اليوم الحادي عشر الاربعاء 20 يوليو :
بعد تناول وجبة الافطار في فندق مايا وعمل تشيك اوت سريع خرجنا الساعة 11 لان رحلتنا على الماليزية الساعة 2 ونص ظهرا طلبت تاكسي قراب الى مطار كوالالمبور الدولي وكان سيارة فان متوسطة الحجم وكان السعر 65 رينجت
كان الجو مشمس نوعا ما في الصباح وقبل الوصول للمطار اشوف سحابة سوداء بالمنطقة المحيطة بالمطار وبالفعل بدأ المطر ينهمر بغزارة شديدة لم اشاهد مثلها في كوالا والحمدلله كنا قريبين من المطار .
في ذلك اليوم كانت موجة امطار غزيرة تجتاح ماليزيا كلها حتى ان مطار بينانج تأثر ودخلت المياه داخل الصالة واعتقد اخوي الغالي ابو عمر ارسل بعض الصور لمطار بينانج في احد المواضيع
دخلنا المطار وخلصت اجراءاتي عبر الجهاز الذاتي ثم انصدمت بوجود طابور طويل جدا لكاونتر الماليزية طويل جدا بمعنى الكلمة ... الموظفة الطيبة شافت معاي اطفال وعرباتهم ... تعال يابو الشباب في مسار خاص للعوائل اللي معها اطفال وعربات وفي اقل من 10 دقائق وانا منتهي من شحن الشنط ... توجهنا لصالة الانتظار وجلسنا نتفرج على الامطار الغزيرة
كنت قد اخبرتكم بأمور ومفاجآت شاهدتها في مطار كوالا الدولي
كمية الامطار الغزيرة واللي تسببت في تأجيل رحلتنا الى الساعة 4 ونص عصرا
صادفت عائلة فقدت طفلها وباقي على الرحلة عدة دقائق وبالاصح النداء الاخير وولدهم مختفي وامه في حالة انهيار عصبي وحاولت زوجتي تخفف عليها وهذه العائلة المشكلة انهم من غير رجل يعني معهم ولد عمره 14 سنة والبقية الام وبناتها الكبار ...حاولت اساعدهم بمخاطبة رجال الامن ومكتب استقبال معلومات المطار واعطائهم رقم السفارة واخذنا رقمهم لانهم بصراحة من الربكة مش عارفين يسووا شي خاصة انهم نساء... المهم في النهاية ماطلعوا الرحلة وبعد وصولنا لنكاوي تواصلنا معاهم ولقوا الولد نايم في احد كراسي المساج وطلعوا على رحلة ثانية ودفعوا مبلغ ثاني للرحلة
الشي الثالث اللي حصل احتجاز زوجين لوجود تزوير في الجوازات وبصراحة موقفهم جدا بايخ بعد ما دخلوهم غرفة خاصة قدام الناس وتحقيق وسين وجيم وطلعوا ومعاهم افراد من الجوازات والشرطة وعملوا شوية ربكة لتجمع بعض المسافرين
انطلقت رحلتنا 4 ونص ووصلنا بحمدالله الى الساحرة لنكاوي في رحلة استمرت 50 دقيقة وتم استقبالنا بزخات من المطر وكان المطر على نهايته ذلك اليوم ... تركت الشنط في السير وتوجهت لاخذ البروشورات وحجز سيارة بروتون اوتوماتيك لمدة 11 ليلة ب 700 رينجت مع تأمين مسترد 100 رينجت وطبعا الرخصة السعودية مقبولة لديهم وخلاني اصور السيارة من جميع الجهات وتصوير الخدوش اللي فيها
بسم الله توكلنا على الله الى اقرب بنزين ومن ثم الانتقال الى منتجع فرنجباني وفي طريقنا شفنا مناظر جميلة وشفنا طلاب التحفيظ والمدارس محتفلين بعيد الفطر في مدارسهم في منظر مبهج وجميل جدا
وصلنا الفندق قبل المغرب بساعة وعملنا تشيك ان سريع من غير تأمين ودفعنا 3 رنجت عن كل ليلة وهذي ضريبة جديدة صارت تطبق في لنكاوي اسوة ببينانج وطبعا كل مازادت الليالي زادات الضريبة يعني لو اقامت 4 ليال راح تدفع 5 رينجت عن الليلة ... واعطونا عدد 2 كوبون لمشروب ترحيبي عند المسبح ثم دخلت الغرفة وكانت قريبة جدا من المسبح وتقريبا جهة المساج
رتبنا شنطنا ثم جلسنا على الشاطي نشوف الالعاب البحرية وبعد العشاء جولة على شارع سينانغ بالسيارة وركنها في المواقف ونزلنا نمشي واشتريت شورت سباحة وتعشينا في صب وي ثم العودة للنوم في الفندق
يتبع