اليوم السادس الاربعاء 13 يوليو : بعد الوعكة الصحية ليلة امس صحيت من النوم وحالي افضل ولله الحمد وقلت خليني امشيها في الاكل خضار وفواكه وتمر واكل مسلوق ... نزلنا بوفيه الافطار واكتفيت بس بصحن سلطة وافواكه ومن ثم كان موعدنا مع السواق كالاي والذهاب الى ايبوه لفندق بيست ويسترن هافان وكان موعدنا الساعة 11 ونص ظهرا والمشوار اخذ ساعتين وربع مع توقف بسيط في احدى المحطات (عشر دقائق) والسعر كان 200 رينجت ... طبعا تجنبت الباص لان المواعيد غير مناسبة لنا ... وكنت مخطط في طريقنا نعدي مزارع الشاي boh ونجلس فيها ساعة بس مع المرض كنسلتها غير كده زرناها في 2011 وايضا الجو كان مشمش كلها امور خلتني اكنسلها وانطلقنا الى ايبوه ... طبعا هذا الطريق يختلف عن اللي جينا فيه من كوالا وكان اخف في التعب من الاول .. وصلنا الفندق واستقبلونا بعصير منعش ومناشف باردة وبعدها شيك ان سريع ودفعت تأمين كاش 300 رينجت وكانت الشقة في المبنى A الدور 22 رقم 9 ... صالة معيشة ومفتوح المطبخ عليها وغرفة نوم واحدة و اعطونا سرير للاطفال رتبنا اغراضنا وارتحنا شويتين وكانت الساعة تقريبا 2 ونص ظهرا وبعدها قلنا خلينا ننزل نشوف الفندق ومرافقه وطبعا حمودي سوى لنا اكشن بأن ضغط زر القفل اللي في الباب الفاصل بين غرفة النوم والصالة وقفل الباب وجاء جلس معانا في الصالة ... واخوكم مستعد للنزول ورايح اخذ جوالي من غرفة النوم والغرفة مقفولة ... ليش يا حمودي كده ... دوبنا وصلنا الله يهديك ويصلحك ... واكلم الاستقبال وكانوا للامانة سريعين ... كان في شاب هندي تلقاه في اللوبي عند الباب تعامله ممتاز وجاني بسرعة وشاف المشكلة وكلمهم يجيبوا مفاتيح الشقة رقم 9 وبالفعل جايبين شنطة فيها مفاتيح الابواب كلها للشقة ورغم كده حاولوا وما انفتح الباب ... تقريبا ربع ساعة ومفيش فايدة ... كلموا الصيانة وجووا اثنين من الصيانة وحاولوا يمين يسار الى ان فتحوا الباب بعد محاولات مدة نص ساعة ... ومن هنا احذر العوائل اللي عندهم اطفال بأن ينتبهوا لنقطة الاقفال هذي لان ممكن يقفل على طفل رضيع نايم في السرير وغيره نزلنا تحت والتقطنا بعض الصور وكان في استعداد لحفلة او زواج بسيط ... بعدها قررنا نتغدى في مطعم الفندق وبالمناسبة عندهم اكل عربي والاكل جيد نوعا ما بعدها اخذنا جولة في الممشى الخاص بالفندق وبدأت الامطار تهطل على خفيف الى ان اشتدت بعد المغرب
هذا اليوم كان مقرر لزيارة موفي انيميش ستوديو المقرر افتتاحها 1 يوليو لكن تأجل الى نهاية السنة الميلادية اضافة الى تعبي قررنا عدم السباحة او الخروج لأي مكان استعدادا للالعاب المائية في العالم المفقود في اليوم اللي بعده
صحينا الصباح على اجمل اطلالة على البحيرة والجبل والطبيعة الخضراء ولسه الشمس ما اشرقت .. نزلنا الفطور وكان فطورهم كويس نوعا موجود البيض بأنواعه والكروسونات والكيك ومطبق والكورن فليكس وفواكه وخضار والباقي معظمه اكل صيني وكان مكان الافطار عليه حركة او بالاصح بدا يزدحم ...
خلصنا فطور وهووووبا على غرفة الالعاب للاطفال وجلسنا فيها نصف ساعة وبعدها على المسبح وسباحة انا وحمودي وتمارا الى ان بدأ ضوء الشمس يجي على المسبح وخرجنا للذهاب للعالم المفقود
العاب العالم المفقود تفتح 11 صباحا ... وشايف الجو مشمش والغيوم لسه بعيده وقلت في نفسي ما راح اروح لو الجو مشمس واخليها بكرة ... وبعد نص ساعة صار الجو غيييييييم وكانت الساعة 12 وهووووبا تاكسي من الفندق سواق هندي اسمه واسو معاه سيارة مرسيد موديلها في التسعينات من الفندق 12 رينجت للعالم المفقود في اقل من 5 دقائق وأخذت رقمه عشان يرجعني الفندق (يوجد باص صغير تابع للفندق يوصلك للمدينة او العالم المفقود برسوم بس ما كان موجود الساعة 12 )
وصلنا شباك التذاكر واشتريت التذاكر ( من موقعهم على النت ارخص) ( ممنوع دخول الماكولات والمشروبات ) دخلنا وكلنا متشوقين للعالم المفقود فهذي الزيارة السادسة لنا لهذا المكان ... الجو كان رائع ... يوجد بعض الملاهي الكهربائية ازيلت او صيانة ... افتتاح بعض الالعاب المائية الجديدة ... افتتاح احواض جديدة للعين الساخنة من الخلف ... قسم جديد على وشك الانتهاء للحيوانات ... تفاجأت بوساخة قسم الالعاب المائية الخاص بالاطفال في ذلك الوقت ( تم مراسلتهم على الايميل واخبروني بمعالجة الامر والسبب زحمة الصيف وعيد الفطر لدى الماليزيين ) والحمدلله اخونا عبدالله حبيبنا وصاحب التقرير الرائع في المنتدى الله يسعده بشرني ان الوضع تمام والنظافة كويسة ...صار عندهم بعض الفعاليات المسائية وتمتد من بعد المغرب الى 11 تقريبا عبارة عن عروض ورقصات واغاني وغيره وتقدر تجلس وتتفرج اما لو خرجت وتبغى ترجع فراح تضطر انك تدفع رسوم تذاكر العين الساخنة ... المسبح الكبير شغال في المسا اللي حاب يسبح فيه
لعبنا وانبسطنا من الساعة 12 الى 8 مساء مع مشاهدة اجزاء من العروض المسائية وتجربة احواض العين الساخنة ... تناولنا وجبة خفيفة من البطاطس والعصير وفجأة على الساعة 5 بدأ المطر ينزل بقوة ثم استمر خفيف الى الليل ... طبعا حللنا الالعاب المائية تقريبا كل لعبة نلعبها 3 او 4 مرات لان الالعاب غير مزدحمة ..
على 8 خرجنا وعلى ماكدونالدز كعابي تقريبا اقل من 10 دقائق وزخات المطر تبللنا ... تعشينا هناك ودقيت على السواق واسو ورجعنا الفندق بنفس السعر ( حاولت اجرب اوبر وجراب تاكسي بس مافي سيارات موجودة قريب في ذاك الوقت)
بعد الفطور سباحة ولعب الى الظهر وبعدها رحنا هايبر جيان القريب من العالم المفقود مع باص الفندق 10 رينجت وتغدينا هناك وكان الخيار بين ماري براون وبيتزا هت وفي الاخير استقرينا على البيتزا ولايفوتكم اصابع الجمبري عندهم لذيذة جدا ... بعدها قضينا من جيان عصيرات وشيبسات وشكولاتات وكيك وغيره لان ورانا السكن في جزيرة بانكور لاوت المعزولة .. بعدها تسوقنا على خفيف من المحلات اللي هناك وفي العاب اطفال لعبناهم شويتين
يوجد بجانب جيان على مسافة 500 متر مقهى ستار بكس وخلفه يوجد صن وي سيتي اكستريم بارك sunway city extream park عبارة عن العاب جماعية وفردية مثل سباق الفورمولا ون ودبابات وحرب طلقات البوية وكرة قدم وغيره ... لعبنا وانبسطنا ...
وكانت الوجهة بعدها الى بحيرة تأخذ فيها جولة بالقارب بس الجو كان مشمس وبطلت منها لان القادم للرحلات البحرية اجمل في بانكور ولنكاوي رجعنا عند جيان مشي ثم اخذت سيارة اوبر الى الفندق ب 4.5 رينجت ( طبعا هنا يوجد مشكلة لدخول سيارات مجهولة الى الفندق فالفندق له بوابة خارجية فلو كنت في الداخل وتبغى سيارة اوبر تدخل ما راح يدخلوه الا اذا بلغت البوابة في الخارج او تطلع له بره عند البوابة ... البوابة تعتبر بعيدة عن اللوبي مشي )
طبعا غدا مغادرة الى ميناء لوموت لركوب القارب السريع الى جزيرة بانكور لاوت ... لايوجد الا رحلة واحدة 5 مساء وهذا الوقت ما يناسبني فكلمت التاكسي الهندي (واسو الكداد ) لانه اعطاني كرته ولقيت انه يوصل الى كوالا وبينانج وحتى جوهور باهرو ... بكم يا واسو قال 250 .... واخر كلام .... 200 ... توكلنا على الله خلاص موعدنا غدا 10 ونص صباحا
كانت الساعة 4 عصرا نزلنا للسباحة وبدأ المطر ينزل واحنا في المسبح الى المغرب وبعدها شفت الاضواء خافتة والمسبح ما فيه احد نزلنا ام محمد تسبح معانا وجلسنا في المسبح الى 9 مساء وبعدها
جهزنا اغراضنا والشنط ونمنا استعدادا لمغادرة ايبوه الى بانكورلاوت
تقييمي لفندق بيست ويسترن هافان ايبوه من 10
الراحة 9
الفخامة 7
الاثاث 8
الموقع 7 (قريب من الالعاب المائية العالم المفقود بالسيارة اقل من 5 دقائق .... يوجد عند البوابة الخارجية للفندق مغسلة ملابس ومطاعم ومحلات اغلبها صينية ومحلات ابو 2 رينجت 5 رينجت وغيره
النظافة 8
المرافق 9
جودة الطعام 7
السعر مقابل الخدمة 8
طاقم العمل 10 : طاقم مبتسم ومتعاون ومحترمين .. سرعة الاستجابة
سرعة الواي فاي: مجاني في الغرفة وفي كل الفندق 7
دورة المياه الله يكرمكم يوجد بها شطاف
مساحة الشقة كبيرة
المصعد سريع
صحينا الصباح واحنا متشوقين لرؤية مكان جديد لأول مرة نزوره كلنا وهو جزيرة بانكور والسكن في الجزيرة الخاصة منتجع بانكور لاوت (طبعا يوجد جزيرة بانكور الام وقريب منها جزيرة منتجع بانكور لاوت وهي خاصة ومملوكة لأحد الاثرياء ... اختنا الفاضلة شموخ عتيبة في تقريرها عن المنتجع غطته بالتفصيل افضل تغطية ومن تقريرها تشجعت لزيارته )
فطرنا عالسريع وودعنا منتجع ذا هافن الجميل وركبنا التاكسي مع السواق واسو واتجهنا الى ميناء لوموت اللي يبعد عن ايبوه بالسيارة تقريبا ساعة واربعين دقيقة وقيمة المشوار 200 رينجت
استقبال الفندق الخاص بالترحيب والتشيك ان فقط موجود في المرفأ ولهم صالة خاصة مكيفة .... انطلقنا الساعة 10 ونص وكان الطريق خط سريع مرورا بالمناظر الجميلة واوقات نعدي على ضواحي صغيرة ونشوف المحلات والمحطات على الشارع واقترح علي السواق زيارة قلعة كيلي وهي من ايام الاستعمار الاسكتلندي في ايبوه لانه على الطريق فنزلت التقط عالسريع التقط صور من الخارج وما دخلت وكملنا الطريق وكان الجو مشمس ونشوف السحب ببكثافة بعيدة عنا ... وصلنا تقريبا 12 وعشر الظهر وقدموا لنا المشروب الترحيبي اللي يعتبر ألذ مشروب ترحيبي اتذوقه في حياتي... اخذوا مني تأمين 1500 رينجت وقيمة القارب السريع 180 رينجت للشخص البالغ ذهاب وعودة و 60 على حمودي وكانت الموظفة هندية وكلمتها على الاطلالة والهوني مون والقرب من المسبح ... قالت طلبك جاهز لاتخاف وقالت لي موعدكم الساعة 1 على القارب السريع وتقدروا ترتاحوا في الجلسات .. اخذوا الشنط واحنا رحنا اخذنا جولة على المرفأ وكان الجو مشمش وفي لحظات سبحان الله كل شي تغير سحب كثيفة وهواء قوي جدا ثم شوية مطر وبدأ المطر يزيد وصارت الساعة واحدة وقالوا هيا وهم يتشاوروا فيما بينهم ننطلق ولا نتأخر الى ان تهدا الامطار الغزيرة لكنهم قرروا الانطلاق ... واعطونا سترات النجاة وسألت السائق عن الوضع قال لاتخاف المسافة قريبة 10 دقائق ونوصل وما راح نعدي على امواج عالية والقاارب تقريبا العدد كان 12 راكب كلهم اروبيين واحنا العرب الوحيدين
انطلقنا والامطار قوية والجو روووعة وكان مكاني عند مدخل القارب ومع الامواج الموية تدخل عندي موية البحر من قدمي الى ركبتي وتبللني انا وتمارا اللي كانت جنبي ووصلنا بحمدلله الى الجسر المؤدي للفندق والمطر جدا قوية ... استقبلونا الموظفين ويعطونا مظلات واحنا نمشي عبر الجسر ورغم المظلات تبللنا من قوة المطر وعند نهاية الجسر تجد موظفة تستقبلنا بالمناشف والابتسامة الجميلة ... يوجد استقبال ثاني وفيه يجي لكل عائلة موظف يشرح لهم المنتجع ويأخذهم بجولة للمنتجع ... احنا جاتنا موظفة صينية مبتسمة على طول وتعاملها معانا كان جدا لطيف اعطتنا خريطة المنتجع و شرحت لنا على الخريطة المرافق والمطاعم واوقاتها وغيره واعتذرت عن الجولة بسبب الامطار وقالت اذا وقفت الامطار وحابين جولة تعالوا عندي .. قلنا خلاص ما يحتاج ... واعطتنا مودم صغير للواي فاي وفيه شريحة بيانات مفتوحة طول فترة الاقامة
قالت الموظفة خذوا المظلات وتعالوا ورايا واحنا ماشين والمطر ماشاء الله قوي الى ان وصلنا فلتنا وكان رقمها 331 فيلا فوق التل مطلة عالبحر وهي عبارة عن غرفة نومة صغيرة ويوجد باب خشبي سحاب لمكان ارضيته رخام وفيه الدواليب والمغاسل والثلاجة والخزنة ودورة المياه الله يكرمكم والبانيو والمروش .. وفيه بلكونة كبيرة والجلسة فيها متعة
الصينية غادرت بعد ما اعطتنا مفتاح الفيلا لانهم على العهد القديم وما طورا الشي هذا عندهم و رتبنا اغراضنا وارتحنا شويتين ونزلنا نشوف المسبح والمرافق للفندق وبعدها حسينا بالجوع .. طبعا انت هنا ملزم تأكل من مطاعمهم وانا اخذ الشي هذا في الحسبان فمعانا اندومي وكيك ومعجنات وغيره للطواريء ورغم هذا كنا نأكل من مطاعمهم اللذيذة رغم غلاء اسعارها ... طيب كان الوقت تقريبا 3 مساء والمطاعم اللي فاتحة 2 من 7 مطاعم في هذا الوقت لان كل مطعم له وقت معين وبعضها بالحجز وبعضها مخصص فقط للغداء وبعضها للعشاء ... وكل مطعم له قوائم مختلفة فمطعم مخصص للاكل الصيني واخر للماليزي وشي للهندي ... طبعا المطعم اللي عليه زحمة دائما هو مطعم بوفيه الافطار لانه يوفر الاكل الماليزي والغربي .. المهم قررنا اننا نطلب في الفيلا وايضا الفيلا يوجد فيها تقريبا 3 طلبات فقط ... طبق المكرونة ... طبق الررز المقلي مع الساتيه ... الثالث الكلوب وما في أي وجبة اخرى غير هذي الثلاث في الغرف وممكن تتغير بين فترة واخرى ..
طلبنا طبق مكرونة وبصراحة كان لذيذ جدا بس السعر نار يا حبيبي نار 100 رينجت للطبق الواحد ... خلصنا اكل وتجهزنا للذهاب لشاطي الزمرد
يوجد شاطي عند مدخل الفندق وعند الفلل على البحر بس اتوقع انه مش للسباحة لانه ما في احد يسبح فيه او يتشمس عنده وهو امام المسبح فأغلب اللي يتشمس على المسبح
اما شاطيء السباحة فهو شاطي الزمرد وتروح له بالسيارة طبعا يوجد سيارات خاصة تنقلك هناك ويوجد اماكن خاصة للانتظار ففي كل منطقة من المنتجع يوجد مكان انتظار سواء للذهاب للشاطي او الى أي مكان لمرافق المنتجع ... الصراحة استخدمتها فقط للشاطي لانه تقريبا لازم سيارة اما المرافق الثانية كنا نروح مشي فالأجواء جميلة
ركبنا سيارة الجيب وانطلقنا للشاطي بعد العصر... الشاطي كان جميل ونظيف جدا وهو أشبه بشاطيء داتاي الى حد كبير ... الشاطيء ممتد فتقدر تاخذ زاوية بعيدة عن اعين الناس وتاخذ راحتك مع الاهل غير كذا كان السياح على الشاطي قليل سبحنا ومشينا على امتداد الشاطي وحمودي يلعب بالتراب وتمار تسرح وتمرح وتتقلب عالتراب الناعم اللين صار شكلها زي الاشعث الاغبر هههههههه وجلسنا نشوف الغروب اللي كان من اروع ما يكون ... يوجد مطعم عند الشاطي وبار يقدم مشروبات وعصيرات وملعب طائرة وايضا مكان الاستحمام وايضا نقطة الانطلاق لتحدي مغامرة المشي في الغابة ويجب الحجز لها مسبقا ... خلصنا على 7 مساء ورجعنا الفيلا بعد الانتظار في المكان المخصص وكنا اخر عائلة ترجع
وبعد كدا اكملنا ليلتنا في البلكونة على ضوء القمر وصوت امواج البحر انا وام محمد نشرب القهوة مع الشوكولاتة في ظل غياب المشاكسين حمودي وتمارا اللي غلبهم النوم بعد يوم حافل
على فكرة منتجع بانكور لاوت ومنتجع كاميرون هايلاند هما ضمن شركة واحدة
اليوم التاسع الاحد 17 يوليو : صحينا الصباح على صوت العصافير في البلكونة ومنظر البحر من السرير اللي يبهج النفس ... نزلنا بوفيه الافطار وكان جدا ممتاز وجودة الاكل ممتازة ومنوع بكل ما تعنيه الكلمة والعاملون فيه جدا محترمين و ودودين ... خلصنا افطار وهووووبا على المسبح وسباحة وكان الجو شوية شمس شوية غيم الى فترة الظهر صار الجو شمس ورجعنا فلتنا نرتاح فيها الى العصر وقبل ما نرجع حجزت رحلة الغروب من الاستقبال للشخص الواحد البالغ 220 رينجت والاطفال مجاني جلسنا في الغرفة الاولاد يلعبوا واحنا شوية عالنت وشوية في البلكونة الى ان حسينا بالجوع وطلبنا الغدا في الغرفة لاني حاجز طاولة عشاء في المساء في المطعم اللي بجانب الاستقبال وكان غدانا طبق مكرونة وطبق الارز المقلي مع الساتيه وكان جدا لذيذ وبعد العصر نزلنا نتجول في المنتجع وقلت لزوجتي تبغوا نروح الشاطي قالت لا خلينا عند المسبح لان ورانا رحلة الغروب والشاطي تراب وحوووسة جاء وقت الرحلة الجميلة واللي انصح بها وتقريبا مدتها ساعة وانطلقنا تقريبا 6 ونص والقارب عبارة عن جلسات مكان قائد القارب وجلسات في الاعلى وجلسات في مقدمة القارب ... احنا اخذنا مقدمة القارب وكان معنا عائلة اوربية مع اطفالهم فوق ... انطلقنا بأخذ لفة حولة الجزيرة لمشاهدة الغروب واي غروب احكي عنه في تلك الاجواء الجميلة جدا ... العاملين في القارب لطيفين ويشرحون لك معلومات عن الجزيرة ويساعدوك في التقاط الصور اضافة الى الضيافة اللي يقدمونها لك من مشروبات غازية و ايس تي وماء وبعض المعجنات والسندويتشات الصغيرة اللي تقريبا كل عشر دقائق يجيك طبق جديد فيه تشكيلة جديدة بدأت الرحلة واحنا في مقدمة القارب والامواج تتلاطم والهواء اللطيف يضرب بوجهك والغيووم الكثيفة تقترب منا لتنزل بعض زخات المطر وعندها طلب منا ان اردنا الدخول للجلسات المغطاة ... خلينا هنا الله يرضى عليك احنا مبسوطين مع هذا المطر وبعدها بدأ ينجلي لنا قوس قزح مع غروب الشمس في منظر رائع سبحان الله في هذه الرحلة الغيوم والهواء اللطيف والمطر وقوس قزح وغروب الشمس رجعنا من الرحلة وهووووبا على المطعم لتناول العشاء وطلبنا كان ماليزي بحري وطبق مكرونة ... تناولنا العشاء وبدأت الامطار تزداد . اخذنا المظلات وطلعنا فلتنا وبالفعل صار المطر جدا قوي ... اكملنا ليلتنا بعد نوم الاطفال بكوب من القهوة نشاهد المطر اللي لم يتوقف الا في الفجر وبعدها كلهم ناموا وانا كنت اتابع فيلم جيم كيري على التلفزيون الى ان غلبني النعاس ونمت
