مع كامل الاحترام لجميع الاعضاء خليني احكي...

  • بادئ الموضوع بادئ الموضوع Saif A. Ahmed
  • تاريخ البدء تاريخ البدء
عرض العطلة
S

Saif A. Ahmed

:: مسافر ::
#1
مع كامل الاحترام لجميع الاعضاء خليني احكي لحضراتكم عن تجربة عكسية شويه
كل اللي بيحكي هنا بيحكي عن المآسي اللي بتحصله من شركات السياحه والفنادق ..
ق باعتباري شغال ف شركه سياحه خلوني احكي وجهة النظر الاخري
بداية من الحجز واللي بيكون علينا كمية ضغط رهيبه واللي بيتصل بيسأل اسئله كنت اتمني انها تكون مهمه لكن ع العكس والنقيض تماما اسئله انا اسف انها لا ترتقي لفكر ينم عن أي ثقافه سياحيه زي سؤال من نوع مثلا .. هل ف كاتيل ف الاوضه ؟ .. الشامبو المستخدم في الفندق نوعه ايه ؟ ...
نعدي بقا المرحله دي وندخل مرحلة الحجز ف المكتب
الناس بتيجي المكتب عايزه تقعد ساعتين وتلاته نقعد نتكلم معاهم ونسيب شغلنا وضغط مكالماتنا ولو معملتش كدا يبقا انتا شركه زباله
نروح بقا للباصات ونشوف بقا العرض المسرحي الشيق ونشوف العائلات وهما بيتخانقوا ع الكراسي الامامية رغم أن كل واحد متبلغ بالكراسي بتاعته ..
نروح هناك تشوف العبر .. واحنا ك شركه بيكون مننا مشرفين يحلوا لاي عميل اي مشكله ف تلاقي عميل بيكلم المشرفين الساعه ٧ صباحا يسألهم هوا الشاي مكانه فين ف البوفيه ... يروح الشاطئ يقولك انا مش عاجبني الشاطئ .. تخيلوا لما عميل عايز يسترد فلوسه عشان مش لاقي شيزلونج ع البسين !!
واحده عملت الفيد باك ٤.٥ من ٥
بس واحنا ع مدخل القاهره الاوتوبيس عطل بينا ف ظرف ساعه كان البديل موجود ورجعنا الناس تخيلوا انها تخش تشتمنا باهلنا !!
لا والمصيبه أن الناس بيشجعوها ع كدا اساسا ويقولولها لازم تاخدي حقك رغم انهم ميعرفوش اي حاجه
صدقوني المفروض لو بنتكلم في الحقوق لازم يكون فيه حد مختص عن الموضوع والنزاعات دي
بصوا انا رايي أن المصري لازم يتعامل افضل من الاجنبي بمراحل لكن لما تكون عنده الثقافه اللي تخليه يعرف حقوقه الفعليه وواجباته اللي عليه
يعرف يفرق بين شركة السياحه والفنادق مش معني أنه اختار فندق وراح معجبوش انه يشتمنا باقذر الشتايم..
كمية المآسي اللي بنشوفها متكفيش اني اكتبها ف بوست لكن فعليا الموضوع بدأ يبقا غريب والناس شايفه انها ع حق !! وكل ما تكلم حد يقولك بفلوسي ويحسسك انك عبد عنده لمجرد أنه دفع مبلغ اساسا صغير جدا عشان سوق السياحه واقف ف بنقلل الاسعار قدر الامكان !
شكرا واسف على الإطالة
 
#2
اي شغل في العالم بيكون قايم علي اساس الوظيفه الخدميه لازم يحصل فيها كل ال بتقوله دة ولازم تقعد مع العميل ساعتين وتلاته و 10 كمان طالما هيديلك المقابل اللي بتطلبه
انت بتعرض خدمه مقابل أجر
طالما بيدفعلك الاجر اللي انت طلبته من حقه ياخد قدامها الخدمه بالطريقه اللي تريحه
كون ان حضرتك شايف ان الاجر اللي بتاخدة بسيط او علي حد قولك في البوست " تافه " مقابل التعب بتاع حضرتك
أو ان المفروض الناس متحصلش علي حقوقها كلها 100% فممكن ببساطه تسيب الشغلانه وتشتغل اي حاجه تانيه
 
#4
عارف المشكله في ايه ؟ ان حاليا أغلب شركات السياحه علشان تبيع بتعمل للعميل البحر طحينه و تحسسه أنه حينزل في أحسن حاجه في الدنيا و مش بتوضحله المميزات و العيوب تحديدا في كل مكان مع العلم أن أكيد أي مكان رخيص ليه عيوب و كتير كمان , فالعميل لما بيسافر بيكون راسم توقعات كبيره للأسف انتوا اللي صورتوها ليه فالنتيجه أنه بيتصدم من الواقع و التقصير الموجود فيبدأ يشتكيكم مع العلم ان مش انتوا أصحاب الفندق و لا انتوا مسؤولين عن الخدمه في الفنادق دي , لكن ده متمش توضيحه للعميل أثناء الحجز علشان يكون على بينه
 
#5
الأسئلة ده أمر طبيعي جدا..
لكن معلش اللي ضايقني فعلا، ازاي حضرتك مستغرب من العميلة اللي راحت و ملقتش شيزلونج علي البسين!! طبيعي جدا اعمل كده .. امال اقعد فين .. انا واحد مثلا اهلي البنات مبينزلوش المياه لكن بيحبوا يقعدوا علي الجمب .. أقولهم اقعدوا في الاوضة لحد ما نرجع!!
المفروض حضرتك بتكون مراجع مع الفندق و متاكد انه مجهز كل حاجة.
بخصوص الاوتوبيس.. المفروض حضرتك تكون متاكد من شركة الأتوبيس و سمعتها قبل ما تطلع بيها.. انا ليا كذا حد اعرفه يحصل معاه الحوار عشان الشركة استرخصت .. و الامر مش صدفة.. يعني ينفع اطلع بعربيتي و أتفاجئ كذا مرة ان العربية بتبوظ مني.
اخر جملة ده اللي كارثة .. انه فعلا الإحساس اللي بيوصلنا من مكاتب السياحة و الموظفين هناك انهم بيتفضلوا.. انا لما كنت في شرم اتعاملت بغرابة اكتر من رومانيا!!
و لما دخلت محل و اتكلمت انحليزي بaccent لقيت الراجل اتغير ١٨٠ درجة في التعامل!!
الموضوع راجع في الاخر ان معظمكم مش شايفين العميل المصري يستاهل خدمة محترمة .. ماهو متعود عَلِي القرف في البلد، جت علي السياحة!
 
عرض العطلة
#7
الله يكون فى عونكوا.وربنا يعينكوا بجد.
هو المشكله ان كل واحد من الزائرين بيكون شايف مشكلته بس .لكن انتوا كامشرفين شايفين مشاكل كل الزوار.بس فى الاخر.كل شغل وله عيوبه ومميزاته صدقنى.وربنا يقظر كل واحد على شغله
 
#8
مع الاحترام للى حضرتك بتقوله الزبون اللى رايح شركة سياحة معندوش خلفية وجاى لك تشرح له وتحجز له فندق و تذاكر ورحلات وعاوز يعرف كل تفصيلة مش داخل يدفع ولا فى دماغه الضغط اللى عليك ودورك ترشح له احسن خدمه علشان ميروحش مكان اى كلام ويشتكى من خدمه الفندق هو اللى بيقدمها وطبيعى انه يشتكى ويحكى للصبح وميدفعش فى الاخر برضو وده دورك انك تبرمجه وتديه كل احتياجاته ويمشى مبسوط بعد ما تثقفه انت علشان ميدايقكش لم يحجز معاك المره الجايه ويبقى زبون حلو كده مثقف ومبطرخ ومبيشتكيش
 
#9
من حق العميل يسأل زى ما يحب ويعترض ويقول رأيه بكل حريه ، حضرتك فى شركة سياحه وهو رايح علشان يستجم مَش علشان يقول ايه وميعملش ايه
 
#10
ايه رأيك بقى انه في أوقات كثيرة جدا "وجود كاتيل في الاوضة" كان السبب في إني اختار فندق و أرفض الثاني و أنا بالحجز و محتار بين فندقين مثلا..... مفيش حاجة اسمها الزبون بيسأل أسئلة مش مهمة... كل واحد و عنده دماغه و له فكره و من حقه يسأل زي ما هو عايز
My money, my way
لكن 99% من الناس اللي شغالة في خدمة العملاء في مصر في أي قطاع...و خاصة السياحة... مش حاقول غير انهم محتاجين يتعلموا يعني ايه خدمة عملاء من أول و جديد.... و دا مش علشان عيون العملاء... بالعكس... علشان الخسائر الرهيبة اللي بتتعرض لها شركات كثيرة بسبب فشل خدمة العملاء فيها و بالتالي غضب الزبائن و بالتالي خسائر مادية
 
عرض العطلة
#12
انتم عاملين زي لما واحد يسئل ع عروسه أو عريس ويبقى عارف عيوبها أو عيوبه ويقولوا البس وانا مالي
في احديث عن الرسول صلى الله عليه وسلم
عن عقبة بن عامر رضي الله عنه قال: سمعت رسول الله صلى الله عليه وسلم يقول: المسلم أخو المسلم، ولا يحل لمسلم باع من أخيه بيعًا فيه عيب إلا بيَّنه له ، أخرجه الإمام أحمد في مسنده، وابن ماجه في سننه ج2 ص755، وهذا لفظ ابن ماجه، وأخرجه البخاري في صحيحه ج3 ص10 موقوفًا على عقبة بن عامر بلفظ: لا يحل لامرئ يبيع سلعة يعلم أن بها داءً إلا أخبره ، ويدل لذلك أيضًا ما أخرجه البخاري في صحيحه عن حكيم بن حزام رضي الله عنه قال: قال رسول الله صلى الله عليه وسلم: البيعان بالخيار ما لم يتفرقا -أو قال- حتى يتفرقا، فإن صدقا وبينا بورك لهما في بيعهما، وإن كتما وكذبا محقت بركة بيعهما .
(الجزء رقم : 13، الصفحة رقم: 212)
وبالله التوفيق وصلى الله على نبينا محمد وآله وصحبه وسلم.
 
#13
معاك فى كذا نقطه وفيه نقاط كتير مش معاك فيها زى إن المبلغ تافه
لأنه لو مبلغ تافه بتشتغلوا ليه أساسا إقفلوها أحسن وأوفر
وشكوى العملاء من الفنادق بتكون عن طريقكم لأنكم إنتم الوسيط واللى حاجزين فنادق سواء زباله أو نضيفه ومعنى إن الفندق مش نضيف يإما حضراتكم إنضحك عليكم يإما الفندق بالإتفاق معاكم عمل كده وكلتا الحالتين إنتم اللى حجزتم للعميل
طبعا أتفق معاك فى هيافة أو تهويل بعض أو معظم النزلاء لأن الحجز عن طريق شركة سياحه فى مخيلة معظم المصريين حج وعمره مش سياحه حقيقيه
 
#14
و " المبلغ التافه " اللي الزبون بيدفعه دا هو اللي فاتح بيتك و بيت زمايلك في الشركة و في القطاع كله. مش عاجبك حضرتك سيب مكانك لواحد ثاني يعجبه
 
عرض العطلة
#16
بص واضح انك متضايق وانا داخل مش عايز اضايقك بس فى كذا حاجة
اولا: لازم تشوف الموضوع على حقيقته انك بتشتغل اصلا علشان العميل ده يرضى عن المكان ويرجع تاني و يجيب ناس تانية
ثانيا: واضح ان فيه سوء ادارة علشان يكون عندك ضغط الشغل ده فعمر العميل ما هيفهم ده ومش مشكلته خالص هو جاى علشان يعرف كل كبيرة وصغيره عن الرحله اللي بيحلم بيها بقاله فترة
ثالثا: انا عارف انك بتشوف مأسي من المصريين والعميل الاجنبي احسن بكتير ودي الحاجة الوحيدة اللى معاك فيها احنا عندنا مشكلة فى ان احنا ازاى نقيم التجربة والتقييم ده على أساس ايه
فلو تاخد برأى اعملوا ورقة تقييم على أسس صح وابعتوها للعميل علشان تاخدوا رأيه قبل ما يدخل يشتم وجهه علشان يعرف انك مهتم، مكانتش سبوبة وخلاص خلصت علشان نحسن الاداء والكلام ده
انا شايف ان المشكلة هنا (واسمحلي) قله خبره مش أكتر
 
#17
طيب انا كعميل محترم مش بشرب الشانبو .. ومش بقعد مكان حد .. ومش باخد من وقت حضرتك 6 ساعات أسألك عن نوع الشيزلونج .. ذنبي ايه في العمايل السودا ورداءة الخدمة .. ثانيا،، حبيبي فين المنافسه؟ انت بتعطي خدمة بس للاسف مفيش أي ثقافة عن الجودة بتاعة الخدمة .. الزبون دافع فلوس واختارك انت علشان يسأل وانت تجاوبه ويشتكي وانت تتفاعل معاه .. طالما مفيش تدريب ولا ثقافة التعامل مع العميل محدود الفهم يبقى اعتزلوا المهنة يرحمكم الله أو متركبهووش من أساسه من أول ما تكتشف محدودية الفهم .. وأتمنى أن يكون موظف الاستقبال أو خدمة العملاء مثقف مرن وذوق ومعلم وسمارت حرصا على المصلحة ..
 
#18
مثال بسيط جدا و لله المثل الأعلي النبي علية الصلاة و السلام في ما معني الحديث كان مر علي أحد البائعين فقال لة اعرض بضاعتك التالفة قبل الناضجة دلوقتي يبقي في رحلة شرم عاملة 300 جنية و واحدة عاملة 5000 انا بمقدرتي و بمزاجي بختار اللي يريحني و ف نفس الوقت فمستواة حضرتك مقدم برنامج هايل ف الرحلة ام 300 و لما أروح ألاقي مكان الإقامة زفت و مفيش ولا أكل ولا حاجة و الكلام اللي بقولة لحضرتك دة حصل بالفعل طب هنا شركة السياحة اة طبعا مقصرة و العميل دائما علي حق طب ما تعرض بضاعتك التالفة الأول قولى العيوب ع الأقل ممكن مطلعش. ....حضرتك ممكن تتفق مع فنادق ارخص و احلي و حتة الاختيار دى ترجعلي . انت مش حتفرض عليا حاجة و بعدين طب منا دافع فلوس فلازم أعرف كل حاجة ...انا لو محجزتش حضرتك مش حتقبض و كلنا في دائرة بنكمل بعض فلازم نبص للفلوس اللي حنخدها حلال ولا لا أمتي تبقي كدةو أمتي تبقي كدة بإتقان العمل بس للاسف ف مصر مفيش أمانة و الموضوع أن شركات السياحة بيشوفو العميل فلوس بس إلا من رحم ربي كمان المفروض يبقي ع الأقل في مميزات في الرحلات الرخيصة عشان تشجع الناس و عروض ان هما يطلعوا بس برضة للاسف احنا معندناس رفق
و ما وضع الرفق في شيء إلا زانة و ما نزع الرفق من شىء إلا شأنا
 
#19
باشا زي مانت بتتكلم عن العملاء، بلاش نتكلم عن اللي شغالين في شركات السياحة عشان الفضايح كتير :D
وأقرب مثال كنت بشوف رحلة لجورجيا، الموظفة الموقرة مش عارفة أساسا إن في بلد اسمها جورجيا، وفيييييين لما قالتلي: قصدك جورجيا الولاية اللي في أمريكا؟
في بلد اسمها جورجيا؟!!!! آه مش هكدب على حضرتك يعني
دي فين دي؟ آسيا إن شاء الله
وده مثال بسيط جدا
 
#20
طيب انا عايز ارد علي حضراتكم جميعا ف بجمع النقط اللي هرد بيها
لكن نقطه الخلاف الاولي واللي حضراتكم علقتوا عليها هيا كلمة مبلغ "تافه " انا فعلا مقصدتش المعني السئ للكلمه وعشان كدا عدلت الكلمه دي تحديدا عشان تظهر وجهة نظري
لكن بجد اشكركم والله جدا علي كم التعليقات اللي حبيت اسمعها والله عشان اشوف الناس بتفكر ازاي فعلا ❤❤
 
عرض العطلة
عرض العطلة
عرض العطلة
أعلى أسفل
عودة
قائمة