امــــريكـــا القـــارة

[لوجىى]

سكــة سفــر فيهــا مشـــاويــر العمـــر
سكــة سفــر مجبــور أجـاوزهــا و أمــر


السـلام عليــكم و رحمــــة اللـــه و بــركــاتــه


بعــد فتــرة انقـطـاع عـن كتــابة التــقاريــر الطــويلـة رديـت لكــم فـي تقـريـر طـويل و ان شـاءالله يكـون مفيـد وممتـع ..

تقـريـري ما يخفـى عليكـم بيكـون عن طبعـا بـلاد العــم ســام


امــــريكـــا القـــارة
فعلا قـارة تختلفت في تضاريسـها وطقسها وبنيانها و ثقـافتهـا

الرحلة كانت اتجاه جدا مختلف عن الاتجاهات السابقة من زياراتي في 2009 و 2012 و خـط سيـر غيـر عن الخطوط المتعودة عليهم .!!!


حطيت استفسار في البوابه عن خط رحلة رود تريب وبالكرفان من سان فرانسيسكو .


ليش تم الاختيار على سان فرانسيسكو لان عندي دوره من قبل دوامي على هالمدينة وطبعا الكل ما قصر معاي في الاقتراحات والاراء واخص بالشكر ل (ابوناصر المسافر - ابوغسان - مقدام )


لكم من كل تحية على ردكم لاستفساراتي وكل من رد علي بأي معلومه شكرا لكم من القلب ..


الحين تمت الترتيبات على فرانسيسكو وما حولها وكان العدد من 3 - 4 اشخاص ..

وبقدرة قادر صار العدد 1 شخص واحد اللي اهي محدثتكم ( كويتـية متنقـــلة )


وين الربع وين المجندات اختفوا من الرحلة ؟؟


تابعــوا مــعــاي بعـــد اشوي التكملــة

​

 

[لوجىى]

وين الربع وينكم يا الاويااود ؟؟

انا الو فلانه عسى ماشر الجدول مو عاجبكم نغير نبدل ؟؟​

فلانه لا والله حلو وعاجبني بس مااقدر دوامي عندي شغل و موراضين يعطوني اجازة !!​

انا انزين حاولي مني مناك ؟؟​

فلانه والله حاولت ما في مجال

انا خيره ان شاءالله في امان الله ..​

انا : اختي حبيبتي اشفيج انتي بعد عسى ما شر ليش منتي رايحه و ويه معصب ؟؟​

اختي ما اقدر اروح دوامي ... خاصمين علي مبلغ وقدرة​

انا : عيوني طلعت شنوووو وليييييش ومو على كيفهم !! انتي من صجج ؟؟​

اختي : تخيلي يقولون ماعندي بصمه من شهر 1 وتوهم يشوفون بالكشف ..​

انا : لا هذيل وينهم طول السنه ؟؟ والحين شنو بتسوين و امريكا ؟​

اختي: ما راح اروح وهاللويه عندي لازم اشوف شنو اخرتهم ..​

انـــا : ســــــرحــــــــــااااااان الى مـــالــــه نهـــاية شتسوين يا كويتية منو يروح معاج معقولة تروحين بروحج ولا اتكنسلين السفره و تأجلينها ؟​

انـــا : لا صبر في شخص 3 يماااا يماااا معاي امــريكـــا هــا

امــي : لا وي درب شيوديني شطوله لندن اوك اروح ..​

انــا : شنو لا من صجج اشفيكم محد بيروح معاي اروح بروحي امريكا ؟​

امــي: اي روحي دورتج و ردي ونروح لندن

انــا: لاااااا توديني و ترديني وتوديني يما حرام عليج درب​

امي : اي عادي انتي تحبين الطيران​

انا : اي صح بس مو جذي عاد .​

امي : كيفج هذا رايي وانتي فكري ..​

ابوي : خلاص يبا روحي دورتج اسبوع و ردي ..​

انـا : لااااااااااااا لاااااااااااا شنو اروح اسبوع و ارد ترا انا مو رايحه كارديف ..​

ابـوي : يعني شنو تبين ؟؟ ( وعاقد النونه )​

انــا : ما ابي شي ابي احد يروح معاي ويكمل خط الرحلة معاي لاني ما راح اطق درب اسبوع وارجع ..​

ابــوي : لا يبا دام محد معاج ما له داعي شهر​

انا : لا يا زمن

ليش يبا بس خلاص ما ابي حتى الدورة ..​

ابـوي : يعني شلون بروحج يبا شهر وهذي امريكا والخ من الاسطوانه ..​

انــا : اقعد زعلانه وخلاص ما افكر في شي .. فجأه طرا على بالي عمي رفيج ابوي من عمر عايش في امريكا وتزوج امريكية وكل بين فترة يزورونا في الكويت .. جان اقول حق ابوي اني بكون على اتصال معاهم وازورهم وانت وصهم علي ..​

ابــوي : يفكر ويفكر واليوم الثاني يفكر ويفكر والثالث يفكر ويفكر​

انــا : على نــــــــار خــلاص يبــا كنسلت السفــره ومـاني رايحــة ..​

ابــوي : خـلاص يبــا توكلي علـى اللـه وانا كلمت عمج ( اللي اهو رفيج ابوي ) وان شاءالله خير ويسهل دربج ..​

انـــا: احلف يبا هيااااااااااااااااا وبوووسه على الراس والايد يستاهل القائد الاعلى

وطبعا خط سير الرحلة كله تغير من a-z والسبب الاول من القروب اللي كان معاي وكنسلوا والثاني دوامي غيروا وجهة دورتي ولازم اغير كل حجوزاتي ..​

و داخل مخي اقوى
brain storm

​

هذي الاحداث كلها صارت قبل السفره تقريبا ب 3 اسابيع ..​

حسيت نفسي في دوامه حزتها من سفره من شغلي الخاص لازم اكمله ومن دوامي لازم اكمل اوراقي وحجوزاتي كل هذا في 3 اسابيع ..​

اوقف معاكم لي اهني على ما اجهز الصور​

​

 

[لوجىى]

بعد ما خذيت الموافقه من القائد الاعلى


لازم الحين ارتب كل شي من يد ويديد


ليش الله يسلمكم ؟ لان خط السير تغير والاتجاه صار شرق
دورتي راح تكون في نيويورك بدل سان فرانسيسكو تخيلوا ..


كانت النية : فرانسيسكو - هاواي - بعدين رود تريب بالكرفان ..


تحولت الى : نيويورك - المفروض شلالات نياغرا - واشنطن دي سي - نيويورك - اورلاندو - ميامي - ديتونا بيتش - اورلاندو ..


طبعا بديت افكر بالحجز وادور الطيران واسعار زينه وسفرتي ما بقى عليها شي ..


و جان اصيد سعر تذكره عجيب عالاماراتيه A 380 وبـــــــزنــــــــــس


شفت السعر انصدمت قلت معقوله !! و ارد اشوف السعر لا في شي ؟؟
واتصل عليهم جان يقولون مسوين عرض بس اليوم
بس اليوم صيديها يا بنت لا تطير عنج ..


التذكره الدوليه خطها كان : كــويت - نيــويــورك - لنـــدن - كــــويــــت


السعر : 800 دينار كويتي


انا ما صدقت كنت محصلتها فوق ال 1000 على اغلب الطيران ..


والله واحجزها عالاماراتية

بعد ما تطمنت على الحجز .. بديت اشوف شلون بيكون خط سيري وبيني وبينكم شوي حسيت بخوف من رحلة امريكا و بروحي يعني صح تعودت على الغربه وجربتها بس كل مره يكون عندي رفيجاتي وزملائي و ما اكون بعيده مثل امريكا ..


قلت يالله هذي تجربة ونتوكل على الله .. وطرت على بالي رفيجتي دكتورة في كندا اتكمل تخصصها واتصل عليها واقولها اشرايج تمرين علي نيويورك جم يوم وترجعين كندا والله جان تقول اوك قلت زين الحمدلله ..


خط الرحله : كويت - نيويورك - سنترال فالي (منطقة الاوت لت ) - شلالات نياغرا ( كنسلتها ) - واشنطن دي سي - نيويورك - اولاندو - ميامي - اورلاندو ..

وانتهي من امريكا الى المعشوقة بريطانيا وبعدها الى الام الحبيبه الكويت ..


بديت بحجز الفنادق

الطيران بتاريخ


30/11/2017 الى 26/12/2017


27 يوم بالتمام والكمال


تم الحجز في


فندق Hampton inn Harriman woodbury
شوف يا ماجد خط الرحلة والفنادق متقاربه


من 30/11/2017 الى 1/12/2017 ليلة وحده والقصد منها اتسوق واشوف الاوت لت .. و اكمل طريجي ..


السعر : 55 دينار كويتي = 185 دولار شامل كل شي ضرايب ورسوم وريوق ..


بعد حجز الفندق ندور على السيارة اللي بأجرها


وتم الاستعانة في موقع بريس لاين اول مره استخدمة بصراحة ممتاز واسعاره حلووه

تم حجز موستنغ كشف بالاول

بعدين تم التغير لا اسباب امنية مو مقتنعه فيهم هههه
وتم الاختيار على جيب SUV MID SIZE من شركة اكونومي ECONOMY


استلمها بتاريخ 30/11/2017 من مطار جون كندي و ارجعها تاريخ 3/12/2017 الى جون كندي


السعر : 40 دينار كويتي - 135 دولار لكل الايام ..


زين الامور ماشية تمام الحين ..


جيكنا على الفيزا الحمدلله موجوده ل 10 سنوات


واللي ما عنده يروح يطلع له و يستفيد من هالتقرير ..


من عضونا المبدع ( مسـافر معـاكـم )

بعد ما خصلت اهم الاشياء بديت عاد بالاستعداد للاقلاع الى القارة الامريكية


اشوفكم باجر ان شاءالله بجزء يديد






​

 

[لوجىى]

عقب ما حجزت اهم الاشياء
قلت اكمل الباجي بالطريج وانا رايحه للقارة


وبصراحة مشيت من غير جدول على كيفي دام اني بروحي ومحد معاي قلت وين ما اروح اروح ..


وصل يوم 30/11/2017
لازم اكون في المطار ليلة الخميس الفير لان طيارتي الفير يعني في المطار اكون يوم الاربعا الساعه تقريبا 12:30 باليل ..


تم التوجه الى مطار الكويت وكلي نشاط وحيويه


وقبل ما اوصل المطار سويت الجيك ان اونلاين عن طابور الزحمه والحمدلله المطار هالحزه فاضي ما في زحمه ولا موسم سفر ..


وانا واقفه بطابور الاونلاين تذكرت اتي نسيت بطارية الكاميرا

هذي اولها ليش يا ابرار ؟؟ قلت خلاص اشوف لا وصلت امريكا ان شاءالله ..

التصوير 90% من تلفوني iPhone 6 plus

ويوصل دوري للكاونتر عند الاماراتيه وهذيل جناطي وحده بالشحن ووحده معاي داخل الطياره


شنو فيها اللي داخل الطيارة : كتاب "تسكع على الخريطة" - كاكاو وبفك - بيجامه - بطارية - لحاف " ثرو"

تفتيش مطار الكويت تقريبا صاير مثل هيثرو لان الشركة اللي ماسكة هيثرو امسكت مطار الكويت " يعني خلكم خفاف ولا تاخذون معاكم سوائل واشياء ممنوعه "


الجمــــارك لختم الجواز

احلى لحظة

سوق الحره الصغير مطار الكويت وحزتها محتفلين بالعيد الوطني للامارات الحبيبه ..

وطرت من الكويت الى الامارات


وصلت مطار دبي ورحت على البوابة على طول ترانزيت عندي ساعتين


وهذي البوابة الى نيويورك

ونتوكل على الله من دبي الى نيويورك 14 ساعه و 25 دقيقه وبعد تفتيش دقيق مرتين في دبي

وابتدي اضيع وقت اشوف مسلسل بو الملاين و واقرا اشوي من الكتاب و انام والخ ..


الخدمه على الاماراتية ممتازه البزنس ولا احلى بصراحه التسليه بالتلفزيون القطرية فيها منوعات اكثر بس تظل بعد ممتازه الاماراتية ..


وبنص الدرب تم توزيع استمارة الجمارك للدخول الى امريكا للغير امريكي ..


البيانات المطلوبة : اسم العايلة - الاسم الاول - اسم الاب - تاريخ الميلاد - عدد المسافرين - السكن في امريكا - الولاية - اصدار الجواز و رقمه - موطنك الاصلي - الدوله المسافر لها - رقم الرحلة ..


بعدين في اسئلة اذا معاي اكل او عندي مزرعه والخ كله حطيت لا لا لا لا ...


ومكان المبالغ صفر


وبالاخير توقيع


وهذا شكل الاستمارة

يتبــــــــــع






​

 

[لوجىى]

خلصت من الاستمارة و رديت نمت لما قالوا بعد ساعه ونوصل مطار


مطار جون كنيدي - نيويورك
Jhon F Kennedy airport - new york

وصلت بالسلامة على تيرمنال 4 كل الطيران الخليجي يطب تيرمنال 4

وعلى طول لكاونترات الكنترول بس قبلها لازم كل شخص يسجل بياناته على الجهاز ويصور وياخذ الوصل وبعدها نوقف بالدور للكنترول ..


و انا راح اقتبس هالموضوع من تقرير اخوي ماجد الفهد ..


هذا الجهاز شكله

وبصراحه سهل وواضح ( تسجل البيانات اللي في الجواز وتبصم وياخذ صوره لك وللجواز وبعدها يعطيكم الوصل ) وتوقفون بالدور ..


وهذا الوصل تقريبا

تمت الاعادة للافادة واقتباسها من تقرير اخوي ماجد الفهد ..


وبعدين رحت للكاونتر وتم سؤالي 3 اسئلة فقط لا غير ..


1- ليش زايرة امريكا ؟
للسياحة


2- وين بتسكنين ؟
hampton inn harriman woodbury


3- جم معاج ؟
3000 دولار


جك جك تم الختم ( have a nice trip )
thank you


طلعت على طول على سير الجناط وطلعت جنطتي بسرعه الحمدلله واطلع ولا جدامي شركة

وخذيت لي خط انترنت مفتوح لمدة شهر مع الضريبة 100 دولار


ومن بعدها خذيت القطار من تيرمنال 4 الى منطقة تأجير السيارات ..
تم الاستعانة بالصور من تقرير اخوي ماجد الفهد

وصلت نيويورك الساعه 2 الظهر على ما طلعت و رحت محطة تأجير السيارات تقريبا 2:45 ولما وصلت قالوا مكتب اللي حاجزه منه في باص كل تقريبا 10 دقايق او اقل واركب الباص اللي تابع لشركة بريس لاين لما وصلت قالوا لا انتي شركة اكونومي بس حجزج من موقعنا ..


وانا الحين شلون وين اروح ما لقيت اوكونومي جان تقول اكونومي راحوا برا المطار وباصهم كل نص ساعه رديت محطة التأجير مره ثانية


ونطرت نص ساعه والجوووووووووووو مووووووووووت بررررررررررددددد
ومحد وصل وين الشركة واتصل عليهم بعدين قالوا الحين نطرش لج السيارة ياسلام اخرتوني وانا ناطرة بالبرد ..


وصلت اكونومي

وكملت البيانات وعطيتهم الليسن الكويتي ياخذون منه صوره خلاص ما نحتاج نطلع ليسن دولي يا مسافرين دولة الكويت ..
والسيارة فيها جهاز ضرايب الطرق السريعه وهذا شكلة

بدال ما نوقف وندفع خلاص هذا وانت ماشي express pass يسمونهم يحسب بروحه ..
ذكرت اول التقرير جم طلعت علي السيارة ..


طبعا تأخرت المفروض اكون ماشيه منهم من زمان بس اهما تأخروا علي ..
وهذا الجيب اللي خذيته
ما احب الصالونات متعوده على الجيبات

وطبعا اصور السياره من كل الجهات عشان لا صار شي لا سمح الله اتأكد من تصويري ..

طلعت منهم على الساعه تقريبا 5:30 - 5:45 وايد تأخرت ..


وهذي جم صوره من جسر نيويورك

حاشتني زحمه نيويورك وانا ما فيني حيل ابي اوصل الفندق

زحمه يا دنيا زحمه

اكره شي صار معاي في هالرحلة اسوق في هالظلمة الحمدلله مو خوف بس مشكلة النوووووم اذا الشارع مافي اضاءة بسرعة تيني النومه تعبت مع سياقة الليل عيني تغمض والله الله ستر ..

بالاتجاه الى منطقة سنترال فالي " منطقة الاوت لت "

والحمدلله واخيرا تم الوصول الى الفندق على الساعه 8:45 تقريبا من بعد الزحمه و وقوف عند الجمعية


وهذي غرفتي

الحمام عزكم الله

المنطقة حييل باااااااارده ابرد من نيويورك
الفندق ممتاز واعتبره من افضل الفنادق اللي سكنتهم في هالرحلة ..


انتهى اليوم الاول والى نوووووم عميق لليوم الثاني ..


القاكم ان شاءالله في اليوم الثاني من الرحلة







​

 

[لوجىى]

اصبحنا و اصبح الملك لله




قعدت الصبح مبجر لان وراي اوت لت وطريج


ولا الجو صقيع برا وعلى السيارات مبين الصقيع


وهذي درجة الحراره

وبرا الشارع

جهزت جنطتي و كل شي ونزلت للريوق وهذيل بعض الصور من الفندق وتزينهم للكريسماس
حبيت امريكا في هالوقت وااايد

مكان الريوق

بسيط و لطيف

ريوقي اللذيذ

الفندق حلو ومرتب ما شفته بالليل جذي النوم سلطان ما كنت منتبه عليه ..
الاستقبال ممتاز والنظافة والموقع

سويت جيك اوت وبروح الاوت لت
وهذا الشكل الخارجي

وو صلت الاوت لت

الفندق يقدم خدمة الشتل للاوت لت
و البعد تقريبا 5 دقايق اذا مو اقل ..

وفيه واااايد ماركات عالمية ويبيله على الاقل يومين حق اللي يبون يتسوقون


انا عن نفسي فريته على الماشي واسرع سريع بصراحة .. لان قاعده احاتي الطريج للمنطقة اليايه وما ابي اتظلم الدنيا علي ..


وهذيل صور من الاوت لت

التزين للكريسماس كل مكان وبالليل مع الاضاءة تكون احلى

وهذا مجمع المطاعم

ولا اشوف الحب موجوووود

من احسن الجناط

و رجعت للحب اخذ المؤونه اللازمة للطريج

وتوكلت على الله بعد جولة الاوت لت الى المنطقة القادمة

الطريج من سنترا فالي الى المنطقة اللي رايحتلها 4 ساعات و ربع مع التوقف توصل 5 ساعات

وهذا اول توقف عند محطة البانزين
وتأكدوا لما تاخذون سيارتكم شنو نوع البانزين اللي تحتاجه عشان ما تصبون غلط وتطق المكينة دربالكم ..

طبعا محطات البانزين معروفه في امريكا بالخدمات اغلبهم فيهم سوبرماركت صغير ومطعم و ممكن فندق او موتيل ..

المفروض عارفين وين راحه لاني ذكرتها في اول التقرير

الحمدلله تم الوصول الى واشنطن دي سي
راح ابات فيها ليلتين من 1/12/2017 الى 3/12/2017


السكن في فندق كابيتال هيلتون - في شارع السفارات
ليلتين بسعر 320 دولار شامل الرسوم والضرايب = 95 دينار كويتي ..


الموقع الالكتروني للفندق


http://www3.hilton.com/en/hotels/district-of-columbia/capital-hilton-DCASHHH/index.html


مواقف السيارات غالية في الفندق باليوم 60 دولار وفي يمهم مواقف ثانية اليوم ب 20 دولار
وقفت بو 20 دولار .. وخليتها السيارة ما استخدمتها طول فترتي في واشنطن ..


وهذا فندقي

كالعادة عقب اليوم الطويل ما افكر بتصوير الفندق بس اصور الغرفة واليوم الثاني اصور الباجي


وهذي غرفتي الغرفة ام سريرين ارخص من غرفه دبل

الحمام عزكم الله

الغرفة تطل على الشارع الرئيسي ..

و وصل عشاي

وانتهى يومي الثاني والى النوم عشان اشوف واشنطن باليوم اللي بعده ..


الفندق موقع ممتاز - نظيف بس الحمام وايد صغير - خدمة سريعه


الى اللقاء
​

 

[لوجىى]

اليوم الثالث من السفره
يوم السبت
2/12/2017


بعد ما وصلت واشنطن


اصبحنا واصبح الملك لله
قلت اطلع اتمشى واشوف المنطقة حوالي



طبعا معروفة واشنطن بالبرد وكان يومها مووت برررررد


صوره صباحية وغرفتي تطل على الشارع الرئيسي اخر الشارع يكون البيت الابيض
تكاسيهم لونهم احمر مثل ما انتوا شايفين ..

وننزل تحت نشوف اللي لنا واللي علينا

اللوبي والاستقبال

اجواء الكريسماس خيال في امريكا

الموظفين ايننون وايد خدومين وحبوبين

ونطلع برا
المنطقة وااايد تشبه مدن اوروبيه ما جنها في امريكا الشوارع وسيعه والنظافة والترتيب والشراحه كل شي فيها ممتاز وما فيها زحححمممه و شارع السوق وايد حلو ..


بس معروفة انها تاريخية يعني الانشطة فيها مو شبابية اللي يحب التاريخ والحروب يزورها ..

ولا الحب مره ثانية متواجد في واشنطن صار الريوق اكيد عنده

يا زين هالريوق زيناه

و رجعت الفندق انطر الترولي يوصل عشان اخذ فيه جولة والحمدلله له نقطة توقف عند باب الفندق
شوفي يا قطرية كل شي يمي ما يحتاي سيارة والترولي موجود

هذا الشارع كله تقريبا سفارات والقنصلية العمانية مقابله الفندق

اسعار مواقف الفندق وايد غالية

اوقف اهني وبعد اشوي اكمل تكملة اليوم والترولي






​

 

[لوجىى]

اكمل معاكم جزء واشنطن


واليوم الثالث من السفره


نبذه بسيطة عن واشنطن


تأسيسها:


واشنطن دي سي وتقع في قطاع كولومبيا ، وهي العاصمة الفيدرالية للولايات المتحدة الأمريكية. وافق الكونغرس الأمريكي في 16 يوليو 1790، على إنشاء عاصمة وطنية دائمة كما أقر الدستور الأمريكي. وتطلّب ذلك إنشاء قطاع اتحادي يقع تحت سيطرة الحكومة الفدرالية مباشرةً ولا يتبع أيٍ من ولايات أمريكا. تم تشكيل العاصمة من أرض تقع على نهر بوتماك تبرعت بها ولايتي ميريلاند وفرجينا، إلا أنه تم إرجاع الجزء الذي أخذ من فرجينيا إليها في عام 1846.


علم واشنطن دي سي

شعار المقاطعة

تقع جميع افرع السياسة الامريكية الثلاث الرئيسية للحكومه الفدرالية في العاصمة ، وتضم العديد من المعالم والمتاحف الاثرية وتحتض 176 بعثة وسفارة اجنبية والخ ..


اكمل النبذه بين الصور


هذا الترولي ويكون شكل باص قديم ياخذنا لي مركز الحجز عشان نركب الترولي الثاني ويكون اكبر من هذا

هذا المكتب السياحي

اشكال التروليات

سعر التذكرة للشخص لمدة يومين ..


40 دولار من غير ضرايب

الترولي وسيع و الجام كبير وبالصيف يفتحون النايلون

تنقسم واشنطن الى 4 اقسام :


- شمالي غربي NW
- شمالي شرقي NE
- جنوبي شرقي SE
- جنوبي غربي SW


القسم الشمالي الغربي اكبر الاقسام ومركز واشنطن الرئيسي للنشاط الثقافي والاقتصادي والحكومي ..


ويتضمن البيت الابيض ومباني الحكومه والمتاحف ونصب واشنطن التذكاري ونصب لنكولن ومنطقة التسوق الرئيسية ..


وهذي بداية الجولة


وهذا مبنى الارشيف ( المحفوظات ) الوطنية ..

وهذا مبنى FBI اللي بالزاوية


من كبرة في ممشى ويسون رياضة فيه

مكتب التحقيقات الفيدرالي ويعتبر وكالة حكومية تابعة لوزارة العدل وتعمل كوكالة استخبارات داخلية وقوه لتطبيق القانون وتأسست عام 1908 ..

اهني المسارح

اقرب الفنادق على البيت الابيض وفنادق فخمه

النصب التذكاري

يتبــــــــــــــع






​

 

[لوجىى]

تكملة الجزء السابق


وبالاتجاة الى اهم المواقع السياحية منتزة ناشيونال مول ( ويحتوي على المتاحف والمواقع السياسية والثقافية والنصب التذكارية في المدينة )


مثل : البيت الابيض - مبنى الكونغرس - مبنى طباعة الاوراق المالية وصك العملة - النصب التذكارية للرؤساء ومنهم توماس جيفرسون ، ابراهام لينكون و فرانكلين روزفلت - ومتحف التاريخ الطبيعي والخ ..


انا زت بعض الاماكن مو كل مكان وهذيل صور الاماكن اللي تم زيارتهم ..


وصلت شجرة الكريسماس الوطنية
ويتم تزين هذه الحديقة اللي مقابلة البيت الابيض للاستعداد لاعيادهم

ويجهزون فيها اكشاك ويتم عمل معارض فيها وقت الكريسماس

وهذا البيت الابيض من الجهه الخلفية وحديقته


حصل البيت الابيض على المركز الثاني في قائمة الجمعية الامريكية للمعماريين في قائمة اجمل المباني في الولايات المتحدة..

و وصلت نصب واشنطن التذكاري

عبارة عن مسله ضخمة تم تشيدها تكريما لجورج واشنطن وموقعها قرب نهر بوتوماك بين مبنى الكونغرس الامريكي ونصب لنكولن بالوسط ..


تم تشيدة في 21 فبراير 1885 م ..


مواد البناء المستخدمة فيه : الرخام - المنيوم - غرانيت - حجر جيري - حجر رملي - حجر املس وخرسانه ..

وفي حوالينها trucks للاكل و للسوفنير

مبنى الكونغرس من بعيد

واحد من الفنادق الممتازه

ونركب الترولي

محطة القطار الرئيسية في واشنطن

وهذا مبنى الكونغرس


وهو المؤسسة الدستورية الاولى في الولايات المتحدة ويعتبر الهيئة التشريعية في النظام السياسي ..
ويتكون من مجلسين مجلس الشيوخ و مجلس النواب و 535 عضو 100 سيناتور و 435 نائب ..
نشأت فكرة تأسيس الكونغرس عن تقليد مجالس النواب الذي انتقل من بريطانيا ..


للي يبي يتعرف اكثر يدخل اهني
https://ar.wikipedia.org/wiki/الكونغرس_% D8%A7%D9%84%D8%A3%D9%85%D8%B1%D9%8A%D9%83%D9%8A

يتبــــــــع​

 

[لوجىى]

نكمل الجزء السابق
تابع اليوم الثالث


وصلنا هذا المبنى المساواه في العدالة ( منظمة الحقوق المدنية )
equal justice under law

وهذيل شاخطين بالكاياك
وبرد و ما يهمهم

وهذا مكان نصب ابراهام لنكولن راح ارجع له بعدين

جسر أرلينغتون التذكاري

والحين وصلنا arlington national cemetery مقبرة ارلينغتون الوطنية ..


تقع هذه المقبرة بمقاطعة ارلينغتون بولاية فرجينيا بالقرب من نهر بوتوماك وفيها دفن قتلى الصراعات من الحرب الاهلية الامريكية وحروب سابقة اخرى ..
تأسست خلال الحرب الاهلية الامريكية بجوار بيت ارلينغتون بتاريخ 13 مايو 1862 وفيها 400,000 قبر ..
من الشخصيات المدنية المدفونه فيها :
جون كينيدي - جاكلين كينيدي - هيلين تافت - جون فريند ماهوني والخ ..


وهذه صور منها


وترا بس شركة ال old trolley السياحية المسموح لها تدخل منطقتها

يتبـــــــــــــع ​

 

[لوجىى]

نكمــــل زيــارة المقبـــرة

انتم السابقون ونحن اللاحقون

وخلصنا من المقبرة و رحنا الى the Korean war veterans memorial - المحاربين الكوريين


يقع قرب نصب لنكولن

فيديو


https://

المكان اللي فيه نصب واشنطن هذا و ونصب لنكولن والكوريين يسمى national mall المجمع الوطني ..

واهتي نصب ابراهام لنكولن
و هو الرئيس 16 للولايات المتحدة واستطاع قيادة الولايات المتحدة بنجاح والقضاء على الحرب الاهلية الامريكية ..
تم اغتيالة من قبل جون ويلكس ..


لتفاصيل اكثر عن لنكولن


https://ar.wikipedia.org/wiki/أبراهام_ل% D9%8A%D9%86%D9%83%D9%88%D9%86

فيديو من نصب لنكولن


https://

يتبـــــــــــع







​

 

[لوجىى]

تــابــــع الجـــزء الســــابــق
المنظر من نصب لنكولن على نصب واشنطن والكونغرس

وبعدين مريت على منطقة متحف امريكا الوطني
ومنتشرين حوالية الفود تركس و وايد منهم عرب وحلال

وهذا متحف الافارقه الامريكان وكان زحمه عنده واايد

ووصلت نصب واشنطن

طقني اليوع قلت اصبر معدتي لي العشا

مبنى الارشيف

وهذا شارع السوق اسمه penn quarter وااايد حلو الشارع وسيع ومنظم و شرح والمحلات كلها فيه ومافي زحمه على راحتكم ..

وهذا الترولي الثاني اللي يوصلنا فنادقنا

رجعت الفندق ريحت اشوي ورديت طلعت
وهذا فندق الريتز بينه وبين الهيلتون عبرة شارع

ووصلت البت الابيض من الناحية الثانية

وبعد البيت وزارة الخزانة الامريكية


معلومات عنها


https://en.wikipedia.org/wiki/United_States_Department_of_the_Treasury

وتمشي عالخفيف

وهذا ميسزز حبيب الشعب

عقب خلصت طاقتي ولازم ادور لي مطعم اتعشا لاني ميته من اليوع ولا الحبايب يوم السبت اغلبهم مشطبين يا سلام يا عالم ياهو انا يوعان مافي sorry we are close يا ربااه وين اتعشا
والله ما قصر السكيورتي في الفندق وقالي هالمطعم فاتح والله ورحت و الحمدلله لقيته فاتح ..

طلباتي

طبعا طبيعي ميديوم ويل هههههه امووووون

والحمدلله على النعمه ..


حسابي طلع 21 دولار مع الضريبه ..


وهذا اسم المطعم

ورجعت الفندق وخذيت جم شغله من محل السوفنير في الفندق ..

والحمدلله انتهى يومي الثالث والتاريخي على خير


القاكم في اليوم الرابع ان شاءالله ​

 

[لوجىى]

اليـــوم الـــرابـــع في بـلاد العــم ســـام


و الثــانـي في واشنطـن


اليــوم الاحــد تاريخ 2017/12/3


اصبحنــا و اصبــح الملــك للــه


عقب اليوم التاريخي قلت اريح اشوي واقعد على الراحه ما وراي شي وقعدت مبجر اشوف الحراره


وهذي صورتها من التلفون

الجوو بارد وفي الشتا ينزل ثلج و بالصيف الجو لطيف بس فيه نسبة رطوبة واعلى شي بالصيف تقريبا توصل 32

واهني نبذه عن جوهم



بما ان الاحد فالوضوع العام شنو مافي احد لان عطلة امشي بالشارع بروحي ومعاي ربعي جوج وماجووج في كل مكان يطلعون لي تنافس احنا واهم ..


وهذي الشوارع تصفر ما فيها احد

بالاتجاه الى البيت الابيض

كنيسة saint johns

وهذا جدامي البيت الابيض وساحة لافييت .. البيت بنفس شارع فندقي طلعت من الفندق خذيت يسار كملت سيدا مشي 5 دقايق انا عنده


وجدامي Lafayette Square

يتبــــــــع







​

 

[لوجىى]

نتــــابع اليوم الثاني في واشنطن

فيديو للساحه والبيت الابيض

https://

ساحة لافيت والبيت الابيض

في هالشارع فندق الريتز والهيلتون والخ من فنادق

فيديوو


https://

ساحة Farragut
(Farragut square )
و حواليها كافيهات ومنهم الحب برت

الريوق

يتبــــــــــــع







​

 

[لوجىى]

تـــابــع اليــوم الـرابـع


وهذا الريوق

و رجعت الفندق نزلت اغراضي استعداد للرحيل وخذيت هالصوره لقنصلية سلطنة عمان ماادري بالضبط شنو اهي بس تابع السلطنة الحبيبه

و اروح مواقف السيارات ولا المفاجأه الحلوه

تخيلوا ولا الكراج مسكر ياحبيبي شنو الكراج مسكر وسيارتي شلون ارجع و ادور المسؤولين رقم تلفون ماكو شي وااااي خنقتني العبره شسوي ..
و تذكرت لما طلعت من الكراج انا طلعت من باب عماره وكان في سيكيورتي قلت ان شاءالله موجودين ولا الحمدلله في وحده قاعده واناديها واقول لها السالفه ..


جان تبشرني بالبشاره وتقولي الاحد ما يفتحون عطلتهم !!!


انا كل علامات التعجب في وييهي نعم حبيبتي كراج واجازه ليش ماما وسيارتي و دورتي شلون ارجع جان تقول بعطيج رقم وشوفي يمكن احد يفتح لج الكراج ..


والله وادق على واحد واقوله سيارتي داخل وانا مسافره جان يقول احنا نسكر الاحد ما شفتي اللوحه ؟؟
انا على استفهام في ويهي شكبرها لوحه وينها وما شفتها ما شفت الا لوحة وحده برا عليها سعر الموقف الحين خلصني تعال افتح الكراج وراي طريج سفر ...


جان يقول يبيلي نص ساعه و ناخذ 50 دولار عشان نفتح الكراج اخذ 100 بس تعال افتح وخلصني ..


ويهي معصب على يضحك على هالموقف اول مره اشوف كراج يعطل يوم كامل ..


ووصلني بعد نص ساعه و عطيتة ال 50 دولار وطلعت سيارتي والمفروض اني اعتقد ادفع 30 دولار او 40 دولار السعر الطبيعي بس لاني ما انتبهت فياخذون 50 دولار ..


المقصود من هالقصه انتبهوا وانتوا داخلين الكراجات عشان ما يصير هالموقف معاكم مثل ما صار معاي ..


هذي اللوحه وانا ما انتبهت لها


ا

و ودعت واشنطن الجميلة الى المنطقة اليايه
المفروض عارفين على وين رايحه

اتمنى لكم قيادة امنة معاي
ترا التلفون ممنوع فيه المسج و التصوير وانتوا تسوقون بس المكالمات مسموحه لكم
بس انا اصور عالسريع و اجيك على العقارب مو منخشين

واستمتع في الطريج ولا احس بالوقت الجو يهبل والشارع اينن

خط السير ساعات gps يخوره استخدم قوقل ماب الحبيب

وقفت اعبي بانزين طبعا اول شي تعرفون رقم المكينة اللي بتعبون منها وتروحون تدفعون داخل المبلغ اللي تبون اتعبونه عشان يفتح لكم المكينة

عبيت ب 40 دولار لاني لازم اردها فل

خلاص عارفين وين رايحه

قوقل ماب كل منطقه ادخلها يرحب ترحيب صوتي مع ايفكت على الخريطة

ودخلت نيوجيرسي

ونكمل الطريج مع شمس الغنية
نجوى كرم

ولا احلى من جذي طريج مع الصوت الجريح ينسيكم الدرب كله

​

https://

وادخل الحب القادم وبقوه الى


نيـــــــــــويـــــــــورك


وباجي 45 و اوصل مكتب ايكونومي ارجع السياره لهم ما راح احتاجها في نيويورك وخصوصا فيها زحمة سيارات وزحمة مواقف وغالية ..

يا هلا بالحب اليديد وينج من زمان عني ظلمتج بصراحة وما عطيتج حقج في الحب لكن راح اعوضج بالسنوات اليايه ان شاءالله

سكــة سفــر فيهــا مشــاويـر العمــر
سكــة سفــر مجبــور أجـاوزهـا و أمـر
عل وعسـى القـى حبيبـي المغتــرب
و أحني عليه و أضمه فـي صـدري الـرحـب

زحمة نيويورك ما ينفع تسوقون فيها ..

جسر بو طابقين

و وصلت مكتب الاكونومي ومن صوبهم طلبت تاكسي يوصلني فندقي في التايم سكوير
تقريبا التاكسي اخذ 70 دولار ..
يتبـــــع






​

 

[لوجىى]

اليـــــوم الـــرابــــع


قبل لا انتقل الى نيويورك الجيك اوت من فندق واشنطن zero ما خذوا مني ولا فلس غير سعرهم اللي في الحجز ..


من بعــد واشنطــن الى نيـــويـــورك الصــاخبــة ونـاطحـات السحــاب


مــــدينـــة جميلــــــة بمعنـى الكلمـــه حبيتــــها وااايــــــــــــــد وللاسف حببي لها وصل متأخر


راح اذكر السبب ان شــاءاللــه....


نبـــذة عنهـــا


مدينــــة نيــــويـــورك اكبر المدن في ولايـة نيـويـورك والاعلى سكانا في الولايات المتحدة والاكثر تأثر في مختلف المجالات تجاره ، اعلام ، فن ، ازياء ،تكنولجيا ، علوم و ترفيهه الخ ..
هي عاصمة اقتصادية للولايات المتحدة ويوجد بها مقر الامم المتحدة ومؤشر الداو جونز الصناعي توصف المدينة بأنها العاصمة الثقافية والاقتصادية للعالم ..


العلــــم

من اشهر احيائها :


1- منهـاتـن 2- بـروكليــن
3- كــوينــز 4- بــرونكـــس
5- ستــاتــن ايـلانــد

التــاريــخ


وصل اول مستكشفيها الاوروبيين جيوفاني دي فيرازانو عام 1524 م ،ومن بعده بدوا يوصولون المستكشفون ..
في عام 1614م تم تأسيس نستعمرة فراء تجارية هولندية سميت نيو امستردام في عام 1625م على طرف منهاتن الجنوبي ..
اشترى بيتر مينويت جزيرة منهاتن من الهنود الحمر في نفس العام حتى غزتها القوات البريطانية في يونيو 1664م وسقطت في يدهم اكتوبر 1664م من ايدي الهولنديين وغيروا اسمها الى نيويورك واصبحت عاصمة الولايات المتحدة من عام 1785م الى 1790م بعيد الثورة الامريكية .

من اهم المواقع شهرة :


تمثال الحرية - جسر بروكلين - ميدتاون منهاتن - التايمز سكوير - مركز التجارة العالمي - سنترال بارك وتعد احدى اكبر الحدائق العامة في العالم - مقر الامم المتحدة - شارع البرودواي والخ ..


مساحتها 1214 كيلومتر


مناخها


اعلى درجة حرارة 40-41 يوليو و اغسطس


اقل درجة حرارة (-13) (-15) ديسمبر - يناير - فبراير





وصلت فندقي في نيويورك وكان


Sheraton New York Times Square Hotel


4 stars


السعر 400 دينار شامل ضرايب و رسوم ل 3 ليالي ل شخصين ..


تم الحجز عن طريق hotels.com


https://uk.hotels.com/ho105816/sher...uare-hotel-new-york-united-states-of-america/


من تاريخ 2017/12/3 الى 2017/12/6


استلمت الغرفة على ما توصل رفيجتي راح تقعد معاي ليلتين وترجع كندا لانها تدرس اهناك ..


وهذي الغرفة

ولا الحبايب معطيني دبل وانا ابي توين


قلت خل اصورها دام دشيتها عشان تشوفونها ..

شوفوا شلون فنادق نيويورك غرفهم صغيرررررة وخصوصا فنادق التايمز

الحمام عزكم الله

المنظر

و اشوف الحراره

و انزل اللوبي عشان اغير الغرفة انا طالبة توين و رفيجتي وصلت ..

يتبـــــــــــــع







​

 

[لوجىى]

نكمـــل اليـــوم الــرابــع


واستلامنا للغرفه في نيويورك


استلمت الغرفه الثانيه


وهذي صورتها

الحمام عزكم الله

اللوبي

فندق ميلينيوم مقابل لنا

رحنا نتعشا ميتين من اليوع اقرب واسهل واحد جدامنا


فــرايــديــز

طلبنا دياي بونلس و فيش اند شبس و باستا
وبس هالصورتين اللي صورتهم من اليوع نسيت

والفـــاتـــورة وبـدينــا مع هالتبس ذبحني ..
صراحه الحركة وايد بايخه ما يصير جذي يجبروني بالاسعار واختار واحد منهم انا كيفي احط ولا لا مو شي اجباري ادري بعضهم يعتمد عليها اكثر من الراتب بس من غير تحديد ..


حسابنا 70 دولار والحبيب حاط حق عمره اكسلنت اللي اهي تقريبا 13 دولار
طبعا بديت اعصب وخصوصا اني مو من عشاق فرايديز بس اليوع حدني جان احط له اقل شي كيفي مو على كيفك تمشيني ..

اللي يعرف في هالموضوع اتمنى يتم شرحه خصوصا في امريكا اعتقد بوغسان انت اتعرف في موضوع التبس ..


وطلعنا نتمشى والجوووو بــــــــــــــارررررررد اينـــن


و يا مرحبا بالتايمز

فندقي اللي سكنته في 2009 اول زياره لنيويورك
وما حبيتها هالزياره كلش لعدة اسباب :
1- الجو كان صيف يعني حرررر خيسه في اغسطس .
2- الريحه الخايسه فيها .
3- ناطحات السحاب .
4- المدة كانت قصيرة .
5- المضايقات
6- الفندق
7- ازعاج الدوريات


الجو كان سبب رئيسي وريحتها الخايسه في اني اكرهها كنت احس اني قاعده اتمشى في بالوعه عزكم الله ..


لكن هالمره غيــــــــــــــر الجوووووووووووو خيااااااااال وحببني فيها وغير الكره الى حب و مااااااااافي ريحة خيااااس ..
الناطحات لما الحين ما احبهم لكن لما بديت اتمشى فيها واعرف سكيكها حبيتها واااااااااايد والمده كانت مساعدتني هالمره في اني اتعرف عليها عدل ويصير بينا تبادل ..


المضايقات كنت وايد اشوف فاقدين الوعي فكانت تصير بعض المضايقات واتجنبها ..


السكن متعب في نيويورك واتوقع بالاخص في التايمز اسامي معروفه لكن مو بالمستوى المعروف كلش وغير ان اسعارهم مرتفعه وايد ..


الدوريات في 2009 كل يمكن دقيقه تشتغل الصفاره وفي 2005 اختي كانت زايره نيويورك تقول اكثر من اللي سمعناهم في 2009 تقول يمكن كل 25 ثانية صفاره اما السفره هذي ما سمعتهم الا مره وحده ..
فأعتقد شي زين وخصوصا هالمره حسيت بالامان اكثر بواايد من 2009 ..


هالاسباب كانت مكرهتني اني اعيد الزيارة لنيويورك لكن عقب زيارتي هذي خلااص الوعد ان شاءالله كل شهر 12 اكون هناك

حبييييتها في هالوقت انصح الكل يزورها في الشتا ويبعد عن الصيف ..


وهذا فندق كراون بلازا التعيس اللي سكنت فيه 2009

تقيم فندق الشيراتون في اليوم الخامس راح اذكره ان شاءالله ..


الـقــــــاكــم في الجـــزء اليــاي







​

 

[لوجىى]

اليــــــوم الخـــامـــس


يـــوم الاثنيـــن 2017/12/4


اول يوم دوره تدريبية ..


اصبحنـــا و اصبــح الملك لله


قلت اشوف الجو و درجة الحرارة

الجووووووو باااااااارد


جهزت عمري و نزلت تحت و رفيجتي نايمه تطلع عقب ونتواعد في مكان معين عفب ما اخلص ..


نزلت اللوبي ورحت الكونسيرج اسأل عن العروض shows

ويمدحون لي هالشو الامريكان وانه ما يصير الا فترة الكريسماس من كل سنه قلت نتوكل على الله و نحجز ..
وتم الحجز والعصر استلم التذاكر ..

بالاتجاه الى مطعم الريوق قبل حضور الدوره ..


وطلعت ولا هذي بويهي احلى شي ...
كل واحد و أمنيته وان شاءالله تتحقق كل امانيكم ..

موقع الفندق جيدجدا الى ممتاز
خطوات الى سنترال بارك و خطوات على وسط التايم سكوير

يمشي الوقت وانا ما تريقت ولا رحت الدورة

السنترال بارك مقابلتني

وهذا مطعمي للريوق


مشهـــوره نيـــويــورك في المطـــاعــم اللذيذة والممتــــازه


Sarabeth's


موقعهم الالكتروني


http://sarabethsrestaurants.com/


المطعم دايم مزدحم وتنطرون دوور و حجز


الحمدلله انا ما نطرت وايد لاني بروحي لشخص واحد ..

من داخل

المنيو

اكيد عارفينه حبيبي

الطلب

وهذا حسابي هالمره كيفي انا اختار جم اعطي التب

المطعم اكله ممتاز والخدمه ممتازه..
السعر غالي - حليب الكاكاو مو المستوى اللي قلبي يحبه


تقيمي له 10/8


طبعا تأخرت على الدوره اشوي وقلت اني ضايعه

الفنادق اللي عالسنترال بارك شكلهم وااو

وصلنا الدورة يتبـــــع عقب الدوره ​

 

[لوجىى]

نكمل معاكم


دورتي كانت عن ( محاسبة بترولية )


خلصت منها وطلعت اتمشى و على ما توصلني رفيجتي ..

وصلت grand army plaza

ونافورة pulitzer و على اليمين فندق شراكة بين السعودية والهند واااايد حلوو الفندق وفخم ..

و دخلت الفيفث افنيو الياده الخامسه 5th avenue ووصلت رفيجتي وتمينا نتمشى ..

معروفه الياده الخامسه بالمحلات العالمية المشهوره ..
الفاترينات اتشوق في طريقة العرض..

فيديو


https://

فيديو تمشي


https://

هالادخنه بالصيف الله لا يوريكم خيااااس وهذا اللي كان مكرهني في نيويورك لما زرتها المره الاولى ..

معروف من زينته

كنيسة سانت باتريك ..
st.patricks cathedral

مقرّ رئيس أساقفة أبرشيّة نيويورك، وتقع عند زاوية الشّارع رقم 50 والياده الخامسة في منهاتن مقابل مركز روكفلر. مبناها من أكبر المباني القوطيّة الجديدة في أمريكا الشّماليّة.
بُنيت الكاتدرائيّة بين سنوات 1858 و 1878، والبرجان اللّذان يصل إرتفاع كلٌ منهما إلى 100 متر استقرّ شكلهم النّهائيّ عام 1888. تمتاز الكاتدرائيّة بروعة هندستها المعماريّة وبدقّة تفاصيلها، حيث تعتبر أحد أجمل مباني مدينة نيويورك، الأمر الذي جعلها إحدى الوجهات الأكثر جذبًا للزّوّار في المدينة.

النقش والتصميم من داخل ابداع

يتبـــــــــــــــع ​

 

[لوجىى]

نكمل التمشي عقب الكنيسه

و ساكس فيفث افنيو العرض اللي عالفاترينه عجييييب

فيديو


https://

وما زال المشي مستمر الى مكتبة نيويورك العـــامـــه

مكتبة نيويورك العامة اكبر مكتبة في امريكا الشمالية و ثالث اكبر مكتبة في العالم بعد مكتبة الكونغرس و المكتبة البريطانية

اهم مكتبات الابحاث في الولايات المتحده وتضم نحو 53 مليون عنصر من ( كتب - اشرطه - خرايط و الخ ..)

تتكون من 87 فرع احدهم مكرس للمكفوفين و الاحتياجات الخاصه ..

ومفتوحه للعامة مجانا و بعضها لايمكن الاستعاره من كتبها ..

يتبــــــــــع ​