K
Khalid Helal
:: مسافر ::
صباح الخير على كل اعضاء الجروب الجميل ده .بعد اذن الادمنز حابب اتكلم عن جمال السياحة فى مصر . اولا الصور دى فى مصر.اه والله فى مصر . مكان لا محتاج فيزا ولا تصريح امنى ولا كشف حساب فى البنك ولا اى حاجة من وجع الدماغ ده . اللى قدامكم دا كهف عالمى اسمه كهف الجارة فى صحراء مصر الغربية بيقع فى وسط الصحراء بين محافظة اسيوط وواحة الفرافرة .ولك ان تتخيل بان الباحثين الالمانيين والاجانب وصفو الكهف بانه اجمل ما وقعت عليه عين انسان فى قارة افريقيا .الكهف عبارة عن شلالات من المياه المتحجرة منذ ملايين السنين واصابع ضخمة من الكريستال النقى ورمال ناعمة جدا ومغارات في قلب مغارات فى باطن الارض .وساحة الكهف من الداخل عبارة عن بهو مجوف مملوء بالشلالات الصخريه الصاعدة والهابطة ذات المنظر الجذاب الرائع . والمدهش بقى جدا ان داخل الكهف يشع نورا كما لوكانت الشمس بداخله,إذا أشعل أي شخص عود كبريت أو ولاعه تضاء جميع جوانب الكهف علي قدرمساحته الشاسعه وتعتبر الشلالات الصخرية كقناديل معلقه تشع نورا وهاجاً علي قدر طولها . سبحان الله . فيه حد ياجماعة زار الجمال والسحر اللى موجود فى مصر ده قبل كده . اعتقد مكان زى ده هيكون مكان مثالى لمحبى المغامرات والاكتشافات الجديدة . للاسف كثير من المصريين مايعرفوش حاجة عن الكهف ده وانا كنت واحد منهم . معظم اللى بيزوره اجانب وانا عرفته عن طريق صديقة اجنبية كانت عاوزه تزوره . بعد اذن الادمنز انا عندى اقتراح . ليه مش كل فترة كده نعمل ايفنت كاعضاء فى الجروب ونعمل رحلة او زيارة للاماكن اللى زى دى . وهتكون فرصة كويسة لناس كتير فى الجروب عاوزة تكتشف اماكن جديدة . بدل ما كل تركيزنا فقط على السفر خارج مصر خاصا فى ظل صعوبة السفر بره من اجراءات مملة وتكاليف مادية باهظة . مصر جميلة وفيها اماكن عالمية وممكن ننبسط فيها بأقل التكاليف وفرصة اننا نكتشف السحر والجمال اللى فى بلدنا
