توكلت على الله و قلت بتسوق اليوم و رحت يمي روس و بعدين اوت لات اورلاندو
و رحت الى Orlando international premium outlet
كل المحلات و الماركات موجودة
حاشني اليوع قلت اروح اشوف لي مطعم اتغدا فيه
وهذي صالة المطاعم
طلبت من الصيني
عيش و ربيان و خضرا
اعتقد الحساب 17 دولار
خلصت من الاوت لت قلت بروح الفندق اريح و اسبح بالحوض بما ان الجو حلو
ولا يوصلني اتصال
ابرار يبا و ينج
خير يبا توني طالعه من الاوت لت آمرني
اي روحي بسرعه هالمكان و كلميني
وين يبا ?
الحين ادز لج العنوان و كلمي عمج علي
اوك ..
و اروح المكان اللي و صوني عليه ابوي و عمي علي ..
تتوقعون اللويه كلها و ين طلع المكان ؟؟
ممممممممممم
موديني حراي السيارات و الكرفانات Manheim Orlando Auction
يا سلام عليكم خوش طلعه صراحه ..
طبعا ابوي معطيني كرت العضوية عشان ادخل بأسمة و انا كنت حاطتها بالسيارة لان ما ادري متى راح يكلمني و يقولي روحي و صادف اليوم هذا كلمني وقالي روحي في سيارتيين ابيهم
كرفان و فود ترك ..
رحت و تميت ساعتين بين هالسيارات و الديلر و اتصالات على الكويت و ديتونا صدعوا راسي
ابرار شوفي الشاصي
ابرار شوفي الماكينة
ابرار شوفي جم ماشية و التواير و وووووووو مو ابرار بنجرجيه ....
والحمدلله صدنا الثنتين اللي يبيهم و شريتهم ..
وهذيل صور بعد ما فضيت من اللويه و المكان صار فاضي
صورت لكم من برا لي داخل
اهني كل السيارات المعروضه للبيع يصفونهم دور عشان يدخلونهم في اماكن العرض بالدور و يتم عليهم المزاد ..
وبعضهم سعر واحد من غير مزاد يتم عرضها و بيعها ..
اهني تسجيل البيانات لما الواحد يشتري
وهذي اللي يبي يقعد و يشوف عرض السيارات من الشاشه من غير ما يكون صوب الكراج او رصيف السيارة ..
وهذا المكان اللي يبي يكون بروحه مع شاشته و يشوف و يختار و يشتري على طول مباشر ..
هذيل الكراجات تفتح من الصوبين و يبتدون يدخلون السيارات للعرض البيع و المزاد و كل رصيف مكتوب شرح كامل عن السياره اللي راح تنعرض و صاحبها و الديلر يكونون موجودين اما عند الشاشات الي حطيتهم فوق او عند الرصيف نفسه ..
تقريبا في 25 رصيف و بكل دقيقه يتم العرض في كل رصيف ..
بعد يتم الشراء يتم تسجيل البيانات و عنوان المرسل له ..
نــــاوية عليها الصفرا
واهني خلاص السيارات المباعه و يبتدون يطلعونهم بالدور و كل واحد حسب يومه ..
هذيل خالصين بيروحون المينا
وبعد الدوخه من السيارات و القلب تعب من اللي ابيهم رجعت الفندق ريحت اشوي
وبعدين رحت اعتقد walmart
الحــــب
وهالبوكيهات لكم
احلى بهارات للتاكو المكسيكي
حق تالي الليل ايووع
الكورن فلكس و البطاط و النفيش احجامهم مو طبيعية
خلصت من الجمعية شريت اشوية ماجله للريوق و تالي الليل ..
و رديت الفندق و اقولكم تصبحون على خير باجر و راي يوم متعب
قبل يومين حجزت اونلاين على عالم البحار - السي ورلد
سعر التذكره لمدينة وحده 80 دولار
واذا نفس اليوم من عند الدخول 100 دولار ..
و خذيت بطاقة الدور السريع quick Que
سعرها 19 دولار دخول غير محدود
يعني الاجمالي 99 دولار ..
المواقف في العاديه و في vip
العادية 20 دولار
انا غلطت اني خذيت السيارة معاي لان المدينه قريبه علي حيل اروح لها امشي اقل من 10 دقايق .. بس ما توقعتها بهالقرب صراحه ..
اللي يسكن في الدبل تري و لايروح السي ورلد بسيارة ..
هذي العلامات كل واحد وحجزه شلون و يروح على الزون اللي يتبعه انا اونلاين اروح زون A
شوفوا زون بي يمين و زون سي بالوسط
و زون A يسار
وهذا اللي انا لازم اروح واطلع تذكرتي
وخذيت تذكرتي و دخلت عالم البحار
و اشهر شي الحوت الشامو ..
بصراحه حسيت بضيقة خلق هاليوم العادة اختي وبنات خوالي معاي و نتهاوش على اللعبه من يركب و كل وحده تضغط الثانية هالمره ما في احد يناشبني ركبت اول لعبه
اللخمه manta
بس ما حسيت بالوناسه وين ربعي نصرخ و نضحك على اشكالنا محد معاي
طبعا اللعبه كلها تقلب اللي ما في حيل لايركب
فيديو
https://
و فلامنغو عالم البحار غير
و يتعرفون علي قروب امريكان ويقولون نشوفج بروحج تعالي معانا وكبار ما شاءالله
عاد انا رحت معاهم بس قلت لهم ربعي رايحين السوق ما يبون يلعبون وانا ابي العب فحجزت و ييت .. والله شحليلهم خوش قروب ستانست معاهم في الالعاب ..
وركبنا الجندول atlantis
وبعدين لعبة الاخطبوط kraken
لازم تشوفون كرسي اللعبه مقاسكم ولا لا ..
عقب الاخطبوط دخلنا للبطاريق
درجة الحراه اتوقع 18- قاعدين بالقطب الشمالي من البروده
عقب عالم البحار قلت اليوم اشوف لي مكان ازوره و اتمشى فيه
قعدت على الساعه 9 تقريبا
على ما جهزت عمري و تريقت هالريوق الطيب
ضبطت السيارة و توكلت على الله
فيديو من الطريج - اليوم يوم بوخالد
https://
فيديـو مـع الصــوت الجــريـح
https://
اخر كــلام مع الصـــوت الجـــريح
https://
مـدة الطريج تقريبا ساعتين من اورلاندو لي المكان اللي بروح له ..
و وصلت المنطقة المقصودة
st.augudtine سان اوغستين
مدينة امريكية تقع شمال شرق سواحل فلوريدا و تعتبر اقدم مستوطنة اسسها الاوربيين في امريكا ..
واللي انشئها مكتشف اسباني بيدرو مينينديز عام 1565 ..
حكمت اسبانيا المنطقة اكثر من 200 عام ، وتمت المنطقه محافظة على طابعها العمراني الاسباني التاريخي و تعتبر من اهم المناطق السياحية ..
و دخلت المنطقة التاريخية
شوفوا البنيان
وصلت البداية
هذي فيلا المليونير فرانكلين دبليو بناها في عام 1883 كفيلا شتوية و مستوحى من قصر الحمرا في القرن 12 في غرناطة اسبانيا ..
سميت بفيلا زورايدا على احدى الاميرات في حكايات واشنطن و كان فرانكلين يشتري السجاد و القطع الاثرية من تاجر سوري اسمه ابراهيم مسلم .. والحين اهي مملوكة لعايلة مسلم ..
العلامات الصفرا هذيل الاماكن اللي يزورهم القطار و اللي ما يبي القطار يقدر يلفها بروحه
في مثل هالبيوت بس على اكب اشوي و احلى مسوينها B&B كنت ناوية اسكن فيهم ..
و اول محطة وقف عندها مصنع الخمور الله يكفينا شره ويبعده عنا واختكم انزلت على ويها و لاتدري مع ان كان يتكلم بس ماادري ليش ما انتبهت
صورة هالصوره
و طلعت رحت الباب الثاني يبيعون مربيات و مخلل و هالسوالف
و اطلع و اشوف الخريطة و لا يمي مصنع الكاكاو و اروح له
درجة الحرارة في سان اوغستين
و مخفر الشرطة
و هذا مصنع الكاكاو
اسعار تذاكر دخول المصنع
وبما اني من عشاق الكاكاو قصيت تذكرة بسعر 8 دولار ..
ويلبسونا قبعة الشعر
حتى الاصلع يلبس ترا
و يشرح لنا عن بذور الكاكاو وشلون يسونه عقب
انا محد ذابحني الا المكاين الكاكاو اخية لو عندي و حده بس ابدع في التشكيلات بس اسعارهم غاليه
ماكينة التغليف
واهني محطة الانتظار عند المصنع
بصراحة هذيل اول محطتين ما انصح فيهم مافيهم شي يسوى تضيعون وقتكم عليه و مصنع الكاكاو حسافه التور فيه و الله اخذ وقت على الفاضي و التور طويل و المصنع نتفه صغير ما يسوى ..
تم بنائها من بعد 107 سنوات من تأسيس المدينة عندما كانت فلوريدا جزء من الامبراطورية الاسبانية بعد الغاره المدمرة اللي قام فيها المدون الانجليزي روبورت سيرلس ..
بدء البناء عام 1672 - 1695 و تعتبر اقدم قلعه في الولايات المتحدة و تقع على خليج ما تانزاس و صممها المهندس الاسباني اغناسيو دازا ..
يعتبر سجن تاريخي و 1987 تمت اضافتة الى السجل القومي الامريكي للاماكن التاريخية ..
تم بناء السجن عام 1891 و تم تمويلة من قبل هنري فلاجلر لان كان في ارض يبيها هنري ليبني فندقه الخاص فمولهم عشان يغير مكان السجن و يكون موقعه الحالي ..
و اخر نقطة يوصلون كل واحد على المكان اللي يبيه
وصلني الشتل مواقف اللي واقفه عندهم
وهذا منتجع كازا مونيكا وايد حلو من برا و حتى من داخل
يا حبيبي لا يحشوك غلوريا خلاص انا شفت سان اوغستين الحمدلله و مابي ازورها انام فيها جذي ام فاين ..
هههههههههه نو جربي تنامين ليله ؟
لا ماابي مافي وقت و انا برجع اورلاندو ليش تفتحين الموضوع الحين باليل و انا بالطريج
هههههههه عادي ابرا لاتحطين في بالج
اوك غلوريا روحي نامي و خليني اشوف طريجي ..
اوك تيك كير
باي - باي
عقب هالمحادثه الحلوه بيني وبينها قلت الله يغربل ابليسج ان جانج خربتي علي جدولي خليتيني على عماي ليش تقولين لي .. و المشكله قالت لي مواقف صارت لها صج بعد
يا الله سترك سكنهم مساكنهم ..
والله خلتني بالطريج اخاف و اوسوس ..
تخيلوا البيوت اللي قلت عنهم حلوين هذيل فيهم و غيرهم وايد و غير الرحلات اللي يسونها ليش ليش رحلات ميانين ..
بس المنطقه تستاهل الزيارة وايد حلوه والله و ترا اماكن معينه اللي فيها مو كل مكان يعني انا ان شاءالله الزيارة اليايه راح ابات فيها اذا الله اراد ..
ما ابالغ لو قلت يمكن بس لعبت 3 لعبات من العالم و الــــــــــــدووووور
صعب احصل لعبه دورها اقل من ساعه تخيلوا
و العيب في ديزني ما عندهم فاست باس مثل السي ورلد و اليونيفرسال لاين بروحهم و سعر تذكره بروحهم ..
لا نظامهم تحجز وقت حق اللعبه و تروحون تلعبون ثانيه على ما يوصل وقت اللي حجزتوها حركتهم كلش مو حلوه و مو عملية راح يضيع اليوم واناا بس افتر و احجز اوقات ..
نفس الكلام ينطبق على لوس انجلوس اذكر مالعبنا وايد والسبب الزحمه و الدوور ..
هذا الدور الناس اللي واقفين حاجزين من قبلهم و الحين وصل دورهم
اكيد ما راح احجز وقت وراي محلات ديزني اللي تشلع القلب
بس صورة لكم ماكينة الحجز
و اروح السبلاش ماونتن ولا الدور الله لا يوريكم
هذا مدخل اللي حاجز موعد الفاست باس
اشوه ركبت هالقطار
و بعدين القطار اللي يتمشى
ادور شي يسد اليوع لقيت مطعم نظام بوفيه بس الاكل لكم عليه
و ارجع السبلاش ماونتن
و انطر دور
مع الدور عليكم بالبرد
و بعد ساعتين و ربع و صل دوري
يمكن تسألون ليش نطرت ؟
نطرت بس عشان احلل التذكره و اسمي لعبت جم لعبة ..
و وايد العاب طوفتها و ادخل المحلات و اشتري من هالخرابيط اللي ما تخلص
و وصلت its small world ولا مسكره
لعبة السيارات حلوه و الدور سريييع
اهني مطاعم مواقعها ممتاز مقابله القلعه و لازم حجز حق الالعاب الناريه و العرض على القلعه ..
زحممممممه الشارع الرئيسي و الكل ماخذ مكانه للالعاب الناريه و عرض الليزر
هالمره اغير و لازم اختار كيكه الكل ياكلها لان لو علي انا جان اخترت كيكه محد ياكلها غيري ودايم انزف والسبب اني اختار شي انا احبه و ما اراعي البقيه
قلبي يعورني لما يشوف اليســــــار
و هذا الورد اهداء خـاص لكل من مـــر و علق لي ولو بكلمة شكرا و لاعــــزاء للمتفــــرجين
المفروض اطلع من الجمعية بكيكه و امشي ما ادري شنو طلعت منها على هالفاتوره
و اوصل بيت عمي علي
و نفتر بالفريج نتمشى على ما يخلص عمي من العشا لان اليوم عليه العشا
فيديو صغير
https://
و سوالف على ما يخلص العشا مع غلوريا و لكزس بنتها و بيتر حفيدها و عمي و غستان و عن سانت اوغستين و عن مخطط الصيف او وقت الكريسماس وين يكون
الاغلبيه اتفقوا على كوستا ريكا و كـوبـا و دول من امريكا اللاتينية و ما يندرا يتحقق هالمخطط و لا لا الله اعلم ..
عشا اليوم باستا بالربيان لذييذه
و كيكة اليزر اللي مو على ذوقي
و الكل حبها انا ادري اذا يبت شي مو على ذوقي يعجبهم
المفروض اكون في المكان قبلها ب 30 دقيقه انا تأخرت 15 دقيقه مع اني واصله بالتايم قبل 30 دقيقه بس ضعت 15 دقيقه و انا احوس بنفس المكان اللي ابيه بس طلع لازم اكمل طريجي جدام اشوي ..
والحمدلله وصلت قبل موعد المغادرة
و نشوف المكان الجميل
هذا المكان الحلو
اسمه بحيرات ويندرمير ..
قلت بعد اهني ويندرمير بس اكيد اللي في بريطانيا احلى
هذي ويندرمير منطقة راقيه و عباره عن كذا بحيرة و دار مدارها بيوت مليارديرية ..
انزين ابرار اشتبين رايحه حق هالمليارديرية شوفي شي على قدج .. ماكو قلت يمكن الله و رحمته و اصير منهم على يوم منو يدري الله كريم و يرزقنا ..
هي مدينة في مقاطعة اورانج فلوريدا و جزء من منطقة اورلاندو ..تأسست كمدينة سكنية في 1889 و ابتدوا يأجرون فيها في عام 1925 طبعا المناطق اللي حوالين البحيرة تقريبا اهما 7 بحيرات يعتبرون عائد قوي للحكومه و السبب الضرايب العقارية اللي ياخذونها ..
و وصلت عوامتنا اللي بنتمشى فيها
المفروض نكون 4 اشخاص مع القايد في واحد كنسل و صرنا 3
