الاجواء الرائعه فى البحرين

[جوومانه]

ما معاكم خبر زين يا رسول السلامه لاتخيب ظنوني
بسألك عن البحرين كيف أهل المنامه عاد هم يذكروني

صباحكم ومسائكم ورد -

بعد هالمقدمه الخفيفه عن عين عذاري الغاليه على قلبي
اليوم ان شاءالله ياييتكم
وحبيت افتح التقرير من الحين علشان اسوي التقرير مباشر وما اتكيسل
وراح يكون ان شاءالله خفيف ولطيف

انتظروني

​

 

[جوومانه]

صباح الخير من البحرين الحبيبه

طرنا امس باليل عالجزيره وماشاءالله كل الطيران فل على كل الشركات

احنا حجزنا عالجزيره وطلعت التذكرة سته وسبعين دينار كويتي وكانت قبل اسبوعين واحد وخمسين شفتوا شلون كل ما الواحد تأخر ترتفع الأسعار

والسكن في ماجستك روتانا ارجان في المحرق - البسيتين

الفندق حيل جريب على المطار ومجابله مستشفى
الملك حمد اليديد
هذيل الشقق في بوكينغ
حجزنا اربع ايام ثلاث ليالي شقه دوبلكس مكونه من غرفتين نوم ماستر وصاله ومطبخ مفتوح وتواليت ومجهزه بكل شي بسعر ثلاثميه وتسعين دينار بحريني شامله الريوق والضريبه

والحين نطير معاكم الى البحرين

أسعار السويتات وطبعا تختلف بالمواسم والايام

الشكل الخارجي للمبنى

الشقه من الداخل المطبخ

الصاله والمطبخ مفتوحين على بعض

صور ليلية

وصور نهارية في شقق تطل على الحمام السباحه واحنا شقتنا تطل على المستشفى

والبلكونه تشوفون الرايح والراد

يتبع تكملة الفندق
​

 

[جوومانه]

الحين نشوف الغرف والحمامات عزكم الله

هذا التويلت حق الضيوف

وهذي الغرفه الاولى ماستر

وهذا حمامها

وهذي الماستر الثانية

للحديث بقية
​

 

[جوومانه]

الحين نشوف المرافق

الريوق ما قدرت أصور البوفيه
بس الاكل جيدجدا

الظهر طلعنا ورحنا بيت ولد خالي في امواج صوب الفلل اللي يسمونهم فينيسا وهذيل جم صوره للمنظر اللي يطل عليه

وهذيل صور لبيت ولد خالي اللي كان مأجره بعد في امواج قبل اللي فوق .. عندي هذا موقعه واهو وايد احلى من بيوت فينيسيا

هذا البيت كان وايد احلى واشرح صراحه من الثاني

اييه عليج يالبحرين

​

 

[جوومانه]

نكمل بقية اليوم الاول بعد امواج رحنا محل هند الفنانه في الرفاع وبعدها على طول على سار حق حبيب الملايين فيلا ماماز

وهذيل بعض الصور من فيلا ماماز

اول الواصلين عصيري اسمه حصه

حصه وليمون بالنعاع

الكوك واللبن

ووصلت الطلبات الناريه كل طبق احلى من الثاني

طلبي القوي الموزااااات ترررررفه لذيذههههه

شيش برك يمي

المضرووبه اللذيذذذذذه ( نفس خثرتنا احنا نسويها بسمج وأهل البحرين بالدياي )

تهجين دياي
واااو

رويال ثالي ( دياي تندوري )

ياسيدهم لازم فلفل بس للأسف ما كان حار واايد

وفاتورتنا

الحمدلله على النعمه واللهم احفظها من الزوال

وعقب عقب رحنا ستي سنتر بس ماشاءالله زحممممه ماقعدنا خمس دقايق وطلعنا رحنا الفورسيزون قعدنا برا وسوالف وضحك وبعدين ردينا فندقنا

هالصوور من لوبي الفورسيزون والقعده الخارجية

حلفت يالزينه ما أفارق البحرين
في قلبي مزروعة ومحفوظة وسط العين

وطلبت كابتشينو وكريم بروليه

وبجذي ينتهي يومنا الاول
وباجر ماندري وين بنكون وبالليل معزومين على حفل تخرج ان شاءالله
يايتكم التغطيه ان شاءالله

​

 

[جوومانه]

اليوم الثاني
يوم اليمعه واللي اهو يوم الحفله
ريحنا بالسكن عقب السهر والسوالف مع رفيجات الدراسه ناموا عندنا واتفقنا نطلع نتغدا على الثنتين ونص رحنا المول اللي يمنا نسيت اسمه في طريج المطار فيه سنتر بوينت
رحنا المطعم قلنا يلا شوركم وهدايه الله
وهذا مطعمنا طلع كل يمعه يسوي بوفيه
اسمه المرش

البوفيه

تقيمي للمطعم سته من عشره
للأسف الاكل مافي لذه ولا تنوع

عقب المطعم تجهزنا لفل تخرج معزومين عليه وهذي بعض الصور اللي قدرت اصورها
الحفله كانت في فندق الموفنبيك المطار

البوفيه

نفس الشي البوفيه تقيمي له مو شي للأسف ..
سامحوني على قلة الصور السفره سريعه وما طلعنا وايد

​

 

[جوومانه]

اليوم الأخير يوم السبت

نسيت اقولكم تم تأجير سياره من بدجت budget نوع كامري بسعر اربعه واربعين د.ك من غير الضريبه لمده اربع ايام من الاربعا الى السبت ،، مع الضريبه صارت ستين د.ك . بس تم ترقية السياره الى فورد اعتقد توريوس اسمها بنفس السعر لان الكامري ما كانت متوفرة..

نكمل يومنا الأخير
من بعد الحفله وسهر قعدنا الضحى العود وين نروح ماندري المهم سوينا چيك أوت متأخر المفروض لي الساعه ست المغرب بس كلمتنا مرت خالي وقالت تعالوا نتيمع في امواج بيت ولدها قلنا اوك فصار الچيك أوت ثنتين ونص من غير اي رسوم زياده ،،

بس قبل ما نروح لهم بنتغدا ونروح سوق المحرق نشتري حلوى
ورحنا السوق وشرينا وكنا محتارين بين ثلاث مطاعم ماكي وموجود في مودا مول وعندنا في الكويت وكلينا في الاثنين و الثاني كوكوز بس هم ما كلين فيه والثالث المطعم الايراني بيرشين روم رسينا على الثالث نجربه ونحكم عليه وأقرب على البيت ..

المطعم في مارينا امواج مو لاغون اللي فيه المطاعم والكافيهات لا هذا مارينا حسيت المكان يديد ومحد فاتح بعدهم بس الايراني

وهذيل صور المطعم

المنيو

الضيافة

والمشروبات لبن خاااااثر وبيبسي يسرسح عالچبد

المقبلات سلطه روب وخيار وحمص سبيشال نوع بالشمندر ونوع عادي ونوع بالريحان

الاطباق الرئيسية
كباب مع ثلاث انواع عيش وشبزي

وقعده خارجيه عالمرسى بس بعيد اشوي ما يبينون اليخوت

وفاتورتنا

تقيمي للمطعم سبعه من عشره طبق الكباب والمقبلات مو ذاك الزود
والحمدلله على النعمه واللهم احفظها من الزوال

ونروح ونقعد في بيت ولد وخالي وسوالف لي وقت طيارتنا الساعه تسع باليل ..

المفروض نروح السوق الصيني بس قالوا لنا كله اثاث خليناه يولي واحنا بالمطار ولا الكويتيات قالوا طافكم شحلوه ومرتب وكل شي في تحسفنا ما مرينا عليه ان شاءالله اليايات اكثر ونزوره

والى اهني ينتهي تقريري البحريني اللذيذ مثل حچيهم وسامحوني على قلة الصور لان السفره رايحين لها للحفله واشوف رفيجاتي من جذي مافي فيها وايد صور وأماكن

الى لقاء قريب

​