تحية طيبة لجميع أعضاء المنتدى
اليوم راح أكتب لكم تقرير خاص بدولة الكويت الحبيبة
والتقرير راح يكون مختصر كثيراً بسبب قلة التصوير .. ولكن راح أضع معلومات كثيرة ومهمة عن بعض الأماكن السياحية والمطاعم والمجمعات
بداية أشكر جميع أعضاء المنتدى على المعلومات اللي أستفدت منها لهذه السفرة والسفرات السابقة
ولولا الله سبحانه وتعالي وبعدها أعضاء المنتدى لما أستمتعنا بجميع سفراتنا ورحلاتنا وتسهلت أمورنا جميعها
التقرير راح يكون من جزء واحد فقط لكي لا تتبعثر الأفكار والمعلومات وتكون مرتبه بشكل جيد
المعلومات :
أفراد الرحلة : 5 / أنا وأم العيال وراشد وشوق وأحمد
المدة : 3 ليالي / من الأحد (1/10/2017) ولغاية الأربعاء (4/10/2017)
الفندق : لاقونا هوتيل سويتس
موقع الفندق في بوكينج : https://www.booking.com/hotel/kw/lag...oom=#hotelTmpl
نوع الغرفة : جناح جونيور مطل على البحر شامل الفطور
المدة : 3 ليالي
السعر : 109 دينار بحريني من موقع أقودا
المقدمة
طبعاً التخطيط لهذه السفرة لم يكن بالشكل المطلوب، وكان بشكل مستعجل وغير مدروس، طبعاً أحنا في البحرين عندنا إجازة يوم تاسع وعاشر من شهر محرم وصادف هذين اليومين الجمعة والسبت ولذلك تم تعويض هذه الأيام في يوم الأحد والأثنين الماضيين، وأنا أخذت إجازة يوم الثلاثاء والأربعاء والخميس، قلت لعل وعسى أسافر فيها أو أستمتع فيها في الديرة.
يوم الخميس فليل خبرت أم العيال وشرايج نروح الكويت، قالت والله مادري كيفك، دخلت على بوكينج وأقودا أبحث عن فنادق وأسعارهم وحصلت على عدد لابأس به من الفنادق، وبعدها يوم الجمعة رجعت لأم العيال قلت لها وشلون الحين لك خاطر ولا ؟؟ قالت يالله توكل على الله خلنا نروح ..
يوم الجمعة الصبح حجزت الفندق من موقع أقودا، والظهر طلعت أصرف العملة الكويتية ولكن للأسف كان أغلب المحلات مخلص من عندهم أو ما عندهم، وبعد ساعة من صراف لين صراف حصلت المبلغ المطلوب.
يوم السبت طلعت من الصبح أبدل إطارات وفرامل وزيت للسيارة، وبعدها جهزت أغراضي، وقعدت أتصفح المنتدى على الأقل أجوف لي جم معلومة تفيدني، وبالليل رحت الحلاق وإلا أسمع صوت في السيارة، رحت للكراج قالوا لي مضخة الماي (واتر بمب) خربان ويبي له تبديل، وقالي الحين الوقت متأخر وبكرة تعال، قلت له بكرة وراي سفر الفجر، قالي ما أقدر، رحت أكثر من كراج وقالوا لي أن الشغلة يبي لها وقت وايد ولازم تجي الصبح، وفقدت الأمل في السفر، ورجعت البيت وقلت لأم العيال خلاص الأمور الله مب ميسرها، خلاص بكنسل حجز الفندق وبنقضي الإجازة في البحرين، وأتصلت بأقودا وخبرتهم بأني أبي أكنسل الحجز، قالوا لي راح ينخصم منك سعر أول ليله، بدل يمين يسار قالوا خصم أول ليله، وبعد تفكير قلت لأم العيال دام أنهم خاصمين أول ليله خلاص خلنا نروح وآنه بكرة من الصبح بروح الكراج وبخليهم يشتغلون على السيارة.
يوم الأحد طلعت من الصبح على طول شريت القطعة ورحت للكراج وقلت له يالله بدلها وراي سفر، يقولي ببروده خل السيارة تبرد شويه وبعدين بشتغل عليها، قلت له أنزين أخذ راحتك والحمدلله ما قصر جهز لي السيارة في 3 ساعات، وبعدها أتصلت لأم العيال قلت لها يالله جهزوا روحكم أكاني جايكم وبنمشي بعد ساعة، ورجعت البيت وأخذت دوش وبدلت ملابسي وركب الأغراض السيارة وحركنا من البحرين تقريباً الساعة (11:40).
خلصنا من جوازات البحرين والسعودية بسرعة لأن كلش ما كان فيه أي زحمة، وطلعنا من من الجسر تقريباً الساعة (12:20) ومسكنا خط أبو حدرية بأتجاه حدود الخفجي وكانت المسافة تقريباً 350 كيلو ..
وهذه بعض الصور من جسر الملك فهد
وهذه بعض الصور من الطريق إلى دولة الكويت الحبيبة
وأحنا بالطريق صادتنا أكثر من تحويلة وتصليحات بالشارع، واللي بيسافر على طريق أبو حدرية عليه الحذر من المطبات، لأن ركبت مطب كبير وأنا على سرعة (140) كم .. والحمدلله الأمور عدت على خير، وأيضاً الحذر في آخر 100 كيلو قبل الخفجي لأن يصير الشارع من مسارين إلى مسار واحد وصعب التجاوز بوجود الشاحنات.
وهذي صورة الحدود الكويتية
وصلنا إلى الحدود الكويتية قرابة الساعة (4:00) عصراً والحمدلله كانت الأمور كلها سهالات .. وطبعاً أنا كنت متوقع أن راح يقولون لي أدخل داخل لإدخال البيانات، لكن الحمدلله موظف الجوازات قالي أسفط جدام وتعالي داخل الكابينه وأنا أخلص لك أمورك .. وكلها دقايق وأنا داخل الكويت.
وفي حدود الساعة (5:00) وصلنا إلى فندقنا (لاقونا هوتيل سويتس) في شارع قطر في منطقة السالمية، وللأسف لم أصور ولا شيء من الفندق لأني وصلت تعبان وموهق ولكني خذيت صورة الفندق من الانترنت وصورت لكم بطاقة الفندق.
وهذي بطاقة الفندق
من الأمام
من الخلف
وبعد ما وصلنا الفندق ورحت لموظف الأستقبال وأعطيته الهويات وأخذ نسخ منهم، قالي أنا غيرت لك الغرفة اللي كنت حاجزها لأن معك أطفال وأعطيتك غرفة غير مطلة على البحر ولكن حجمها شويه أكبر، قلت له أبي أجوف الغرفتين وأختار، وكان أقتراح صحيح قلت له أنه ما يهمني الإطلالة كثر ما أني أبي وسع وراحه في المكان، قالي هذي بطاقة الغرفة ونزلوا الإغراض من السيارة وجابوهم إلى الغرفة، وماقصر بعد الموظف جاب لنا فراشات للأطفال وسرير للطفل الصغير.
ريحنا لمدة ساعة مع التفكير وين نروح، ووقع الأختيار على سوق المباركية للتمشية وتقضية بعض الوقت، ووصلنا سوق المباركية وكان زحمة شوية وتعبنا وأحنا ندور موقف للسيارة، والحمدلله بعد عناء ومشقة حصلنا على موقف قريب المصاعد، تمشينا في سوق المباركية وسوق السلاح وجميع الأسواق اللي في المباركية وفي النهاية خذينا بعض الفواكة ورحنا إلى السيارة.
الآن وقت العشاء وتم أتخاذ قرار العشاء في مقهى سليمان الشميمري الشعبي القريب من سوق شرق،
وأخترته بعد مدح وتوصية الأخت هاوية الأسفار له هذا المقهى، ولكن للأسف ذهبنا إليه في وقت متأخر وكانت الساعة تقريباً (9:45)، وقعدنا على طاولة مقابل البحر وفي موقع جميل، وانتظر أحد يجينا ياخذ الطلب، ولكن محل يعطي ويه كلش، رحت سألت أحد الموظفين قلت له شسالفة، قالي أهني أخدم نفسك بنفسك، المطعم داخل روح أول الكيشير وأدفع وبعدها روح للمطبخ المطلوب، رحت للكاشير وأخذ 3 ماعون كباب لحم وماعون شيش طاووق وكان سعر الماعون الواحد (1.250) دينار كويتي، وأخذت حمص وبطاطس كان على نص دينار، وأعطاني فيش ملونه وكل لون يدل على طبق، وقالي بعد (10) دقايق تعال أخذ الطلب، ورحت البرادة أشتري المشروبات، ورجعت أخذت الطلب وأكلنا، وأحنا ناكل قالوا خلاص بنسكر بعد ربع ساعة، رحت بسرعة أخذ قوري شاي أحمر بنص دينار، ولكن للأسف يوم رجعت سكروا المصابيع كلها اللي برع وقعدنا في الظلام، وبعدها أطردونا
المكان بصراحة وايد حلو وآنه عجبني وايد وايد وايد، والأكل أيضاً حلو، وفكرة المكان حلوة، وتنوع الطعام، يعني الواحد يقدر يروح ياخذ له غوري شاي ويقعد على البحر، وناسه، بس حلاته يكون الجو شتاء وبارد .. لكن ما يعيب المكان يوم رحنا كانت الرطوبة مرتفعة وفطسنا، وأيضاً ما يعيب المكان كثرة القطط وما عندهم مشكله بعد لو اييون يقعدون يمنا على الطاولة، يعني ضايقونا بشكل مو طبيعي، وبعدها رجعنا الفندق ونمنا على طول من التعب.
اليوم الثاني (2/10/2017)
صحينا من النوم ونزلنا إلى إلى فطور الفندق، وأنصدمت أن الفطور عادي جداً جداً جداً، صاج لبنه وزعتر وبيض مفيوح وطعمية وسلطة وكيك وحمص ولبنه وخبر لبناني، أكلنا خفيف وبعدها رجعنا الغرفة بدلنا ملابسنا ورحنا إلى مجمع الأفنيوز، وأول ما وصلت مواقف المجمع سألت موظفين الأمن المنتشرين في باركات الأفنيوز عن كيدزينيا قالوا لي أطلع من هذي البارك وروح حق الباركات اللي من خلف المجمع وبعدها لقيت كيدزينيا ودخلت في الباركات اللي جنبه ونزلنا المجمع، وبعدها بعد قمنا نسأل مرة ثانية وين كيدزينيا ووصفوا لنا أياه لين ما ليقناه وهذي صور لمدخل كيدزينيا
ورحنا لكاونتر الأستقبال قلنا لهم نبي تذاكر لطفلين قالت لنا الموظفة بـ (12.000) دينار كويتي للشخص لمدة (5) ساعات وفي بعد بطاقة بـ (4.000) تشمل اللعب في المنطقة الرياضية وتلوين الوجوه وبوب كورن مجانا وفي النهاية يحصلون على هدية، فطلع مجمع الطفلين (32.000) كويتي، وأعطونا ورقة يحق لنا زيارة الأطفال أي وقت ولمدة فقط ربع ساعة، وبعدها وحدة من الموظفات أخذت الأطفال إلى الداخل وتشرح لهم شلون يلعبون وطبعاً أهم عارفين الشغلة لأنهم رايحين كيدزينيا اللي في دبي وماليزيا.
وأنا وأم العيال رحنا نتمشى في المجمع، وبعدها حسينا بالجوع وقلنا وين نروح نتغدا، قلت لها خلنا نروح السوق القديم ونتغدا من المطاعم الشعبية الكويتية، وأول ما دخلت السوق شميت ريحة الكباب فايحه في المكان دوخت راسي، قلت لأم العيال خلنا نروح هذا المطعم ريحه الكباب دوختني، قالت يالله، وبعد دخلنا المكان وسألنا القرسون أكتشفنا بأن المطعم هندي وأكلهم كله حار، أعتذرنا منه وبعدها أحترنا بين مطعم زوارة وبزة، ووقع الأختيار على مطعم (كافيه بزة) وهذا الرابط (تقرير عن مطعم كافيه بزة).
https://www.arabtrvl.com/vb/t30246.html
وبعد ما خلصنا من الغداء، رحنا لأطفال في كيدزينيا ودخلنا عندهم وقلنا لهم يالله خلص الوقت والحين لازم نمشي، وبعدها ركبنا السيارة وطلعنا من مجمع الأفنيوز بأتجاه مصنع الشمالي للحلويات الشعبية في منطقة الشويخ بحكم أنه قريب من مجمع الأفنيوز، طبعاً كتبت في قوقل ماب عن المصنع لكن ما وداني عند المصنع، وداني قريب منطقة المصنع، وبعد سؤال أحد الأشخاص وصف لنا المكان ورحناه وهذه بوابه المصنع والمحل اللي بداخل المصنع
وشرينا منه الدرابيل والرهش والغريبة والكيك وشريت شيء ما أعرف أسمه لكنه وايد حلو، وبعدها قلت له خلهم كلهم بكارتون واحد أحسن وأرتب للأغراض.
وبعدها قعدت مع أم العيال الحين وين نروح، قالت لي كيفك، قلت لها لكم خاطر تروحون متاحف، قالت أي مكان بتودينا بنروح، قلت لها عيل بنروح متحف قرين، وقلت لها قصة المكان وتشجعت أم العيال، وضبطت الجارمن مع قوقل ماب وودونا إلى المتحف بالضبط، وأحنا رايحين المتحف مرينا على مجمع 360 وقلت حق أم العيال بعد ما نخلص من المتحف بنيي حق هالمجمع.
وصلنا المتحف وطلع المكان شويه ظلام، وأنا توقعت أنه في كشافات ومصابيح، لكن قلت دام أني وصلت بنزل، نزلنا من السيارة العيال خافوا من المكان وقالوا ما نبي ندخل رجعونا السيارة، رجعتهم السيارة وقلت لهم سكروا على روحكم الباب ولا تفتحون حق أي أحد، ونزلت أنا وأم العيال ودخلنا داخل وتمشينا في البيت والمتحف ولكن صار لنا موقف داخل البيت ههههههههه بعدين بقوله لكم، وهذي بعض الصور اللي التقطها للبيت من الخارج
طبعاً في صور كثيرة للمكان لكن للأسف راحت علي لأني صورتها عن طريق السناب شات ونسيت أحفظها، وطبعاً المكان هو عبارة عن البيت وبعدها فيها متحف به صور الشهداء وبعض ملابسهم وأسلحتهم، المكان ممتاز ولكن ينصح بالذهاب إليه في النهار وليس بالليل، لأن يوم دخلنا المكان كنا أنا وأم العيال بروحنا وأحنا نتمشى بالصالة سمعت صوت باب تسكر بقوة مب طبيعية معنه ذاك اليوم ما كان في هواء ولا كان أحد معانا معناه أن البيت مسكون، لذلك أنصح الذهاب إليه في النهار.
وبعد ما خلصنا من متحف القرين، ذهبنا إلى مجمع 360 للتمشيه والعشاء فيه لأن الأطفال من الصبح يبون ياكلون من ماكدونالز يا على الغداء أو على العشاء، وأنا كان خاطري أتعشى في مطعم الحجة أو ملك الكباب ولكن أنصعت لأوامرهم، ووقفنا في المواقف الخارجية وتمشينا إلى داخل المجمع، وأول ما دخلنا عجبتني هذه الثريا
وبعدها تمشينا في المجمع وأعجبتنا بعد النافورة اللي داخل المجمع، أستانسوا عليها اليهال ما يبون يتحركون من عندها، وبعدها رحنا للطابق الثاني وعلى طول عند المطاعم وطلبنا عشاء من ماكدونالدز، وبعدها أخذنا عصير من محل جنب مطعم بيتزهت نسيت أسمه، طريقته يعطيك الكاس تحطه عن فترة برع أمام المحل وأهو يحك الفواكة في العصارة عنده داخل ويطلع العصير الفتحة اللي برع .. فكرته حلوة، وأيضاً نفس المحل يسوون سلاطات على حسب اللي تطلبه وفرش، وبعدها قعدنا نتمشى ولقينا كشك يسوي حلويات حلوة أسمه بابابوبل وشرينا من عنده حلويات كثيرة، ويوم نروح له كان قاعد يصنع حلاوة وعطانا نذوقها كانت حارة ولينه وأول ما تصير بارد تصير يابسة وكانت لذيذه.
وبعدها طلعنا من المجمع وتوجهنا إلى سوق السالمية القديم، ودخلنا محل مذركير لأنه كان عنده تخفيض 70% وأول ما دخلنا قالوا بعد ربع ساعة بنسكر، أشترينا بسرعة بسرعة وطلعنا وبعدها على طول إلى الفندق بعد يوم شاق وطويل ومليء بالفعاليات
اليوم الثالث (3/10/2017)
قعدنا الصبح من النوم وبدلنا ملابسنا على طول إلى سوق المباركية إلى مطعم دلق سهيل، بعد ترشيحه من بعض الأعضاء في المنتدى ومدحه، ضبطنا المطعم على القوقل ماب ووادنا على طول له، ووقفنا السيارة وهالمرة كانت المواقف خفيفة ما كان فيها زحمة نفس أول يوم، ونزلنا بحث عن المطعم والحمدلله حصلناه وبسهولة، وهذا رابط تقريري عن مطعم (دلق سهيل).
https://www.arabtrvl.com/vb/t30247.html
وبعد ما تريقنا كانت الوالده موصيتنا على ورد محمدي مجفف، وشريناه لها وطلعنا من السوق، وضبطنا قوقل ماب إلى متحف بيت العثمان، ولكن هذي المرة قوقل ماب عفسنا وخبط فينا، وبعد السؤال من المارة وصفوا لنا المكان، والحمدلله حصلنا ولكن بعيد كل البعد عن المكان اللي ودانا له قوقل ماب.
وبعد ما وصلنا المتحف ووصلنا عن الباب قال لي موظف التذاكر باقي نص ساعة ونسكر، قلته يا أخوي أنه خذ لي نص ساعة مضيع عطنا شويه وقت زيادة، قالي المتحف يبي له ساعتين أو أكثر، قلت له آنه الحين واصل وبدخل لو 5 دقايق، دفعنا دينار عن كل شخص، ودخلنا بسرعة بسرعة علشان نجوف كل شيء قبل ما يخلص الوقت وخذينا بعض ربع ساعة زيادة على الوقت ولكن هم ما خلصنا كل شيء.
المكان جداً جداً جداً رائع وأكثر مكان عجبني في الكويت، لكن للأسف الوقت كان مداهمنا ولفيناه بسرعة بسرعة وبعد ما نقدر نضيع وقتنا أكثر ونرجع له مرة ثانية، لأن ورانا أماكن كثيرة نروحها، ولكن أنصح أي شخص يروح الكويت يمر على هالمتحف، المكان حلو ومكيف وفيه أشياء رائعه وتستحق التأمل فيها.
وبعد ما خلصنا من متحف بيت العثمان، وجهتنا الآن إلى المركز العلمي، ضبطنا الجارمن على المركز العلمي وما كان بعيد عن متحف بيت العثمان لكن الأزدحام عطلنا كثير لأن كان وقت الطلعة من الدوامات، ووصلنا المركز العلمي حوالي الساعة (2:00) ظهراً، طبعاً رحت المركز العلمي هذي اليوم وكان يصادف يوم الثلاثاء بسبب أن عندهم عرض ليوم الثلاثاء بعد الساعة (1:00) ظهراً تكون التذاكر بنصف السعر.
أخذنا (8) تذاكر
(4) تذاكر لمركز الاستكشاف
(4) تذاكر للأكواريوم
ولم نأخذ تذاكر للسينما لأن دخلناها من قبل، ولأن الوقت متأخر علينا ونبي نروح نتغدى، وطلع مجموع التذاكر (13.000) دينار كويتي، وهي صورة أيضاً لأسعار التذاكر يوضح فيها أسعار التذاكر العادية والمخفضة ليوم الثلاثاء.
وبعد ما خلصنا من المركز العلمي، على طول رحنا إلى مطعم فريج صويلح للأكلات الكويتية الشعبية، وكان أيضاً قريب جداً من المركز العلمي، وفي الرابط أدناه تقريري عن مطعم فريج صويلح.
https://www.arabtrvl.com/vb/t30248.html
وبعد ما خلصنا من الغداء في مطعم فريج صويلح، توجهنا مباشرة إلى أبراج الكويت، بالرغم من زيارتي للكويت (3) مرات إلى أني ولا مرة زرت أبراج الكويت، وأوصل ما وصلت عن البوابة قالي البواب على وين قلت له على الأبراج قالي المشاهدة ولا المطاعم، قلت له المشاهدة قالي روح وقف برع، المواقف الداخلية للمطاعم فقط، رحت وقت السيارة وتمشينا بالقرب من الأبراج لأن يومها كان الجو خيالي كان هواء ومافيه أي رطوبة، وبعدها رحنا عن كشك التذاكر ودفعنا على الكبير (3) دينار وعلى الصغير (1.5) المجموع (9.000) دينار كويتي،
وبعدها توجهنا إلى المصاعد
وصعدنا إلى الأعلى وتمشينا وصورنا وللأسف حصلت على هذه الصورة فقط
وبعد ساعة تقريباً نزلنا، طبعاً أنا أخترت وقت يكون فيه نصفه نهار ونصفه ليل، علشان نستمتع بمناظر الكويت بالنهار وبالليل وهذي صورة للأبراج بالليل
وبعدها مشينا من الأبراج وتوجهنا مباشرة إلى الفندق علشان نجهز أغراضنا ونسكر شناطنا، وأول ما وصلت الفندق رحت لمطعم مشويات وفطائر بالقرب من الفندق لأن ذقنا منه الفطائر أول يوم وكانت وايد حلوة .. وشريت من عنده فطائر الجبن واللبنة .. وأيضاً بجنبه محل عصير وأشتريت منه عصير مانجو فرغلي وكان أيضاً وايد وايد حلو وهذي صور المطعم ومحل العصير وصورة أيضاً للعشاء.
وبعد هذا الطعام، سكرت الشناط ووديتها السيارة وخليت بس شنطة وحدة للملابس اللي لابسينها وبعض الأغراض المهمة، وبعدها نمنا شويه من وقت علشان بكرة ورانا خط.
اليوم الرابع (4/10/2017)
الساعة 4 فجراً صحيت من النوم، وبدلنا ملابسنا ونزلت الأغراض إلى السيارة وبعدها صحيت اليهال ووديتهم السيارة وعملت شيك أوت وحركت من الفندق تقريباً الساعة (5:00) الفجر.
والحمدلله وصلنا إلى مملكة البحرين الساعة (10:30) صباحاً ..
وإلى هنا أنتهى تقرير رحلتي إلى دولة الكويت الحبيبة
أسمحولي إذا كان في أخطاء في التقرير أو كان التقرير مب مرتب
لأني حبيت أخليه من جزء واحد فقط
وتقبلوا تحياتي
أخوكم بو راشد