فندق المارينا رويال سويت

[جواهرر]

السلام عليكم جميعا

اليوم السادس

الجمعه 23 / 12

اليوم ريوقنا كان في مطعم الكلحه بالسالميه خلف المارينا مول

و بالتحديد عند فندق دلال سيتي

و ما شاء الله المكان داخل المطعم فلللل قعدنا برع و الجو بااارد و هذا المنيو

ضيافة المطعم خبز و مخلل و خضره

فول و فلافل

فتة باذنجان

و طلبنا شاي حليب و هذا داخل المطعم

دخلنا المطعم عشان نكلم المسؤول لانه الفاتوره غلط اعتقد طلبنا عصير و ما يابوه

بس كانوا حاسبينه في الفاتوره

المهم شبعنا الحمدلله و ما يحتاي اقيم الاكل لانه 10 / 10

كنت مقرره اليوم ازور مناطق قديمه في الكويت

فشاورت ام حسين على اساس ازور الفنطاس و الفحيحيل

بس قالت ما فيها شيء مجرد مطاعم و ما عندهم شيء اثري او اسواق شعبيه

و هذا البوليفارد مرينا عليه

و توجهنا للفحيحيل

الحراره بدت ترتفع و الحين وصلت 18

وصلنا المنطقة و أذن الظهر وقفنا و نزل زوجي يصلي و ما شاء الله ما شيء مكان

بعدها قلنا بنشوف الاسواق بس طلع السوق عادي مثل سوق نايف اللي عندنا

طبعا اليوم جمعه و المحلات كلها مسكره فشفنا مجمع الكوت و دخلنا

و هاي البحيره و النافوره في الليل تكون روووووووعه مع الاضاءات

​

 

[جواهرر]

لازم شوية لعب

انا سرت اصلي و العيال ساروا ياكلون سينابون

طلعنا من الكوت و توجهنا للبوليفارد

شفنا مطعم آشاز و قلنا خلاص غدانا عندهم بس للأسف كان مسكر

و قالوا باجر بيفتحونه تمشينا شوي و طلعنا المكان ما فيه شيء و المول ما حبينا

ندخله و برع الجو كان شوي حار


رجعنا للمارينا و خذنا سندويشات من كوردو الجبد لذيييييييييذ

و عصاير من المنعش لانه امس في الليل بعد خذنا من عنده

خذنا رقي (يح ) ( حبحب ) و غاليه لذييييييييذ

للأسف اليوم كنت ناسيه سوق اليمعه و الا ما كنت بطوفه


و كان خاطري اطلع رحلة بحرية لجزيرة فيلجا ( فيلكا ) و الصبح اتصلت و قالي

الشخص 15 دينار x اربعه يطلع 60 دينار قلت وايد و كلمت ام حسين العصر

عطتني ارقام و عنوانين و الحمدلله قبل ما اوصل لهم قالت مسكرين

بس توني تذكرت ام حسين ليش اللي كلمته الصبح قال في رحلات ؟؟؟

المهم النهار طويل و قلنا يالله على مقهى السالميه

و احلى لقيمات

و لازم دلة القهوة بس ما حبيتها طعم القهوة نيء

و اليهال يلعبون

​

 

[جواهرر]

طلعنا من مقهى السالميه و توجهنا الى مركز السلطان للجمله بمنطقة شويخ

و بعدها الى اسواق المباركيه

و تمينا نتمشى خارج السوق

و بالصدفه شفت بيت احمد

و انا تذكر في تقرير قبل كان لاختنا ابرار او حد ثاني سامحوني

ما اتذكر بس دورت وايد في البوابه ما لقيته لاني اذكر شايفه بيت احمد

المكان وايد صغير و مزحوم بالاغراض يا دوب حاطين كم طاولة للتقهوي

اخترنا طاولة برع و تريينا يمكن 5 دقايق محد عبرنا دخلت سألتهم متى تسكرون قال الحين

و الساعه كانت 10 و نص قلنا مالنا الا ساحة المطاعم

خذنا صحن كباب

واحد كشري و ما كنا يواعه بصراحه

خلصنا و رجعنا للفندق


كان هذا اليوم يوم الاكتشافات و الحمدلله عدى على خير و استمتعنا

اشوفكم في اليوم السابع و اماكن جديده


دمتم بود

​

 

[جواهرر]

يوم الجمعه اغلب المحلات تسكر الظهر وتفتح العصر
ومثل ما قلت لج الفحيحيل والفنطاس مافي شي اثري
لانها كانت في القديم منطقه زراعيه تكثر فيها المزارع والناس تطلع كشتات هناك
راحت المزارع وصارت مكانها البنايات والبيوت

البوليفارد ليش مادشيتي المول مالهم ...وترى ايام ما تيون توه فاتح المنتزه جديد
وزين انكم تمشيتوا فيه
الكلحة ممتاز ...بس اول مره اعرف مكانه عند المارينا
انا خابره مكانه الاول اللي تقريبا يطلع على شارع البلاجات

اما فيلجا
انا قلت لج عن العبارات اللي تطلع من مينا نادي رأس الأرض كانت اسعارهم رمزيه ومع السياره بعد

وكلمت صديقتي الفيلجاويه اللي أكدت لي ان موقفين لأن المرسى لهم بفيلجا يصلحونه

اما اللي قالو لكم ب ١٥ دينار الصراحة اول مره اسمع عنهم
خابره ام الخير سعرهم ٥ دنانير
بس ما ادري اذا في نزول بفيلجا

فيلجا الحين مهجوره الا من المنتزه اللي مسوينه هناك مع اني مارحت له بس وايد من الأهل راحوا
ان شاءالله يسنعونها وتروحون بالزيارات اليايه
يعطيج العافيه على الجزء الجميل والجولات الأجمل
متابعيين​

 

[جواهرر]

صباح و مساء الخير

نكمل وياكم اليوم السابع

السبت 24 / 12

اليوم توجهنا الى المباركيه للريوق

اخترنا دلق سهيل

الطلب نفسه بيض و طماط خصوصي و حمسة دجاج

و الكرك لابد منه

خلصنا الريوق الحمدلله و طلعنا باتجاه المتحف الوطني بس كان مسكر للترميم

كل مكان مسكر المتحف و البيت الامريكي لان الوقت كان الظهر فتوجهنا لحديقة الشهيد

الحديقه حلوة للتمشي فقط و الجلوس للاسترخاء

و هذا داخله كافيه او مطعم

​

 

[جواهرر]

و هني مكان المصلى

و هذا الجدار عليه صور و اسماء الشهداء الله يرحمهم

و بعد الحديقه توجهنا لفندق سيتي تاور لانه اختي كانت بتحجز في فندق آدمز

لكن ما حصلت حجز و اختارت هالفندق و قلت بسير اشوف المستوى

و الفندق ما شاء الله مكتض بالاماراتيين و زوجي طبعا حصل ربيعه و قال احنا عوايل

من 30 شخص ما شاء الله و غير الباقي يايين في الطريج


هاي شقه من غرفتين

و هاي الماستر

و الشقه فيها حمامين و مطبخ
تقييمي لها جيد و لكن مب ممتاز

طلعنا و توجهنا الى محل نقوه من هيل و زعفران توصيه من اخويه طالب مني كيك مشكل
عندنا في الامارات هيل و زعفران لكن هذا غير و في صدد افتتاح فروع خارج الكويت

​

 

[جواهرر]

و هذا تحت الترميم

توجهنا لمجمع الصالحيه و بالاخص مطعم دكاكين

ما كنا يواعه وايد طلبت فتة باذنجان

و حلاوة غيبوبه

شربت بيذان

و بعدها طلعنا باتجاه متحف طارق رجب و طلع هذا الاسلامي
و الدخول بدينار للشخص لكن ما ينفع للاطفال

و التصوير ممنوع في بعض الغرف

طول الوقت كنا على اعصابنا نخاف اليهال يكسرون شيء

المتحف ما عجبني بصراحه و خاصه مع اليهال و يوم طلعنا مشينا شوي الا اشوف واحد ثاني

مكتوب عليه متحف طارق رجب و اعتقد هذا اللي كنت ابغيه مب الاولي

رجعنا الفندق نريح و نصلي و بعدها توجهنا لمقهى سوق البحار اعتقد بجانب ميناء شويخ

اعتقد هذا اول مقهى لانه الالعاب اللي فيه من التسعينات او يمكن الثمانينات
و كلهم ما يشتغلون و مكسرين يا ريت بس يهتمون و يرممون المكان

فيه وايد محلات للتحف

بصراحه المعروضات وااااايد حلوة و اغلبها صناعه يدويه

​

 

[جواهرر]

انا عن نفسي وايد احب هالسوالف لكن اسعارهم شوي مرتفعه و قلت حق عيالي

باخذ لكم اي شيء فيه سيارات تحتفظون فيه في غرفتكم قالوا ما نبغي

و عندهم خيم و جلسات

خذنا خبز رقاق بالزعتر و النوتيلا لليهال

غوري شاي حليب

و اعتقد بعد طلبنا عرايس

و هاي جلسات خارجيه

خلصنا و رجعنا للفندق و مرينا محل العصير عند الفندق و خذنا عصاير
و انا خذت عصير اسمه هيروشيما فيه تمر لكن طعمه لذييييييييييييذ

و الحمدلله انتهى يومنا و استمتعنا فيه

و انتظروني في اليوم الثامن

 

[جواهرر]

السلام عليكم

نكمل وياكم جولاتنا الجميله

اليوم الثامن

الاحد 25 /12

الجمعه و السبت الجو كان شوي حار

لكن اليوم الحمدلله تباشير الخير من الصبح

اخترنا الريوق في الكلحه للمرة الثانيه و اليوم المطعم فاضي

خذت راحتي بالتصوير

الضيافه

غيرنا و طلبت فتة حمص

طلبنا صحنين فلافل لانه بصراحه لذيييييييييذ

بيض و طماط

خلصنا الحمدلله و دخلت المحل اللي عند المطعم اعتقد اسمه سوق الميره

اذا ما كنت غلطانه لكن السوالف اللي عندهم خطييييييييره

و نفس البضايع اللي في السلطان لكن ارخص

تمشيت و صورت وايد بالتليفون و طلعنا باتجاه حولي بارك لانه صارلي كم يوم ادور حدايق

اوقات الحديقه

للأسف الالعاب الخارجيه كانت مغلقه و يفتحونهم العصر

لعبناهم في الالعاب المغلقه

خذت كابوتشينو

رجعنا الفندق لاني كنت بحجز غرفه لاختي و زوجها و ولدها من كم يوم و احنا

في الانتظار و اخيرا اتصل فيني المسؤول و قال الغرفه موجوده رجعت عشان احجزها

و نصلي و بعدها توجهنا الى الافنيوز من اول يوم وزوجي خاطره يسير

​

 

[جواهرر]

العيال ذابحنهم شيك شاك وين ما يشوفونه لازم يحنون يبغون ياكلون منه

دخلناهم و احنا سرنا نشوف و نختار من مطاعم الشيراتون هندي و لبناني و ايراني

و اخترنا بعد الاستعانه بصديق ( ام حسين ) الايراني

اخترنا جلسه داخليه اهدى و بعيد عن ازعاج ولدي

و نشوف بعض من صفحات المنيو

ضيافة المطعم خضره و مخلل و خبز تنور حاااار

مطعم ايراني لازم نطلب لبن منعنع

و هذا التنور

كباب كوبيده لحم مع 3 انواع من العيش

كباب سلطاني دجاج

وصلوا العيال و عطيتهم الكيمره يصورون المطعم

و الفاتوره 15 دينار و 300

الحمدلله الاكل كان لذييييييذ و راااااائع

طلعنا و تمشينا في المول

و اتجهنا للسوق القديم احلى مكان في الافنيوز

و اخترنا نقعد عند هالكافيه

خلصنا الشاي الحلو و كملنا تمشيه

حبيت الكراسي و الديكورات في هالمطعم

​

 

[جواهرر]

خلصنا الجولات و رجعنا الفندق للصلاه و الاستعداد
ل اللقاء الجميل باحلى عضوات منتدى العرب المسافرون

في البدايه كنا متفقين على مطعم بابل لبناني توه فاتح و زحمه فضيعه عليه و لازم حجز مسبق
ترى لين الحين اسمع الناس يتذمرون لانهم ما يحصلون مواعيد لشهر جدام
اششششششششششششدعوه

مطعمنا اسمه طلوا احبابنا و بالفعل طلوا وحده ورا الثانيه اهلا و سهلا فيكم

وصلت و كانوا اول المنتظرات الايمان و توبليرون ( ام حسين )

و بدينا بتصوير المنيو قبل ما يوصلون الباقي

وصلوا الصديقات نمارق و كويتيه متنقله يا هلا و مسهلا

طلبنا الطلبات و وصلت ضيافة المطعم اولا الخبز

الزيتونات و معاهم صاج صغيرون عشان نسخن الخبز عليه

و هاي الخبزة من ايد ام حسين للتسخين حبينا الفكره و بصراحه اول مره نشوفها

و هاي الجلسات خارج المطعم

و دخلنا نصور من داخل المطعم

انا وايد احب هالاحواض و الشلالات احب اسمع صوت الماي
و هاي بعض من الجلسات و كل وحده تختلف عن الثانيه

خلصت التصوير و رجعت للحبايب نكمل سوالف و ضحك و صلت طلباتنا

المقبلات كلها لذيذه

العصاير

كبه شكلها يشهي

العرايس و الكباب و شيش طاووق

و هذا طلبي و تحته الفحم

و هذا وايد حبيته على طاولة الاكل و نفس النقشه على الكراسي

وصل وقت الحلو و تشاركنا ويا السوالف و طبعا كل شيء حلو

و خلصوا الثلاث ساعات و ما حسينا فيهم ابدا لهينا بالسوالف و اليمعه الحلوه
و العيال مع ابوهم في مقهى السالميه يلعبون

استمتعت وااااااااااايد و الايمان اول مره التقي فيها و كان ودنا نشوف ليمونه بس اعتذرت
لظروف خاصه و كلهم ما يتخيرون عن بعض و نعم الصديقات العزيزات

و ان شاء الله نلتقي مرات و مرات

رجعنا لبنيد القار و حصلنا المطعم اللي يدوره زوجي من اول ما وصلنا الكويت

خذوا سندويشات شوارما و كباب و رجعنا البيت اقصد الفندق

و هاي الهديه الجميله من الصديقات العزيزات شكرا لكم من كل اعماق قلبي

و بهذا انتهى اليوم الثامن و كان يوم من بدايته جميل و رائع و مفعم بالنشاط و المرح

اشوفكم في اليوم التاسع

دمتم بخير

​

 

[جواهرر]

السلام عليكم
وسلامات ام علي ريحي شوي لاحقين على التقرير

بما اني صورت معاج بالمطعم خل انزل صوري
هني

اولا المطعم لبناني واسمه يدل على ترحيبنا بالغاليه ام علي

تستاهل الضيافه كلها

المنيو

رجعت اصور الكلمات ههههه

صاج الخبز والزيتون

السلطه والمقبلات

حمص ومتبل ومتبل شمندر

كبة البرغل

عصير ليمون بالنعناع

المشويات

مشويات الشيش طاووق على الفحم

روابط يوتيوب لطلعتنا
الصاج والخبز

والحلووو

المطعم

​

 

[جواهرر]

السلام عليكم
وسلامات ام علي ريحي شوي لاحقين على التقرير

بما اني صورت معاج بالمطعم خل انزل صوري
هني

اولا المطعم لبناني واسمه يدل على ترحيبنا بالغاليه ام علي

تستاهل الضيافه كلها

المنيو

رجعت اصور الكلمات ههههه

صاج الخبز والزيتون

السلطه والمقبلات

حمص ومتبل ومتبل شمندر

كبة البرغل

عصير ليمون بالنعناع

المشويات

مشويات الشيش طاووق على الفحم

روابط يوتيوب لطلعتنا
الصاج والخبز

والحلووو

المطعم

​

 

[جواهرر]

السلام عليكم

اعذروني على التأخير قلت بريح عيوني و راسي شوي من اللاب توب

و الآي باد لاني وايد تعبت

و نكمل وياكم الجولات الجميله و اماكن جديده و حصريه للنساء

اليوم التاسع

الأثنين 26 / 12

الجو اليوم جميل جدا و ريوقنا قررنا انه يكون في كافيه بزه

موقعه على شارع الخليج العربي و يبعد عن فندقنا تقريبا 7 دقايق

وصلنا و كان الدور الثاني ما فيه مكان يلسنا تحت و نشوف المنيو

اكتفيت بهذه الصور لاني نزلتها في التقرير القديم

لوحات جداريه جميله

صورة جميله جدا لباب المطعم

طلبنا حليب بالهيل و الزعفران

طلبنا ريوق البيت العود لشخصين لكن يكفينا احنا كلنا و يزيد

طبعا امس كنت قاعده مع الجميلات و من ضمن السوالف تكلمنا عن جلابيات الحريم

الدراعات الكويتيه و انا من كم سنه ازور الكويت و ما كنت اعرف عن اماكنهم بس اسمع

من الناس و و عرفت مكان واحد او اثنين و البنات ما قصروا دلوني على مكانهم و توجهنا

بالقرب من جيت مول

اول واحد مكه مول

عندهم تفصيل و جاهز و ما لقيت شيء يناسبني غير قطعه وحده بس

خلصت من مكة مول و توجهت الى زايد مول

و هذا لقيت فيه المطلوب و ما خليت شيء في خاطري بس للأسف الوقت تأخر

و كانوا بيسكرون و بيفتحون مره ثانيه العصر
​

 

[جواهرر]

المكانين عباره عن محلات للملابس و الخام ( اقمشه نسائيه )

خلصنا و قلنا بندخل جيت مول و نشوفه

حبينا المول من اول ما دخلنا

توجهنا اول شيء للمصلى و بعدها عند الالعاب عندهم فن سيتي


حصلت كافيه و بغيت اصوره لكن شفت مسؤول كويتي ياني و قال ممنوع التصوير

قلت ليش يعني مجرد صور قال بسأل و برجع رجع و قال المطاعم ممنوع تصورينهم

اكتفيت بتصوير المنيو

بصراحه ما كان لي خاطر اصور لاني تضايقت يوم قال ممنوع تصورين


بغيت شاي مغربي قال ما عندنا فطلبت شاي لومي

شفنا مطاعم حلوه و اول مره اشوفهم بس بعدنا شبعانين

اللي يعرف الشيف جنان العصفور انا من أشد المتابعات لها على الانستقرام

و السناب و عرفتني على اماكن و مطاعم يديده و حصريه في الكويت و قررنا

اليوم نجرب واحد منهم و موجود في منطقة المهبوله

منطقة المهبوله سكنا فيها قبل و تغيرت وايد و تطورت

صاحب المطعم كان دكتور في الجامعه و تقاعد و قرر انه يفتح هالمطعم

و يديره بنفسه الله يوفقه و يرزقه كل خير نشوف المطعم

نشوف المنيو في الآي باد

الضيافه

كان خاطري اجرب هالبطاط بس كلهم قالوا ما نبغي

​

 

[جواهرر]

الحلويات

اكتفي بهالصور لانها وااااااايد و لازم تجربون بنفسكم

طلبت بيتزا لبنانيه عباره عن خلطة مسخن لذييييييييييييييييييييييذه

باستا لليهال

و المارغريتا لابد منها

حتى تقديم الملاعق عندهم مدروس بدقه و ذوق

و التحليه كيكة الموز لذييييييذه

و شوفوا الفاتوره وينها

و خلصنا الوجبات اللذيذه اللي انصح الكل بزيارة هالمطعم و تجربتها

و هذا صاحب المطعم الدكتور عبدالعزيز و يخدمنا بنفسه

خضار مزروعه و طازجه ريحان و نعناع و غيره

و هذا الجدار الخاص بالمطعم و تكتبون عليه اللي تبغونه و هاي كتابة ولدي

و هاي انا

و هذا ولدي الثاني

و الدكتور يودعنا

بعدها توجهنا لمركز جابر الاحمد الثقافي اخيرا

كنت استانس و انا اشوف هالمبنى كل يوم و كنت اعتقد انه بعده ما افتتحوه

الجو كان بااااااااااارد و هوا شديد

​

 

[جواهرر]

المكان بصراحه راااااااااااااااائع و جميل جدا

الممشو وايد حلو و التصوير في الليل احلى

و هاي الصوره ذكرتني بالنمسا عندي نفسها تقريبا صورتها في الليل كانت عند النهر

و هني على يسارنا مطاعم و كافيهات وايد عليها زحمه

هذا مطعم بيت شكري

شفنا نافوره في النص و الناس بدت تتجمع فسأل زوجي عامل واقف قاله الساعه 7

بتشتغل النافوره و كان باقي 10 دقايق و كانت صدفه جميله بصراحه

و بدا الاستعراض

 

[جواهرر]

طبعا النوافير الراقصه وياها موسيقى

الوان و اشكال جميله جدا جدا

و هاي بصراحه احلى شيء وايد حبيت الحركه

و خلص الاستعراض الجميل و استمتعنا بمشاهدته و اليهال وايد استانسوا

بصراحه اول مره في حياتي اشوف نوافير راقصه بالقرب هذا لانه اللي عندنا

في دبي مول نكون قاعدين في المطعم و نشوفه من بعيد و لا مره قربنا من المكان

و كان خاطري اجرب كافيه لوف جار شوقتني ابرار عشان اجربه بس للأسف وايد

زحمه عليه و الناس واقفه طوابير و ارقام قالوا يمكن تتريون ساعه

قلنا ما نقدر بس استانسنا بالمكان و الجو كان وايد بارد و رجعنا الفندق

لانه اختي و زوجها و ولدها وصلوا و الباقي ما يابوهم عشان اختي تاخذ راحتها

في التسوق

صلينا و كان الوعد نتعشى في المباركيه لكن زوج اختي متخوف انه ندخل

السوق و ما نطلع

فقلنا نوديهم مقهى السالميه نتعشى و نرجع عشان يرتاحون من مشوار الخط

للأسف ما صورت اجرنا خيمه عشان نتدفى من البرد و طلبنا مشاوي و نخي

و خبز رقاق و شاي حليب

و خلص يومنا الجميل على خير و نشوفكم في اليوم قبل الاخير

دمتم بود

​

 

[جواهرر]

بسم الله الرحمن الرحيم

اليوم التاسع

الثلاثاء 27 / 12

اليوم المفروض يكون يوم مغادرتنا للكويت لكن مددنا يوم عشان اختي

اول مرة تزور الكويت و لازم ادليها الاماكن الحلوة و اللي نحبها

الشقه اللي قعدوا فيها كانت غرفة و صاله و حمامين و كانت كبيره وايد

و طبعا كانوا حاجزين غرفتين حق باقي الايام لكن يوم شافوا الوسع في الشقه

و هم بس ثلاثه قالوا كفايه هاي حلوه و طلبوا انهم يتمون فيها لكن هاي اطلالتها

على البحر و كانت ملاصقه لشقتنا و محجوزه لباقي الايام فغيرولهم لشقه ثانيه

مقابله المدينه


طلعنا بسيارتنا و السياره الثانيه خليناها لولد اختي يبغي ياخذ راحته بالنوم

الوجهة للمباركيه و للأسف ما لقينا مكان في دلق سهيل

طلبنا صحن بيض و طماط

صحن بيض عيون

مشلتت عكاوي

اصياخ جبد ( كبده )

بالاضافه لغوري شاي احمر و شاي حليب و عصير برتقال


خلصنا الريوق الحمدلله و انطلقنا للسوق

و ما شاء الله عليهم الرياييل دخلناهم لسوق الاقمشه و الدشاديش ما بغوا يطلعون


خذوا غتر و قحافي و اقمشه طبعا نفس اللي عندنا بالضبط لكن ارخص

شفت هالقطاوة توهم مولودين و يزاهم الله خير اللي حطوهم في كرتون

وصل ولد اختي و رجعنا مره ثانيه لسوق الاقمشه عشان يشتريله نفس ابوه

تمشينا شوي في سوق البشوت و اغلب المحلات سكرت

الغدا بغيناه في فريج صويلح لكن الرياييل يبغون بحري و نصحوهم بالشمم

لكن يحاتوني انا قلت مب مشكله بسير وياكم و اشوف يمكن المطعم يطلع حلو

بصراحه ما توقعته بهالنظافه و الرقي توقعته اي كلام و كان مزحوم عل الآخر

طلعنا الدور الثاني كباين و مغلق بطريقه حلوه نشوف المنيو

طلبنا شوربة عدس

​

 

[جواهرر]

و الضيافه معبوج و خضره و خبز تنور

طلباتنا كباب دياي حقي مقي

شربت بيذان

و البحري حمسة ربيان و قباقب و اعتقد السمكه الكبيره شعم ما ادري شو سامحوني
مالي بهالسوالف

الحلويات و البقلاوة

و الحمدلله خلصنا و الاكل عجب الكل و محد ذمه

خلصنا من المباركيه و كان الوعد مكه مول و زايد مول

و زوج اختي تعب و قال بيرجع الفندق ويا ولده و احنا ما شاء الله ما نتعب

لازم لآخر لحظة نتسوق

خلصنا من السو ق و سرنا ندور سوق العربيد و درنا لين دار راسنا

و اخيرا حصلت وحده يزاها الله خير دلتنا و قالت ورا جمعية الفروانيه

و حصلنا المكان و نزلنا و تشرينا و فصلنا طبعا الدراريع اغلبها نفس اللي

في زايد مول بس هذاك ارخص و هني اغلى تقريبا ب 5 دنانير و اكثر

و عقب السوق رجعنا لعصاير المنعش و سندويشات كوردو

و رجعنا الفندق و ما شاء الله الضباب نازل تحت و البنايات ما تبين

و قعدت ويا اختي و ولدها نرتب الاغراض و نسكر الشنط و لولاهم و الله جان انكسر ظهري

محد راضي يساعدني لا العيال و لا زوجي لانه تعب من الحواطه و كلهم رقدوا

و الحمدلله خلص يومنا الاخير و باجر بنغادر الى الدمام

ان شاء الله استفدتوا من هالجزء و انتظروني في يوم الوداع

دمتم بود