فندق وكازينوا بيراميزا سويتس القاهره

زهرةة البنفسج

:: مسافر ::
إنضم
16 ديسمبر 2018
المشاركات
1,007
مستوى التفاعل
0
النقاط
0
العمر
40
السلام عليكم ورحمة الله
صباح \ مساء الخير على جميع الاحبه الاعضاء والزوار الكرام

ما بتكلم ف القدمات كثير .. كل شيء بقوله ف التقرير ؛ لكن ..
هذا اول تقرير لي ف المنتدى الجميل ، ف اعذروني على سوءه لو كان سيء

البداية :

بداية كل تجهيز للسفر ، اول شيء يشيك عليه الواحد تذاكر السفر والحيرة الي سببها كثرة خطوط الطيران
عن نفسي واهلي نقدر كثيرا الخطوط القطرية .. لدقة المواعيد والخدمات المقدمة من قبل الخطوط
بعد ما شيكت على جميع الخطوط عشان ما الوم نفسي بعدين ان هذي ارخص او هذي
ف القرار المناسب لي كان الخطوط القطرية ل ثلالثة اسباب :
1 - الوقت
2 - السعر
3 - الراحة النفسية



التذكرة الدولية

الناقل : الخطوط القطرية

السعر :
الدمام - الدوحة - القاهرة والعكس ف الرجعة .. كان 1300 ريال سعودي
( السعر مرتفع لان الوقت كان متاخر .. اول ما شيكت قبلها ب اسبوع كان 900 ريال سعودي )


التذكرة الدخلية

الناقل : خطوط النيل

السعر :
القاهرة - شرم الشيخ والعكس ف الرجعة .. كان 415 ريال سعودي

الاختيار كان ب سبب السعر الوقت .. طيران مصر كان مبالغ في سعر التذكرة ( 730 ريال سعودي )
كانت اول تجربة في خطوط النيل ، الطيران اقتصادي ماهو ل راحة او خدمات ترفيهيه ، عجبني انهم على صغر المشوار الا انهم قدموا لنا وجبة بسيطة عبارة عن سندويتشات جبن ولحم وعصير حار -ـ-


هذا بخصوص الطيران .. انتهيت من الطيران واي استفسار فيهم من عيوني



الجزء الثاني


الفنادق

اختيارك للفندق هو عامل رئيسي لوناستك ورضاك عن السفره وعن راحتك في البلد الي انت مسافر له
ف القسم هذا عشان ما اظلم شرم الشيخ الجميلة راح اتكلم عن فنادق القاهره بس ، وبخلي شرم الشيخ ف تقرير لحالها ( من كثر الحب الي حبيته ل شرم الشيخ )
تعبت جدا جدا جدا ف اختيار فندق القاهرة ، لان المعروض جدا كثير كثير .. والمواقع زادت الحين ف يتعب الواحد على ما يقرر وش الفندق الي يبيه و وين وكيف سعره وموقعه وتقاييمه .. لدرجة اني حجزت ف نفس يوم السفر


الفندق الاول :

الاختيار كان ولله الحمد على : فندق وكازينوا بيراميزا سويتس القاهره - الدقي \ السعر شامل الضرائب : 800 ريال سعودي وشوي ( نسيت ب الضبط كم ) المدة ليلتين ثلاث ايام
ما عليكم من اسم كازينوا لان الفندق عائلي بحت ، الفندق مصنف خمس نجوم الغرف نوعا ما واسعه فيه جميع الخدمات الي ممكن الواحد يحتاج لها عن نعسي ارتحت فيه جدا ، فيه مطعمين وبار ما جربتهم .. الفطور برضوا ما جربته معهم .. جربت الشيشه وكانت عالية الكيف في احد المطاعم الي داخل الفندق ف اللوبي

* صارت لي سالفة ف الفندق وم عجبني رد الرسبشن ف بقولها لكم
اتصلت اطلب ادابتر .. محول كهرب ( فيش ) .. ،قالوا طيب وما احد جاء ، نزلت تحت سالت الرسبشن قالوا اطلبه ب التلفون ، قلت له طلته ما جابوا شيء .. قالي طيب انتظر الشخص الي هنا ( اشر على مكتب ف واجهة الفندق ) وقوله الي صار لك .. انتظرته شوي ولما جاء عرفت انه مدير الفندق ف انحجرت على شيء مثل كذا اكلم مدير الفندق .. لكن قلت ان ادري المفروض ما اكلمك على سبب تافه مثل هذا .. لكن ربعك الي بالرسبشن هم الي رسلوني لك .. ف تعوعد فيهم وكلم احد العمال يجيب لي وجابه بنفس الوقت

باول الشارع فيه بقالة صغيره فيها الاشياء الاساسية .. واذا ما تشتغل 24 ساعه ف هي فاتحه الى وقت متاخر من الليل



الفندق الثاني :

كان اخر ليلة في القاهرة والحمد لله توفقت فيه ، كان قريب من المطار جدا
الفندق كان : نوفيتيل المطار .. السعر : 230 ريال سعودي

الفندق ب اختصار ، ل رجال الاعمال والي عندهم رحلات يوم ثاني ، لان شفت فيه من جنسيات كثيييره جدا
الغرف ضيقه نوعا ما ما فيها مساحة ، الميني بار موجود وكان عليه رسوم عدا الشاي والكافي والامور التابعه لهم .. المسبح ممتاز جدا وفيه العاب اطفال ومسبح الطفال وحديقة عامة كبيرة جدا

* صارت لي سالفة معهم بقولها لكم
اتصلت وانا في شرم الشيخ علمتهم موعد وصولي واكد عليهم مره ثانية ب اتصال ثاني وكان التوصيل من المطار شامل للحجز .. الي صار اني انتظرت وانتظرت وانتظرت واتصلت اكثر من مره الين جاء السائق
ولما وصلت الفندق .. ما سكتت عن هالموضوع خصوصا اني ماكد موعد الوصول
ف كانت الاجابة منهم الاعتذار والترقية للغرفة لى المبنى الجديد بدون اي رسوم


انتهيت من الفنادق واي استفسار فيهم من عيوني



الجزء الثالث


التنقلات :
ما راح اتكلم عن التنقلات كثير لان عارفين مصر والتكاسي الكثثثيرة
لكن بنصحكم نصيحة .. توفر عليكم مبالغ من الاموال ، وتركبكم سيارات نظيفة وجديدة وناس متعلمه ومثقفه ومرتبة .. اشتغلوا على اوبر وكريم ف كل مشوار لكم حتى لو كان صغير
لان اي تكسي راح يستغل ويزيد السعر بما انك سائح .. ناهيكم عن السيارات وقدمها والناس الي تسوقها
( اغلب التكاسي الي ركبت معهم اعضروا علي خدماتهم السيئه من المداقص والبنات والخمور والحشيش .. خصوصا اني لحالي ) ( اعتذر منكم على الصراحة لكن هذا الواقع )

غلطتي ان ما انتبهت للموضوع الى متاخر ف استخدمت كثير من التكاسي



الجزء الرابع

المطاعم :
مصر مشهوره ب الاكل الطيب واللحوم الجيدة
تجاربي كانت قليله ف المطاعم م اعرف ليش مع اني محب للاكل كثثثير
المطعم الاول : الدهان في منطقة الحسين في الخان خليلي
ممتاز جدا جدا .. الطلب كان صحن ريش 800 غرام .. كافي لشخصين
اللحم كان ذااايب ولذيذ الراحة

المطعم الثاني : شاورما ابو عمار السوري في منطقة المهندسين ( او قريب منها )
الطلب كان شوارما لحم ودجاج .. اللحم الذ من الدجاج لان حطيت مع الدجاج جبن ف ضيع الطعم
الشوارما الواحدة الصغيرة .. عن صاروخ عندنا ف الي اكله قليل يكتفي بوحده
يصلح اذا كان الواحد فيه نص جوع


المطعم الثالث : مطعم فرحات في مصر الجديدة قريب المطار نوعا ما
سيء جدا اللحم كان خشن ومو لذيذ .. م انصح فيه ابد

المعم الرابع : مطعم الدهان ( نفس الي ف منطقة الحسين )
كان ممتاز جدا ولذيذ نفس الي ب الحسين
الطلب كان .. فراخ مشوي ( ما ابي امشي قبل م اجرب الفراخ ) + نص كيلوا ريش + شوربة لسان العصفور
ب النسبة للفراخ ، فهي دجاجه مشوية والي ياكل من الطازج فروج فهو 80٪ نفس الطعم
الريش ما يحتاج اتكلم .. شيء عجيب .. وشربة لسان العصفور كانت تجربة جيدة بديلة ل شوربة العدس لو كانت مو موجودة

المطعم الخامس : ما اذكر اسمه ولا اعرف وين
لان طلبت من سواق تاكسي كريم يوديني مكان نظيف ل طعمية ف رحت معه .. بحاول اجيب مكانه عن طريق قوقل ماب

المطعم السادس : كبدة زيزو .. مقابل مدخل شارع المعز لدين الله ( الاسم المشهور للشارع التلوث )
الاسم المشهور للمحل ( زيزو التلوث )
بس ما عليكم من الاسم .. الكبدة من الاخخخخخخير شيء عجججيب صراحة ( اسم ليس ماهو على مسمى )

محل عصيرات : عصيرات العائلة في مصر الجديدة ممتاز جدا طلبت منه 6 لتر عصير مانجو وعطاني فوق الطلب كاسين عصير


اي سؤال عن المطاعم من عيوني




الجزء الخامس :

الاماكن السياحية

الاماكن كثيرة وكل شخص له توجه وله اهتمامات ف الاماكن
عن نفسي احب الاماكن القديمه ، الاسواق والمحلات والمطاعم والمدن

اول ليلة رحت الخان خليلي ودخلت مسجد الحسين .. فيه مقام هناك لكن م عرفت ل شنو او منو
وفيه ناس يتعبدون ويذكرون الله لكن بطريقة الصوفين ( الطريقة غريبة لكن اتمنى من الي يزور يسال عن الي يصير وراح يشرحون لك كل شيء + اتمنى عدم السخرية )
التصوير للناس هذول ممنوع وممكن يطلع لك اي واحد منهم وقت الي يسون الذكر ويقولك ممنوع وينزل جوالك
حاول ما تكون في وجههم ، هم صايرين حرف U فالجزء المفتوح ما يكون فيه احد لكن غلط انك تمشي ب التجاه الجزء المفتوح من الحرف للان عندهم ممنوع او غلط او حرام م اعرف لكن ما يرضون

السوق ما فيه اشياء كثيرة ، كله هدايا تحف وملابس بسيطة ومحلات شيش واكسسوارات
الي بيشتري ينتبه من السعر .. ومن حركة صارت معاي ( كنت باخذ 3 علب معسل وسعرها 220 واتفقت معه علي 180 بنفس الوقت كانت معي اغراض كثرة لما جاء بيحسب المجموع طلع مبلغ واجد .. اخذت الحاسبة وقسمت المبلغ على 3 ف طلع الحرامي حاسب لي الوحده ب 225 جنيه .. ف طبيت فيه طب وحشرته وهزئته وكان فيه 2 من الاخوان الاماراتين ، قالوا دامك نصاب حتى احنا مب ماخذين منك شيء وطلعوا

ف انتبهوا


القناطير :

جولة ممتازة جدا جدا .. انا عن نفسي حبيتها
طبعا اهم شيء ان تختاروا مكان لمركب ممتاز ، الي رحت معه عن طريق تكسي وكان نوعا ما سيء ، لكني وسعت صدري وهذا اهم شيء

المركب مع الغداء كان 2000 جنيه ، اخذته ب 1500 حنيه
الغداء كان كميته جدا قليله ف طلبت زيادة
سمك مشوي وربيان مشوي .. الطعم مو حلو .، حسب م شفت انه مطعم واحد بس الي الكل يتعامل معه
ف اخذوا لكم اشياء بسيطه للرحلة واطلبوا المركب بدون غداء

الجولات نوعين
جولة صغيرة وجولة كبيرة ، انا خذت الكبيرة
وكانت عبارة عن عدة اماكن .. قناطر محمد علي وقناطر حسني مبارك ومعاهم كم اسم .. وهم كلهم عبارة عن سد مجرى الماء .. ف لو ما شفتهم عادي

بيوت الفنانين .. تمر عليهم مرور الكرام بالمركب
مزارع الموز والمانجو .. تابعين لممثلة وتمر عليهم مرور الكرام بالخيل
قصر الملك عبدالله والملك عبدالعزيز او الملك فهد رحمة الله عليهم .. تمر عليهم مرور الكرام بالخيل
مزرعة العسل .. فيها شايب يبيع عسل وراح يشرح لكم ويعطيكم تست تحربون العسل وعنده انوع من زيت الخروع وزية الحبه السوة .. سعره ممتاز البكج كامل لكني مو في حاجته .. اخذت زيت الخروع بس
تفاصلوا معاه او كلموا سواق المركب يجيب لكم خصم

فيهم ف نفس المزعة فطير المشلتت حلو ححيل ويجي معاه جبن او عسل قيمته 50 جنيه
فيه واحد يجيب شاي حتى لو ما طلبت ويقولك 50 جنيه .. انا لاني مو راعي شاي ما اخذته وقال بس سواق المركب طلبه .. قلت له روح له يدفع لك انا شدخلني ! وما اخذته

فيه رجال بياخذكم ف جولة صغيرة ف المزرعة وبعد الكلام راح يطلب منكم مبلغ عشان حياتهم .. لكن قولوا له ان الماء متوفر واللحوم والالبان والاجبان والخضروات والفواكه متوفره عندكم م تحتاجون اي مبلغ

وراح يجيب لكم بنتين صغار حلوات الله يحفظهم .. قول انهم اصغر فلاحات عندهم .. انا من شوفتهم حبيتهم وحبيت اعطيهم مبلغ .. لكن الابو خرب عليهم ، وهو طلب بالنيابة عنهم .. ف قلت له انت مالك شغل بيني وبينهم خلهم يجون للمركب وانا اعطيهم الي الله كاتبه .. ف سكت



القصور والقناطير ( السد ) والمزارع والشلالات الكذوبية والشجرة الي عمرها 100 سنة واكثر من شيء نسيته راح ينزلونكم في منطقة ما ارف اسمها وبتاخذون حنطور لو كنتوا عائلة ، او خيول لو كنتوا شباب ( الخيل اكثر متعة )
لكن عيب الخيل ان ممكن يحسب لكل خيل سعر .. السعر كان 1000 جنيه ، للاسف احس من الحماس اني بركب خيل م انتبهت للسعر .. ف وافقت عليه
الولد الي بياخذكم حاولوا ما تعطوه وجه لانه ف الاخير راح يشحت منكم ب اسم الطمع ف الكرم

( بغيت صراف الي لان م حسبت حساب الطلعة نهائيا ، او قلت لهم ابي مكان يبدل فلوس لان معي سعودي ف
الولد لما درا ان عندي سعودي .. وانا رحت الصراف الالي ، جادء يطلب مني بالسعودي يقول انا باخذها وبتوهق فيها لكن شسوي ! .. شين وقوي عين قلت له مالك عندي شيء لا والله اشتكيك )



اليوم الاخير .. رحت شارع اسمه ( المعزين لدين الله الفاطمي ) قزيب من الخان خليلي في منطقة الحسين
السبب الي خلاني اروح ان فيه معرض لمصنع الحاج خليل مأمون .. حق المعسلات والشيش وكنت باخذ لي من عنده ف رحت هناك وتمشيت فيه .. الشارع حلو وفيه محلات كثيرة ومتنوعة عكس الخان خليلي
وهم تقريبا متصلين ببعض لكن فيه مسافة


هذي الاماكن الي رحت لها ف القاهرة




بشكل عام :
القاهرة حلوه وفيها اماكن كثير لكن .. اغلبهم ما تستهويني ف ما حيت اروح لها واضيع الوقت ، ان شاء الله الايام الجاية لي رجعة لهم لو حصل نصيب ورحت القاهرة .. الجو ف الايام الي كنت فيها كانت خياليلة جدا جدا جدا وحلوه ف المساء وف العصر .. الظهر حرارة الشمس

عن نفسي .. السفرات الجاية ما راح ازيد عن يومين ف القاهرة سواء كنت لحالي اومع اهلي



نهاية التقرير

*** جوالي انكسر في وسط الرحلة .. البديل كان موجود لكن للاسف الصور الي صورتها لكم كلها راحت معه .. نعوضكم ب الجايات ان شاء الله ***



اعتذر منكم اذا كان فيه شيء غلط .. اول تقرير لي مثل ما قلت وان شاء الله الجايات نعوضكم
تهمني ملاحظاتكم .. عشان اعدلها في تقرير شرم الشيخ
 
أعلى