ولاية اوريغون الامريكية

[nanaa]

بوابة السفر الى الولايات المتحدة الأمريكية U.S.A


بسم الله الرحمن الرحيم


ولاية اوريغون الامريكية من اجمل الولايات الامريكية اللي زرتها ,, ففيها الجبال والانهار والشلالات والشواطي ورمالها الرائعه

زيارتي لها كانت لاربع ايام في شهر مايو الماضي وكنت في زيارة خاصة لامريكا وقلت ما اريد افوت زيارة اوريغون ,, واسباب زيارتي لها كانت لزيارة اقاربي اللي يدرسون فيها وايضا لما شاهدته من صور لبعض شلالاتها مثل شلال سيلفر الجميل وايضا لزيارة رملة اوريغون او البعض يسميها رمال فلورانس

كان وصولي لها يوم الخميس 15 مايو على الساعه 5 العصر عن طريق مطار بورتلاند واستأجرت سيارة عن طريق موقع اكسبيديا قبل يومين من رحلتي لاوريغون وكان سعر السيارة 210 دولار لمدة اربع ايام ,, وتوجهت بالسيارة الى كورفاليس وين مايسكن اقاربي وتبعد عن المطار حوالي ساعه و40 دقيقة وسكنت عندهم 3 ايام واليوم الرابع سكنت بالقرب من بورتلاند عشان اكون قريب من المطار

وكان جدولي فيها كالتالي ,,

اليوم الاول .... يوم الوصول والتوجه مباشرة الى كورفاليس
اليوم الثاني .. قمة ماري بيك ,, وبعد صلاة الجمعه رحنا لرمال وشاطي فلورانس
اليوم الثالث .. زيارة جبل هود الثلجي والبحيرة المرآة ثم البحيرة الصافية كلير ليك
اليوم الرابع .... خصصته لزيارة الشلالات ومدينة بورتلاند
اليوم الخامس .. مغادرة اوريغون و مفاجأة تأخير الطيارة 5 ساعات وعمل جدول سريع لقضاء الخمس ساعات

------------------------------------------------------------------------------------------------

اليوم الاول ,,

الوصول الى مطار بورتلاند عن طريق طيران الدلتا وحجز سيارة قبل السفر بيومين عن طريق موقع اكسبيديا وكان سعر السيارة 210 دولار لاربع ايام
مع تأمين شامل وكان نوع السيارة سوبارو اوت باك ,, وماكان معاي تفيقيشن واستخدمت خرائط الايفون واللي وهقتني شوي لان بعض الاماكن ما فيها ارسال
خصوصا اذا اردت الذهاب لمكان والمنطقة مافيها ارسال ,, وبطاقة التيلفون اللي عندي كانت عن طريق t mobile وللعلم كانت شركة at&t ارسالها اقوي وافضل
وكانوا يستخدمونها اقربائي ,,, ووصلت كورفاليس تقريبا الساعه 7,30 المساء

صورة من الطائرة لنهر كولومبيا قبل الوصول الى مطار بورتلاند

اليوم الثاني ,,

لما صحيت الصبح كان الوقت تقريبا الساعه 8,30 والشباب كانوا بيروحون للجامعه وبخلصون على الساعه 1 الظهر ومخططنا
اننا نروح لرملة وشاطي فلورانس بعد صلاة الجمعه ,, قلت شو بسوي لين الساعه وحدة ,, قالولي فيه قمة ومنتزه حلو يبعد حوالي ساعه وفيه شلالات
صغيرة ,, المهم حددت مكانه في الايفون ورحت له بروحي وقلت بتمشى فيه لاني من محبي الشلالات
القمة والمنتزه اسمها Mary's peak
واحداثياتها N 44° 30.633 W 123° 33.047
وهذي خريطة لخط سيري

وهذي بعض الصور

شلال صغير على الطريق واسمه Alder falls

ثم شلال اخر اسمه Parker Creek Falls

وهذي صورة لسيارتي سوبارو اوت باك subaru outback

وهذي صور من القمة

وبعد الاستمتاع بالقمة وشلاتها الصغيرة قلت برجع لكورفاليس وكان الوقت تقريبا 11,30 وأشوف الايفون عشان ادخل العنوان وما فيه ارسال توهق البطل
وقلت مافيه حل غير احاول ارجع على نفس الطريق والمشكلة الطريق فيه بعض التفرعات قلت الله يعين لكن الحمدلله وصلت تحت بعد النزول من القمة ووصلت
لاقرب قرية ولقيت ارسال وضبطت الايفون على عنوان البيت في كورفاليس

بعد صلاة الجمعه توجهنا الى فلورانس وتغدينا على الطريق وكانت المسافة 88 ميل والوقت ساعه و 45 دقيقة
ووصلنا لفلورانس الساعه الساعه 4 العصر تقريبا
وهذي احداثيات رملة اوريجون oregon sand dunes
N 43° 54.826 W 124° 06.712

وهذي خريطة خط سيرنا الى فلورانس

وهذي صورة من جسر فلورانس اول ما بينت الرمال

وقمنا باستئجار دراجات وهذي بعض الصور من رملة فلورانس وبحياراتها الرائعه وجولتنا فيها بالدراجة

وهذي صورة لدراجتنا وقت الاستراحة

بعد جولتنا بالدراجة لمدة ساعه رجعنا للرملة بالسيارة وكان عندنا سيارة فور ويل

وهذي صورة لدلة القهوة بالقرب من البحيرة

وهذي صور من الشاطي المطل على المحيط الهادي

وفي طريق الرجوع هذي صور لمدينة فلورانس الصغيرة

وبعد الجولة السريعه في فلورانس والظاهر عندهم مهرجان في هذه الفترة رجعنا الى كورفاليس



>>>> يتبع اليوم الثالث ​

 

[nanaa]

اليوم الثالث ,,

وكانت رحلتنا لهذ اليوم الى البحيرة المرآة وجبل هود الثلجي وكلير ليك

وهذي خريطة سيرنا

البحيرة المرآة Mirror Lake
N 45° 17.823 W 121° 47.580

جبل هود Hood Mount
N 45° 19.885 W 121° 39.853

كلير ليك Clear Lake
N 45° 10.941 W 121° 42.161


البداية كانت بالبحيرة المرآة وما كانت عندنا عنها معلومات سوى اننا ونحن بطريقنا الى جبل هود شفنا لافتتها على الطريق
ووقفنا عندها ونزلنا نمشي صوبها ونشوف لافته متكوب عليها ان البحيرة تبعد 1.8 ميل انصدمنا وقلنا يالله نواصل
والطريق صعود وصلنا هلكانين من التعب والطريق ما كان مهيأ وكان متعب ,, ولكن البحيرة تستاهل وكانت حلوة

وهذي بعض الصور

وهذي صور من الطريق ونحن نمشي بطريق الرجوع

بعدها رحنا لجبل هود ووصلنا وكانوا مسكرين التلفريكات لان وصولنا كان متأخر على الساعه 4 ونصف العصر واثار المتزلجين كانت موجودة
واخذت بعض الصور

وبعد جبل هود رحنا لكلير ليك لاني شفت صور حلوة لها وقلت بشوف بحيرة صافية وكل شي فيها يبين مثل البحيرة الزرقاء في سويسرا
ولكن بعد ما وصلنا لقينا بحيرة عادية جدا وما فيها شي يستاهل والظاهر عندهم في ولاية اوريغون اكثر من بحيرة اسمها كلير ليك حوالي 11 بحيرة
بنفس الاسم هذا اللي اكتشفته بعدين ,, والبحيرة اللي شفت صورها طلعت بعيد عننا حوالي 4 ساعات

وهذي صورة لبحيرة كلير ليك اللي زرناها

وفي طريق الرجوع مرينا على اوت لت Woodburn Premium Outlets
وكان جيد المستوى وهذي احداثياته N 45° 09.334 W122° 52.695

وهذي صورتين للاوت لت

وبعدها رجعنا لكورفاليس ,, وقلت ليش ما احجز اخر يوم عدال بورتلاند لان رحلة مغادرتي في اليوم اللي بعده من بورتلاند
و طياراتي بتكون الساعه 3 الظهر فقلت اسكن قرب مركز تسوق اسمه واشنطن سكوير واقوم الصبح اتمشى فيه واطلع للمطار منه
وحجزت في فندق Embassy Suites Portland - Washington Square
وكان سعره 139 دولار لليلة وكان فندق ممتاز وغرفه واسعه وكانت الغرفة مكونة من غرفة وصالة مفتوحات على بعض و بدون مطبخ


>>> يتبع اليوم الرابع​

 

[nanaa]

اليوم الرابع ...

خصصنا هذا اليوم لزيارة بعض من اجمل شلالات اوريغون
والشلالات اللي زرناها

شلال سيلفر الجنوبي Silver Falls
N 44° 52.658 W 122° 39.338

شلال سيلفر الشمالي Upper Silver Falls , North
N 44° 53.045 W 122° 37.205

شلال واهكينا Wahkeena Falls
N 45° 34.525 W 122° 07.675

شلال ملتنومه Multnomah Falls
N 45° 34.661 W 122° 07.037

وهذي خريطة خط سيرنا لهذا اليوم

انطلقنا من كورفاليس الساعه 10 صباحا وكان اليوم ممطر في بعض الاوقات وفي بعض الاماكن والحمدلله في اوقات زيارتنا للشلالات ما كانت فيه امطار
وكانت غزيرة في الطريق

البداية كانت بشلالات سيلفر اللي يبعد عن كورفاليس حوالي ساعه ونصف
وهذي صورة قبل الوصول للشلال

وهذي بعض الصور للشلال الجميل وفيه طريق يمر خلف الشلال

صور من خلف الشلال

صور اضافية من زوايا مختلفة

وهذا فيديو من تصويري لشلال سيلفر




وهذي صور للمواقف قرب شلال سيلفر

وهذي صورة من بعيد لشلال سيلفر الشمالي وللوصول له مشي حوالي 2 ميل ونصف واكتفينا بتصويره من بعيد

وصلنا لشلال سيلفر الشمالي العلوي ووقفنا سيارتنا في المواقف وكان قريب من شلال سيلفر الجنوبي حوالي اقل من 5 دقايق بالسيارة
ونزلنا مشي وكان يبعد نصف ميل او اقل

وهذي صور من الطريق ونحن نمشي

ويبين الشلال من بعيد

وهذي صور للشلال

وبعد هذي الجولة في شلالات سيلفر رحنا الى الشلالات القريبة من بورتلاند واللي تصب في نهر كولمبيا
والمسافة كانت 80 ميل والوقت ساعه و35 دقيقة
ووصلنا الى شلال Wahkeena

وهذي صورة من بعيد

ومشينا الى الشلال حوالي 5 دقايق الى ان وصلناه

وهذي صور للشلال

وبعده رحنا الى شلال ملتنومه وهو من اجمل الشلالات الي شفتها وهو عبارة عن شلالاين واحد في الاعلى ويصب في بحيرة
والثاني تحته مباشرة ويبلغ اجمالي طولهم 180 متر

صورة من بعيد للشلال وتشوفون قدامه مبنى يبيعون فيه الهدايا والتذكارات للشلال وفيه كافتيريا ومحل لبيع الايسكريم

وهذي بعض الصور للشلال

وهذا فيديو لشلال مولتنومه من تصويري



ومن جمال هذا الشلال ودعته وخاطري اقعد اكثر عنده


وبعده رجعنا لعمل شيك ان في الفندق ونصلي الظهر والعصر جمع
وهذي صورة من الفندق

ومن ثم رحنا لمدينة بورتلاند نتمشى فيها وهذي بعض الصور

وانتهى برنامج هذا اليوم الرائع وودعت اقربائي بعد ما تعشينا مع بعض


>>> يتبع .. يوم المغادرة





​

 

[nanaa]

يوم المغادرة

صحيت الصبح وافطرت في الفندق وسويت تشيك اوت تقريبا الساعه 10 ونصف الصبح ,, وقلت باخذ لفة في مركز تسوق واشنطن سكوير
وكان قريب علي وكان تخطيطي اخذ لفة في المول وعلى الساعه 12 ونصف اروح المطار لان طيارتي الساعه 3 الظهر وقلت بتسوق فيه على الخفيف لان ولاية اوريغون ما فيها تاكس ,,
ووصلت المول وانا اتمشى فيه وتقريبا على الساعه 11 ونصف وصلني ايميل من شركة الطيران ان الطيارة تغير موعدها الى الساعه 4 العصر ,,
وقلت ساعه تأخير ما تضر ,, ومرة ثانية وبعدها بربع ساعه وصلني ايميل ثاني وصدمني ,, الطيارة بتتأخر الى الساعه 8 المساء وقمت اتصلت عليهم واحاول فيهم اذا فيه طيارة ثانية قبل ولو ترانزيت لكن مافيه فايدة وما حصلت شي ,, وبصراحة ضاقت علي الدنيا قلت الحين وين بروح وطلعت من المول وقعدت في السيارة
افكر وين وين وين وافتح الايفون ادور بالخرايط ,, تذكرت واحنا راجعين من الشلال كان فيه اوت لت على الطريق وقريب من المطار قلت بروح له

اسم الاوت لت colombia gorge premium outlet
Columbia Gorge Premium Outlets

الاوت لت كان صغير ولفيته في اقل من ساعه وما كان فيه شي يسوى ,, طلعت منه ووقفت في المواقف القريب عليه وصليت الظهر والعصر جمع
وكانت الساعه وحدة ونصف ,, قلت ما فيه غير شلالي شلال ملتنومه اللي ودعته بروح وبقعد عنده وكان يبعد حوالي عشرين دقيقة عن الاوت لت
وتذكرت انه فيه شلالات قريبة عليه طبعا اثناء بحثي قبل السفر الى اوريغون وبالفعل حصلت واحد اسمه horsetail falls وكان قريب من شلال ملتنومه ويبعد عنه حوالي 5 دقايق

خط سيري لهذا اليوم
البداية بمركز تسوق واشنطن سكوير ثم الاوت لت ثم شلال horsetail ثم شلال ملتنومه

احداثية مركز التسوق واشنطن سكوير N 45° 27.076 W 122° 46.948
ورابطه Washington Square | Home

وهذي صورتين لمركز تسوق واشنطن سكوير وكان بودي اضع لكم صور اكثر لكن بعد ما ياني الايميل وعرفت بتأخير الرحلة نسيت التصوير وطلعت من المول

وهذي صورة للاوت لت

وهذي بعض الصور لشلال horsetail

وبعدها رجعت لشلال ملتنومه واخذت صور اضافية له وكان اليوم مشمس عكس الامس اللي كان ممطر ومغيم

وصورة اخيرة من بعيد بعد ما قعدت عنده حول الساعه وشوي

وعلى الساعه اربع وربع رحت للمطار اللي كان يبعد 35 دقيقة تقريبا وسلمت السيارة على الساعه 5 العصر
وودعت اريجون

نهر كولومبيا من الطيارة

وهذي صورة لجبل هود من الطيارة

وبالاخير اتمنى ان ينال التقرير والصور اعجابكم ,,,, وللعلم الصور كلها من تيلفوني الايفون 5 اس

ولكم مني اجمل تحية ,,,, مقدام​