أنت تستخدم أحد المتصفحات القديمة. قد لا يتم عرض هذا الموقع أو المواقع الأخرى بشكل صحيح.
يجب عليك ترقية متصفحك أو استخدام
أحد المتصفحات البديلة.
يوم الذهاب الى براغ
اتفقت مع أحد السماسره العرب ع انه يوفرنا سياره خاصه لبراغ بـ 100 يورو
انطلقنا الصبح بعد ما اتريقنا وسوينا الشيك ان
وصلنا مدينة براغ
وصلنا فندق الانتر
سوينا شيك ان
واستلمنا سويتنا
أنا كنت حاجزه سويت ب 1700 درهم في اليوم
عقب ماريحنا شوي رجعنا طلعنا من الفندق ومشينا في الشارع
المقابل لفندقنا وهو شارع الماركات
وبدينا اللف في محلات لماركات
في نهاية شارع الماركات واقفين سيارات من الطراز القديم وممكن
تأجرونها وتاخذون جوله في المدينه
كان وقتنا ضيق ولا كنا خذينا لفه فيها
وبعد عندكم اختيار ثاني لو بغيتوا تتجولون في المدينه وهي جوله بالحنطور
وبعد عندكم اختيار ثالث في هالقطار
وعقب شارع الماركات دخلنا في الساحه الكبيره
يتبع ...
نكمل معاكم جولتنا في براغ
وصلنا الساحه الكبيره
ما اعرف أسمها
هاي الساحه وايد كبيره وفيها يسوون عروض ، وناس رايحه وناس سايره
حلوه وشرحه بس عيب هاليوم انه شمس
حوالين هاي الساحه تنتشر المطاعم والمحلات
تعبنا من كثر اللف ع محلات الماركات ولما وصلنا الساحه قلنا
بنيلس في كوفي نتبرد واخترنا هالمطعم الايطالي
وطبعا هاليلسه ماتحلى الا بـ
وايد أحب الايس كريم في اوروبا بس في البلاد قليل آكله
عقب ماتبردنا بهالايس كريم الغاوي انطلقنا نمشي في السكيك
ونستكشف المنطقه
ونحن نمشي شفنا محل يبيع شوكليت وانواع من الحلويات
الصراحه وايد روعه المحل لايطوفكم
عقب ماخلصنا محل الشوكليت كملنا مشي
فشفت هالريال يسوي دعايه حق محل للمساج التايلندي
وتفاجأت انه تونسي
كملنا مشي وشفت مدخل لمتحف ويشبه متحف مدام توسو
مادخلناه لأنه وقتنا ضيق ونبا نتشرى
ولقينا متحف ثاني بعد لمدام توسو
مب فاهمه شو سالفتهم
وكل مانمشي نشوف شي
ونحن نمشي وصلنا لين هالمدخل
عقب ماعبرنا هالمدخل شفنا جدامنا ساحه ثانيه
في هاي الساحه بتشوفون مطاعم ومول وفندق وغيره
شفت في هاي الساحه فندق اسمه
كينج كورت
ماتتصورون كيف انقهرت يوم شفته ، لأني كنت حاجزه فيه سويت
وكان شكله روعه وكبير
ولكن قمت وكنسلته
لأنه أخويي مدحلي الانتر
صحيح الانتر راقي وموقعه قريب من شارع الماركات ، بس هذا موقعه أفضل ووسط الحياه
هناك صوب الماركات ماشي وايد ناس وهادي
وهنيه يوله وكثير من المحلات والمولات والمطاعم والكوفيهات
الله يحفظه أخوي دومه يدور الاماكن الهاديه
ماطلع شرات أخته
هذا المول في ويه الفندق
يتبع ...
الجزء الاخير من تقريري الشيكي
نتابع معاكم جولتنا في وسط براغ
وسكيكها الحلوه
لما وصلنا في الساحه الثانيه شفنا هالمول جدامنا
دخلنا المول وهومن كم طابق
وفيه كثير من المحلات وتأخرنا فيه ونحن نتسوق منه
وشفت عندهم ماركس سبنسر ولاحظت انه أرخص عنا
عقب ماخلصنا تسوق من المول حسينا خلاص تعبنا رجعنا للمطعم
الايطالي اللي كلنا فيه الايس كريم
وتغدينا بس غداء متأخر
وعقب ماخلصنا أكلنا قمنا وأجرنا التكسي السياحي وهو مب سياره
هي تشبه التك التك بس الاوروبي الصراحه نسيت أصوره
وأجرناه لانه عندنا وايد أكياس ومانقدر نمشي لين الفندق
وقضينا باقي اليوم نرتب أغراضنا ونضبط شنطنا ونمنا بدري
صحينا الصبح ونزلنا تريقنا في البوفيه بس ماكانت وايد اختياراته حلوه
وعقب وصلت سيارتنا الخاصه من طيران الامارات
وتحركنا ع المطار
وصلنا المطار وخلصنا التاكس فري والامور كلها مرت بسلاسه ويسر
واتشرينا من السوق الحره
هههههههههههه لآخر نفس نتشرى
وعقب ركبنا طيارتنا
وودعنا الشيك ع أمل انه نلتقي مره ثانيه ان شاءالله
وصلنا لأرض بلادي الغاليه
أرض الامارات الطيبه
الله يحفظج يابلادي من كل حاقد وحاسد
أحبج
تم بحمدالله
ولاتحرموني من دعواتكم بظهر الغيب
