منتجع ثيرمال

[nanaa]

مقدمه

لما قررت أسافر الشيك بحثت وايد عن معلومات عنها​

ولكن للاسف مالقيت عنها وايد تقارير واللي لقيته كان قديم من سنوات​

ففكرت أنزللكم هذا التقرير عشان تستفيدون منه في حالة قررتوا تسافرون لها​

وتعرفون الكثير من التفاصيل اللي ان شاءالله بتنفعكم​

الهدف من الرحله

​

سمعت عن الشيك وايد ومن زمان كان خاطري أجرب منتجعاتها​

وفكرت أجرب عندهم برنامج التخسيس ( تنزيل الوزن )​

عن تقولون عني دبه تراني مب دبه بس أحتاج أنزل وزني شويه

اجراءات الحجز

​

في البدايه عطينا شركه سياحه في الشارجه تخلصنا اجراءات الفيزا
ولكن وايد بهدلونا وتأخروا علينا شهرين وكنا بنكسل السفره

وعقب قلتلهم ما ابا عن طريقكم الفيزا وخلاص نحن كنسلنا سفرتنا​

وعقب اتصلنا ع السفاره الشيكيه في الامارات وسألناهم عن الفيزا​

وخبرونا انه في شركه للسياحه في دبي أسمها سينمار هم وكيلهم​

مرينا عليه وكان الموظف من الشيك قال بعطيكم الموعد حق البصمه وخلال أيام بتجهز الفيزا​

ماصدقت اللي سمعته

الله يغربله هاك الهندي كيف غربلنا وأخرنا وآخر شي يقولنا اذا تبون فلوسكم كلموا المدير

أما هذا المكتب قاللي الشيكي :​

اذا تحبون بحجزلكم بكج للرحله​

قلته عطني عرضك​

وخبرته عن التفاصيل اللي اباها​

طلبت نسكن في منتجع ثيرمال وناخذ منهم البكج الخاص بنظام التخسيس مدة اسبوعين​

وطلبت تكون الغرفه عندهم سويت وفي الادوار المجدده​

بالاضافه للسكن في فندق 5 نجوم من فنادق براغ في آخر يوم​

وتوفير سياره توصلنا من منتجعنا الثيرمال في آخر يوم الى براغ​

ويكون العرض شامل التذاكر​

بعد ماعطاني العرض غيرت رآيي​

شفت انه التذكره عن طريق النت أرخص بـ 100 درهم ، فحجزت بروحي تذاكرنا

والتوصيل حسيته غالي عطاني ياه ب 550 درهم​

وقلت مابستعيل ولما أكون هناك بسأل عن سعر التوصيل​

والفندق اللي في براغ عطاني عرض لفندق 5 ستار بس حسيته بعيد شوي عن الداون تاون​

وأخويه كان مادحلي الانتر في براغ ولكن طلع في بوكينج فل​

وهو حصل عندهم بس سويت ووايد غالي​

بس أنا تميت الاحق بوكينج كل يوم وأشوف اذا حد كنسل لين حصلت حجز فيه​

وحجزت غرفه غرفه جونيور بـ 1700 درهم​

نرجع للشركه​

قررت أحجز عن طريقه بس بكج المنتجع الصحي رغم انه عطاني أغلى من النت​

لأنه من خلال بحثي وجدت موقع عن طريق النت نقدر نحجز مباشره منهم​

بس ليش أنا حجزت عن طريقه ؟​

الصراحه بغيت أفيده من فرحتي انه سفرتي ماانلغت وانه بحصل الفيزا فقلت عن خاطري باخذ لو شي واحد من عنده​

الشخص = 17 الف درهم تقريبا​

شامل السكن + الوجبات الثلاث + برنامج لنظام التخسيس لمدة اسبوعين​

من غير الضريبه اللي خذوها مني لما سويت الشيك أوت​

بعدين أكتشفت لما سرت هناك انه طلع علينا وايد غالي ، والصراحه مستوى الفندق مايستاهل السعر اللي دفعته​

بالنسبه لفيزا أعتقد دفعنا 400 + 150 تأمين صحي ( ع ما أذكر )​

تاريخ رحلتنا

​

من 21/ 5 / 2014​

لين 5/ 6 / 2014​

الفنادق اللي سكناها

​

في كارلوفالي​

منتجع ثيرمال​

من 21/ 5 / 2014​

الى 4/ 6 / 2014​

اسبوعين​

وفي براغ​

فندق الانتر كونتتتنيتال​

من 4/ 6 / 2014​

الى 5 / 6 / 2014​

يوم واحد​

وقت الرحله

​

طيران الامارات توفر رحله وحده يوميا​

رحلة الذهاب تكون في الصباح 9 الا5 دقايق بتوقيت الامارات​

والعوده العصر الساعه 3,45 دقيقه بتوقيت براغ​

ليش أخترت منتجع ثيرمال بالذات​

من خلال بحثي الكبير استقريت ع منتجع ثيرمال بالتحديد

للاسباب هاي :​

انه جدا قديم وخبرته كبيره خصوصا في برامج التخسيس​

انه اكثر العرب يزورونه وبالتالي فهو يوفر للعرب احتياجاتهم وبالتحديد حق الحريم​

لأنه فيه خصوصيه لنا يمكن مانحصلها في منتجعات ثانيه​

واقصد بالخصوصيه هي وقت الجلسات​

تعلموا اخواننا الشيكين انه الحريم منفصلين عن الرياييل​

وعشان جذي كل البرامج المخصصه لنا تكون مفصوله عن الراييل​

بالاضافه انه كل اللي يقومون ع تنفيذ هاي الجلسات هم اناث وهاي أكثر نقطه ريحتني وشجعتني أختاره​

بالاضافه انه وايد أشياء مكتوبه بالعربي​

وموفرين مترجمين للي يحتاج​

والأكل بعد مراعينا بأنهم يحطون لافتات ع الاكل اللي في خنزيرومكونات الاطباق اللي يقدمونها​

تدرون يوم جربت هالفندق وشفت الخدمات حسيت كأني في بانكوك​

وخصوصا مستشفيات بانكوك اللي فيها كل شي موفر للخليجين​

ووايد موظفين منهم تعلموا وايد كلمات عربيه ، ساعات نضحك لما ينقون بعض الكلمات
وقمت انا بعد أعلمهم بعض الكلمات

الصراحه وايد انبسطنا فيه​

ولكن عندي ملاحظات عليه بقولها في آخر التقرير​

المواصلات

​

من المطار لين منتجعنا في كارلو فاري كانت السياره من طياران الامارات عشان نحن ع البزنس​

ولكن السائق خذا عني 120 يورو وقال أكثر من 50 كيلو ينحسب عليكم​

ونحن منطقتنا خارج براغ​

طبعا دفعت المبلغ ولكن وايد تضايقت لأنه محد بلغني قبل​

ولو كنت أعرف كنت شفت الفرق بينهم وبين أي سياره لو حجزتها بروحي​

عموما أنا ماسكت وقدمت شكوى لطيران الامارات عن هذا الموضوع وكان ردهم انه المبلغ صحيح

رغم اني أجرت سياره من منتجعنا لين براغ في آخر يوم ب 100 يورو يعني أرخص عنهم​

أما من فندقنا الانتر اللي في براغ لين المطار​

كان التوصيل عن طريق طيران الامارات بس هاي المره ماخذوا عنا اي مبلغ لأنه نحن داخل براغ​

مطار الشيك

الاجراءات سهله وسريعه ومرت أمورنا بسلام ولكن لاحظت شي في مطارهم ماشفته قبل في مطار ثاني​

لما طلعنا من الطياره ومشينا صوب الكاونتر عشان نختم جوازاتنا​

اتفاجأنا انه نحن نمشي وسط السوق الحره

ولو مب كنا تعبانين كنا تسوقنا شويه ، الصراحه تزغللت عيونا

في العاده نشوف السوق الحره في العوده​

ولكن لما رجعنا البلاد بعد مشينا في نفس الممر اللي فيه هاي المحلات​

يعني السوق الحره يمرون عليها القادمين والمغادرين​

العمله

تسمى كرونا​

100 كرونا تقريبا تساوي 18 درهم وكسور​

جزء صرفناه كرونا وجزء يور​

الاتصالات

اشترينا بطاقة فودافون وبخبركم التفاصيل في التقرير​

معلومات عن النظام الغذائي

​

النظام الغذائي يشمل وجبة الافطار ووجبه خفيفه بين الريوق والغداء ويعطونا ياها في علبه عند الريوق​

ووجبة الغدا ووجبه خفيفه بين الغداء والعشاء وتكون من الساعه 4 لين 5 نآخذها في كوفي الموجود في اللوبي​

وآخر شي وجبة العشاء​

النظام المتبع لهاي الوجبات أول ماندخل نيلس ع طاولتنا المخصصه لنا​

في اول يوم أخترنا طاوله ويلسنا عليها ، وعقب حطوا عليها رقم غرفتنا ومن هذاك اليوم وهاي تعتبر طاولتنا​

بعد مانيلس اتينا المسؤوله وتسألنا شو برنامجنا ونقولها D فتعطينا خيارين للغداء​

وعندنا بعد خيارين للعشاء بس الريوق يكون محدد​

في حالة لو اي وجبه ماعجبتكم ممكن تغيرونها من البوفيه بس ماتاخذون كميه ويكون من نفس الأكل​

مثلا اذا حطولكم دياي مع نوع من الخضار وانتوا ماتحبون هالنوع​

في هاي الحاله ممكن تغيرون بنوع ثاني اذا موجود في البوفيه​

أهم شي انه يكون أكلكم في نفس النظام​

عموما هم يعطونكم من أول يوم جدول الوجبات الخاص فيكم​

معلومات عن الجلسات

​

بشرحلكم ياها من خلال التقرير​

الأشياء المطلوب أخذها عند السفر للمنتجع الصحي (( خاص بالنساء ))​

1- لبس رياضي مناسب وهذا بينفعكم في الطلعات مع قروب المشي​

2- أحذيه رياضيه​

3- مايوهات متنوعه منها بوقطعه مب لازم يكون اسلامي ، ونوع بوقطعتين حق بعض الجلسات​

وممكن مايوهات اسلاميه اذا بغيتوا تتسبحون في الحوض العام​

تصدقون ماحصلت فرصه اسير اشوف المسبح العام​

4- كاب خاص للشعر حق حوض السباحه​

5- فوطه كبيره وصغيره للاستخدام الشخصي لأني حسيت انه فوطهم مستهلكه والحمدالله ماخذه فوطي​

6- أثواب او جلابيات خفيفه ومريحه ممكن تلبسونها فوق المايو​

او فوق لبسكم اللي بتلبسونها وانتوا سايرين الجلسات​

الجلسات كلها في نفس الفندق وفي طوابق مختلفه​

أحيانا كنت البس عبايه فوق لبسي​

لأنه اوقات تضطرون تلبسون المايو وتسيرون ع طول الجلسه في هاي الحاله​

تحتاجون تلبسون شي فوقه ، أتمنى فهمتوا عليه​

7- شنطه عشان تحطون في أغراضكم وانتوا سايرين للمسبح​

8- نعال مريح تلبسونه داخل الفندق وبعد نوع ثاني مناسب للمسبح​

هذا اللي اتذكره واذا ذكرت شي برجع أضيفه​

المعلومات اللي جمعتها قبل السفر​

​

المواصلات

حجز التكسي من الانترنت عن طريق شركه​

Contact Us – Prague Airport Transfers​

الصراحه جربتهم وعطوني سعر 95 يورو من كارلوفاري لين البراغ​

بس انا حجزت ب 100 من السماسره العرب اللي كانوا موجودين في الفندق​

أولا / براغ

​

1- الداون تاون أسمه​

Wenceslas Square​

الساحة الحيوية المليئة بالمحلات و المطاعم​

2- الباص السياحي​

Prague Grand City Sightseeing Tour​

و التي تغطي أهم المناطق السياحية في المدينة​

ثانيا مدينة كارلوفي فاري
اماكن سياحيه فيها

1- في المدينه جوله ع الركشه وسعرها 40 يورو لمدة نصف ساعه​

2- وفيه قطار سياحي​

3- قطار جبلي جميل مدخل وفي كشك يبيع التذاكر للقطار . والتذكره 70 كرونا​

4- مزرعة فراوله ، المكان قريب من كارلوفي فاري 25 دقيقه .​

وتقريبا كان الحساب في حدود 75 كرونا​

5- فندق القراند في كارلوفي فاري الفندق جميل وفخم وبعيد شوي عن الثيرمال تقريبا 20 دقيقه.​

الفندق ماخذ مساحه كبيره .. والمحلات اللي تحته راقيه​

وفيه كافييه في الفندق وله باب من برع .​

6- مدينة درسدن الالمانيه​

المدينه جميله تصلح للتسوق فيها مجمعات تسوق كثيره مطاعم​

يتبع ...​

​

 

[nanaa]

​

اليوم الأول يوم الوصول

كان يوم الاربعاء 21/ 5

​

الحمدالله كانت رحلتنا مريحه واعتقد خذينا 6 ساعات

ولما كنت ع البزنس يلست عدالي وحده روسيه كانت عايشه كم سنه في الشيك​

والحين من كم سنه عايشه في دبي ، وهي سايره الشيك زياره وعندها شغل​

سولفت وياها وكانت طيبه وعقب صار موقف بيننا فاجأني​

بتعرفونه عقب في الاجزاء اليايه

بعد رحله مريحه وصلنا الشيك الجميله​

بعد ماخلصنا اجراءات المطار طلعنا برع وكان السايق ينتظرنا​

وانطلقنا الى فندقنا في كارلوفاري والمسافه كانت أقل من ساعتين​

دخلنا وسوينا الشيك ان واستلمنا غرفتنا​

وتفاجأنا بعدد كبيرمن الخليجين وهالشي حسسنا بدفئ المكان

تفاجأنا بسويتنا وبمستواه

​

أول مانحل جدامنا هالكبت بو الشلفات ووايد نفعنا حق أحذيتنا عزكم الله​

هاي صالتنا​

عقب ماريحنا شويه قلنا بنطلع نشتري بطاقة الموبايل وخدمة النت ونتمشى شوي
والجو كان ع حظنا حار مشمس ودرجة الحراره تقريبا 26

وللاسف سويتنا فيه مكيف بس مايبرد ولما سألناهم قالوا عشان التكيف مركزي وقديم​

هذا سويتنا الغالي

فكرنا نسير ندور مروحه معقوله الجو جذي حار ، والقهر انه أغلب لبسنا شتوي

قبل لانسافر باسبوع شفت انه درجة الحراره تبين انه جوهم بارد وغيم وامطار​

ومن يينا نحن انقلب الجو عندهم وصار مشمس حار​

كأنه هاي نحاسه فينا

طلعنا من الباب الخلفي​

وأول ماطلعنا شفنا جدامنا محلات ملابس ومحل تتايلندي للمساج وكله هذا تقريبا في مبنى فندقنا​

ومن هاي النزله نطلع ع برع​

فندقنا من برع من الجانب الخلفي​

مشينا للسنتر وهو قريب منا مجرد دقايق​

وسرنا ندور محل موبايلات وحصلنا شركتين ( فودافون وo2 )​

نحن اشترينا من فودافون لأنه هو اللي أول واحد شفناها وماعندي فكره أي وحده الأفضل عندهم​

وعموما كانت الفودافون ممتازه​

بالنسبه لخدمة الداتا هي تنحسب عندهم بالشهر ونحن في الربع الأخير من الشهر​

الموظف اقترح عليه اني ادفع جزء من المبلغ​

وهو بيكفيني لين آخر الشهر ولكن عقب بتنقطع الخدمه أول الشهر​

وبعدها بشوف شو بسوي اذا بجددها ولا لا​

دخلنا خدمة النت مع الرصيد ونسيت كم المبلغ بس ماكان غالي​

عموما السعر يختلف حسب حاجتك من الرصيد أو من خدمة النت​

بس المفاجأه

ما انقطعت الخدمه عني لين رجعت​

مشينا ومشينا وحسينا بالحر والتعب وقررنا نيلس نتبرد وأخترنا مطعم يلسته بعيده عن الشمس في الظله​

قلنا بنودع الايام الحلوه قبل لاندخل في البرنامج والرجيم

تمشينا ندور السوبرماركت وماشفناها وعقب في يوم ثاني شفناه وكان جدامنا بس ما انتبهنا له​

عقب قررنا نرجع الفندق ونحن رادين شفنا بقاله للصينيين يبيعون فواكهه طازجه ومغريه​

أشترينا فواكهه وبعض الاغراض البسيطه اللي بنحتاجها​

كنا وايد مرهقين وتعبانين​

رجعنا غرفتنا حطينا أغراضنا وطلعنا ع المطعم​

والفندق متروس خليجيين وكل شويه حد يسلم علينا​

طبعا أكلنا من ضمن البكج ، بس اليوم نقدر ناكل من البوفيه لأنه بعدنا ماخذنا البرنامج​

أول مادخلنا عطيناهم رقم الغرفه ، وعقب اخترنا طاوله ويلسنا عليها وماتوقعنا انها بتكون طاولتنا حق الايام​

كنا نقدر نغيرها بس كانت مناسبه لنا​

واول مايلسنا حطوا رقم غرفتنا ع طاولتنا وبهاي البطاقه محد يقدر ايلس مكانا​

نسيت أصور اطباقنا وتذكرت في الأخير​

والبوفيه صعب أصوره وايد ناس وخليجين​

يتبع ...​

​

 

[nanaa]

​

اليوم الثاني يوم الخميس​

​

قمنا الصبح بدري وسرنا عند الممرضه في الطابق 2 وخذينا موعد مع الطبيبه​

وعقب سرنا نتريق ولين الحين ناكل ع كيفنا​

وعقب دخلنا ع الدكتوره وبعد مناقشات وحوارات وياها عطتنا البرنامج المناسب بالاضافه للجلسات​

طبعا هاي البرامج والجلسات تختلف من شخص لآخر حسب حالته الصحيه واللي عنده أي مشاكل صحيه​

بالنسبه لبرنامج الرجيم أختارتلي البرنامج D​

الصراحه ما أعرف بالضبط شو الفرق بينه وبين البرامج الثانيه​

وطلبت منا اني باجر الصبح ونسوي تحليل دم وعطتنا موعد حق باجر​

وطلبت منا انه ننزل الطابق -1 ونآخذ الجدول عنهم الخاص بالجلسات​

وفي المطعم عطونا البرنامج الغذائي لطول الاسبوع​

وبدينا في هذا اليوم الجلسات​

ملحوظه​

غير عن البرنامج الغذائي انا طلبت منها تعطيني علاج لكتفي اليمين​

لأنه دايما تكون العضله عندي مشدوده وأتألم منها بسبب رقدتي الغلط عليها​

وهذا العلاج ممن ضمن البكج اللي دفعناه​

قلتها ممشكله بدفع زياده ، وسوتلي 4 جلسات​

ملاحظتي ع فحص الطبيببه​

كون انه نحن يايين عشان التخسيس استغربت من الدكتوره انه ما اهتمت تآخذ وزني مجرد سألتني كم وزنج

ولاخذت مقاسات جسمي عشان تقارن الفرق بعدين​

ولما سألتها وقلتلها​

ليش ماتاخذين مقاسات جسمنا ووزنا​

قالت فيه ميزان في الممر تقدرين تقايسين وزنج​

طبعا ماعجبني كلامها

وبالنسبه للمقاسات قالت​

ممشكله اذا تبين بآخذ مقاس جسمج​

ولكن بس خذت مقاس محيط خصري وماقاسته مره ثانيه​

انا سكت عقبها وقلت الظاهر مايهتمون بهالشي​

والصراحه انقهرت ، لأني انا يايه ومتعنيه عسب هالشي وبالمقابل متوقع اهتمام كبير في هالموضوع​

واللي شفته عكس جيه

السنه اللي طافت لما سجلت في مركز عندنا في الامارات حق التخسيس أول شي يسووونه​

يخلونا نعق ملابسنا ماعدا الداخليه ويلبسونا روب خفيف مثل الورق ، ينلبس مره وحده وينعق​

وعقب تاخذني ع الميزان وتوزني والجهاز يطلع نسبة الدهون والماي والعضل وكل شي موضح فيه​

وهالشي مموجود عندهم في منتجعهم​

وعقب تآخذني في غرفه خاصه وتاخذ مقاسات جسمي وتسجله ، وكل اسبوع تشيك عليه​

يعني الواحد يحس فعلا انه ياي حق التخسيس​

ولكن للاسف البرنامج وياهم مانفع ويايي لسببين​

انه المغريات في حياتنا وايد فصعب كنت التزم بنظام غذائي وخصوصا انا ارادتي ضعيفه​

وعسب جيه فكرت اسافر الشيك لكن للاسف المده مب كافيه​

والسبب الثاني هي الظروف اللي مرينا فيها خلتني ما أكمل وتركتهم​

والحين رديت أكمل عندهم لأني كنت دافعه مبلغ كبير وماخلصت البكج مالي​

وقلت دام اني بديت في الشيك فخلني اكمل قبل ارمضان​

نرجع حق جلسات اليوم اللي خذيتها​

خذيت في هذا اليوم 3 جلسات وكلها بمواعيد محدده ولازم مانتأخر ولاتروح علينا الجلسه​

قبل موعد الجلسات سرنا مشينا ساعه في القريه ع محاذاة النهر​

هذا فندقنا​

شوفوا بخبركم عن المنطقه اللي حوالين فندقنا
لما نطلع من الفندق من الباب الخلفي وهو هذا الباب المهم وننزل من هاي النزله​

بتشوفون في ويهكم ساحه فيها أكشاك للبيع وأحيانا تقام فيها عروض وانشطه
وورا هاي الساحه فيها نهر ومطاعم وابنيه​

من زاويه ثانيه​

لو لفيتواع ايدكم اليمين ومشيتوا مسافه وطلعتوا السلم الي بيي في ويهكم وعقب لفيتوا يسار ومشيتوا ع طول ، هنيه بتشوفون
المحلات والمطاعم والسوبرماكت وحديقه والممشى طويل ومتفرع ، وهو نفسه اللي مشينا فيه اول يوم وكلنا فيه آيس كريم
أما لو خذيتوا جهة اليسار وانتوا طالعين من الفندق ، في هاي الجهه المنظر غير
هنيه بتمشون ع جانب النهر وعدالكم الخضرا والحدائق وجلسات وكل مامشيتوا بتشوفون أكثر
شويه مباني ، ومكتب المعلومات ، ومحلات وكوفيهات ومطاعم
وهالمكان وايد جميل حق التمشي
وفي نهاية هذا الممشى اتيكم محلات الماركات
لما نحن طلعنا مشينا هاي المره جهة اليسار صوب النهر​

شوفوا هالجانب من دريشتنا​

وهنيه لما طلعنا نتمشى​

هالجزء جميل جدا ولكن الصور ماعطت المكان حقه​

عموما في الاجزاء اليايه بعطيكم صور أكثر​

كل يوم بيومه​

وعقب ماتمشينا شوي رجعنا للجلسات​

وأول موعد كان عندي تأخرت ربع ساعه لأني طلعت من الغرفه متأخر​

وعقب تخربطت في الطوابق ، انزل واركب لين وصلت​

أول ماوصلت سويت نفسي مسكينه وجاهله وما أعرف المكان​

هي حرجت عليه وكانت بتفوت عليه الجلسه ، وعقب قالتلي هاي أول وآخر مره تتأخرين
قلتلها : اوكي سوري

وفعلا هنيه عندهم المواعيد دقيقه واذا الواحد تأخر ممكن تضيع الجلسه عنه وماتتعوض​

فحطوا بالكم هاي النقطه​

برنامجي في اليوم الأول​

الجلسه الاولى اسمها​

Peloid Packs​

انا بسميها جلسة الاكياس حاره​

موعدي كان الساعه 1.10 دقايق وهي موجوده في الطابق -1​

هي عباره عن أكياس حاره واعتقد فيها طين​

يحطونها ورا ظهري وع أقدامي من جدام​

وخلوها يمكن 20 دقيقه وبس​

للاسف ماصورت هنيه​

ولكن هاي المره الوحيده اللي حسيت هاي الاكياس حاره والمرات اللي عقب ماكانت حاره​

وعقب كنسلتها لأني ما استفدت منها ، بتعرفون أكثر عن هالموضوع في الاجزاء اليايه​

بعد ماخلصت الجلسه الأولى سرنا نتغدى في المطعم وهو يسكر الساعه 3​

وكان هذا طبقي الرئيسي​

مول مب حلو سمجهم​

بالاضافه الى السلطه​

​

وشوفوا عيالي شو الصور اللي طرشولي ياها من غداهم​

​

وحبيب قلبي

​

وكان هذا ردي عليهم​

​

ومن يومها ماطرشوا أي صوره طبعا عصبت عليهم وقلتلهم لازم تساعدوني​

بعد ماخلصت غدايي جهزت نفسي للجلسه الثانيه​

الجلسه الثانيه واسمها​

Endo - Vaco
بسميها أكواب الحجامه
موعدها الساعه 2.40 وهي موجوده في الطابق 2​

هي عباره عن أكواب تنحط ع الاماكن اللي تالمني من الظهر​

وهاي الاكواب بعد ماتحطها تشفط شرات الحجامه وعقب تشغل ذبذبات كهربائيه​

وبعد تميت فتره مب طويله يمكن ربع ساعه​

وهاي الجلسه من ضمن العلاج الاضافي اللي طلبته لكتفي​

وسويت منها 3 والرابعه لغيتها لأنها مافادتني​

الجلسه الثالثه واسمها​

Underwatermassage
بسميها مساج في البانيو
موعدها الساعه 3.45 دقيقه ، وهي موجوده في الطابق -2 الكابينه 3
في هاي الجلسه يدخلوني أول شي غرفة تغيير الملابس وفي هاي الجلسه تحتاجون مايوه بوقطعتين
وبعدين تدخلكم في البانيو ويكون الماي دافي
وعقب تييب هوز يبخ ماي وتمشيه ع كل أجزاء جسمكم
شو فايدة هاي الجلسه
أعتقد تحرك الدهون في الجسم أو تقوي العضلات
الله أعلم لأنه محد يشرحلك شي هناك
خلص جلستك واطلع
حق هاي الجلسه شلوا وياكم فوطه من حمامكم وكيس نايلون
لأنه عقب ماتخلصون بتعطيكم شرشف تتنشفون فيه
حد يتنشف بالشرشف بالله عليكم

وكيس النايلون هذا بينفعكم حق ثيابكم المبلول​

(( اسمحولي اني اقولكم بالتفصيل بس هذا للفايده ))​

ملاحظه مهمه​

في كل جلسه تسيرولها لازم تاخذون وياكم جدول البرنامج ، وفي كل جلسه تعطونهم الجدول
وعقب ينادونكم ولما تخلصون يردون عليكم الجدول بعد ماختموا ع الجلسه انه انجزوها لكم
طبعا انتوا حاولوا تكونون قبل الجلسه ب 5 دقايق​

عقب ماخلصت جلستي الاخيره رجعت الغرفه وكنت بروحي​

والصراحه تضايقت في هاليوم لأني ما أحس اني سويت شي وايد​

واللي معاي برنامجهم يختلف شوي عني​

هم عندهم في برنامجهم مشي مع قروب في الغابه مدة ساعتين وانا الدكتوره قالتلي​

هذا مايناسبج وبيتعبج وايد عشان ريولج فلات فوت​

مع اني أحس انه عادي بمشي شويه وبريح اذا تعبت

لما شفت اني فاضيه وماعندي شي وبروحي​

نزلت كوفي الفندق وشربت شاي​

وعقب طلعت اتمشي بروحي شوي وأتفرج​

وانا طالعه شفت هاذيل الحلوين في ويهي​

هاي المره خذيت صوب اليمين أتمشى​

تمشيت وعقب يلست ع الكرسي في هالحديقه البسيطه​

وعقب رديت الغرفه ، ووقت العشاء سرنا المطعم وورجعنا غرفتنا بدري​

ع فكره المطعم يسكر الساعه 9 وتكون الدنيا بعدها ماظلمت​

وهذا عشايي​

يتبع ...​

 

[nanaa]

اليوم الثالث يوم الجمعه 23/5/2014

برنامجي في هاليوم حافل ومزدحم​

ووايد تعبت وانهكت فيه

اول شي سرنا عند الممرضه الساعه 7 الصبح وسحبت منا دم ونحن صايمين​

وعقب بدينا جلساتنا​

الجلسه الاولى اسمها​

Lymphodr.Apar​

أنا سميتها الصروال الضاغط

موعدي كان الساعه 7.40 دقيقه ، في الطابق 2 غرفه رقم 207​

هي عباره عن صروال مثل الربل​

تطيحكم ع السرير وتدخلون ريولكم فيه وتسكره ، وتقريبا يوصل لين الخصر​

وهو موصول بوايرات وتشغله مدة نص ساعه أو أقل​

واللي يصير انه هالصروال يضغط عليكم وعقب يفج يعني يرخي ، وجذي لين تخلص المده​

أعتقد انه هذا يحرك الدوره الدمويه ويفتح العروق
لأني سبق سويته في بنجلور​

وعقب ماخلصت هاي الجلسه سرت تريقت​

هنيه صارلي موقف

​

لما خلصت الكورن فليكس فتحت العلبه وكلت الفراوله كلها
وعقب ماخلصت تذكرت انه في الاستقبال مخبرتني انه كل يوم بيحطولي فاكهه في علبه​

وهاي الفاكهه هي سناك بين الوجبات ، يعني اشلها ويايي وعقب ساعه او أكثر أكلها​

ونحن كلنا الخضر واليابس

الجلسه الثانيه واسمها​

Exercises in swim.pool​

رياضه في الماي​

موعدها الساعه 10 وهي في الطابق -2​

وهي عباره عن رياضه في حوض السباحه الداخلي​

وهنيه بتحتاجون مايوه ومب شرط يكون مايوه اسلامي + كاب للراس + وفوطه + نعال مناسب​

والافضل بعد ماتخلصون تتنشفون وتلبسون ملابسكم​

وسيروا غرفتكم اتسبحوا هناك ، لأنه قسم الشور مافيه خصوصيه

صور المسبح الداخلي​

قبل لاتدخلون من الباب اللي يوديكم المسبح بتشوفون غرفة الجيم​

للاجهزه الرياضيه ، وايد صغيره وتسد النفس

عقب ماتدخلون من الباب اللي يودي المسبح ، ينقفل هالباب ومحد يقدر يدخل​

واذا حد منكم اتأخر خلاص انقفل الباب وراحت عليه الجلسه

وهنيه غرف تبديل الملابس​

وهاي خزائن لأغراضكم​

تشوفون الستاره اللي هناك​

وراها الشور وهو يضم 4 شورات ورا ستاره وحده يعني ابدا ماشي خصوصيه​

ومافي داعي اخبركم عن العيايز الاجانب وفضايحهم

هذا الممر اللي يوديكم للمسبح​

هاي من الجلسات او البرامج اللي حبيتها

وممسموح لنا نسبح في الحوض

انما ندخل ونصف بطريقه معينه والمدربه وهي خارج الحوض
تسوي حركات رياضيه ونحن نتبعها ونسويها في الماي

ونتم تقريبا نص ساعه أو أكثر شوي ، وعقب مانخلص التمارين

تعطينا 10 دقايق زياده نستخدم مساجات الماي أو الجاكوزي
وأقصد بمساجات الماي

هو ماي متدفق من الحوض وموزع في الحوض بطريقه معينه

وكل واحد خاص بجزء ، شي حق الاكتاف وشي حق البطن وشي حق الريول وجيه يعني​

ونحن العضوات نتبادل الاماكن​

وعقب ينتهي هذا البرنامج وتختم ع جدولكم وباي باي​

أنا طلعت غرفتي وتسبحت وريحت وعقب سرت تغديت​

للمره الثانيه أطلب سمج

وأعتقد من عقبها كرهت سمجهم وماطلبته ابدا​

أكلهم ملغ​

لابهارات ولاملح ولاشي ، ونحن نعدل الطعم بالملح والفلفل والليمون وساعات بالتباسكو​

عقب استعديت للجلسه الثالثه واسمها​

Hydrotherapy
وهاي سميتها جلسة التعذيب بالماي

كانت اتعس جلسه في برنامجي

موعدها كانت الساعه 2،20 دقيقه في الدور -2 غرفه رقم 1​

الله يسلمكم هاي الجلسه تحتاجون فيها مايوه بوقطعتين
وعقب تدخلون غرفه مثل غرف أفلام الرعب

وتوقفون في مكان محدد وحواليكم حدايد عشان تمسكون فيها​

شوفوها في الصوره​

وهي تكون واقف جدام آله تبخ ماي مجابلتني​

بهاي الطريقه​

وهاي الاله فيها هوزين ماي ، واحد حار والثاني باااارد ودفع الماي قوي وااايد​

توقفون جدامها ، وايدكم ماسكه الحدايد

وهي تصوب عليكم الماي الحار ع جزء جزء من جسمكم ، مثلا الريل كلها من جدام

وهي طالع ونازل بالماي الحار وتكون قوته عاليه ، وعقب ترشكم

مره وحده ع كل الريل اللي مشت عليها بالماي الحار ، فجأه

ترشها بماي بارد

تعالوا شوفوا انا شو سويت

الصراحه هسترت تميت أصرخ واشتمها واتحرطم

وهي تبتسم

وشويه أصرخ وشويه أضحك بصوت عالي

خبلتبي الله يغربلها

ومادريت انه العالم اللي برع ممكن تسمع صوتي

مايندرى منو سمع صراريخي وشتايمي

وفي العاده أنا مؤدبه وممن النوع اللي أشتم

بس غصبن عني ماحسيت بنفسي الا وانا أشتمها ساعات أقولها

ياالكلبه ، يالخايسه وما أدري بعد شو قلت

وتخيلوا تقريبا سوت جسمي كله

زين ماوقف قلبي

وقلت توبه ما اباها هاي الجلسه

لايمكن آخذها مره ثانيه ، أصلا ما أدري شو فايدتها

وعقب ماخلصت تنشفت ولبست وطلعت داير راسي ، وانا أقول

الحمدالله طلعت بالسلامه

تحتاجون حق هاي الجلسه​

مايوه بوقطعتين + فوطه + نعال مناسب + كااب نايلون للشعر الخاص بالشور

هذا بتحصلونه موجود في حمامكم كل يوم يحطون منه

بعد خلصت هاي الجلسه ع طول​

سرت الجلسه الرابعه واسمها​

Anticellulite massage

مساج السايلولايت للريل كلها والبطن بس

وموعدها 2،50 دقيقه في الطابق -1 غرفه رقم 116

وهاي من أفضل الجلسات عندي لأنها مفيده جدا للتخسيس

وتقريبا تاخذ ويايي 40 دقيقه​

وعقب ماخلصت كل هاي الجلسات تخيلوا كيف كانت حالتي من التعب و الارهاق

وعلى طول رجعت الغرفه ورقدت رقدت الاموات وماطلعت من الغرفه الا بس حق العشا​

ونفس كل الاطباق لاملح ولافلفل ولا اي طعم حلو

وصدر الدياي نااااشف ويابس

وقبل ما أختم بخبركم عن

موقف محرج صارلي في هاليوم

​

أحيانا لما كنت أسير جلساتي أنزل واصعد من الدري ( السلم )

وما استخدم اللفت ( المصعد )

ومره وانا نازله شفت وحده تركض وهي نازله

ولما خلصت جلستي وانا صاعده الدري قلت في خاطري أنا بعد بركض جيه هي أحسن عني

وركضت شرات الغزاله وشوي

الا اندبغ هاذيج الدبغه العوده

عاد انا هاذيج الساعه مايهمني شو اللي يعورني كان أهم شي عندي انه محد شافني

قمت أتصدد في كل صوب ويوم شفت عمري بروحي أرتحت

ومن يومها تبت أركض ، وامشي خطوه خطوه وساعات اتيود
كله ولاسلامتي

الحين تصبحون ع الف خير واشوفكم في الردود​

يتبع ...

​

 

[nanaa]

اليوم الرابع يوم السبت
​

يوم المارثون

خريطة كارلوفاري

في هذا اليوم كارلوفاري كان عندهم مارثون كبير والبلده كلها متجهزه


وكثير يايين من مناطق ودول ثانيه

بخبركم سالفه

في فندقنا شفت مجموعة شباب من كينيا وااايد ضعاف

وكل يوم لما اشوفهم في المطعم اقول في خاطري هاذيل شو يسوون في هالمنتجع

يتعالجون من شي او يسوون رجيم مثلا

والصبح بدري يسيرون يمشون ويسون رياضه

ونسيت انه فندقنا من الفنادق العاديه وممكن الناس تسكن فيه بدون مايكون لهم اي هدف في العلاجات

المهم عقب عرفت انه هالكينيين يايين يشاركون في المارثون وما ادري اذا حد منهم فاز

الله يهداهم ماخبروني عشان اشجعهم

أحداث هذ اليوم

لأنه اليوم السبت فتكون عندنا بس جلسه وحده

وكل أحد عندهم اجازه يعني ماشي جلسات

وكنا مخططين انه يوم الأحد بنسير براغ

اليوم نشيت بدري اصلا من ييت وانا انش بدري مول ما اشبع رقاد
سرت جلستي الوحيده

وشو تتوقعون

أي جلسه خذيت في هاليوم

؟

؟

أتعس جلسه

Hydrotherapy

جلسة التعذيب بالماي

مالغيتها

وطلعت انها في جدولي ثاني يوم الصبح الساعه 7.15


يعني من صباح الله خير انا سايره أنضرب بالهوز

بس هاي المره سكرت بوزي لاصرخت ولاشتمت

بس يوم ترش ماي بارد اتيبس مكاني

والصراحه هاي المره يتني وحده وايد أموره واحسن من اللي سوتلي أمس


هاذيج كانت قاسيه وايد عليه

عقب ماخلصنا جلساتنا سرنا نتريق

ياااابسه الخبزه

بعد التعديل

وفاكهه بين الوجبات

وعقب طلعنا في القريه نتمشى ونتفرج

وعشان المارثون الحياه زحمه ويوله والمكان ممتع

طلعنا في اتجاه اليمين صوب مركز التسوق

هذا السوبرماركت اللي كنا ندوره أول يوم وهو جدامنا وماكنا نشوفه
ع فكره في هالمبنى سوبرماركتين واحد تحت والثاني في الدور الأول

شارع حيوي وكله محلات وفيه مطاعم

نحن طالعين في هالاتجاه وعندنا هدف قبل لانتمشى

نحن سايرين لمحل متعنين له عسب نشتري تذاكر الباص اللي بيودينا براغ باجر

هذا هو المكتب اسمه

STUDENT AGENCY

للاسف لقيناه سكر الساعه 12 ونحن كنا واصلين الساعه 1

فقررنا نسير محطة الباصات ونسأل ونشوف اذا نقدر نحجز تذاكر حق باجر

مشينا فتره لين وصلنا محطة الباص ، طبعا كنا نسأل الناس

ومن حظنا الحلو انه لقينا فرع المكتب موجود في المحطه ومفتوح

حجزنا تذكرتين ذهاب وعوده ب 320 كرونا للشخصين

وكان موعد رحلتنا باجر الصباح الساعه 8

وصارلنا موقف ماتوقعناه بخبركم عنه في الجزء الياي

ونحن نتمشى اكتشفت مطعم هندي

عقب بخبركم عنه بس مافوته وجربته

عقب ماتمشينا وحجزنا التذاكر رجعنا غرفتنا نصلي ونريح

وهاي لقطات من شباكنا الخلفي

عقب نزلنا نتغدى

عقب ماتغدينا رجعنا وطلعنا نتمشى بس من صوب اليسار

وكان الجو يخبل غيم ومطر واول مره يعتدل الجو من يينا
وطبعا هالجو مخرب ع المتسابقين

وعقب انقلب الجو فجأه وطلعت الشمس وحرت الدنيا علينا

أنشطه موجوده في كارلوفاري

الاجواء جميله وممتعه

اللي لابسين ورق فضي هم اللي طلعوا من المارثون وماقدروا يكملون

وبعض المتسابقين

عقب المشي في هالجو الحلو اخترنا كوفي نشرب فيه شاي

الصراحه خدمتهم تعيسه في هالكوفي

ما أدري شو عندهم متيمعين الموظفين ويالسين داخل يسولفون ومحد ايي يسألنا شو نبا

وانا كل شويه أسير داخل أسألهم عن طلبي واذا أبا شي
وماعندهم زبائن غيرنا

وفوق هذا شايهم مب حلو

وعقب ماخلصنا جولتنا رجعنا تعشينا

وسرنا غرفتنا استعدينا حق رحلة باجر لبراغ

بالنسبه للخليجين

خلال الايام اللي طافت اتعرفنا ع بعض منهم وكنا نسلم ع بعض في المطعم وفي الروحه والرده

واحيانا كنا ندردش وياهم

وكان كثير منهم وايد طيبين ومرحبانيين بس انا طبيعتي ما أحب اتعرف وايد ع الناس ولا أكون صداقات

واحب استمتع برحلتي مع الناس اللي مسافره وياهم

ممكن يصير تعارف خفيف بس ما أحب أتعمق أكثر في علاقاتي


يمكن تقولون عني انطوائيه او وغده هههههه ما أدري بس انا أرتاح جذي

وع الرغم من هذا في هاي الرحله غصبن عنا تعمقنا في علاقاتنا مع أغلبهم

ولكن والحق يقال انهم ناس وايد طيبين وحبوبيين ووايد انبسطنا معاهم

منهم من السعوديه ومنهم من قطر ومنهم من الكويت ومنهم مصريين

ولازلنا متواصلين معاهم بعد مارجعنا

بس اللي من أهل قطر هاذيل أكثر ترابعت وياهم

الله يجمعنا دايما ع المحبه والخير ولايشتت شملنا


يتبع ...

​

 

[nanaa]

اليوم الخامس يوم الأحد تاريخ
25 / 5 / 2014

اليوم هذا مميزعندي لأنه يوم ميلادي​

نشينا بدري وتريقنا واليوم قدرت أصورلكم البوفيه​

ريوقنا روب وكورن فليكس

والسناك كان يح
خذيناه ويانا وكلناه في الباص

وعقب سرنا نمشي لين المحطه

والباص يتحرك الساعه 8 الصبح

مشينا في السكه اللي ع اليمين لين آخرها

وعقب لفينا يسار ومشينا مسافه لين شفنا المحطه جدامنا ع الشارع الثاني ، والمحطه كبيره​

وصلنا المحطه الرئيسيه واسمها


محطة كارلوفاري تريمنال

​

وعقب دخلنا من هالباب ونزلنا تحت بالسلالم ووقفنا عند الخط 1 اللي فيه باصنا
​

وبعد ماعطيناهم التذكره خبرنا الموظف عن ارقام كراسينا

وللاسف الحرمه ماحطتنا عدال بعض

عقب انا كلمت اللي يالسه عدالي انه تغير كرسيها وكانت جدا متعاونه ووافقت تعطينا كرسيها

ع فكره هم جدا شعب طيب ومتعاون وحبوب

ومحطتنا في البراغ اللي بتنزلنا السنتر أسمها​

محطة فلورانس

تحرك الباص تقريبا ع الساعه 8

ونحن يالسين وزعوا علينا السماعات
​

وعرضوا علينا فيلم ونحن نختار اللغه نباها
​

والحلو والكشخه في الباص انه فيه واي فاي

عاد أنا خليته يولي الفيلم ويلست ع فوني

​

يتبع ...

​

 

[nanaa]

نتابع معاكم

وصلنا عقب ساعتين تقريبا
​

اول شي وقف الباص في محطة المطار

وعقب كملنا ومشينا في مدينة براغ لين وصلنا محطتنا
​

فاللي يبا يسير المطار من كارلوفاري يقدر ياخذ الباص والعكس صحيح

انصحكم فيه

جدا نظيف وراقي ورخيص والرحله كانت جدا ممتعه

بس للاسف لأنه وقتنا دايما مزحوم فماعرفت رحلات الباص الثانيه

يعني لو عندكم وقت ممكن تتطلعون الى اماكن ثانيه تتفسحون فيها​

نزلنا في محطتنا فلورانس

​

كان عدالها محطة الباص محطة الميترو

نزلنا في محطة الميترو وحجزنا من المكينه تذكره نستعملها أعتقد في خلال نص ساعه

الصراحه نحن واحد ساعدنا وقال اذا تبونها ليوم كامل بـ 100 وكسوركرونا بس

اذا مشوار واحد فهاي أفضل

وفي الرده بعد تحجزون مره ثانيه بتكون أرخص لكم​

حطينا في المكينه 24 كرونا وضغطنا ع الزر اللي مكتوب عليه

24 وعقب تنزل التذكره

وكررنا العمليه حق تذكره ثانيه وجذي​

وعقب ركبنا القطار وخذينا خط رقم 2

ونزلنا في ثاني محطه واسمها محطة ميوزيم

وعقب نزلنا وتسوقنا

ومن خلال الصور بشرحلكم أكثر

المكان حيوي وحلو وحبيتها وايد براغ​

وعقب دخلنا فندق الامبسادور وتغدينا في مطعمه المطل ع الشارع

بس نحن يلسنا داخل لأنه الدنيا مشمسه

وهاي يلسته من بعيد بومظله

​

وانا يالسه داخل واتطالع برع كانت المفاجأه اللي ماتوقعتها

تدرون من شفت ؟

شفت الروسيه اللي يلست عدالي في الطياره

ولما شافتني مسكينه فرحت وقامت تشاورلي

قمت وسلمت عليها وكان معاها صديقها عرفتني عليه هههههه

سولفت وياها وتمنيت لها رحله سعيده لأنها كانت بترجع دبي في هاليوم​

نرجع لغدانا ..


حاولنا مانطلع عن النظام وأول مره من يينا نآكل أكل لذيذ

بعد الغداء رجعنا نتسوق مره ثانيه وفيه كثير محلات والشارع وايد

كبير مثل الشانز في باريس

وع جوانبه محلات ومطاعم ومولات​

للاسف ماكفانا الوقت
وع حظنا اليوم حر وشمس

وقررنا نخرب شوي ونآكل أيسكريم

​

وعقب ماخلصنا تسوق رجعنا لمحطة ميوزيم نفس الي نزلنا فيها​

وقطعنا نفس التذكر

وخذينا الخط الأحمر​

وعقب نزلنا في مطة فلورانس​

ووقفنا ننتظر الباص اللي وصل بسرعه وماتأخر​

وكانت المفاجأه اللي ماتوقعناها

بعد مادخلنا شنطنا في الباص ويينا بنركب الباص ، طلبوا تذاكرنا
لما عطيناهم ياها قالوا

انتوا حاجزين بس ون واي يعني بس سيره ومب مرجع

قلنالها كيف ؟

وراوتنا التذكره وشرحتلنا

قلنالها بس نحن طلبنا منها سيره ومرجع

قلتلها شو الحل

قالت انتظروا اذا حد من اللي حاجزين ماوصل بنقطعلكم تذاكر

لكن للاسف الباص انترس وكلهم وصلوا

قلتلها والحين شو نسوي

قالت سيروا داخل المحطه واحجزوا تذكره ثانيه بعد ساعه فيه باص ثاني بيوصل

سرنا ع الكاونتر وحجزنا تذاكريديده بـ 320 للشخصين​

وعقب رجعنا ننتظر

والحمدالله ما أتأخر الباص وكان نصه فاضي​

ورجعنا بالسلامه لأرض كارلوفاري بس

وصلنا متأخرين وسكر المطعم مالحقنا ع العشا

ولكن مشينا عمارنا بالموجود​

نقاط مهمه عند حجزكم تذاكر الباص


* لما تقطعون التذاكر اكدوا عليهم تكون الكراسي عدال بعض


* أكدوا عليهم انه تكون الرحله سيره ومرجع طبعا اذا انتوا تبون هالشي

* لازم تختارون الوقت اللي تحبون تسيرون فيه وانا أنصح تاخذون باص الساعه 8 عشان تستفيدون من الوقت

وبعد تختارون الوقت اللي بترجعون فيه لأني اكتشفت اني لازم

أحدد وقتي وبهاي الطريقه يكون كرسيكم محجوز

وانتهى هاليوم الجميل

كانت تجربه حلوه​

يتبع ...​

 

[nanaa]

اليوم السادس يوم الاثنين

همسه

اذا قررتوا تزورون منتجعات الشيك بغرض التخسيس خلوا


وصولكم للمنتجع يوم الأحد


عشان هذا اليوم عندهم اجازه والاثنين بتبدون وياهم


لأنه نحن تونا بدينا الجلسات ولايانا الويك اند وخربناها​

أحداث اليوم

قمت بدري ونزلنا تريقنا وعقب بديت جلساتي

اليوم الله يسلمكم حافل بالجلسات

الجلسه الاولى


الرياضه في الماي


Exercises in swim


الساعه 10


هاي الرياضه وايد أحبها

الجلسه الثانيه


الساعه 11.10 دقايق


الصروال الضاغط

ملاحظه


ترا انا أحطلكم التوقيت لكل جلسه بس عشان تعرفون كيف كنا نتعب في بعض الاوقات

الجلسه الثالثه اسمها


Lymphodr.Apar


تبدأ الساعه 1.40 دقيقه


هاي عباره عن وايرات يثبتونها ع جسمكم وتحسون بذبذبات


وأعتقد هاي تساعد ع التخسيس بس انا ماعجبتني


لأنه بس تخليني ربع ساعه وهاي الذبذبات أنا كنت اسويها في البلاد واتم فيها 45 دقيقه

موعدنا مع الطبيبه


الساعه 2.50 دقيقه


ماسوت شي ولا اهتمت فينا ولاشافت كم صار وزنا


بس مجرد سألتنا اذا كل شي أوكي او اذا فيه أي ملاحظات


وشافت نتائج التحاليل وخبرتنا اذا عندنا أي مشكله


طيب والوزن ياحرمه

ع الاقل تطمني علينا

شوفي نزلنا ولازاد بسبب الايس كريم

بس للاسف ماحسينا انه في حد مهتم فينا

أصلا الجهاز اللي يقايس الدهن والعضل والماي ويحلل الجسم


مموجود عندهم وهذ أقل شي لازم يكون متوفر


ع فكره من عقب هالموعد ماعطتنا موعد ثاني
​

وقت الغداء
​

سرنا تغدينا عقب الجلسه الثالثه

ما أدري هذا مثل القمح ولكن أبدا ماعجبني وما أكلته

الجلسه الرابعه


الأكياس الحاره اللي ماكنت حاره

وموعدي كان الساعه 3.40 دقيقه

أما الجلسه الأخيره

كانت مساج ريلاكس للجسم كله


اليوم وايد مرهق من جلسه لين جلسه انهكت وايد رغم انه الجلسات مافيها مجهود كبير


بس كل شوي أنزل للجلسه وعقب أطلع غرفتي شويه وأحيانا اسير الجلسه الثانيه أتريا


واحس خلاص أبا أرقد بس مب قادره مسطله من التعب


لأنه بين جلسه وجلسه مايكون فيه فجه كبيره


واضطريت أمسك نفسي لين أخر جلسه وعقب المساج دوخت
وسرت غرفتي وانا بنص عين

ورقدت بسبات عميق


وبعد مانشيت من الرقاد وريحت طلعنا نتمشى

سرنا من صوب النهر جهة اليسار

حتى حمامهم متان يحتاجن رجيم

ياسلام ع هالمكان

الحين لو يايه ويا اسرتي جان مسويه هاك المجبوس الغاوي


ومرتزين في هاي اليلسه الحلوه

هذا الكوفي اللي يلسنا فيه هاذيج المره وكانت خدمتهم تعيسه

هذا المول الصغير عدال فندقنا ودخلته في يوم ثاني وبراويكم صوره عقب

اليوم الجو جميل ومنعش

ع فكره في يوم من الايام الاولى يمكن ثاني او ثالث يوم صحيت


بدري من الفجر وطلعت اتمشى بروحي


واتمنيت اعيد التجربه بس من ضغط الجلسات ماقدرت

مشينا لين وقت العشاء

اليوم عشانا ستيك وانا احب الستيك لكن هذا كان تعيس وفيه كله خيوط
وماكليناه ومن يومها بعد ماطلبناه

وعقب رجعنا الفندق


الجلسات تنهكنا وتاخذ من وقتنا ومانحصل فرصه نستكشف المدينه


مافي أحداث يديده في هاليوم غير انه اليوم تيلسنا ويالخليجيات في اللوبي


الفندق وهاي أول مره نيلس وياهم ومن عقب بدأ مسلسل التجمع عندنا

الفندق فيه كثير خليجين وفي منهم متعود ايي كل سنه ماشاءالله عليهم


وبعد فيه عرب من مصر ولبنان أكثر شي


وتعرفت ع وحده من تركستان غرفتنا عدال غرفتها وكانت بروحها


واستوت اربيعتي فتره بسيطه وعقب روحت


بس حبيتها وايد


وانتهى هاليوم الجميل

​

يتبع ...

​

 

[nanaa]

اليوم السابع يوم الثلاثاء

صحينا بدري والجو يجنن غيوم وامطار

بعد الريوق بدينا برنامجنا​

وكان برنامجي اليوم عبار عن​

الجلسه الاولى​

Hydrotherapy

التعذيب بهوز الماي وهاي المره الثالثه

كانت جلستي الساعه 9.15

الجلسه الثانيه​

Exercises in swim

رياضه في حوض السباحه

وكانت الساعه 10

الجلسه الثالثه​

Anticellulite massage

وهاي من أحلى جلسات المساج واللي فيها فعلا فايده

وهي مساج السايلولايت

ومدتها تقريبا 40 دقيقه وكانت تسويلي من البطن لين الركبه

وكنت أباها تسويلي فيه ايدي بعد بس تقول مطلوب مني هالمكان بس

وهي تستخدم في هالمساج نوع من الكريمات الخاصه بتذويب الشحوم

ومثل هالمساج وايد ممتاز لو من عقبها سويتوا رياضه بتكون نتايجها رهيبه​

وقت الغداء​

سرنا تغدينا في هالوقت

نسيت أصور الغداء

الجلسه الرابعه​

أكواب الحجامه اللي خبرتكم عنها والخاصه بكتفي

الساعه 2.20

العصر لما خلصت كل جلساتي طلعت تمشيت بروحي لأنه اللي

ويايي ساروا عني يمشون ويالقروب

وانا محرومه

وهاي هديه منهم

استكشفت المول اللي عدال فندقنا وكان صغير فيه محلات ملابس


وبقاله ومطعم وصرافه غيره

أسعار الصرف
​

وعقب طلعت من المول وتمشيت وانا مستمتعه بالجو والمكان​

هاي محطة الباص الصغيره واللي ننطلق منها لأماكن داخل

كارلوفاري

وهو ورا شارع المحلات الي في مركز المدينه​

أنا تمشيت من صوبين


من جهة اليسار واليمين

وعقب رجعت الفندق وكان عدال فندقنا كان واحد يبيع مضرب

تنس فكرته حلوه

أشتريت واحد حق عبادي​

بعد مارجعت سرنا تعشينا في الفندق

اليوم قررنا نغسل ثيابنا وهاي ثاني مره نسويها من يينا


ندفع للفندق 250 كرونا وناخذ غرفة اللاندري 4 ساعات

عيوب الغرفه انه مافي تكييف ولاشباك نقدر نفتحه و4 ساعات


ونحن نغسل ونكوي والباب مسكر


فطسنا من الحر

في المره الاولى كنا بروحنا ويلسنا لين الساعه 2 بالليل

تعبنا وايد ولازم مانتعدى الاربع ساعات

فيلسنا نكوي كل اللي عندنا

لأنه ماعندهم كوايه وقالوا اذا تبون لازم تأجرون غرفة اللاندري

ملاحظه

هاتوا كوايتكم وياكم

بس في المره الثانيه كانت يمعتنا أحلى والحلو في هاي المره انه

يلسوا معانا ربيعاتنا القطريه والسعوديه

ومروا علينا الكويتيات سلموا وراحوا

وتمينا نحن الاربعه سوالف وضحك وماحسينا بالوقت لكن اللي

نايمين من الاجانب عصبوا علينا من حشرتنا رغم انه الباب مسكر علينا

وتمينا لين الساعه 1 ونص بالليل

وانتهى اليوم الشاق والجميل




يتبع ...

​

 

[nanaa]

اليوم الثامن يوم الاربعاء

همسه

لما يعطونكم برنامج الجلسات في حالة لو ماعجبكم توقيت لبعض


الجلسات تقدرون تغيرون الوقت من الكاونتر اللي في الطابق -1


من نفس المكان اللي خذيتوا منهم البرنامج أول مره


لكن في حالة لو بغيتوا تغيرون جلسه من الجلسات مثلا تلغونها


وتحطون بدالها جلسه ثانيه في هاي الحاله لازم تسيرون عند


طبيبتكم وهي لازم توافق وتعدل لكم البرنامج وبعدين تنزلون تحت


وتاخذون البرنامج عنهم بعد التعديل

اليوم غير كل الايام

اليوم أحلى يوم بالنسبه لي


اليوم لأول مره أحس اني انجزت شي مهم في الهدف اللي يايه


عشانه الشيك

انا ما ابالغ في شعوري بس هذا الواقع اللي لمسته


بتعرفون هالشي من خلال احداث اليوم

اليوم بعد جميل غيم ومطر

بس كان اكثر بروده

جلساتي اليوم حسب البرنامج

الجلسه الاولى


مساج في البانيو الساعه 8 ونص

الجلسه الثانيه


الصروال الضاغط الساعه 10.25

الجلسه الثالثه


الذبذبات الكهربائيه الساعه 1.40

الجلسه الرابعه


الاكياس الحاره الساعه 3.40

الجلسه الخامسه


مساج السايلولايت الساعه 4.40

هاي هي جلساتي اليوم بس هداوه اليوم اعلنت التمرد


اليوم قررت قرار صارم


قررت أسير أمشي ويالقروب

طبعا لازم أسيرأكلم الدكتوره عشان تغيرلي جدول اليوم


والغي بعض الجلسات اللي ممستفيده منها


اسميني تبهدلت عشان اغير برنامجي

أول شي سرت الكاونتر اللي تحت في -1 وقلتلهم ابا أطلع ويالقروب


وقالولي سيري كلمي الدكتوره


طلعت الدور الثاني لكن لقيت الدكتوره عندها مريض ويلست أتريا


يخلصون بس تأخروا


وانا عندي الساعه 8 ونص المساج في البانيو


قلت بخلص جلستي وبرجع عند الدكتوره

خلصت الجلسه ورجعت عند الدكتوره وبعد حصلت عندها مريض


قلت بسير اتريق وبرجعلها

الوقت قصير ولازم أكسب الوقت ، بعد ماتريقت طلعت عند


الدكتوره للمره الثاثله بس هاي المره لازم أقابلها


وبعد حصلتها مشغوله فيلست أتريا وبديت اتوتر ماشي وقت


وبعد انتظار وتوترفتحت الباب


وفي واحد كلمها وانا تميت مرتزه واقفه فقالتلي


شو تبين


قلتلها : ابا أغير البرنامج


قالتلي تعالي ادخلي


فقلتلها انا حابه أسير أمشي ويالقروب


طبعا انا حاطه في بالي انها يمكن ماتقبل عشان ع حسب كلامها
مب زين لريولي


أول ماخبرتها رغبتي


جان تفرح

وقالت وايد زين انج بتسيرين تمشين ويالقروب


ياناس هاي تستهبل ولا الشو

انقهرت منها صراحه


لأنها هي اللي مانصحتني ولاحطته في برنامجي ولما أنا أقرر تقوللي
زين انج قررتي

قلت في خاطري


الحين اهم شي عندي اني الحق ع القروب ممتفيقتلج


قالت لازم تحذفين جلستين اذا تبين تمشين


قلتلها أحذفي جلسة الذبذبات والصروال الضاغط


طقطقت ع الكمبيوتر وقالتلي الحين اوكي سيري تحت اخذي الجدول


وركضت تحت خذيت الجدول وعقب ركضت لين غرفتيعسب


أجهز نفسي ، وموعدنا كان الساعه 10


والحمدالله لحقت ونزلنا في اللوبي وسرت عند المدرب وعطيته الورقه


وعقب ودانا عند سيارته الفان وعطانا حزام نربطه في خصرنا


نحط فيه موبايلنا ودبة الماي اللي عطانا ياها وكلينكس انتوا تييبونه


معاكم للحاجه وكله يكون في جيب الحزام


ولأنه الجو ممطر في هذا اليوم فقام ووزع علينا جاكيت نايلون


نلبسه بس أنا ماخذيته لأنه جاكيتي ضد المطر


وعقب عطانا عصاتين حق المشي تتثبت في اليدين وعلمني كيف استخدمهم


واذا تحبون ممكن تيبون أي بود وسماعات اذابغيتوا تسمعون اي شي وانتوا تمشون


القروب كله خليجين شباب وصبايا


وعددنا كان أقل من 10 ، وبدينا مرحلة العذاب المفيد

مشينا في الغابات صعدات ونزلات تقريبا ساعتين

وعاد هداوه ماعندها لياقه ، ومره وحده أمشي 7 كيلو

ياهو مشي مشيته


ياهي سلالم ركبناها


ياهي صعدات ونزلات


ياويلي هلكت هلكت من التعب

لدرجة اني كنت اتنفس بصعوبه في بعض الاوقات خصوصا في الصعدات

وطبعا انا في آخر القروب

هم ماشاءالله متعودين بس انا يديده اول مره

والمدرب أسمه آرتور وهو بولندي يعرف بعض الكلمات العربيه
يقوللي :

هداوه أكملي
اقوله انزين انا أمشي هاي قدرتي

وساعات أوقف اسوي عمري أصور عشان اخذ نفس

الصراحه المدرب جدا رائع ودمه خفيف وماشاءالله ع الخليجين


معلمينه أغاني خليجيه قديمه مثل


هيلي يارمانه

ما أدري كيف مضى الوقت وماصدقت انه خلصت الجوله


واللي ويايي تقوللي


اليوم يابنا في طريج أسهل

يالهوي يوم هذا أسهل

هذا ارتور مدربنا

ماقدرت أصور وايد لأنه كله نمشي ومانوقف

القروب متجدم عني

أول مارجعت لأول مره أحس اني بذلت مجهود


لأول مره أصب عرق من ييت


كان ويهي احمركانه طماطه


رجعنا الغرفه وخذيت شور وريحت في غرفتي

وقت الغداء

عقب كملت باقي جلساتي

الاكياس الحاره الساعه 3.40

مساج السايلولايت الساعه 4.40


هذا المساج وايد ريحني عقب هالمشي

وعقب ماخلصنا كل جلساتنا طلعنا نتمشى ويااربيعتنا القطريه
كانت الساعه

هاي المياه الكبريتيه اللي ماشربناها ولامره وهي منتشره هناك


ما أدري دكتورتنا المصونه ماعطتنا ياه من ضمن البرنامج وانا


بغيت الفكه منه وماسألتها عنه


ومافكرت اجربه

يجنن الجو

وتيلسنا في الكوفي وأصرت صديقتنا القطريه الاتذوقنا كيكة العسل


وخربت نظامي الغذائي

لحظه


لحظه


انا ماكليت منها الا قطعه صغيرونه من طرف الخاشوقه ( الملعقه ) والحمدالله ماعجبتني

أنا سويت جريمه ثانيه

كنت وايد بردانه ويوعاااانه

أنا


شربت هوت شوكليت

بس ماشربته كله

نصه بس

وعقب رجعنا ع طول المطعم نتعشى

وبعدها خلاص مافيي حيل رديت غرفتنا بدري وريلاكس


والشله الخليجيه كلهم متيلسين في اللوبي


هذا التجمع كل يوم عقب العشاء


أنا اعتذرت وقلتلهم ابا ارتاح واللي ويايي راحوا يلسوا معاهم


وانا يلست أتابع مسلسلاتي ع اللاب توب

وانتهى هذا اليوم اللي حسيت اني


انجزت فيه شي حقيقي من ييت المنتجع

يتبع ...

​

 

[nanaa]

اليوم التاسع يوم الخميس

بعد ماتريقنا

بديت جلساتي لهذا اليوم

الجلسه الأولى ..


مساج بالماي في البانيو


وكانت الساعه 10.10

الجلسه الثانيه ..


رياضه في حمام السباحه


الساعه 11

الجلسه الثالثه..


مساج السايلولايت الساعه 4.35

اليوم حبيت اسير أمشي ويالقروب ع حسابي لأنه مموجود في برنامجي


الحلو انه المدرب يعطي حصص خاصه


يعني أدفع للمدرب مباشره بـ 250 كرونا


ولكن هم موعدهم الساعه 5 وفي هالوقت عندي مساج وهاي


الجلسه مهمه عندي


حاولت أغير موعدها بس ماقدرت


فماكان لي حظ أكون ويالقروب

سرت أول جلسه لي وتأخرت 5 دقايق ورفضوا يدخلوني آخذ


جلستي عشان التأخير

وانتظرت موعد الثانيه وخلصتها

موعد الغداء


اليوم قررت آكل برع في المطاعم اللي برع


كرهت أكلهم وبغيت أغير وقلت بحاول ما أطلع عن النظام واخترنا


مطعم هندي كنا شايفين دعايته ومره شفنا بالصدفه مكانه فقررنا


نسير نتغدى ونآكل شي فيه نكهه

طلعنا من الفندق من الباب الرئيسي


ولفينا يسار ونزلنا من النزله

ركزوا في الصوره ع جهة اليمين العماره الحمراء تكون الدخله منها ع المطعم


المهم في هالشارع

هذا فندقنا من ورانا

اللافته مكتوبه بالعربي

موقعه تعيس ومايشجع

استقبلنا راعي المطعم ببتسامه

المطعم فاضي ، يغاوي عليه الذباب

المنيو

وطلبنا دجاج تكا مشوي وعيش أبيض وروب وخبزه وحده نان

العيش تقاسمناه نحن الاثنين عن تقولون كلت وايد

اكله حلوبس انا شكيت انه التكا مشويه لاني شفت عليها حمسة بصل

بس ماسألتهم وسكت

والحساب طلع أقل 500 كرونا ، وايد رخيص


عقب ماتغدينا سرت تمشيت بروحي صوب الكشكات


وفي هالكشكات اكثر اللي يبيعون صينيين ، ويبيعون اكواب


وكاسات أرخص من المحلات الكبيره


الشيك مشهوره بالكرستالات وخصوصا أطقم الكاسات والاكواب والاستكانات وغيرها


وتكون غاليه نوعا ما

وعقب رجعت الفندق من المدخل الخلفي


وانا راجعه مريت ع محل المساج التايلندي وخذيت موعد حق باجر


فوت مساج


والعصر سرت جلستي للمساج


وعقب ماخلصت طلعت غرفتي بدري ويلست بروحي ريلاكس


وانتهي هذااليوم اللي ما استانست فيه وايد عشان ماسرت مشيت

يتبع ​

 

[nanaa]

اليوم العاشر يوم الجمعه

جلساتي اليوم عباره عن

الجلسه الاولى ..


مساج ف البانيو الساعه 10.10

الجلسه االثانيه ..


الصروال الضاغط الساعه 11

الجلسه الثالثه ..


اكواب الحجامه الساعه 2.20

الجلسه الرابعه ..


مساج السايلولايت الساعه 2.50

أحداث هذا اليوم


قررت اليوم اسير امشي مع القروب وع حسابي الخاص لأنه مموجود في جدولي


وعشان اسير لازم اضحي ببعض الجلسات اللي دافعه قيمتها من ضمن ابكج

معلومه


اي جلسه تتأخرون عنها او تفوتونها تراها ماتتعوض


يعني راحت عليكم

ما أدري شو السبب اني لغيت الجلسه الاولى مساج في الماي يمكن تكاسلت


ع طول سرت تريقت


وعقب سرت جلسة الصروال الضاغط ولكن قلتلها تحطلي وقت أقل عشان ابا الحق ع القروب واسير امشي وياهم


تجهزت ونزلت عند المدرب وعطيته 250 كرونا عن حصة اليوم

وانطلقنا نمشي مع القروب وكان عددنا 4 من غير المدرب وكلهم خليجين 2شباب وصبيتين

ومشينا هاي المره 8 كيلو

بس الحمدالله مامشانا ع صعدات انما في محاذاة النهر وسط العشب


بس كنت خايفه من الحشرات والزواحف ماكنت مرتاحه


وقطعنا شوارع وجسور ووايد استمتعنا وكنا احيانا نسولف ونضحك


بس هو متعب حق اللي ممتعود شراتي

آرتور مدربنا

اليوم حفظته عدل اسمي هداوه


وساعات ينطقها هادوا اقوله هدااااوه

لين نطقها صح وقام يطفرني كل شويه يقوللي اكملي


هداوه أكملي


بس الصراحه هالمدرب جدا ممتاز ويخاف وايد علينا


مثلا اذا أنا أتأخر عن القروب هم عادي يتجدمون بس هو يمشي ويايي ومايتركني بروحي يخاف عليه بس يلوع جبدي من كثر مايباني


امشي بسرعه والحقهم


ومره كان متجدم شويه وانا وراهم، جان يشوف حرمه وياها جلب (كلب ) جان يركض اييني يمشي عدالي


خاف عليه من الجلب وخاف اني أكون خايفه وفعلا انا كنت خايفه لين ماعديت الجلب وتطمن عليه


هاي بعض الصور اللي صورتها ونحن نمشي

بعد مارجعت مع القروب وصلت وكنت منهكه وايد


خذيت شور وع طول سرنا تغدينا قبل لايسكر المطعم
​

بعد ماعدلت غدايي وضبطته بالصوص طلع بهالشكل


المفروض عندي جلسه بس لغيتها وهي


الجلسه الثالثه جلسة الذبذات اللي مامنها فايده


وعقبها كانت عندي جلسة مساج ( مساج السايلولات )


طبعا مستحيل افوتها


وقتها الصراحه كان جسمي تعبان ومرهق ويباله هالجلسه


وبعد ماخلصت جلستي ع طول بدلت وطلعت مع اربيعتي القطريه وسرنا مركز تسوق صغير اسمه تيسكو

مشينا لين محطة الباص ونحن في الطريج مرينا ه هذا المطعم


بس للاسف ماجربته

ونحن نمشي شفت مطعم تركي صغير يسوي دونر

عاد هذا نشنت عليه وقلت


مابهدك لازم أتذوقك

وكان لي نصيب فيه بس في يوم ثاني

وصلنا محطة الباص وخذينا الباص رقم 22

المركز فيه سوبرماركت كبير وهو تيسكو وفيه محلات متنوعه ومن ضمنها فرع لمحل
C&A

وبعد ماتشرينا رجعنا بالتاكسي


اتصلنا ع شركة التاكسي وطلبنا تكسي ووصلنا في خلال دقايق


بس ما أذكر كم خذا منا قيمة المشوار


وعقب مارجعت كان عندي موعد في محل المساج اللي لاصق في فندقنا


وكنت حاجزه فوت مساج ( للقدم ) النص ساعه خذوا عني 490 كرونا


وعقب سرنا اتعشينا


واليوم خربطت في الاكل من المطعم لانه ماعجبني اللي قدموه لنا


وانتهى هذااليوم المتعب والحلو في نفس الوقت



يتبع ...

​

 

[nanaa]

اليوم 11 يوم السبت

اليوم يوم الدمار

أول شي قررت ماأنش من النوم ولا اسير جلستي وارقد لين أشبع


حتى المطعم تمردت عليه وماسرته

واليوم عندي جلسه وحده عشان اليوم السبت نص دوام عندهم

واظن اليوم عندي جلسة الصروال الضاغط

عقب ماشبعت نوم قمت أدور ريوق يوعانه لانه سكر المطعم

اتصلت أشوف اذا بيطرشولي ريوق في غرفتي

اعتذروا انه الوقت متأخر

كليت الموجود في غرفتي من الفواكه والروب والبيذام والحمدالله شبعت

طلعت أصرف من محلات الصرافه المنتشره واغلبها يديرونها

صينين وطلع الـ 100 يورو = 2690 كرونا

ولفيت ع الاكشاك المنتشره

وانا طالعه من فندقنا مريت ع هاي الاكشاك اللي مجابلتنا في

الساحه اللي مواجهه الفندق

وهاي أكشاك في الصوب الثاني

وهنيه صرفت من محل الصرافه اللي مجابلنهم

وانا أمشي شفت دعايه ع الجسر لمحل المساج التايلندي اللي في مجمع فندقنا

وهاي أسعارهم

مستواهم زين ولما جربت عندهم الفوت مساج الصراحه عجبني

وهذا كشك من الاكشكاك اللي عدالنا وفيه وحده صينيه تبيع فواكه طازجه ودوم آخذ عنها

وعقب رديت الغرفه وصلينا ونزلنا في اللوبي


يتبع ...​

​

 

[nanaa]

مطعم يقدم لحم الغزال

اليوم غير كل الايام

اليوم ولأول مره في سفراتي أتعرف ع ناس واطلع معاهم رحله ،

ممن طبعي احتك وايد في الناس

شو أسوي وغده ههههه

امس اتفقنا ويالخليجيات انه اليوم نسير مطعم يقدم لحم الغزال وهو

يبعد عن فندقنا ساعه

بخبركم قبل عن أصل الموضوع

الله يسلمكم أنا من زمان خاطري اتذوق لحم الغزال ولما سافرت

جنوب أفريقيا دورته وماحصلته ولما ييت الشيك مافكرت انه متوفر عندهم

ومره أخويه قاللي سيري مطعم يقدم لحم الغزال ووايد لذيذ وطرش

صورة المطعم والمفروض انه قريب من فندقنا بس هو ممتأكد منه

لأنه من سنوات كان زايرنه

وعقب وانا يالسه ويالخليجيات كنت أخبرهم عن المطعم ، فخبروني

انه فيه مطعم يقدم لحم غزال بس يبعد ساعه عنا

ورمسه من هنيه ومن هناك جان نتفق نسير

وماشاءالله طلعنا قروب وأجرنا سيارتين وحده فان والثانيه صالون عادي

الفان حسبها علينا بـ 3000 كرونا والسياره الصغيره بـ 2000 كرونا

خذيت عن السايق بطاقة الشركه
وممكن تتصلون عليهم وتطلبون منهم سياره توصلكم لأي مكان

وكان الطريق جميل استمتعنا فيه بالسوالف والضحك

قربنا من المطعم واعتقد هاي اسم المنطقه

وعقب وصلنا المطعم

من داخل المطعم

عنده أدوات قديمه جدا ، مال اول

المنيو


قابلوني لوفهمتوا حاجه

حنخش ع أطباقنا

اول شي طلبنا شوربة مشروم

عقب طلبنا السلطات

وعقب طلبنا أباقنا الرئيسيه

حد منا طلب سمج

وحد طلب ريش

وأغلبنا طلب لحم الغزال

وقدمونا خبز وبطاطس وهذا اللي أجرمت فيه

لذييييييذ عيشهم ما أدري شو حاطين فيه كان شكله كأنه فيه زيت أو سمن


ووحده من الخوات تقول مطبوخ بالياسمين


المهم نحن طلبنا صحن واحد لأنه مب الجميع يبا عيش


وانا لما تذوقته وعجبني نسيت أبو الرجيم


والصحن شويه فيه قمت وطلبت غيره ، فقالولي لاتطلبين بيكفينا هذا ونحن مانبا


قلتلهم ماعليه يمكن حد يبا لأنه هذا خلص


ووصل الصحن الثاني وحطيته عدال

محد غيري أكل منه وكليت نص الصحن

هم يسولفون ومشغولين وانا في عالم ثاني


كل شوي أغرف لين أنتبهت عليه شريكتي وقالت بسج

انتبهوا الموجودين
قالولي هداوه وين الرجيم

ندماااانه اني ماقضيت عليه

تركت نص الصحن وانا قلبي يعورني عليه

الرجيم لاحقه عليه بس العيش هذا وين بححصله


ليش أنا كل يوم بآي الشيك

عقب ماخلصنا تمشينا حوالي المطعم والله المكان جدا روعه وحلو اليلسه فيه


وطلع حسابنا تقريبا 6000 كرونا


وهاي بطاقة المطعم

وهاي المناظر الحلوه اللي عداله ، ع فكره عداله بحيره جدا جميله

وعقب هالغدا الحلو رجعنا فندقنا وريحنا شوي


وردينا طلعنا مره ثانيه وسرنا مركز تيسكو للتسوق


وبعد مارجعنا يلست في الغرفه ومانزلت للعشاء وتعشيت روب


وشوية فواكهه لزوم الرجيم

يتبع ...

​

 

[nanaa]

اليوم 12 يوم الأحد
يوم الاجازه

المفروض اليوم نسير براغ وكنا حاجزين التذاكر من كم يوم ولكن


القروب عيبتهم طلعة أمس وقالوا بنطلع بعد مره ثانيه وبنسير مزرعه


تميت متردده بس اصروا عليه الا نسير وياهم


وافقت وضاعت علينا تذاكر الباص


أتصلوا الجماعه واحجزوا عند راعيت المزرعه وطلبوا تسويلنا


خروف مشوي


بس اعتذرت انه الخروف مابيكون متوفر لأنه ماحجزنا عندها الا متأخر


فطلبوا الجماعه مشاوي مشكله دجاج وسمك


اتفقنا انه الطلعه بتكون الساعه 12 ونص الظهر


هاي المره حجزنا سيارتين فان


لأنه عددنا صار أكبر وكل فان طلع علينا ب 2000 كرونا


والطريق تقريبا 50 دقيقه

أول ماطلعنا من الفندق

وصلنا وهاي سياييرنا

واول ما وصلنا لقيناها يالسه تشوي

ولقينا طاولتنا مجهزه في الهواء الطلق وحاطه الخبز والسلطه


واللي تخلصه من الشوي تييبه ع الطاوله


وكانت بروحها تشتغل


وغير المشاوي يابتلنا عيش ( رز ) وبطاطس مقليه

الصراحه ماقدرت أصور أكثر من جذي لأنه هم طالعين في الصور

ولكن عموما ماعجبني الاكل وايد

وما انصحكم بالمكان أشوف اللي سرناله أمس كان أحلى أكله


والمناظر اللي حواليه أجمل


تغدينا وبعدها يلسنا نتمشى في المزرعه وحواليها


وانا هنيه تمشيت بروحي وما أدري ماكنت مستانسه وايد وتندمت


اني لغيت سيرة براغ


ويمكن اللي عكر مزاجي الحر شويه لأنه الدنيا كانت مشمسه


ومشاكل العيال اللي يلست احلها بالتيلفون

عقب ماخلصت قضية عيالي يلست اتمشى واصورلكم

يتبع ...

​

​

 

[nanaa]

نتابع ...

وعقب ماخلصنا غدانا ، يلسوا الدريوليه وتغدوا

ودخلت في مكان الظاهرانه يجددون مكان يديد من المطعم

عقب دخلنا قاعه ثانيه وتيلسنا فيها

وحلينا بالايس كريم بس نسيت أصوره

وبعد ماشبعنا يلسه قررنا نرجع

سامحوني ما عندي عنوانهم

ما أدري ماحصلت كرتهم عشان أعطيكم العنوان لكن عموما

السماسره العرب اللي هناك يعرفون المزرعه بس في رآيي ماتستاهل العنوه

وبعد مارجعنا طلعت وسرت مركز التسوق اسمه أنترشبار اللي فيه سوبرماركت سبار

وطلعنا بالباص رقم 2 وهنيه صارلنا مقلب

وهاي رسوم الباص

لما وصلنا المحطه خذينا الباص اللي ساير في الاتجاه المعاكس

ويلسنا في الباص وكل مايوقف عند محطه نحس انه مب هاي المطلوبه

وهالمكان اول مره نسيرله

لين خلصنا وايد محطات

عقب سرت للسواق وسألته عن مركز التسوق اللي نباه

قال تموا في الباص هو ممن هالصوب وعقب وصل لأخر محطه وسوا حركه غبيه

قال انزلوا وسيروا اقفوا هناك في المحطه المقابله وانتظروني

نزلنا والمحطه المقابله تقريبا عداله

يعني شو بيصير لو تمينا في الباص

تخيلوا يالسنا نتطالعه

تم واقف فتره بسيطه ومحد في الباص ولما صار وقت معين لف

ويانا وركبنا وياه

أحس يالسين نلعب

النظام نظام عندهم

المهم رجع وين ماركبنا أول مره وركب ناس وعقب سار في

الاتجاه المعاكس وهنيه فهمنا غلطتنا

يعني نحن سوينا مثل المثل اللي يقول

وين اذنيك ياجحا

وعقب نزلنا عند المركز وسألناه متى آخر باص

قال الساعه 9 وتسوقنا ورجعنا قبل الساعه 9

​

كان الوقت متأخر وماخذينا كفايتنا منه يادوب دخلنا محل اتش اند

ام وعقب دخلنا السوبرماركت وكان وايد كبير طلعنا بسرعه ولحقنا ع الباص

وعقب مارجعنا وسرنا تعشينا

واليوم يلست وياقروب الخليجيات لأنه كنا بنودع وحده تقربنا منها

وايد وحبيناها وهي من السعوديه

وعاد وانا نازله وديتلهم المدخن ودخنيتهم ( بخرتهم ) بالعود

وخليت اللوبي ريحته حلوه

يتبع ...

​

 

[nanaa]

اليوم الاثنين 13

صورة محل المساج التايلندي

اليوم شفتها فقلت بنزلها لكم

جلساتي في هذا اليوم

الجلسه الاولى
رياضه في حوض السباحه

الجلسه الثانيه
مساج في البانيو

الجلسه الثالثه
الصروال الضاغط

الجلسه الرابعه
مساج للجسم كامل

اليوم يوم منهك وشاق جدا وتعبت نفسي وايد

اول شي حضرت حصة الرياضه في حمام السباحه

وعقب سرت أمشي ويالقروب تقريبا 7 كيلو لين خلاص انهار جسمي

اليوم مشينا في اتجاه ثاني

الحلو مع هالمدرب انه كل مره يمشينا من صوب وبالنسبه لنا هاي فرجه حلوه نشوف أماكن أكثر

ولما رجعت ماقدرت أسير الجلسه الثالثه وتغديت وريحت


والعصر سرت آخذ جلسة مساج للجسم كله


عاد هنيه خلاص ارتخى جسمي وماعاد فيي حيل

ولاقدرت أطلع أتسوق ولا أصرف ولاسويت شي يالسه ومهدود


حيلي ووقت العشا بالقوه نشيت عشان اتعشى لأنه اليوع قرصني ولامابسير
​

باجر بيكون اليوم الأخير في منتجعنا في كارلوفاري




يتبع ...

​

 

[nanaa]

اليوم 14 يوم الثلاثاء

اليوم آخر يوم لنا في كارلوفاري


اليوم يوم حر


أنا قررت أكنسل كل جلساتي


قررت اليوم أعيشه بحريه وبدون قيود ولاجلسات


ابا اتمشي في المدينه


أبا أتفرج ع أشياء ماشفتها


ابا أرتاح من اي التزام

كيف قضيت برنامجي في هاليوم


طلعت تسوقت من عند الصينيين ومريت ع محل يبيع عزكم الله


أحذيه تشبه أحذية أم بي تي بس الفرق بينهم انه هالنوع أخف من ام بي تي هذاك شويه ثقيل

هالنوع اسمه KyBoot وهي صناعه سويسريه


موقعهم ع النت

Startseite - kybun AG (kyBoot, kyBounder, kyTrainer, kySsen) | kybun.ch



أشتريت واحد وجربته وحسيته مريح بس مامشيت فيه وايد يمكن مره وحده لبسته


وهالنوعيه تكون غاليه ، اللي اشتريته تقريبا بـ 1000 درهم


واللي تبيع تقوللي هم كلهم نفس شركه ام بي تي ولكن هذا المطور
فاتني أصور المحل من برع

عقب ماأشتريت دخلت المطعم التركي اللي كان قريب منه نفس


الجهه


وكان وقت الغداء وقررت أتغدى ساندويش دونر مشتهيتنه من يوم ماشفته


ومابخليه في خاطري

ع فكره ماكان لحم ولادياي كان تركي بس لذيذ

مطعمه صغير وكان فيه جلسه


قلت في خاطري بيلس آكل أحسن ما آكل وانا أمشي وخصوصا كان فاضي

شوفوا بعطيكم صورة الساندويش


بس تذكرت أصوره عقب ماكلت ثلاثة ارباعه

الصراحه ترددت أنزل صورته أحس كأنه قارضنه فار

وعقب رديت الفندق رتبت شويه أغراضي وريحت

عقب طلعت مع شريكتي في جوله في الحنطور ونسيت كم


السعربالضبط


يمكن بـ 300 او 200 درهم لمدة نص ساعه


بس كان غالي وايد وابدا مايسوى ، لو مشينا ع ريولنا كان أحسن

اخترت الورديه

كانت سواقته بطيئه وتلوع بالجبد


وياريته ودانا في طريج مانعرفه


نفس الطريج اللي نمشي فيه يوميا

بعدها رجعنا الفندق وشريكتي سارت تمشي ويالقروب وانا مابغيت أسير وياهم

اليوم مخصصتنه للترفيه فقط

​

 

[nanaa]

نتابع معاكم ...


وعقب طلعت مع صديقتي القطريه وسرنا نتمشى وصعدنا جبل ديانا

في هاي السكه تدخلون صوب الصعده لجبل ديانا

صعدنا فوق والصراحه المكان مب واااو

وفي زاويه من الجبل قدرنا نشوف هالمطل

وماطولنا فيه ، شفناه ممل ونزلنا


وكان عداله فندق بوب جراند

يلسنا في كوفي فندق بوب جراند


يامحلات اليلسه والجو

واضرب هاك الايس كريم الغاوي


قلتلكم


يوم حر

عقب دخلنا فندق بوب جراند نتفرج عليه وناخذ فكره عنه


هالفندق مشهور في كارلوفاري


في هالفندق سوت الممثله كوين لطيفه الامريكيه فيلم


الفيلم حلو شايفتنه مرتين واسمه الفيلم



LAST HOLIDAY


وهاي صور لبعض غرفه

ماعندي فكره عن برامجهم العلاجيه ولكن من خلال موقع الفندق ممكن تعرفون


وحصلت هالموقع بعد ممكن يفيدكم عن المصحات اللي هناك



الدليل الشامل لأشهر المصحات العلاجية في جمهورية التشيك - التشيك ... اليوم



لقيت في هالفندق جماعه من الامارات وسولفنا وياهم


الفندق يعتبر راقي وموقعه هادي وقريب من محلات الماركات


ومن النهر اللي حواليه محلات ومطاعم وكوفيهات

وعقب هاي الجوله الحلوه رجعنا الفندق

رجعت طلعت مره ثالثه

طلعت مع شريكتي وسرنا تعشينا في المطعم الايطالي


يوم حر

المطعم هو اللي عنوانه بالازرق وهو مقابل فندقنا ورا النهر

يالسته حلوه واكله حلو

مقبلات من عندهم وايد لذيذه

وانتهى هاليوم اللي استانست فيه وانا عايشه حريتي


وبنلتقي وياكم في الجزء الياي في براغ

اعتراف


اليوم بعترفلكم بشي


لما كنت هناك كنت احس اني وايد ملتزمه واعاني من النظام بس


لما كتبت هالتقرير بهالتفصيل


شفت اني وايد خربطت في ايام كثيره


وكان الايس كريم هوالمتصدر الأول في اختلال نظامي الغذائي


وأنا ياربي ليش ماضعفت وايد

يتبع...

​

 

[nanaa]

​

ملخص ما استفدت منه
من رحلتي في منتجعات كارلوفاري

في البدايه ما أقدر افيدكم ابدا في موضوع العلاجات والاستشفاء وسبق قلتلكم هالشي

يمكن لأنه ماكان همي أعرف هالشي وماسألت عنه بالاضافه انه


اليوم كله نكون مضغوطين ومانلحق نسأل ونستفسر

بالنسبه لبرامج التخسيس


للاسف لضيق الوقت ماسرت دورت وسألت عن منتجعات ثانيه


حتى فندق بوب جراند والوحيد اللي دخلته وسألت مادققت شو عندهم بالضبط


من علاجات واكتفيت اني أشوف الغرف


وهم عطوني مجلتهم وقلت في خاطري خلاص من المجله بعرف شو عندهم


ولكن للاسف لما فتحت المجله أمس كان أكثر شي مكتوب بلغتهم


ومافهمت وايد عشان جيه ماقدرت أعطيكم معلومات


من ناحيتي أنا


وبعد مامريت فيه من جلسات ونظام غذائي وغيره ،


أقدر اقولكم انه مافادني وايد

او ماحصلت اللي كنت أتوقعه لأنه أغلب الجلسات ماكانت تفيدني


وايد ومافيها مجهود

وحسيت انهم مب بروفيشنال في هالموضوع والموضوع كله تجاري

ممعنى هذا اني مول ما أستفد


بالعكس انا نزلت كم كيلو بس مب وايد

ولكن مقاسات جسمي تغيرت ووسعت ثيابي


والكل لاحظ اني ضعفت واعتقد الطلعات مع القروب هي اللي كانت


لها فايده كبيره في تنزيل وزني وترتيب جسمي أكثر

وبعض الاصدقاء قالولي لما شافوني زعلانه ومحبطه عشان مانزلت وايد

قالولي :


انه ممكن ماينزل وزنج وايد لأنج تكسبين عضل


وهالشي ريحني شويه

بس أهم شي لما رجعت البلاد استمريت في الرياضه والرجيم


ونزلت أكثر ولكن ماطولت ودخل ارمضان علينا


وتغيرت كل الامور

لو قدر لي وزرت الشيك مره ثانيه والنيه موجوده ان شاءالله


هاي المره بيكون الوضع مختلف تماما

أولا : بغير الفندق ماحبيت زحمة الخليجين وايد ماحسيت بالخصوصيه


بالرغم اني تعرفت ع بعض من الناس وكانوا جدا طيبين وحبوبين ، بس بصوره عامه ماعجبني الوضع

ثانيا: مابلتزم بنظامهم الغذائي وبكون حره في وجباتي وبآكل من المطاعم المختلفه


وانا عارفه شو اللي لازم آكله بصوره عامه

ثالثا : بسوي اشتراك بس في السايلولايت مساج بصوره يوميه وحق معظم اجزاء جسمي

لأنه هذا وايد مفيد للجسم وبحاول يكون قبل خروجي للمشي مع القروب

رابعا : وهذا أهم شي انه امشي مع القروب بصوره يوميه ع حسابي الخاص يعني ما احتاج اشتراك فيه


وقفه


في واحد من الاخوان من قطر الله يذكره بالخير ، قاللي :


أنا من سنوات آيي هنيه وجربت كل هاي الجلسات وكلها مافيها فايده


واذا تبين تضعفين أمشي كل يوم ويا القروب


وقاللي انا أسوي جيه من كم سنه ، وسألته


والنظام الغذائي


قال : آكل من المطاعم وانا اعرف الأكل اللي يناسبني


وبعد ماعشت التجربه فعلا طلع كلامه هو الصح



أعتقد اني وضحت رأيي في هالموضوع واذا أي حد عنده سؤال أنا حاضر







يتبع ...​

​

​

​