الاجواء الشتوية ديزني لاند باريس

[جنى جى جى]

السلام عليكم ورحمه الله وبركاته ...

اول شي شكرا جميعا على عوده المنتدى ...

ثاني شي التقرير هذا كان المفروض اكتبه من زمان بس النوت اللي كاتبتها بالتليفون ضاعت وقاعده احاول قد ما اقدر اتذكر التفاصيل بالرحله ...



الرحله من تاريخ 17/12/2014 الي 1/1/2015 ..

مقسمه بين ديزني لاند باريس .. باريس.. امستردام .. بروكسيل .. ثم العوده الي باريس

( انا ودي اكتب التقرير كامل هني .. بس قولولي رايكم.. او اكتب كل دوله بروحها ؟؟)





التخطيط كان من قبل شهرين من الرحله .. بحكم عطله الاطفال في شهر 12 قررنا نوديهم ديزني لاند (الهدف الاساسي) .. لانه اخر مره رحنا لها كان ب 2011 ومايتذكرون التفاصيل فيها

ولاني ابي اروح مكان ثاني غير باريس قررنا نروح امستردام وبالمره بلجيكا







كان الحجز عن طريق الخطوط الجويه التركيه بسعر ممتاز 163 دينار كويتي

كويت - اسطنبول-باريس-اسطنبول - كويت

الترانزيت ساعه بس





اليوم الاول 17/12/2014


الرحله كانت الساعه 6 صباحا .. انطلقنا للمطار قبلها ب 4 ساعات

ادري وايد بس لانه ماكان في احد يقدر يوصلنا قبل الرحله


لحسن الحظ الكاونتر كان شغال

دخلنا الشنط .. وقعدنا ننتظر بقاعه الؤلؤ بمطار دوله الكويت

حتى موعد الاقلاع ..




حتى وصلنا اسطنبول بعد 3 ساعات ونص تقريبا ... الطياره كان فيها تلفزيون

و بسرعه عالطياره الثانيه




حتى وصلنا الى باريس

الحب

مطررر

وبسهوله خلصنا الجوازات وكان في تاكسي حاجزينه من النت ناطرنا بالمطار ..

وانطلقنا لي فندقنا بديزني لاند



فندق ريم كاسل

اول مره نجربه .. اخذنا غرفه عائليه



وصلنا تعبانين ودايخين نبي ننام لكن الحماس ماخذنا ...

.

بس غسلنا وصلينا وطلعنا على طوووول على ديزني لاند .. انا متحمسه اكثر من الاطفال

الحين الخطه شنو ؟؟؟

احنا حاجزين بدايه الرحله ديزني لاند ونهايتها بليله راس السنه بعد .. والفندق مايوفر مع الغرفه تذاكر .. ولانه اذا حجزنا تذاكر الحين وبعدين ليله راس السنه يومين راح تطلع علينا وااااايد غاليه

قررنا ناخذ منهم التذكره السنويه .. اللي اسمها ديزني باسبورت .. طبعا فيه انواع وكل نوع يختلف عالثاني بالايام .. يعني اقل نوع بينهم يمنع الدخول في ايام العطل وهذا مايناسبنا


اخذنا اللي اسمها Fantasy 20th annual passport سعرها 169 يورو


ميزتها ايضا عليها خصومات بالمطاعم والمحلات ... استفدنا واااايد من الخصم

ولانه الوقت متأخر تقريبا كانت الساعه 6 فدخلنا البارك شوي لعبنا الاطفال اللعب البسيطه وتسوقنا شوي

رحنا الفليج ناكل لنا لقمه ..

الشي اليديد محل ليقو موجود .. والاطفال غرامهم ليقو

بعدين رجعنا البارك

قعدنا شوي بس لانه تعابانين رجعنا الفندق نرتاح ونستعد لليوم الثاني

وتصبحون على خير

​

 

[جنى جى جى]

اليوم الثاني 18/12/2014




قعدنا الصبح مبجر نزلنا نتريق بالفندق .. البوفيه بسيط مافيه تنوع وااايد بس الحمدلله

عندي مطاره ماي للاطفال عبيتها ماي من الفندق و زهبت جنطتهم ماي وبعض السناك الخفيف وبعض الحاجات المهمه ..


في العاب بالفندق يلعبون فيهم لحين وصول الباص اللي ينقلنا الى ديزني لاند

ووصلنا الى عالم الاحلام

لازم نصور جم لقطه عند الفندق


والقصر ... مانشبع منهم

اذكر اخر مره كنت بديزني كان هني حاطين ستيج للعروض .. لكن هالسنه ماكو ولاحظت انه التصوير مع الشخصيات بساعات محدده ودووور حتى عروض مافيه بالساحات نفس كل سنه

قبل لمن كنت اروح كانو الشخصيات يتمشووون بين الناس ونصور معاهم

انطلقنا الى اول محطه

الموسم هذا ازحم موسم بالسنه اتوقع ... واااايد زحمه اجانب (عطله الكريسماس) وكل يوم عن يوم تزيد الزحمه


يعني ننطر دور اقل شي ساعه بالالعاب الجماعيه .. والالعاب الفرديه اكثر ..

وبعد حتى الفاست باس ما ياخذ اكثر من وحده .. اقصد لي خذينا فاست باس حق لعبه مانقدر ناخذ حق وحده ثانيه الا اذا طاف وقت معين ينكتب بالتذكره مالت الفاست باس

اول مره ادخل بيت علاء الدين على كل هالسنين اللي رحت

اطلب وتمنى

هذي السفينه لانها تاخذ عدد كبير يمكن اللعبه الوحيده اهي و سمووول ورلد اللي لعبناها اكثر من 5 مرات يمكن

طلعنا بعدها للمين ستريت لانه في عرض قادم



طبعا جدول العروض موجود عند الباب

حبيب الاولاد بززز و وودي

نفسهم حلووووه

واخر العرض عربه سانتا كلوز

خلص العرض ورحنا نتغدا

لاحظت هالسنه بعد ماعندهم العلب الملونه اللي على شخصيات دزني

...


الكشكات منتشره بس انا افضل اشتري من المحلات ولو انها نفس السعر ونفس البضاعه

لعبه بززز اللعبه المفضله ولكنها عله ... طابور اكثر من ساااعه وغصبن علينا لازم نوقف لانه الاولاد يحبونها وغير جذي لاحظت اكثر من عربه مغطينها كأنها خربانه ومو بس بهاللعبه باكثر من لعبه مادري ليش مايعدلون ويسووون صيانه

يعني المفروض مكان بمستوى ديزني المفروض المفروض يلاقون حل للطابور الطويل .. ووقت الزحمه والمواسم

لازم نشتري من المحل اللي يم اللعبه

على فكره في تاكس فري على فاتوره ديزني اذا وصلت باليوم الواحد 169 اعتقد ماني ذاكره بالضبط ..

غرااااامي

وبناهية اليوم بعد اللعب والمشتريات .. سوينا التاكس فري وكان في عرض على شجره الكريماس .. عرض ليتات وثلج

على فكره عندهم خدمه توصيل المشتريات لي الفندق اذا كنتو ساكنين بأحد فنادق ديزني لاند


...

اخر شي رحنا الفليج كنا بنشوف السينما

بس كل الافلام بالفرنسي .. بس انا ثقافتي اسبانيه ماعرف فرنسي

من داخل السينما

ورحنا ليقو


اليهال شرووو ماخلو شي

و بس خلص يومنا الثاني ...

وتصبحون على خير






​

 

[جنى جى جى]

اليوم الثالث 19/12/2014




اليوم وجهتنا الى الاستديو

طبعا لانه عندنا التذكره السنويه من مميزاتها يسمح لنا دخول للبارك قبل الموعد بساعه ..
وبما انه قاعدين مبجر وااايد طلعنا رحنا البارك تمشينا شوي

لين صارت الساعه 9 ونص طلعنا وحنا الاستديو لانه يكون فاتح بهذا الوقت

هدوء .. مافيه زحمه نفس البارك ولانه توه اول الصبح


هوليوود تاور ولا مره بحاتي ركبته .. كنت احسب شي رعب ويخوف .. بس قبل لا اسافر قريت تقرير ام حسين واكتبت عنه .. حسيت انه مايخوف وفهمت فكرته فقررت اجربه هالسنه

بصراااحه متعه

ويني عنه كل هالسنين .. حسافه ضاعت ايامي وانا مادري عنه عبالي شي يخوف


حتى اليهال استانسو عليها




الجو كان مغيم .. ورشت مطره خفيفه

الحين تحدي الاطفال منو يحطم الرقم القياسي ..

لازم يحطون لعبه نلعبها حق شخصيه المونسترز

والبساط السحري ...

الوقت وايد مبجر عالعروض المسرحيه قلنا انشطب عالالعاب كلها وبعدين نشوف العروض

ميزه الاستديو انه اغلبها عروض جماعيه تدخل فوق ال 100 شخص فكلش ماكان في زحمه الا على لعبتين او 3 الي تعتبر العاب فرديه




ورحنا القطار اللي يلف فيك على مواقع التصوير

كل هالاشياء استخدمت بتصوير الافلام من قبل .. اللي متابع بيعرف الافلام .. انا مو كل الافلام اعرفهم

خلصنا وطلعنا عاليمين .. عند باااز

وبعدها رحنا عرض السيارات .. يحبون هالعروض الشباب واستانسووو واستمتعو فيه

الظاهر بسبب المطر ازلقت وحده من السيارات و ما قامت بالحركه عدل فعادو العرض من اول

خلص العرض


وردينا حق ............

والله متعه


وصار وقت الغدا ودخلنا نشوف المحلات شوي نتسوق ونطلب لنا اكل ... للاسف مافي مطاعم وايد بالاستديو فوااايد زحمه نطرنا طاوله تفضى علشان نقعد

هذا اللنش بوكس يمكن عندي منه 6

بوزعه هذايا المره اليايه

اللي شايف توي ستوري 3 .. بالفلم يقولون انه هذا الدب ريحته فراوله ... وفعلا مسوين اللعبه ريحتها فراوله ... حبيتها


حتى ولدي كلما دخل ستور قعد يشم ويقول ماما صج فراوله

ممنوع التصوير

واخيرا صار دورنا راتاتولي .. كنا حاجزين فاست باس

شوفو الانتظار 35 دقيقه .. بعدين صار 60 دقيقه

بس جداااا ممتعه اللعبه تحرك كل الحواس

وطلعنا من الاستديو قريب وقت الاغلاق ..



اي نسيت اذكر انه حجزنا بميكي كافيه الموعد الوحيد الموجود الساعه 10

طبعا كل الايام فلللل زحمه ماكو مواعيد هذا الموعد الوحيد اللي حصلناه



ردينا الفندق صلينا وردينا طلعنا الفليج ...


تسوقنا



شعر منو يبي

كل سنه اشتري منهم .. مادري ليش عاجبيني..

هذا بمطعم كنج لويس

تعبنا من الانتظار والوقت مو راضي يمشي واليهال يوعانين

و دايخين .. قاعدين من الصبح لاخر لحظه كنا بنكنسل ونرد الفندق ... بس متعه ميكي كافيه غييير لا تعوض



و ريلي مو راضي ييكنسل جم مره قلت له تعبو اليهال خلاص نرد الفندق واهو مو راضي لسبب .. بعدبن تعرفونه




واخيرا دخلنا قبل الموعد دخلونا يمكن 9 ونص ...

والاطفال مو مصدقييييين ومستمتعين

و مع ملك الحركات قوفي .. يحليله وااايد حبوب مع الاطفال يلعب معاهم ويسويلهم حركات

مع انه هالصوره مو واضحه وحسافه لانه الكاميرا كانت مغبشه .. بس حطيتها لسبب واحد ..

تأثير الحضن عالاطفال


لحد اليوم ولدي يقول .. تيقر يحبني سوالي هاق .... الياهل يتاثر بالحضن ويحس بالحب

بس مصوره طبق واحد من العشا .. مشروم

كنا طالبين بيتزا و معكرونا



والسبب اللي ريلي ما رضا يكنسل اهو

مسويلي مفاجأه عيد ميلادي

قبل موعد عيد ميلادي باسبوع




....


وخلصنا وايد متأخر يمكن عالساعه 11:30 وركض نلحق عالباص .. علشان نرد الفندق






​

 

[جنى جى جى]

اليوم الرابع 20/12/2014

اليوم هذا قررنا نروح نتسووق بالاوتلت والمول فال دي يورب و السوبر ماركت نشتري بعض الاشياء لانه بعدها بجم بيوم بنروح امستردام

بعد الريوق طلعنا بالحديقه اللي عند الفندق .. لانه الاوتلت مايفتح من الصبح واحنا وااايد قاعدين مبجر .. قلنا نقعد نستمتع بالجو والمنظر

الجو جمييييل والمنظر يرد الروووح

بعد التصوير .. ردينا الغرفه بدلنا وطلعنا .. اخذنا الشتل الخاص بالاوتلت وبعد ثلث ساعه وصل وانطلقنا الى الاوتلت




حبيب الشعب

مع انه الجو بارد بس يحلى الايس كريم بالبرد

الواي فاي مجاني بالاوتلت .. وسريع طلقه ...

مع اني كنت لاهيه بالتسوووق صورت صور وااايد للمحلات والبضايع اللي شريتها بس للاسف ولا وحده موجوده ..كلهم انمسحو (سناب)

فرصه الشرااااء بالاوتلت بصراااحه .. كل سنه اشتري منهم


وعقب ما خلصنا الاوتلت (طولنا شوووي فيه) دخلنا المول تقريبا الساعه 3 .... كاااااااااااااان زحممممممممه لانه يوم السبت ومموسم عطلات ..

نفس على نفس

و اول شي فكرنا فيه الاكل


من الريوق ما اكلنا الا الايس كريم

طلبنا من بريوش دوريه

استغفر الله ما كملت ساندويشهم .. طلبت جبن بس فيه ريييحه خرفان ... وريلي طلب تونه يقول لذيذه

والاطفال كلو كرواسون وخفايف


وبعدها الى الحبيب الثاني

بس انا ما اكلت كنت حاطه ببالي ابي وافل .. في وحده كل سنه اشتري منها تبيع عند السوبر ماركت


المهم تسوقنا شوووي ملابس وعطور وميك اب كيكو

بعدها دخلنا السوبر ماركت

كان ودي اشتري كل شي حق البيت بس وين بحطهم

شرينا كاكاو انواع وشيبس و عصاير وماي وبسكوت

بعد ما قدرنا نكمل اكثر حييل زحمه طلعنا .. حتن ما شريت الوافل

ردينا الفندق وعقب صلاه المغرب رحنا ديزني لاند نشوف العروض بالليل


الزين انه بهالايام العطل البارك يسكر الساعه 10


وردينا نلعب بعد

عرض نافورات الماي عند القصر

خلص العرض وكملنا نلعب بالالعاب اللي مافيها دووور

سفينه القراصنه حفظناها

هذا المطعم اللي يم اللعبه بس القعده من داخل .. خذينا طله عالمينيو ما عجبنا ولا كنا بناكل فيه

بعدين رحنا نسوي التاكس فري من ديزني

المركز اللي تسوون فيه التاكس فري بالضبط مقابل السنتر

وهذا من داخل

بعدها شفنا العرض النهائي عجييييب كان

واللي حاب يشوفه يكتب باليوتيوب


dream of christmas

في عرضين تقدمو

احنا وقتنا كان اللي مع فقره فروزن




وبعد الانتهاء يتسكر البارك فالكل لازم يطلع

رحنا الفليج انتعشى

الكشكات منتشره اللي يبيع كراكرز واللي وافلز واللي مارون .. كل شي موجود


وقع الاختيار على

متنوع ولذيذ .. في ساندويشات وسلطات وشوربه ..


شيبس مع الوجبه

طلبي

المفروض انها بيتزا

والحمدلله .. خلص يومنا وكان وااايد حافل بس انا مو مصوره

​

 

[جنى جى جى]

اليوم الخامس 21/12/2014


اليوم كان مفتوووح لانه اخر يوم لنا في ديزني ومن باجر بنروح باريس

فقررنا نشتري كل اللي نبيه نلعب ونسكر جناطنا



اول شي رحنا البارك

تذكرت مكان ما رحناله


اللي اهو

هذا القسم اللي محددته


وكان فاضي مافي زحمه

بيت الاشباح



بعد ما لعبنا طلعنا نشتري بعض الاشياء

بس دشينا وصورنا وطلعنا

وبعد جم ساعه ولمن صار وقت الغدا اخترنا هالمطعم احب الباستا عنده .. صاير مقابل سموول وورلد

الدووور مو طبيعي زحممممه ..لانه كان وقت الغدا والادهى والامر ممنوع حجز طاوله تنطر طلبك يخلص بعدين تقعد على طاوله

وقفنا بالدور اكثر من ساعه علشان بيتزا وباستا


اهم عندهم اسلوب غريب وغبي بالطلب .. شفته باكثر من مطعم حتى في ماكدونالدز .. تطلب وتنطر طلبلك يخلص وبعدين اللي وراك يطلب وهالشي يعطل الدور .. وياخذ وقت

المفروض يسوون مكان للطلب ومكان للاستلام


المهم طولنا والاطفال نامو


وبعدين وصل دورنا

خلصنا الحمدلله

قلنا نروح الاستديو ..

رحنا لعبه مظله الجنود الدور ما يقارب الساعه .. واللعبه 30 ثانيه وتخلص

بس عشان الشباب يستانسووون

مشكلتهم وااايد بطيئين بادخال الناس وترتيبهم وااايد يسبب زحمه زياده


..

طلعنا نبي نرد الفندق لانه لاااازم ارتب الجنط


هذا المحل فيييه كل المنتجات اللي داخل تقريبا .. اللي ما لحق يشتري يشتري من هني

وفيه تاكس فري تقدر تاخذه من هني بعد

طبعا كل واحد منا يضيع بعالم بروووحه داخل المحل ونتلاقى عند الكاشيير

كان قريب المغرب نطرنا الصلاه صلينا


والحين الخطه شنو ؟؟؟


احنا بنروح باريس ومن باريس لامستردام بالقطار ولنا عوده ديزني اخر الرحله

فما ابي اشيل جنط كثيره مالها داعي لانه تنقلنا بالقطار


حطيت الاغراض اليديده كلها بالجنط صارو 3 جنط تقريبا وسحبناهم من دريم كاسل لي ماجك سيركس .. يم بعض مو بعاد


وحطيتهم بالمخزن مال ماجيك سيركس على اساس انه اخر بعد اسبوع تقريبا رادين لهم

عطونا مفتاح المخزن وحطينا جناطنا

الحين بس صار معانا جنطتين كبار ووحده صغيره نوديهم معانا باريس وامستردام بس فيهم ملابسنا اللي بنلبسهم ونقطهم ما نبيهم

ومن ماجيك سيركس استقلينا الباص ورحنا البارك مره ثانيه


والى ...

صار ادماااااان مو طبيعي

وبعدها الى راتاتولي .. الوقت كان متاخر بيسكرون بعد ساعه تقريبا ومافي فاست باس بس فيه دووور ..

من اول يوم وصلنا وولدي الكبير يبي يركب هذي اللعبه بس وااايد دور ماعندنا وقت وغير جذي ولدي الصغير مايدخلونه ..

طبعا عندهم دوور اقل للسنقل رايد بس هم مايدخلونه بروحه لانه قالولي صغير على انه يدخل بروحه

ان شالله هالسنه اذا رحت تكون زحمتهم اقل ويركب

خلصنا خلاص ...

رحنا الفليج نتعشى ونحلي

وصلنا للاخر وتعشينا في مطعم الساندويشات اللي ذكرته من قبل

وانتهى يومنا



ومن باجر بنروح باريس

​

 

[جنى جى جى]

اليوم السابع 23/12/2014




اليوم اخر يوم لنا في باريس .. باجر بنروح امستردام


قعدنا الصبح نتريق ... المكان هادي جدا ومافي احد

والريوق متنوع

الحمدلله


طلعنا نتمشى

واستخدمنا المترو للانتقال الى الاوبرا .. قاصدين جاليري لافييت

في شوارع الاوبرا

احب الاكشاك اللي تبيع سوفوفينيرات .. اكثر شي احب اشتريه المغناطيسات تبع الثلاجه و السنو بوول

وصلنا الى نقطتنا ولكن قبل لا نغوووص في الماركات رحنا C&A

بالضبط مقابل جاليري لافييت

ملابس عمليه جميله للاولاد احب اشتري منهم

وطبعا مانقدر نشوفه وماندخل نشرب قهوه

عاد انا اخذت منهم باستري اخذتها من صوب الجيز باستري

حطيتها عند الكاشير ورحت اقعد عالطاوله ..

لمن زوجي راح يدفع جان يقوله هذي فيها هام (لحم خنزير)

الحمدلله انه نبهنا ولا انا كنت ماخذتها من صوب الجبن بس الظاهر احد حاطها بالغلط

خلصنا طلعنا الى جاليري لافييت

الاولاد استانسو عالفاترينه

حبيب النساء

بس ماصورت اكثر انشغلت بالشوبنق

بعد وقت من التسوق .. خلاص مانقدر نمشي ولا نستخدم المترو ..

قالي زوجي اشرايج ناخذ الباص منها نشوف المعالم بالجو الحلو ومنها نوصل الفندق

وافقت عالفكره

واحنا راكبين الباص شاف انه في عرض تذكره الباص مع جوله بالسين بسعر اقل .. جان ياخذ العرض

والحين اخليكم مع جوله على معالم باريس ..

كل معلم توقفون عنده يقولون لكم سالفته شنو

على كل هالمرات اللي رحت باريس ولا مره نزلت عنده .. ولا دخلت اشوفه .. ماتستهويني الصور والمتاحف والرسم

قبل لا اسافر سمعت عن انهيار السور بسبب الاقفال والحمل الزائد المعلق عليها .. ماصدقت حسيت صوره مفبركه

لكن طلع صج

لاحظو شلون في اماكن مسكره بخشب

وصلنا عند برجل ايفيل ونزلنا لانه من هني ناخذ الرحله البحريه

تبون الصج دخنا وصار فينا النوم .. انا ماتحركت من مكاني داخل السفينه بس الاطفال طلعو فوق شافو البحر والهوا والمناظر الحلوه وردو انزلو لانه بررررد وااايد .. وبس ماصورت شي

تقريبا نمت

اظن الرحله مدتها ساعه


المهم ردينا حزه المغرب

تمشينا الى الما

استخدما الاندر قراوند للوصول الى فندقنا .. من الما الى جورج5 ..

متعب مع الاغراض اللي شارينها بس اللي يعافي العربانه اللي معلقين عليها الاغراض


نزلنا الفندق حطينا اغراضنا .. صلينا وطلعنا


وتمشينا بالشانز نكمل اخر المشتريات



وتعشينا بيتزا ..



ولازم كريب من الكشكات وبطاطا

هني انتها يومنا في باريس

لكن قبل لا انتقل الى امستردام




كان موعد القطار اللي بينقلنا من باريس الى امستردام الساعه 10:25 وهذا اول قطار يروح امستردام .. القطار ثايلس ( الافضل بين اللي جربتهم)

قبل لا اروح كنت سائله عن الرحله بالمنتدى وماقصرو اللي جاوبوني وقالولي اخذي اول رحله لانه القطار يكون موجود .. وفعلا كان موجود لانه انا معاي جنطتين كبار ووحده وسط وغير الهاند باق وجنطتي الشخصيه وجنطه الاطفال .. وعربانه اطفال

فنوعا ما لوووويه الموضوع


بس الحمدلله سهالات

المحطه

حجزنا درجه اولى .. اربع كراسي على طاوله

الوجبه المقدمه

الى هولندا

....

راح انتقل الى جزء هولندا وبلجيكا .. بعدين برجع اكمل .. لانه بعد بلجيكا رديت باريس
وللموضوع بقيه
​

 

[جنى جى جى]

اليوم الرابع عشر 30/12/2014




انتقلنا من بروكسيل الى باريس


عن طريق القطار .. استغرقت الرحله ساعه ونص تقريبا للوصول الى محطه مارني .. القريبه من ديزني لاند

وعلى طوول اول ما وصلنا اخذنا تاكسي ووصلنا الى الفندق ماجيك سيركس



...


مثل ما ذكرت سابقا انه احنا حطينا شنطنا عندهم

والحمدلله سليمه ..


دخلنا عندهم بالمخزن باقي الشنط اللي مانحتاجها (مشتريات هولندا وبلجيكا)


ورحنا للغرفه

فاميلي روووم

وكأننا رادين بيتنا

المكان مألوف جدا وعارفين كل شي فيه



حطينا اغراضنا وانطلقنا لديزني لاند

الايام هذي اللي قبل يوم راس السنه زحمه جداااااا

اللي مو رايح كلش و هذي اول مره له ما انصحه يروووح بهذا التاريخ

يمكن بهذا اليوم ما لعبنا شي اغلب شي تمشينا وشرينا

كملنا باقي المشتريات


للبنات

والله ياحلوهم البنات كلهم لابسي برنسس ولا يقولون برد ولا همهم

لو في قياسي جان اخذت منه

عاجبني

بس ما خليت بخاطري اخذت حق بنات اخواني منهم

شبيك لبيك

اطلب وتمنى

وبين البارك والاستديو نتنقل

اللعبه الوحيده

اللي من العصور الوسطى وللحين الناس تستانس تلعبها

وفي نهايه اليوم



تعشينا وحلينا بالفليج

​

 

[جنى جى جى]

اليوم الخامس عشر 31/12/2014


اليوم اخر يوم لنا في ديزني لاند ... بنروح تركيا اليوم باجر الصبح 1/1/2015


نزلنا نتريق

هذي حديقه الفندق

بس كلش ماطلعنا لانه باول الصبح بررررررررد و غير جذي ماعندنا وقت نضيعه بالفندق

بما انه الليله احتفال راس السنه الميلاديه واحنا بنقعد بديزني نشوف العروض

قررنا نروح الصبح الاوتلت والمووول اشتري باقي الاغراض اللي كانت ببالي وماشريتها

ايام الكريسماس كانو مسوين عروووض اكثر اليوم كل الاسعار مثل ما اهي

غير جذي كنت ابي جنطه وما اخذتها على اساس اشتريها اليوم .. لكن مااااكو

خلصت شروووها

فنصيحه اللي تبي شي لاتخليه .. تاخذه على طووول

حق اللي يخافون من الشتا والبرد .. ترا ما يحلى الايس كريم الا بالبرررد

محبوب البنات

وبما انه راح نرجع الكويت والاطفال يبتدون مدارس على طول ثاني يوم

قلنا نقص شعورهم حق المدرسه

القصه سعرها مناسب جدا


5 دنانير كويتي تقريبا

خلصنا من المول وتغدينا بالمول ..

بعدها ردينا الفندق حطينا اغراضنا وطلعنا

ومن هالوقت لي الليل بديزني


الوضع كان زحمه وكل ساعه تزيد الزحمه

بالبارك اما الاستديو مافي احد


قصينا فاست باس حق لعبه باز ولا الموعد الساعه 10 ونص

قالولنا اليوم بسكر البارك والاستديو بعد الساعه 12 .. او بالاصح بعد عرض راس السنه

كنا بنلعب لعبه راتاتولي بس ماكو امل .. الفاست باس مسكر و الدور يبيله اكثر من ساعه

قضينا الوقت تمشي و مشتريات


واكل

هذا الشي لذييييذ

شريناه اول يوم من السوبرماركت وماكليناه الا اليوم ..حسافه جان ماخذه منه وااايد

طلع لذييييييذ

بوب كورن مغطى بالكاكاو

رحنا الفليج نتعشى

وكانو مسوين عرض

وردينا بعد العشا البارك

وصار موعد بااااز

حسيت اليهال تعبو و يبون ينامون

قلت حق بوبدر .. خلاص خلينا نرجع مو لازم نشوف العرض والالعاب الناريه


وبوبدر شاف بعيوني انه ودي اقعد .. بس عشان الاطفال


مارضى قالي نقعد .. كل سنه نسافر ودج تشوفين عروض راس السنه ومايصير

ولا تطوفين لانه بكره بتحسفين


وفعلا قعدنا والوقت بالغصب يمشي لانه كل شي تسكر

والناس كلها تجمهرت جدام القصر تنطر العرض


وصااار زحمه مو طبيعيه اصلا ما نقدر نطلع من الزحمه


و الناس كلها قاعده عالارض

عاد انا نومت والاطفال بالعربانه وغطيتهم ونطرننا


و كااان برررررد الارض بارده بس تحملنا




لين صارت اللحظه

والعد التنازلي بالفرنسي

(انا مصورته فيديو بس مادري شلون انزله.. اذا عرفت بحطه)


وبعدها العاب ناريه


بعدين عرض مال كل يوم مدته 30 دقيقه تقريبا


وخلصنا وردينا الفندق .. رتبت الاغراض ونمت


وثاني يوم كانت طيارتنا المغرب تقريبا



فمن الظهر رحنا المطار نخلص التاكس فري

وزين انه رحنا قبلها بوقت لانه كان زحمه



وطرنا الى اسطنبول


الطياره تأخرت ساعه تقريبا على ما طارت .. واحنا ترانزيت ساعه بس يعني طيارتنا الثانيه اللي المفروض تودينا على مانوصل تكون طارت
المهم مو بس احنا بالطياره بهذا الوضع .. اكثر من 50 شخص كانو نفس حالتنا والكل يسأل شنو بيصير

قالت لنا وحده قاعده ورانا انه صاير هالموقف فيها من قبل والطيران عطوها سكن بفندق لحين موعد اقرب طياره

وصلنا اسطنبول وبس انقتح باب الطياره .. دخل واحد يقووول كويت كويت ويأشر بسرعه الطياره الثانيه

ناطرتكم


وبسرعه نروح الطياره

ثم الى الكويت

و اللي حصل من تاخير ولخبطه وبسرعه بسرعه

وحده من جناطنا ما وصلت


بلغنا عنها


والحمدلله بعد 4 ايام تقريبا وصلت الكويت

--------------------------------------






شكرا من قلب لكل كلمه كتبت وشكرا للمتابعه

خلص تقريري

وان شالله اكون اضفت ولو شيء بسيط للبوابه


وانا حاضره لاي استفسار بخصوص ديزني لاند




​