بعد ان استقرينا بالسكن
طلبت من الاهل ان نذهب للسوق نتغدا
السوق قريب جدا من السكن
تقريبا 300 متر واول محل يستقبلنا بالسوق بريمارك
وملاصق له محلى المفضل بالتسوق الرياضي سبورت دايركت
وقفت هنا قليلا واتذكر زيارتي الاولى الجميلة بهذه المنطقة
هنا وقع الاختيار للاهل وطلبوا فايف قاي
اكلهم طعم
البرجر حقتهم عن 2 من اللي عندنا
حجم برقرهم حجم عائلي
طلعنا ناكل بالدور العلوي ومافيه احد
غيرنا واثنين من اهل الخليج
هنا انا تطمنت قلت ما دام الطلبة حقين الخليج ياكلون هنا
ان شاء الله ان اكلهم حلال
بعد ما تغدينا دخلنا المجمع نشوف السوق وبنفس الوقت نهضم
وهنا اذكر اني جربت بطاقة الراجحي مسبقة الدفع
واخذت قهوة
والتجربة من اجل التاكد من سعر الصرف
بينها وبين بطاقة بنك الاسشتثمار المستخدمة وقتها بكل العمليات
وبالفعل بعد العودة والتشييك وجدت ان اختياري كان الافضل
وهو الاستثمار
كان هو الافضل بالسعر
السكن كان بدون افطار
واحنا عملنا حسابنا لهذه النقطة كانت معنا كم علبة من المعلبات البسيطة
افطرنا بالغرفة ونزلنا للتسوق حيث الخطة ان هذه المدينة
كانت للتسوق
طبعا ام مشاري اول محل تستفتح فيه السوق هو بريمارك
اول محل يقابلنا والمحل المفضل لنساء الخليج
اخبرت ام مشاري ان فيه هنا سوق شعبي
حسب ذاكرتي
والحمد لله لم ناخذ وقت طويل بالوصول له
السوق يبيع كل شي انا مريته اتذكر اني اخذت من عندهم
محفظة كروت الى يومك هذا استخدمها
وبالفعل وجدتها عندهم
واذكر وقتها يقول خذ ثلاث محافظ بعشرة باوند
المرة هذه رفض يقول 3 بـ12
اخذت من عنده محفظة كروت بس لزميل بالعمل كان يبحث عنها
ولدنا الصغير من النوع اللي ما يحب الاسواق
لاحظت علية الطفش والملل
قلت له وش رايك نتغدا بناندوز وصار وضعه
لان شفناه بالامس بعد ما تغدينا بفايف قايز
رحنا جهت المطاعم والسينما
الاماكن كلها بمطنقة وحدة كانك تلف نص كيلو بنص كيلو
واذكر ان المطاعم اول ما تخرج من السوق يمين واول دخلة يمين
بعد مغادرة مدينة ليستر والتوجه الى بريستول وهي محطتنا الاخيرة
ونقطة التقاء مشاري بالمعهد
القطار كان الركاب فية قليل
والتوجة الى برمنقهام ومنها تغير القطار بريستول
التبديل بالقطار في برمنقهام
وصلنا الى محطة بريستول واخذنا تاكسي الى الفندق
مقابل 9 باوند
كان السكن بفندق ماريوت
Bristol Marriott Royal Hotel
الاقامة كانت
من 1/9/2016
الى 3/9/2016
بصراحة انصدمت من حجم غرف الفندق
كبيرة جدا مقارنة بالسكن في بريطانيا
الفندق انصح فية وبقوة جدا
هنا الحجز كان حجزين واحد من بوكينق
والثاني من نفس موقع الفندق
السبب كان حجز الفندق ارخص من بوكنق
والثاني نفس السعر
غرفة مشاري واخوة
كانت غرفة ديلوكس بسرير بالحجم الملكي أو بحجم كوين
والسعر كان بموقع بوكنق 212 £
لكن اخذته من موقع الفندق ارخص من هذاالسعر
الغرفة الثانية حجزها من بوكنق
جناح كينغ من غرفة نوم واحدة
بسعر 478.34 £
طبعا الحجز كان شامل الافطار
ما يميز الفندق قربة من الاسواق ( السنتر )والمعهد قريب جدا جدا
ومقابل الفندق بقالة تسكو
وصلنا الفندق والجناح كان غير جاهز
الديلوكس كانت جاهزة
طبعا بالبداية اعطونا الجناح فوق بالدور الرابع والديلوكس بالاول
حسب طلبي ان الغرفة تكون باعلى دور
وعادة النوعية مثل هذه تكون باعلى الفندق
قلت لهم ابي اولادوي بجنبي بالغرف قالوا ما تجي
قلت نفس الدور
قالوا ما فية مشكلة بس بتنزل بالدور الاول قلت ماهي مشكلة
اهم شي نكون قريبين من بعض
مشاري نام عندنا اول يوم
وثاني يوم نام عند العائلة
اخبرته انه من الادب انك تستاذن وتودعهم
وتكاليف توصيل مشاري للمطار مدفوع مسبقا
فقلت لمشاري الوعد المطار تقابلنا هناك
طبعا مشاري كان اول طالب واخر طالب يسكن عند العائلة
والسبب ان العائلة ما هم محتاجين
ولكن قبلوا مشاري لحاجتهم للمال لترميم بيتهم
الرجل مدرس كيمياء مدري فيزياء
والحرمة مديرة مكتب دكتور
وحسب الخطة لاول يوم ان يخرج مشاري من المعهد
ويمرنا بالفندق ويبات عندنا ونطلع نتعشاء احتفال بمشاري
واثناءا انتظارنا اخذت صور للجناح الخاص بابومشاري
صحيح انه غالي
لكن قلت انه اخر يومين ادلع نفسي بالسكن والراحة
ملاحظة مهمة بخصوص الجو في مدينة بريستول
الجو وقت تواجدي كان قريب من جو البحيرات
بارد نسبيا وامطار متوسطة
اعجبني جو المدينة
حتى ام مشاري اعجبتها المدينة
ومنطقة التسوق فيها حلوه جدا
هذا التمثال مقابل الفندق
وخلف الباص يوجد بقالة تسكو
والكنيسة على يسار الفندق
وهذه الساحة مقابل الكنسية منطقة حيوية بالناس
ومن جانب الفندق رصيف الميناء وفية مطاعم ومركزالاستعلامات للمدينة
ايضا فية قوارب صغيرة تاخذك بجولة قصيرة
صورة من امام الرصيف للفندق
هالمبنى مش متاكد منه هو جامعه ولا لأ
بس اشوف هنا بالمنطقة طلبة بكثره ومعهم شنطهم
اتفقنا مع مشاري بعد ما يخلص من المعهد يجينا الفندق
وبعدها نطلع نتمشى وناكل
السوق قريب من الفندق تقريبا 10 دقائق مشي
السوق بصراحة روعه كل شي حولك
خارطة منطقة السوق
دخلنا السوق ومشاري يشرح لنا المنطقة ويقول هذه اكثر منطقة حفظتها
اطلع من المعهد واجي الف هنا الين الغروب وارجع للبيت
طبعا كان يعاني من وجبة العشاء بالبيت
كانت الساعه 6 المساء
ومشاري كان يطلع من المعهد اربع ونص ويقول يادوب الحق
واحيانا اتاخر بسبب ان بعض الاحيان الباص يفوته
ومشواره للبيت بالباص تقريبا نص ساعه
هنا احب انوة للنساء عموما لا يفوتكم هالمحل كبير ثلاث ادوار
هذا اغلب بضاعته اوتلت وماركات
وتقدرون ترجعون للخريطة وتشوفون كبر المحل
ولا تنسون قبل ما تشترون خذوا من عندهم بطاقة عضوية
ولا بد من تفعيلها عن طريق النت
استفدت منها تجمع نقاط ويعطون خصم مقابلها
لما رجعت السعودية عندي 10 باوند خصم
والاحلى انه يشحن للسعودية مباشر
تم تجربة الشحن بعد العودة مقابل 9 باوند
طبعا ما يحتاج محل ابوغسان بكل سوق
دبنهامز ام مشاري سنترت عنده من بكره الصباح
واللي حلاه زيادة ان بريمارك ملاصق له
ومقابلهم ابوواحد باوند محل كبير
هنا مشاري وقت دراسته صار لجوالة مشكلة وهو ان سماعة الجوال خربت
وحجز موعد عندهم وصلحوه له وبعد اسبوع اسبوعين خرب مرة ثانية
ورجع لهم وكانت المفاجأه له
قالوا له تفضل جوال جديد
ويقول مشاري اخذت عندهم تقريبا ساعتين علشان انقل ملفاتي وافعل الجهاز
ونشوف ناندوز قلنا ناكل العشاء فيه والمحل فل زحمة
وننتظر تقريبا 5 دقائق ونجد طاولة نجلس
الشباب طلبوا قالوا هذه المرة نبي نضيف رز
وكان الحساب فوق الاربعينات باوند
والصورة بالمطعم اخذتها وكاني اصور الديكور
لاعتقادي ان تصوير الاشخاص عندهم جريمة
رايت مقاطع كثيرة باليوتيوب والاحظ ان التصوير يبتعد عن الاشخاص
وثناء الانتظار تاخر الطلب على غير العادة وامسك اقرب موظفة تمر من عندي
سلامات وين الطلب تاخرتم اعتذرت وتقول شوي ويجي
ولحظات واقول للعائلة اشم ريحة حرق عشانا انحرق
واقل من خمس دقايق
الا الدخاااااان بكل المحل واسال قالوا ان احدى مراوح الشفط
اختربت وصار الدخان مايخرج للخارج
هنا العالم انسحبت من المحل والطاولة اللي ورانا كانوا حريم ثنتين كبار بالسن
ماخلصوا اكلهم طلعوا برا المحل واخذوا نصف فلوسهم
ام مشاري هنا دخلت بحالة ضحك هستيري
على ابومشاري
تقول اطلع العالم كلهم طلعوا الا انت
وابومشاري ولا كانه صار شي متكي على الكرسي وفارش ايدينه
ووقتها ام مشاري اخذت جوالها وتصور الموقف وتضحك
شوي ويجي رئيسهم ويقول اسفين ويعتذر
خاف من ام مشاري يحسبها تصور بتشتكيهم
هذا توقعنا
قلت طيب عطونا قروشنا خلونا نروح
قالوا نصف طلبك جاهز ما يصير تروح وتخليه
وبنفس الوقت قالوا لاتخاف فلوسك بترجع كاملة لك
والطلب اللي جهز لكم ببلاش
وهذا الاكل اللي اكلناه ببلاش
وهنا واحنا ناكل جابوا الفلوس
المضحك انهم مرجعين لنا فلوس اكثر من اللي دفعناه
اكلنا وانبسطنا وضحكنا من الموقف
هنا المحل بعد ماخرجنا وفاكين كل الشبابيك والباب
وطاولتنا كانت اول شباك من اليسار
بالطريق للفندق وقفت ام مشاري وولدها عند محل يبع رز ومكرونه
بطريقة جميلة وكانها صينية
اكل الولد الصغير بالمحل
وصلنا الفندق وكان من الغد يوم المغادرة
بالصباح نزلنا للافطار
وبعدها عمل التشيك اوت
وكنت حاجز تاكسي الى المطار وقت المغادرة حسب الاتفاق مع الشركة 9.45 صباحا
تعاملت معهم بالقدوم والمغادرة
اسعارهم ممتازة وعلى الموعد
expressairporttransport
وبالفعل لما نزلت الساعه 9.40 وجدته واقف عند باب الفندق
وسالته كم لك قال تقريبا 10 دقائق
واسالة لية ما طلبتني يقول فعلت ولكن الفندق رفض
يقول هو على وشك الخروج انتظر
انطلقنا ولله الحمد بفضل من الله ورحمته
ومتفقين مسبقا مع مشاري يقابلنا بالمطار
لان المعهد راح يوصلونه للمطار
الجو طبعا اليم لابومشاري
اعشق هذه الاجواء
وصلنا بوقت مبكر للمطار قلت فرصة نمر التاكس
وزحمة غير طبيعية
وفوق الزحمة غلطت غلطة كبيرة اخرتني تقريبا ساعه
ماعبيت النماذج وهذا بسبب جهل مني
طبعا يوجد موظفين عرب وللاسف ما يبلغون الجميع
كثير ناس تاخرت والسبب هو عدم تعبئة النموذج قبل الوصول
لموظف المطار
والتصوير هنا تعتبر جريمة
ممنوع التصوير
ومسكوا صيني بغوا يصادرون الكاميرا
بس كانوا قروب وتساهلوا معه
طبعا ما خلو الصور امسحوها
خلصنا وبالاخير يقول الموظف مافيه ريالات سعودية
بنحولها لك على البطاقة
طبعا اللي يسوي هذه الحركة يعتبر خسران كثير
التاكس بيرجع ناقص 8%
تحويل البنك من الباوند للدولار للريال شف كم بيخصم عليك
