أنت تستخدم أحد المتصفحات القديمة. قد لا يتم عرض هذا الموقع أو المواقع الأخرى بشكل صحيح.
يجب عليك ترقية متصفحك أو استخدام
أحد المتصفحات البديلة.
تابع اليوم العاشر..
والى الفندق ننطلق
ووصلنا فندقنا بريمير ان
موقعه ممتاز جدا
في يمه مول و شارع للتسوق وتمشي
بس عيب الفندق شكله مو فندق.. يعني كانه بس تعال بالليل نام واطلع الصبح
الريسبشن بس طاوله
بس الغرفه كبيره..
كفت السراير والجناط
بس عيبها
مافي ثلاجه ولا سيفتي بوكس
خلاص ماكو وقت نضيعه و نبي ناكل
طلعنا على طول عالمول القريب
اول شي عالمطاعم ندور مطعم
ووقع الاختيار على
طلبي
برجر خضار
فيش اند شيبس للاطفال
وهذا نسيت شنو يمكن فيش برجر
واساس المائده
الحمدلله على النعمه
صار وقت نتمشى
هذا المحل موجود بتركيا والبوتات عنده وايد حلوه
شريت منه بتركيا والحين اخذته منه بعد
حبيت المكان كأول يوم وايد هدوء و شفت وايد بنات كويتيات صغار بعمر الجامعه حسيت انهم طالبات .. وحسيت بالامان
وقلت خلاص هذا المكان اللي درس فيه
ومترو كارديف
وطلعنا من المول الى الشوارع المجاوره
ورجعنا الفندق
كله مشي لا تحتاجون تاكسي ولا مترو...
اليوم الحادي عشر : 31/12/2016
كان المفروض اكتب هذا الجزء قبل 3 اسابيع و كنت ناويه اخلصه قبل سفره السنه وحملت الصور بس كلش ماكان عندي وقت
المهم
هذا اخر جزء ان شالله
واخر يوم لنا
بالبدايه الريوق
على عيوب الاوتيل الا انه ريوقه متنوع اكثر من اللي سكنت فيهم بلندن ومانشستر
اول شي ركن السيريال
و الروب و الفواكهه ركني المفضل
والتوست والبيغل و البان كيك
والزبده والمربيات و العسل والنوتيلا
والاطباق الرئيسيه الساخنه
وعندهم بيض بانواعه
واهم شي
الحب الكبير
القهوه
حاطين مكينه القهوه تبع كوستا وانواع متعدده تسوي
الحمدلله عالنعمه ربي دومها
خلصنا وطلعنا
وهذا الاوتيل من برا
و تسوق لي اخر نفس
التمشي و التسوق كله كان حوالين فندقنا ابدا ما استخدمنا سياره للتنقل
دخلت بريمارك
والاسعار تنزيلات عالاسعار
اهو اوردي رخيص ومسوي سيل بعد
صورت نبذه مختصره عن الاسعار للي مايعرفه
ملابس البيبيات
واحنا نتسوق
عزكم الله ولدي كان يبي يروح الحمام
سالنا موظف بريمارك عن الحمام و اخذني مع ولدي مكان خاص للموظفين
اللي عجبني
تقديرهم للعاملين عندهم
حاطين لهم دور كامل فوق المحل
في استراحه وغرف تبديل وحمامات و مطبخ كامل وتلفزيون وصاله
بصراحه خنقتني العبره على دواماتنا
هذا اللي قدرت اصوره مابيهم يشوفوني
و استراحه قصيره
الاطفال ياكلون ايس كريم
وانا و ابوهم بالكافيه اللي مجابلهم
البرواني ما عجبني
بس القهوه زينه
يتبع...
تابع اليوم الحادي عشر..
نتمشى فى الارجاء
والاطفال متعودين يشوفون الاشخاص اللي متنكرين واللي يعزفون على طووول يقولون نبي كووين نبي نعطيهم
يستانسووون ولازم يصورون
و زارا بعد اسعارهم رخييصه جدا
والمحلات كلها تنزيلا للحين ماخلصو
وهذا الماركت
في اشياء متنوعه من اكل و كماليات
اللبس الويلزي وينه يوم كنت ابيه
و طلعنا منه الى الشارع المقابل
ودخلنا محل بو ون باوند
انا وايد دقيقه واقرا كل شي وكل مكون
المهم للتنبيه هذا يحتوي على دهن خنزير (عزكم الله)
في ناس كل شي ياكلون بدون ما يدققون مصدر الاكل ومدى نظافته او حلال او شنو مكوناته
الهم يحشووون البطن
والى قلعه كارديف
والشارع المقابل
الشارع صارتلي فيه ذكرى سيئه كلما تذكرت والله افكر اقول شلون صار و الحمدلله الله نجى ولدي باعجوووبه
الحمدلله
احنا بنخطر الشارع و يعرفون عيالي انه لازم ننطر اشاره المشاره يصير لونها اخضر علشان نمشي
واحنا واقفين ننطر
ركض ولدي بالشارع يبي يروح الجهه المقابله
طبعا انا وقفت مثل الصنم مصدومه مادري شسوي
سيارات طايره واهو يخطر
انا حزتها ما كنت ابي اصرخ علشان لا يتدوده (مادري شنو ترجمتها يمكن وايد ناس مايعرفون هالكلمه)
كنت ابيه يركز على دربه وقاعده ادعي انه يوصل الجهه المقابله
بس اسمع اللي حواليني يصرخون
are you creazy
المهم وقف بنص الشارع
انا حزتها قمت الطم
غيبت مادري شنو صار مادري منو انقذه
فجاه شفته جدامي رجع
جان امسكه واصررررررررررخ عليه واطقققققققققه من خوفي والله
اطقه وانا اللي ابجي
والاجانب ماهموني خليهم يقولون تعامل الطفل بعنف
الحمدلله عدى الموضوع وخطرنا الشارع
ودخلنا محل التذكارات
و محل الرغبي حق ولدي بس كله ملابس كبار للاسف ماكو صغار
يتبع...
الجزء الاخير
و من بعد جوله قصيره بالشوارع
رحنا ندور على شارع اتوقع اسمه (سيتي روود) ماني متاكده من الاسم
بس الهدف منه كان الوصول الى شخص هناك عنده بقاله و موصينه احد الاصدقاء انه نوصله (مجلات العربي)
المهم انا ماشيه على قوقل ماب
و احنا ماشين صادفنا شخص عربي ساله زوجي عن الشارع وعلى طول قاله تبي مطعم لا شيشه
قلناله لا نبي البقاله
الظاهر المطعم مشهور بالشارع
و وصف لنا ووصلنا الشارع
وهذي البقاله
ووصلنا الامانه للشخص
لكنه حلف يعزمنا على الاكل
اكرمه الله بس انا ما احب ارتبط باحد خصوصا بالسفر
واحنا عارفين العرب كرما لازم يعزمون ويكرمون
لكن ابي اكمل تسوووق و الاطفال بعد يبون محل رياضه
كلش ماكو وقت لكنه اصرررر وحلف الا يعزمنا
وزوجي استحى يرده
ورحنا مطعم لا شيشه
مطعم حلال
يمكن اول مره بحياتي الترحاليه ادخل مطعم عربي اكل فيه
شبعانين مشاوي وعيوش بديرتنا
احب لمن اسافر اكل من اكل الدوله نفسها او اي شي خفيف يمشي حاله
ماقصر طلب لنا مشاوي وعيش و مرق باميه
بس الله يسامحه
كل المحلات سكرت
عموما
رحنا نتمشى
ونشوف الاستعدادات لرأس السنه
و لعنا بالالعاب و حصلنا هدايا
واستانسو اليهال
و رجعنا الاوتيل نسكر جناطنا و نشوف الالعاب الناريه من الشباك
و خلص اليوم
و الصبح طلعنا مع سايق كويتي من فئه البدون انتقل للعيش هناك واسرته بالكويت
عنده سياره خاصه وكبيره الله يعافي اللي عطانه رقمه
ماقصر ويانا
ووصلنا من كارديف الى مطار هيثرو
ووصلنا الكويت الحبيبه يوم 1/1/2017
.................................................. ......
شكرا جميعا عالمتابعه والتعليق
شكرا على كل كلمه
شكرا ولو انه التقرير لم يشمل كل شي لكن اتمنى اكون افدتكم ولو بشي بسيط
