السلام عليكم ... اخباركم ؟
كل واحد له مزاج بالسفر ... احد يحب الصخب ... احد يحب الهدوء... ناس تحب الاسواق... ناس تحب الطبيعة ... انا احب المشي ... انت تحب المواصلات ... هو يبي شي مذهل... هي تبي شي اكشن ... كل هذا هنا... تبي متعه عندنا ... تبي اثارة ( عندنا ) ... تبي مغامرة ( عندنا ) ... ماتدري وش تبي ( عندنا بعد ) ... سلمني مفاتيحك وخل السواقه علي هالمره ... انك تقدم على شي وانت ماتدري انت مقبل على ايش هذا بحد ذاته اثارة ... ان الاسئلة تدور براسك وماعندك جواب ( ؟ ) ... دايم بسفراتي اعرف وش انا رايح له واصير حاط خطوط عريضه ورئيسية ... بس هذي اول مره اروح ( ادربي راسي ) .. انا مادري هل التجربة طرحت في المنتديات العربية او لا ... بس بعد باريس سئلت بريطانيين وش تقترحون اسوي ، وش عندكم بديرتكم ؟ واكتشتفت خيارين الى الان ممتازين على الاقل بالنسبة لي ... اليوم اطرح خيار منهم .. وهو متوفر في كل بريطانيا ... وغير محدود بمنطقة معينة ... سواء في الشمال او الجنوب ... انجلترا او ايرلندا او ويلز ... وفيه بعد بدول اوربيه ثانيه نفس الفكره ... في فرنسا وهولند والنرويج وغيرهم ...تجربة انك تركب بوت او قارب وياخذ بك جولة هذي معروفه ومجربة وجربتها انا بماليزيا في رحلة المانقروف ودبي والدمام وغيرها .. تجربة اني اركب سفينه مطعم وتمشي بنا هذي معروفة ومنتشرة بالعالم بعد ... تجربة الكروز معروفة وفي هنا تقريرين كبار لاثنين من كبار الخبراء تقرير قطري ( ابو سعد ) وتقرير هداوة ( ام عيسى ) ... وان شاء الله يصير لي تقرير قريب بعد ( لاني احسها تجربه ممتعه جدا ) ... بس انك انت تستاجر بوت كأنك مستاجر سيارة !! انت تسوقه !! انت قبطانه !! مسؤول عن تحريكه وعن توقيفه !! تمشي اذا بغيت وتوقف اذا بغيت !! مسؤول تشيك الوقود حقه وتفحص موية الاديتر له !! انت اللي ترسوا به في المراسي !! احيانا يكون المرسى جذع شجرة !! تقفز من البوت وهو يمشي ومعك الحبل عشان تربطه !! تسحبه للجال !! يساعدك افراد عائلتك !! يرمون لك بالحبال الاخرى ...لا احد غريب معكم !! عادي تصدم به في المرسى !! او احد يصدمك ويضحك !! تجارب بالنسبة لي جديدة والغريب ما سأقوله لكم في ثنايا هذا التقرير البسيط ... اعذروني ان تعاظم الموضوع اكبر من توقعاتكم ... ولكن .. لو علمت عن زيارة احد لربما اجبرته اجبارا على خوض التجربة ... ولربما تركت اسئلته تدور براسه بدون جواب ... التجربة هذي ارشحها بقوووه وبقوه وبقوه لأي احد ... حتى كبار السن رأيتهم هناك... فمن لايعشق الجمال .. او الاثارة .. او الدهشة ... اترككم للنشبة الكبرى والمعضلة العظمى ومانعة التقارير ومحطمة الاقلام ... اترككم واروح ارفع بعض الصور وارجع
طبعا بما ان كثيرين يجهزون لسفرة الصيف ومن باب حب لاخيك ماتحب لنفسك ... ويمكن يعجبهم ويضعونه ضمن خططهم ... فسأستغل الفرصه واقدم التقرير كالعاده ( حوسة ) ... مجهز حوالي 500 صورة
...بس مدري كم بنزل ...كثير من الناس بيجون بريطانيا بعد رمضان ... وهو بيكون هنا من اجمل الاوقات ... خصوصا الارياف ... وبتقريري هذا بتشوفون الريف الانجليزي بوجه اخر
... سموها سفاري ان صحت التسمية ... بس على ظهر البوت ... سياحة الابوات او قوارب النزهات سوقها رائج هنا وبقوة ويلزمك احيانا تحجز بدري ... افكر اعيد التجربة بعد رمضان ان شاء الله لعدة اسباب ... اولها واهمها جمال التجربة وروعة الاحساس ... ثانيها الربيع تأخر شوي ولازالت اثار الشتاء باقية في كثير من الاماكن وخصوصا الاشجار توها بادية تورق ويمكن يبيلها شهر من الان او اكثر شوي .... ثالثا - كثير يوجد الكثير من الفعاليات في طريقك وانت في النهر ( ملاهي ، محميات طبيعية ، جولات الغابات وغيرها ) وطبعا على حسب مكان النهر اعتقد ... رابعا - اخذنا المره هذي البوت ثلاثة ايام وكان اللي يسلمناه مثل المستغرب ليش مااخذنا اسبوع ؟!! واحنا اصلا كنا نبي يومين بس قالوا اقل شي ثلاث ايام . وفعلا ابي اعيدها وبمدة اطول ... التجربة ممتعه لكل افراد العائلة ... وسعرها بعد حلو مرررره ... ارخص اي استراحة او مخيم ... بس اجمل ... عاد اللي يحبون الكشتات اعتقد قمة الالم لهم مغادرة هذا المكان ... بحثت عن تأجير الابوات في بريطانيا وتفاجات انها موجودة في كل بريطانيا تقريبا ... فيكفي انك تبحث بالمنطقة اللي بتسافر لها وبيطلعون لك وممكن اساعد اللي يحتاج في البحث ...كنا نفكر نجرب البوت لمدة يومين لان مانعرف اي شي عنه ولا وش وضعه ... دخلنا الموقع ولقينا الابوات اشكال والوان ... من شخصين الى 10 اشخاص ... مايشترطون انك تعرف تسوق بوت او حتى سبق ركبته ... حتى لو ماسبق شفته مو مشكلة !!!!! اتصلنا عليهم لان موب متاكد من سالفة اني بسوق وانا مامعي رخصة !!!
قالوا اقل شي ثلاث ايام ... والابوات المتوفرة محدودة لان عليها طلب واحنا نبي نحجز قبل اسبوعين من الاجازة ... اجازة المدارس ... يعني موسم ... بالمناسبة هنا الاجازت تنخفض الاسعار وتزين العروض ويساعدون الناس انها تستمتع بالاجازة ومايستغلون ظروفك (بحجة انه موسم ) . علمونا الموجود عندهم واخذنا شي مناسب لنا وكان 3 ايام بـ 300 باوند شامل التأمين و 75 باوند تأمين الوقود ... طبعا مثل نظام السيارات تستاجر الوقود فل ترجعه فل ... لو استأجرت البوت وفيه مثلا بـ 75 باوند ديزل وقبل نهاية جولتك مثلا عبيته بـ 100 باوند اذا رجعته يحسبون الليترات واللي فوق 75 باوند يرجعونه لك يعني مايقولون محد قال لك عب زياده .. فيه ريفاوند يعني ... والديزل عاد مايصرف .... انا 3 ايام وماكنت اوقف الا قليل مرررره واخذوا علي زيادة 81 بنس ( اقل من باوند ) ...ترا انا اطلع عن الموضوع لموضوع واستطرد وانسى ...اللي بيستفسر عن نقطه معينه عادي بس يقول ...حجزنا وسحبوا فلوسهم على طول ... وجلسنا نفكر وش نسوي بهالورطه ... وش ناخذ معنا ... طيب وش تجهيزاته !! وارجع اقرا مميزاته والقى البطانيات والواي فاي والمطبخ ... بس مدري المطبخ وش تجهيزاته وهل فيه ثلاجه او لا ؟ ونكلمهم ثانيه ويقولون بعضها يجي فيه ثلاجه وحقكم فيه ...ونسينا نسئلهم عن اغراض المطبخ
...ونجمع الشناط حقة الملابس ونقلبها عزبة ... ملاعق ، سكاكين ، شوك، ملاس،سكين تقطيع، مفك ، فرادة ، قدر كبير ، مقلاة ... خذت الاغراض شنطة ونص واخذنا تموين للطبخ ( ارز ومكرونه ودقيق ) وملحقاته من بهارات وصلصة وخضار وفاكهة واخذنا سناكات واخذنا (((((((( قدوع ))))))))) وتراه مهم لاتنسونه . والشاهي والقهوة والسكر والهيل ،والعصاير الخ ، في اليوم الموعود قمنا وكنا مخلين بعض الاشياء ناخذها طازجه مثل الدجاج والفواكه وموية الشرب ع الطريق لان مدري عن وضع المويه للشرب والطبخ ...اللي بيروح يكتب قائمتي اللي فوق ...كان موعد استلام البوت الساعة الثانية والنصف بعد الظهر وهم بعيدين عننا حوالي ساعة ونص ... هم في نارويتش ... وصنا لهم على الوقت وسلمونا ستر النجاة للصغار وللكبار ....
وقالوا البوت هناك روحوا له وبيجيكم واحد الان ...
رحنا بالسيارة عشان ننزل الاغراض ووقفنا جنب البوت
وجانا واحد وقال بسوي معكم جرد للبوت واعلمكم وش تسوون بما انكم اول مرة ... نزلنا معه للبوت ...
الدخول مع ورا كان
اليمين غرفة صغيره مره فيها سرير لشخص واحد ودولاب ...
فرن غاز ( فيه اسطوانتين غاز في البوت موجودات برا يعني ماراح تشوفونهن الا اول مره عند الجرد ) وفيه ثلاجه صغيره بفريزر + وفيه مجلى صغير ودولاب مطبخ ...
اللي فيه هذي اغراضنا ..
اللي كتب الاغراض من فوق يرجع يمسح المواعين ، فيه كل الادوات حتى القدور بس صغيره ،حتى الملاحه موجوده ، بس جيبوا التموين ... واذا تابعتوا التقرير بتشوفون شي ثاني ينمسح ...
قدام الفرن فيه صندوق كبير وهذا هو
مكينة البوت ... قال تشيكون الزيت والمويه كل صبح وفيه في البوت برا علبة زيت ( بس ماحتجناها ابد ) ....
في المقدمة فيه اللي تشوفون مكان السواق في غرفة الجلوس
فيه مقعدين كبار على جنب وممكن يستخدمن سراير
مع مساحات تخزين اسفلها ...
فيه تلفزيون ملحق به دي في دي
- في محلات باوند لاند فيه افلام دي في دي بـ واحد باوند ..
وتشتغل القنوات المحليه بواسطة اريل ( موجود بالبوت تشبكونه من برا وتحطونه فوق )
فيه طاولة اكل
فيه واي فاي مجاني (بعد ماتشبكون عليه يفتح المتصفح وتسجلون بياناتكم ويرسل رقم التفعيل ع الجوال لاول مره بس ) ثم باقي المرات يكفي تسجيل الدخول ع الشبكة وفتح المتصفح والانتظار الين تجي صفحة ( قيت ستارت ) تضغطونه وخلاص ..
فيه بعد دفاية هوا ...موزعه فتحاتها في البوت وممكن تشتغل لمدة 4 ساعات بعد ايقاف المحرك .. وعادي استعمال الكهرب بعد اطفاء المحرك لان فيه بطاريه للمحرك وبطارية للاستعمال الكهرب مثل الانارة والشواحن والتلفزيون الخ ...
في الخلف فيه مساحتين تخزين وحده فيه دبتين غاز والثانيه هذي
اطناب لو حبيتوا ترسون على جنب النهر ومافيه مربط تغرسونها بالارض وتربطون البوت ...
وفيه مقدمه جميله تشيل طاولة الاكل وممكن الجلوس فيها او حتى الجلوس في المقدمة وتعلقون رجليكم برا اثناء الابحار ( تجربة لاتنسى )
طبعا فيها فتحة سقف كبيره ... وطبعا المميزات تختلف من بوت لاخر ...فيه انواع فيها جلسة في السطح وبعضها النصف الامامي ينفتح بشكل كامل ( يرجع نصف غطاء الكبينه للخلف وتصيرون كنكم جالسين برا ) وفيه ابوات دورين ... البوت الدورين حلو وتشوف من فوق بس مشكلته احيانا الجسور مايقدر يمر من تحتها كلها ...
الى هنا خلصنا البوت ومرافقه والجزء القادم ننطلق معكم ونشوف وش اللي صار ....
كونوا بخير ... وعودوا
بعد ما جرد الموظف معنا الاشياء اللي لازم ننتبه لها ( المرساة ، الاطناب ، الغاز ، اريل التلفزيون ، عصا طويلة تساعد في دفع البوت عن المرسى وقت الحاجة ...الخ ) قال لنا بروح 10 دقايق وارجع اعلمكم عليه ... رتبنا اغراضنا في الاداراج وحطيت السيارة بالمواقف قدام المراسى ( مواقف مجانية تابعة للشركة ) ... ورحت للبوت ... الخطوة عن خطوتين واحيانا ثلاث ... وما احسن ما قال المتنبي :
لقد دب الهوى لك في فؤادي *** دبيب دم الحياة إلى عروقي
موضوع الجو كان غايب عن البال تقريبا ...وماانتبهنا له الا بعد الحجز بفترة وان الجو بيكون اكثره ممطر ... بس دايم اقول ان العلم اولا واخيرا عند الله سبحانه وكلها توقعات ... وان شاء الله ماتضبط التوقعات ويصير جونا حلو .... الجو يوم الرحله كان يبشر بخير وانه بيكون يوم مشمس نسبيا وهادئ ... طبعا احنا عارفين انه الربيع لسى في بداياته وتو الاشجار بادية تورق ... يعني مافيه خضره بشكل كبير .... الطيور منتشرة بكل مكان
وش هالنشبه ... كيف بنطلع
جاء الموظف مره ثانيه وعلمنا كيف نشغل ونطفي وعلمنا على اللوحات في امام السواق
ثم قال يلا ورنا مشيك يا فلان .... وبسم الله واشغل وامشي بشويش... وطلع المقود سهل التعامل معه وازيد السرعه .... قلنا له كيف نرجع لك بعدين ؟! احس انه سؤال وجيه !! قال عادي ماراح تضيعون !!!! وقال لو احتجتوا مساعده اتصلوا واحنا نجيكم ... قلت خلاص اجل ... انس موضوع كيف نرجع لكم .... النية ضيعه ... نسيت اقول لكم انهم معطينا كتاب عن البوت كيف تتعامل معه وكيف توقف وكذا وخريطه... وطبعا كعربي اصيل ... رميته بالدرج ... وماشفته الا بالليل يوم وقفنا وخلصنا من نص التعليمات بروحنا ....رجعنا نرجع الموظف وطبعا كان معلمنا انه بما ان ايجارنا لمدة ثلاثة ايام فما نحتاج للتزود بالوقود ... لان الديزل اللي فيه يكفي اسبوع ... والموية ممكن نحتاج نعبي كل يوم ... قلت من وين ؟ قال عادي بالطريق بتلقون اماكن كثيرة للتزود بالديزل او المويه او لشفط الصرف الصحي اجلكم الله ... المويه قال غالبا مجانية ولو احد طلب فلوس فغالبا 50 بنس ( نصف باوند ) وبالمناسبة المويه صالحة للطبخ وفيه فلتر صالح للشرب ( بس ماعجبني طعمها للشرب ) بس للطبخ والشاي والقهوة كانت عاديه وماحسينا بشي ... احنا اصلا كنا ماخذين موية بس رجعنا بها لان مويتهم مناسبة للطبخ ... وعلمنا ان فيه كثير مواقف مجانية ... وانه لازم مانوقف في المواقف الخاصة ... او المكتوب ممنوع الوقف هنا ..
بعد ما نزلنا الرجال ... انطلقنا بعون الله ... لوحدنا ... في بوتنا ... لا سائق يمنع حريتنا ... كأننا في بيتنا ( المتحرك ) ... بدأت فعاليات الاطفال ... لعب وصراخ ... وهذا كيف يشتغل ... وهذي بطه قدامنا بابا لا تصدمها ...
لوحات اسماء الانهار مثل اسماء الطرق
هذا نهر آنت اللي نطلقنا منها
مناظر على جانبي النهر
مشاهد تتغير باستمرار
فيه بعد ردارات سرعه !!!
الجوانب بعد شهر او اكثر شوي من الان بتكون كلها خضراء باذن الله ..
تقابلك احيانا ابوات ثانية ...
تمر احيانا بقرى ..
او مزارع
او براري خاليه
ام عبدالله اخذت دورها في قيادة البوت ... وبالمناسبة البوت له 4 قباطنه ... كل افراد العائلة جربوا واستمتعوا بقيادته ... وبما انه اقترب وقت المغيب ... واحنا لسى جديدين في الشغله ... وكنا شايفين في النهر اكثر من مرسى ... بتشوفون صورهم ... اخترنا نوقف هنا ... وبدأت فعالية اول توقف حقيقي.. اول توقف بدون موظف يوجه او يساعد ... خففت السرعه واقتربت من اليابسه بشويش ... اول مره التدئه الكبرى كانت بصدم الميناء .... ونزلت بالحبل
البوت خفيف نسبيا عشان المويه ... ويستجيب للسحب ...او الدفع ...
كل المراسي مجهزة باماكن للربط .. والمراسي تختلف احيانا التوقف يكون على جنب مثل الان ... واحيانا للخلف ... وموجود في البوت حبل في الامام + مرساة للتثبيت حال التوقف بالخلف ... وموجود حبلين في خلف البوت للتثبيت مع الزوايا ...
جيران ....
موقف بعيد عن اللي ورانا ... والصبح كانت هذي المساحه كلها مليانه ...
شبينا على الغدا العشاء .... والقهوة
قهوتنا ...
البوت مثبت ... بوجود جيراننا الحلوين
اول وجبة بوتيه .... الاواني موجوده كامله مع البوت ....
طلعنا نشرب الشاهي بعد العشاء برا ... وكان الجو حلو ... بس شوي وبدأ المطر ودخلنا ... النت كان حلو وسريع وشغل كل الاجهزة اللي معنا... 4 جوالات ولاب توب ...طبعا حسب مكان توقفك اذا كان قريب من قرية فيكون النت زين.. الشاحن الموجود مثل شاحن السيارة ... لذلك انصخ باخذ اللي له منفذين او اكثر ... فيه فيش بدورة المياه عشان الاستشوار ( ممكن يوفرون استشوار برسوم اضافيه ) ...
ثم الى تجربة اخرى ... تجربة اول مبيت داخل البوت ...
قرينا اذكارنا وكان الجو برد شوي مع المطر .... وخلينا الدفاية تشتغل ... وكان فيه بطانيات كافية للجميع ....
عاد اول تجربة لي انام في مكان يهز ... يمكني مالحقت على سراير الهزاز يومني صغير .... فكل شوي اقوم وافتح الستاره اشوف البوت في مكانه والا مشى بنا
.... وتجيك الافكار السودا وماتتركز الا عند النوم ... طيب لو مر واحد الحين وفك الحبال ودفنا عشان ياخذ الموقف ... وش نسوي بهالليول ... وخذ من هالافكار .... كلهم ناموا الا انا وعبقريتي وهواجيسي
... ولازم كونان وشارلوك هولمز يجون وتبدا التحقيقات ... لو صار كذا ...طيب لو مااشتغل البوت الصبح ومافيه ارسال جوال .... هههههه صح افكار جهنمية
.
وصحيت بدري قبل جرس المنبه لصلاة الفجر بس كان الوقت داخل وصليت الفجر ... وضبطت ام عبدالله القهوة ... وطلعنا نتقهوى برا وكان الجو حلو ...
Free Moorings يعني مراسي مجانية ... فيه مراسي بفلوس احيانا ... وفيه مراسي خاصة ... وفي ممكن توقف بأي مكان ثاني مثلا تحت شجرة وتربطه فيها ... عادي ... المهم كل كل مرسى يوضح تعليماته ... هنا الوقوف لمدة 24 ساعة ثم ماترجع لنفس الموقف لمدة 24 ساعه ... وفيه مواقف لمدة ساعتين او ثلاث وتكون غالبا في اماكن الخدمات مثل التزود بالماء او الوقود ...
ضيوف شاركونا قهوة الصباح ...
طبعا رياضة الكاياك مشهورة هنا ..اللي هو القارب الصغير ... اللي تحس ان رجول اللي راكبه نازله بالمويه
ثم دخلنا وصلحنا فطور سريع عبارة عن مشروم + فاصوليا حمراء وشاهي ...
اللوحة اللي قدامنا المرقمه هذي دايم تجي قبل الجسور ... وفيها ارتفاع البوت المناسب للدخول الان .... وتتغير حسب ارتفاع منسوب النهر ... فكرة ذكية
انطلقنا ...
طبعا البوت بطيئ جدا ...يعني مافيه سرعات عالية ... وبكذا هو امن جدا ...
جو جميل ... مستحيل الصور تنقل جماله ... وانتم تعرفون ان الصور عجزت تنقل جمال سفراتكم بالشكل المطلوب ...
هذا موقف خاص ...
ابوات وقوارب من مختلف الاحجام
ممرات مائية مختلفة
كانك في طريق سيارات ... بيوت ومطاعم على جوانب النهر ...
المراسي منتشرة ومتوفرة ....
الاجمل ... نظااااافة .... والله ماتشوف اي شي بالنهر ... لا اكياس ولا علب ... ولا اي مخلفات ...
رغم زحمة الناس في بعض الاماكن ... الا ان التنظيم الرائع يخليك ماتحس بوجود اي زحمه + التزامهم بالنظام ومعرفتهم بأن للاخرين ايضا حق ... انا ومن بعدي الطوفان غير موجوده ...
رحلات سياحية ...
طبعا حنا احسن منهم ... لاننا في بوتنا ... اللي احنا انسوقه ....
لو احد بيعطيني هدية بيت هنا مع بوت ترا والله مارده ... لاتستحون ...
الاماكن هادية ...
بالمناسبة .... في بيوت صغيرة للايجار ... بيوت عطلات
تطلع من بيتك ... تركب بوتك ... تروح دوامك ...
ورشة ...
كوفي ...
ولاني نسيت التنبيه في البداية انبه الان ... انه يمكنكم صيد السمك في الانهار ... كل ماعليك هو توفير سنارة او خيط ولو نسيت بتلقاها في القرى اللي بتزورها... ثم استمتع .... فيه اماكن يمنع فيها الصيد وعليها لوحات ...
مثل الحواري .... تدخل مع جهة وتطلع مع اخرى ...
نوع اخر من مرابط الابوات وتحت اشراف البطات ... اذا وقفت يمكن تركب البطه ... لانها متعوده يحطون لها اكل
لوحات تنبيه عند الحاجة
كأنه فنار قديم ...
بالمناسبة في الطريق قد تجدون الكثير من القلاع او بقايا الحصون القديمه والمتاحة للزيارة ... او غير متاحة .. وذلك حسب اللوحات الموجودة بالمكان ...
يوجد الكثير من الفعاليات بالطريق مثل الملاهي ، الحدائق ، المتاحف ، جولات الغابات ، زيارة اكواخ الاشجار ... ولكن اكثرها كان مقفل الوقت هذا وتفتح بداية ابريل ...
....