مدينة يونيفيرسال ستوديوز
Universal Studios
سبق وأن تكلمت عن هذي المدينة وشرحت أقسامها السبعة بالتفصيل بالتقارير السابقة
لذلك مابي أعيد نفس الكلام
طبعا معانا 4 تذاكر مجانية فاطريت لحجز تذكرة وحده لأحد الأطفال
أما يويو فكان دخوله مجانا
سعر التذاكر :
سعر التذاكر للكبار يساوي 74$ وللصغار يساوي 54$
ساعات العمل :
يوميا من الساعة 10:00 صباحا إلى الساعة 7:00 مساءا
أيضا بقولكم ان بهذي المره شريت تذاكر الاكسبرس
Universal Express
وهي تذكرة تخليك تلعب الألعاب بدووووووووون ما تصف بالطابور نهائيا
يكون لحاملين هذي التذاكر مكان خاص بكل لعبة يدخلون منه ويلعبون اللعبة بدون ما يصفون بالطابور ولا يتأخرون ولا شي
سعر هذه التذكرة يساوي 30 دولار سنغافوري للشخص الواحد
ومافي فرق بين الكبير والصغير بهذي التذكرة
نصيحة :
أنصح الجميع لو كنتوا مسافرين بموسم السفر والصيف انكم تشترون هذا النوع من التذاكر ( الاكسبرس )
لأن المدينة بهذا الوقت بتكون زححححححححححححححمة كبيرة وراح تشوفون الطوابير شلون طوييييلة ومدة الانتظار على الألعاب مابين 30 إلى 45 دقيقة !!!!
لذلك انصحكم تشترون هذي التذكرة عشان يلعبون عيالكم ويستانسون بدون تعب وبدون ملل وبدون انتظار وتأخير
أيضا ودي أقولكم وأذكركم بأن مدينة اليونيفيرسال لها عروض بالاشتراك مع أماكن سياحية أخرى
مثلا في تذكرة تكون شاملة مدينة اليونيفيرسال ستوديوز + الأكواريوم
Universal Studios Singapore + S.E.A. Aquarium
وسعر هذي التذكرة = 100$
طبعا هذا السعر ارخص مما لو حجزتوا تذكرة منفصلة لمدينة اليونيفيرسال وتذكرة أخرى للأكواريوم
أيضا في تذكرة لليونيفيرسال + الأكواريوم + الووتر بارك
Universal Studios Singapore + Adventure Cove Waterpark + S.E.A. Aquarium
وهذي سعرها 217$
وفي تذكرة للأكواريوم + الووتر بارك
Adventure Cove Waterpark + S.E.A. Aquarium
بسعر 67$
نصيحة :
الي يحب يروح أكثر من مكان في جزيرة سانتوزا الأفضل انه ياخذ هذي العروض التسويقية لأنه بيوفر على نفسه مبلغ حلو
طبعا احنا ما اخذنا هذا العرض لأن تذاكرنا مجانا
بس ذكرت هذا الموضوع للإفادة فقط
والحين عقب هذي القرقه والنصائح أخليكم مع صور اليونيفيرسال ستوديوز وهي من أهم أهم أهم الأماكن السياحية في جزيرة سانتوزا وسنغافورة عموما
وتحتاج مدة تتراوح بين نص يوم إلى يوم كامل للتمتع بكل العابها ومرافقها وعروضها ، وعلى طاري العروض لا تنسون أول ما تدخلون للمدينة انكم تاخذون الورقة أو الدليل الي فيها أوقات العروض وأماكنهم بالتحديد
العروض جدا جدا جددددددددددا حلوه وممتعة للأطفال وما تتطوف أبدا
بأحد الأيام رحنا لمدينة اليونيفيرسال ستدويوز ، وكان يومها ياسين ولدي ليلحين مريض وما يقدر يمشي عدل بسبب المرض
الله يشافي مرضانا ومرضاكم يارب
لذلك أول ما دخلنا رحت أجرت له عربانه صغيره عشان يقعد فيها وندزه بدال ما يمشي على ريوله
مع العلم ان عندهم بمكان التأجير كرسي متحرك للكبار وللصغار ونوع آخر من العربانات غير الي أجرناها
يعني مو محدودين بشيئ واحد
عندكم أكثر من اختيار لمن يجد صعوبة بالمشي داخل الحديقة
شوفوا منو يدز ياسين !!
هذي الصور أول ما دخلنا للمدينة
كما جرت العادة أول قسم زرناه كان قسم مادغشقر
Madagascar
وهذي لعبة السفينة وهي من أحلى الألعاب بهذا القسم
بالصورة تلاحظون مكانين للدخول
على اليمين لدخول الناس العادية وعلى اليسار لحاملين بطاقة الاكبرس وهي المرور السريع
بدون دور ولا انتظار ولا طابور
ضحكني هذا المنتحر
هذا عرض جميييييييل مع اغاني الفلم والرقص عليها
وبعد ما خلصنا من كل الألعاب الموجودة بقسم مدغشقر رحنا للقسم الثاني
وهو قسم شريك أو فار فار أوي
Far Far Away
تلاحظون مدة الانتظار المتوقعة لدخول اللعبة
بس احنا مع تذاكر الاكسبرس ما ننتظر ولا دقيقة نهائيا
وأيضا بعد ما خلصنا كل الألعاب الموجودة بهذا القسم رحنا للقسم الي بعده
وهو قسم الديناصورات أو ما يسمى ذ لوست وورلد
The Lost World
هذا الممر الخاص بحاملين بطاقات الاكسبرس
تشوفون شلون فاضي !! والناس كلها صافه بالطابور بالجهه المقابلة لنا
.
. . . . . يتبع
