الرد على الموضوع

بانكوك

تم الاستعداد للسفر الى بانكوك لقضاء آخر 3 ايام من الرحلة واللي اتفقنا على انها بتكون للتسوق فقط لعدة اسباب ... 

اول شي الوقت قليل ولا يكفي للتمشي والتسوق وثاني شي احنا متشبعين من الرحلات السياحية وآخر شي رخص اسعار الملابس في بانكوك يعني لازم نستغل اسواق بانكوك للتسوق منها قدر المستطاع

اقلعنا من فوكيت الظهر متوجهين الى بانكوك ووصلنا ولله الحمد واخذنا تاكسي من المكتب خارج المطار وكانت وجهتنا الى فندق بايوك سكاي

والطريق زحمة وشوارع بانكوك بشكل عام فيها زحمة سير بعكس المدن الثانية

[ATTACH=full]467239[/ATTACH]

[ATTACH=full]467240[/ATTACH]

فندق بايوك سكاي (Baiyoke Sky ) فئة 4 نجوم

الفندق يقع في برج عالي ( THAILAND'S TALLEST TOWER ) يوجد فيه محلات تجارية وفندق ومطاعم من ضمنها مطعم يعتبر الاعلى في تايلند ويقع في الدور 78 واللي راح يكون فيه الافطار اللي من ضمن حجزنا

بالنسبة للفندق اعتبره عادي جداً من ناحية الاثاث والخدمة وموقع الرسبشن يختلف عن باقي الفنادق اللي تكون في المدخل الارضي .. هذا لازم تطلع له بالمصعد واذا جيت تطلع للغرفة تروح لمصعد ثاني .. وصايره المصاعد زحمة اللي طالع واللي نازل يعني الموضوع مزعج في الدخول والخروج .. لكن مايميز الفندق من وجهة نظري هو موقعه المييز لانه في وسط بانكوك وكل المشاوير اللي نروحها بالتاكسي تكون قريبة ولا تكلفنا شي يعني اغلب مشوايرنا اقل من 10 ريال سعودي ... ويميزه بعد الاطلالة الحلوة على مدينة بانكوك

سعر الليلة 350 ريال شاملة الإفطار

وهذي بعض صور الفندق

[ATTACH=full]467241[/ATTACH]

[ATTACH=full]467242[/ATTACH]

[ATTACH=full]467243[/ATTACH]

[ATTACH=full]467244[/ATTACH]

[ATTACH=full]467245[/ATTACH]

وهذي اطلالة نهارية وليلية من نافذة الغرفة

[ATTACH=full]467246[/ATTACH]

[ATTACH=full]467247[/ATTACH]

[ATTACH=full]467248[/ATTACH]

[ATTACH=full]467249[/ATTACH]

طبعاً الهدف من جلوسنا في بانكوك هو التسوق فقط لضيق الوقت ولرخص الأسعار في بانكوك وخاصة الملابس ..

بعد ما ارتحنا شوي نزلنا نستكشف المكان بجانب الفندق .. ولقينا أسواق صغيرة للملابس أخذنا فيها جولة تسوق إلى المغرب وبعدها تمشينا في الشوارع المحيطة للفندق والمنطقة حيوية فيها كل اللي يحتاجة السائح من اسواق ومطاعم ومحلات تدليك بالاضافة لسوق ليلي صغير بجانب الفندق على شكل كوشكات يباع فيها الاشياء المقلدة من ملابس وشنط وساعات وغيرها .. وفيه كذلك المشغولات اليدوية والتحف واشياء كثيرة لكن زحمة وازعاج ولا تاخذ راحتك في التسوق ..

بعدها رجعنا للفندق ورتبنا امورنا للتسوق في اليوم التالي

في اليوم التالي من الصبح توجهنا لطوكيو سنتر والحقيقة توقعت انه مركز تجاري ضخم ولكن طلع متجر كبير للملابس ولكنه مميز ومنوع واسعارهم جيده الى متوسطه واخذنا فيه جولة تسوق واشترينا بعض الملابس ..

بجانب طوكيو سنتر سوق آخر اسمه MBK وهو عبارة عن سوق من عدة ادوار وكل دور يختص بنوع معين من البضائع ... مثلاً دور للملابس ودور للشنط والاحذية ودور للالكترونيات ودور للتحف ودور للاجهزة الكهربائية ..... الخ

صراحه من اجمل الاسواق في بانكوك يعني ميزته انه منوع واسعارهم رخيصة الى متوسطه وخاصة في الملابس ويحتاج وقت طويل عشان تلفه وتشوف كل الادوار 

احنا لفيناه الين تعبنا وكملنا من بكره ... وانصح أي شخص يزور بانكوك لغرض التسوق زيارة الـ MBK ..

راح انزل لكم كم صورة اخذتها بالجوال لاني واجهت مشكلة في الاسواق وهي منع دخول الكميرا للسوق لذلك اعتذر منكم لقلة الصور في هذا الجزء 

[ATTACH=full]467250[/ATTACH]

[ATTACH=full]467251[/ATTACH]

[ATTACH=full]467252[/ATTACH]

[ATTACH=full]467253[/ATTACH]

وعلى فكرة لازم تكاسر وتفاصل في السعر اذا جيت تشتري ... وبالنسبة للملابس غالبيتها تايلندية الصنع يعني ما تقارن ببعض الماركات العالمية لكن الخامات جيدة وخاصة للطلعات العادية او ملابس البيت او حتى المناسبات .. وفيه اشياء بعد جودتها عالية

بعد ما اخذنا عدة ساعات في هالسوق المميز واشترينا اغراض وملابس طلعنا لسوق ثاني اسمه بوبي او بوبوي وطلع سوق يبيع بالجملة ومناسب للتجار واصحاب المحلات وطلعنا منه لانه ما يناسبنا ..

وبعدها رحنا على مجمع سيام وهو قريب من الـ MBK وتصميمه مميز وكله ماركات عالمية غالية السعر زي اللي عندنا في الخليج .. ولاحظنا عدد المتسوقين فيه قليل مقارنه بطوكيو سنتر والـ MBK يمكن عشان الأسعار غالية أو ان السياح يلقون نفس هالماركات في بلادهم ونفس البضائع ويمكن عشان استغلال السلع التايلندية الجيدة والرخيصة في الاسواق الثانية..

هذي صور للسوق من الداخل وطبعاً بالجوال لان الكميرا ممنوعه

[ATTACH=full]467254[/ATTACH]

[ATTACH=full]467255[/ATTACH]

[ATTACH=full]467256[/ATTACH]

اخذنا فيه جولة تسوق وتغدينا في مجمع المطاعم داخل السوق .. وطلعنا من المكان ورجعنا للـ MBK مرة ثانية لانه كبير وفيه ادوار كثيرة وفيه سينما ويحتاج وقت طويل ..

بعدها رجعنا للفندق وريحنا بعد التسوق فترة المغرب وفي الليل رحنا للحي العربي وموقعه في شارع سوكو مفيت ورقم الشارع 3 وكان التخطيط نتمشى ونتعشى هناك ونشوف هالشارع اللي كثير ما نسمع عنه ..

وصلنا المكان وماشاء الله الخليج العربي كله هناك [ATTACH=full]796108[/ATTACH][ATTACH=full]467257[/ATTACH][ATTACH=full]467258[/ATTACH][ATTACH=full]467259[/ATTACH][ATTACH=full]467260[/ATTACH][ATTACH=full]467261[/ATTACH][ATTACH=full]467262[/ATTACH] والكل كاشخ بزي بلده يعني تشوف الثوب والشماغ والغترة ... 

حصلنا في المكان كل شي متوفر من محلات وسوق ليلي وحلاقين ومطاعم عربية وهنديه ومكاتب سياحية وغيرها ..

لكن حمدت ربي اني ما سكنت في هالمنطقة لانها زحمة وازعاج وفيها مناظر غيره جيده وبخاصة للعوائل والاطفال (بنات الليل في الشوارع) ..

بعدها طلعنا نتسوق في المحلات والسوق الليلي وصارت لنا حادثة بسيطة في المكان ..

وانا امشي ومعي المدام في السوق الليلي لاحظت شخص شكله غريب وتصرفاته اغرب وكان يمشي وراي بالضبط وانا عاد متنبه في هالامور وخاصة في الاسواق الليلية .. المهم اذا ناظرت ورا اشوفه قاعد يحوس ويدوس وشكله ما اعجبني .. قلت للمدام شوفي هالشخص ما ارتحت له تصرفاته غريبه .. بعدها طلعنا من السوق الليلي ورحنا لمطعم هندي وتعشينا وبعد العشاء رجعنا للمحلات وشفت نفس الشخص قاعد يمشي ورا أخ بحريني ويحاول يسحب شي من مخباته الخلفية وانا في هاللحظة رحت له بسرعة وصوت للشخص وهذا سمع صوتي وحط رجله وطلع معه واحد ثاني لما انتبه لحق خويه وانحاشوا وكلمت الاخ البحريني واشوى طلع مافي جيبه شي ولكنه عصب وراح يدور اللي حاول يسرقه .. انا بعدها قلت ما لنا جلسه في هالمكان واخذت تاكسي وعلى الفندق

واحذر الاخوان والاخوات من النشالين في شارع العرب او أي مكان فيه سوق ليلي وازدحام وانصحهم ما يحطون محافظهم في الجيب الخلفي او أي مكان سهل السرقة .. والاخوات انصحهم يعلقون شنطهم الخاصه على الرقبة بدل من تعليقها على الكتف .. واي شي ضروري ومهم اتركوه في السوفت بوكس في الفندق 

في اليوم التالي بعد الافطار الصباحي رحنا مشي لمجمع الباتونام لانه قريب للفندق ولايحتاج تكسي ويشبه لبضائع MBK لكن السوق عادي .. وتسوقنا فيه ورحينا في الدنكن دونات شوي وبعدها طلعنا للام بي كي نرجع بعض الاغراض ونكمل باقي الادوار .. وبعدها رجعنا للفندق وقبل لا ندخل الفندق مرينا محل للمساج واخذنا فوت مساج بـ 250 بات للساعة ورجعنا الفندق

في الليل قررنا زيارة النايت بازار واخذنا تاكسي ورحنا للمكان وهو عبارة عن محلات صغيرة وكوشكات تبيع كل شي والمكان كبير والمحلات كثيرة لكن مكتومه وكلها زحمة والاسعار غالية عشان يحسبون حساب المكاسر في السعر وبصراحه ما احب وجع الراس والمفاصل في السعر ولا طولنا في المكان ورجعنا للفندق وقبل ما ندخل الفندق مرينا مطعم حلال فيه مسلمين واكلهم حلو وفيه رز ومشاوي وكل شي وتعشينا عندهم ورجعنا للفندق عشان نجهز الشنط للسفر الى ارض الوطن ..

قبل لا اختم هذي بعض الاماكن السياحية اللي تستحق الزيارة في بانكوك ولكن لضيق الوقت ما زرناها وهي:

- السوق العائم

- دريم وورد

- ساندي ماركت

- سفاري وورلد

ومن بكره صباحاً توجهنا للمطار واقلعت الطائرة في الوقت المحدد .. مرورًا بالبحرين ثم وصلنا للرياض بسلام والحمد لله

واختم تقريري هذا ببعض النصائح لمسافرين الى مملكة تايلند 

نقاط ونصائح للمسافر الى تايلند:

• لا تنسى اذكار الصباح والمساء وخلي ذكر الله على لسانك في كل مكان .

• البلد ان شاء الله امان لكن الواحد لازم يعرف متى يطلع ووين رايح ومع مين وابتعد عن مواطن الشبهه .. يعني انت بيدك تحفظ نفسك بعد حفظ الله لك . 

• خذ علبة ماء صغيرة معك في كل مكان قدر المستطاع لان اغلب حماماتهم (تكرمون) مافيها مويه لذلك ممكن الواحد يصير له مواقف محرجه .

• انت في بلد له انظمته وقوانينه لذلك يجب احترام النظام وعدم الجدال واعكس صوره حسنه عن بلدك ودينك ..

• قبل ركوب الطائرة احرص على عدم حمل أي مادة سائلة (الكريمات ..المعجون .. الخ) في شنطة اليد واللي تتعدى 100m لانها ممنوعه وراح يصادرونها منك فلذلك اشحنها مع العفش ما عدا ما يقل عن هذه الكمية .

وفي نهاية التقرير اتمنى ان اكون وفقت في نقل تجربتي الخاصة عن هذا البلد باسلوب ممتع ومفيد .. وتضل بعض الآراء والنصائح تجارب شخصية تختلف من شخص لآخر .. مع تمنياتي للجميع بالصحة والعافية .. ورحلات سعيدة ان شاء الله

اخوكم فهد المنيع