تايلند الطبيعة الساحرة - اعتدال الأسعار - المعاملة الطيبة للسياح - النظام

[دودى]

بسم الله الرحمن الرحيم


أقدم لكم رحلتي السابقة لبلد الابتسامة والطبيعة تايلند وان شاء الله تعجبكم


في البداية كنت أفكر قبل موسم الصيف عن البلد المناسب لقضاء الإجازة وطرحت أكثر من بلد وبحثت عن طريق الانترنت عن مميزات كل بلد من طبيعة ومرافق سياحية وتسوق وغيرها.. وكم التكلفة المتوقعة ومناسبتها لميزانيتي ..

وبعد البحث ومشاورة بعض الاصداقاء استقر الرأي على تايلند لتكون وجهتي في الصيف .. لعدة أسباب من أهمها: الطبيعة الساحرة - اعتدال الأسعار - المعاملة الطيبة للسياح - النظام ..


وبدأت مرحلة جمع المعلومات وقراءة البلد من جميع النواحي قبل موعد السفر بـ 4 شهور وبعدها بديت بحجوزات الطيران وبحثت عن رحلة مناسبة خاصة ان مافيه رحلات دايركت من السعودية ... بعد البحث استقريت على طيران الخليج ( الرياض- البحرين- بانكوك) والعودة (بانكوك - البحرين – الرياض) والتوقف في البحرين ننتظر في نفس الطيارة ينزلون ركاب ويجي غيرهم ..

سعر التذكرة 2470 ريال للشخص ...بعد الحجز بديت التخطيط لتوزيع أيام الرحلة على المدن المقترح زيارتها ..


أفراد الرحلة : أنا والمدام


14ليلة (15 يوم) وزعتها كالتالي :
4 ليالي شانق ماي Chiang Mai
6 ليالي بوكيت Phuket
4 ليالي بانكوك Bangkok


الخطوة التالية هي إخراج الفيزا (التأشيرة) وحجز الطيران الداخلي والفنادق ..

الفيزا طلعتها عن طريق احد المكاتب السياحية في الرياض وسعرها 130 ريال


وهذي هي

خطة السير بتكون :

الوصول لبانكوك واخذ طيارة داخلية لشانق ماي مباشرة وبعدها طيران لبوكيت وبعدها طيران لبانكوك ثم العودة .

تم حجز الطيران الداخلي على الخطوط التايلندية (Thai)

صراحة طيران اكثر من رائع .. خدمة مميزة ودقة في المواعيد

قيمة التذكرة 1600 ريال للشخص



بعد ما انتهيت من حجز الطيران بديت في حجز الفنادق .. وكانت أهم النقاط اللي ركزت عليها هي موقع الفندق ونظافته وخدمته المميزة ويكون ضمن الفئة 4 او 3 نجوم قدر المستطاع .. وبحثت في الانترنت عن أفضل الفنادق في كل مدينة إلى أن سويت لي قائمة بأفضل الفنادق في كل مدينة وشيكت على الأسعار إلى أن توكلت على الله وحجزت الفنادق التالية :


- شانق ماي: فندق رويال برنسيس (Royal Princess) فئة 4نجوم ( 4 ليالي)

- بوكيت : منتجع موفنبيك (Movenpick) فئة 5نجوم (ليلتين) شاطئ الكارون ... فندق الهولدي ان (Holiday Inn) فئة 4نجوم شاطئ الباتونق (4ليالي)

- بانكوك : فندق بايوك سكاي (Baiyoke Sky) فئة 4نجوم (4 ليالي)

وراح اتكلم ان شاء الله عن كل فندق بالتفصيل من خلال التقرير ..


بالنسبة للفلوس أخذت معي مبلغ بالدولار وفيزا راح استخدمها في الشراء من الأسواق والمحلات الكبيرة



انطلقنا على بركة الله وتوفيقه من الرياض الساعة 6 مساءً وتوقفنا في البحرين .. والتوقف كان لمدة ساعة طلبوا منا ننزل لطيارة ثانية واستغليناها فرصة نصلي المغرب والعشاء جمع تقديم واقلعنا إلى بانكوك ومدة الرحلة 6 ساعات ونصف تقريباً وكانت الطيارة غالبيتها أوربيين وأجانب والحمد لله بعد ما أكلنا وجبة الطيارة حطيت راسي وغطيت في سابع نومه لمدة 3 ساعات

وحسيت إننا وصلنا بسرعة بعكس الرجعة اللي كانت معاناة

كان المقرر الوصول إلى مطار بانكوك الساعة السابعة صباحاً وكنت حاجز رحلة من بانكوك إلى شانق ماي في نفس اليوم الساعة 10 الصباح يعني ماله داعي أضيع لي يوم في بانكوك وأنا ابرجع لها آخر محطة خاصة ان مامعي اطفال .. المهم وصلنا متأخرين ساعتين عن الموعد المحدد

يعني مهما تحسبها صح ممكن ما تمشي معك

وبسرعة نزلنا من الطيارة

واستلمنا الأمتعة وختمنا القدوم بسهوله ويسر الحمدلله وعلى الصالات الداخلية ركض ركض

وصلنا وباقي على الاقلاع ساعة إلا ربع تقريباً وقصينا البوردنق

وفي نفس الموعد اقلعنا إلى شانق ماي على الطيران التايلندي وصراحة فرق عن طيران الخليج في الخدمة والتنظيم .. ولما اقتربنا من شانق ماي اخذت هالصورة من الجو

شانق ماي Chiang Mai

شانق ماي مدينة تقع في شمال تايلند وتعبر ثاني اكبر مدينة في تايلند وطبيعتها جبلية وتتميز بطبيعة ساحرة من جبال الى انهار وشلالات وجوها روعه .. جلسنا فيها 4 ايام ما شفنا فيها الشمس الا 10 دقايق تقريباً


بعد ما استلمنا الامتعة في مطار شانق ماي اخذنا تاكسي من المكتب اللي خارج المطار لأنه ارخص من مكاتب التكاسي اللي بالداخل وتوجهنا لفندق رويال برنسيس مقر اقامتنا وكان الجو غيم ومنعش والارض واضح عليها نزول المطر ..

وصلنا لفندق رويال برنسيس وبصراحة شكله الخارجي قديم لكن من الداخل حلو واثاثه جديد وخدمتهم جيده وأول ما وصلنا ضيفونا عصير وأعطيناهم فوشرات الحجز وبسرعة خلصوا امورنا ... واكثر شي اعجبني في الفندق موقعه .. يعني نفس ما سمعت عنه .. موقعه في قلب الحدث .. تطلع من الفندق تلقى قدامك كل شي .. محلات صرافه .. مطاعم .. كفيات .. السوق الليلي (نايت بازار) .. سوبر ماركت .. مكاتب سياحية .. يعني ما تحتاج للتاكسي ابد .. وفيه مجمع تجاري اسمه Pantip Plaza كله محلات الكترونيات واجهزة (جوالات – كميرات – اجهزة منزليه .......الخ) وموقعه اول ما تطلع من الفندق خذ الشارع يمين وبتمشي لك مسافه 200 متر تقريباً وتحصله على يدك اليمين


هذي بعض الصور لفندق رويال برنسيس..

هذا الحمام (اعزكم الله)



بعد ما ارتحنا شوي نزلنا نستكشف المكان ونتمشى شوي خاصة اننا واصلين الظهر ومعنا النهار كله .. واشترينا بعض الأغراض ورجعنا للفندق .. طبعاً الآن لازم ارتب للرحلات من بكره وكنت ماخذ رقم مكتب اسمه مهاجرين لاخوان مسلمين من تايلند مدحوه بعض الشباب في النت .. اتصلت عليهم من الفندق وسألتهم عن موقعهم وعن رحلاتهم فقالوا بنرسل لك السواق ياخذك من الفندق وفعلاً جاء السواق واخنا للمكتب وطلع خطوتين عن الفندق واستقبلنا الاخ حمزة وعطانا برنامج الرحلات اللي عنده ورشح لنا الأفضل منها واتفقنا معه على اول رحلة وهي ركوب الفيلة وركوب البامبو في النهر وركوب العربات اللي تجرها الجواميس وعروض الفيلة مع وجبة غداء ..

طبعاً هو قالنا مدامكم في النهار انصحكم تاخذون جولة في النهر اللي يمر في وسط المدينة وتشوفون معالمها وبلغنا انه قريب من هنا وقال بخلي السواق يوديكم ويرجعكم مجاناً الله يجزاه خير

توجهنا للنهر وقصينا التذاكر بـ 250بات يعني بحوالي 28 ريال للشخص ..

ركبنا قارب طويل ومعنا مجموعة من السياح ومشى في النهر بسرعة بطيئة والجميع يصور ويتفرج على المدينة وعلى الصيادين والمطاعم وبيوت الأثرياء والفنادق والجو كان غائم والهواء يالله براد الجنة وهذي بعض الصور

بعد ما يقارب الساعه وقفنا في مكان فيه مطعم صغير وقدموا لنا فواكه وعصير من ضمن سعر التذكرة واسترحنا فيه لمده 20 دقيقة تقريباً ونزل المطر ماشاء الله ، وبعدها رجعنا للمكان اللي انطلقنا منه والسماء كل شوي تمطر والجو جميل .. ووصلنا لمحطة البداية بعد ما قضينا حوالي ساعة ونصف في النهر والوقت قارب للمغرب .. ولقينا سواق مكتب مهاجرين ينتظرنا واخذنا للفندق ..


والجزء القادم بيكون فيه اول الرحلات بمشيئة الله ... لا تروحون بعيد

​

 

[دودى]

نكمل معكم اليوم الثاني من رحلتنا لشانق ماي

صحينا بدري وافطرنا في الفندق وجهزنا انفسنا للرحلة الأولى وهي عبارة عن: (عروض الفيلة-ركوب العربات اللي تجرها الجواميس-ركوب البامبو في النهر-عروض الفيلة-وجبة غداء) قيمة الرحلة 1400 بات ما يعادل 159 ريال للشخص شاملة المواصلات والغداء من 9 صباحاً الى 5 عصراً...

وفي الساعة 9 صباحاً جاء سواق المكتب وطلع حرمه

راعي المكتب الله يجزاه خير من حرصه علينا ارسل لنا حرمه مسلمه محجبه من باب احترام الخصوصية ههههه

ما يخالف لكن بنت الناس كنها تمشي على بيض

بغيت اقول لها اركبي مع المدام وانا اسوق ...


المهم مشينا والمناظر ماشاء الله حلوه والجو لطيف ..

وهذي صور من الطريق

وصلنا للموقع وكانت البداية بعروض الفيلة .. لعب كرة القدم وكرة سلة ورقص ،، والغريب ان فيلين قعدوا يرسمون لوحات تشكيلية

صراحه حلوة وعرضوها للبيع بعد ما انتهت العروض

وهذي صور لعرض الفيلة

بعد عرض الفيلة توجهنا لركوب العربات الخشبية اللي تجرها الجواميس وكانت تجربه مضحكة وممتعة في نفس الوقت والجو عليل والمناظر حلوة

بعدها وقفونا في مكان فيه محلات تبيع ملابس ومشغولات يدوية وريحنا فيه بعض الوقت

وبعدها ركبنا الفيل ..في البداية كان مخيف شوي وارتفاعه عالي لكن تجربه رائعة استمتعنا فيها وخاصة انه يمشي في غابة وبين اشجار واحياناً نتقابل مع فيل ثاني في مناطق ضيقة يعني فيه اكشن حلو ..

والسواق مقلع .. شوي يجلس على رقبته وشوي ينزل ويخلينا لحالنا

وشوي يتعلق عليه .. صراحه لعبتهم الفيل ذا التايلنديين

كنهم بعض ربعنا مع الاباعر هههههههه

بعد الفيلة ركبنا البامبو وهو عباره عن قارب من القصب يمشي في النهر وسط الجبال وبين الاشجار والجو يرد الروح .. براد ورذاذ يالله الجنه

بعدها قدموا لنا وجبة الغداء ... الله يكرم النعمة ما اكلنا منها شي

اسوء مافي تايلند الاكل ..


وبكذا انتهينا من الرحلة ورجعنا للفندق .. وفي الطريق مرينا معرض للزهور الدخول بالمجان فقلنا نتفرج شوي على بعض الزهور .. بس طلع خاص بزهرة الاوركيد وهذي بعض صور الزهور

وبكذا انتهى اليوم الاول من الرحلات واللي كان مميز وفيه تجارب حلوة والاجمل من هذا الجو اللطيف والممطر بين جبال شانق ماي الخضراء .. ورجعنا للفندق ..


في الليل يبدا النايت بازار (السوق الليلي) وهو عباره عن كوشكات تبيع الملابس والتحف والشنط والاشياء اليدويه والجلديات والماركات المقلدة وكل شي .. بس لازم تكاسرهم في السعر يعني لو قالك 500 بات قله بـ 100 بات ..

كالعادة في الليل نطلع بشكل خفيف في المنطقة المجاورة للفندق وغالباً للعشاء او التسوق وبعدها نرجع للنوم المبكر والاستعداد للرحلات في اليوم التالي ..


وهذي صور للسوق الليلي اخذتها من نافذة غرفة الفندق

وهنا راح اتوقف وترقبوا في الجزء القادم رحلة الشلالات واعلى قمة في تايلند

تحياتي للجميع

​

 

[دودى]

نكمل تقريرنا على بركة الله ..


لازلنا نستمتع بجمال الطبيعة في مدينة شانقماي وموعدنا في هذا الجزء مع رحلة الشلالات واعلى قمة جبل في تايلند​

رحلة الشلالات وزيارة أعلى قمة جبل في تايلند​

في اليوم الثاني من تواجدنا في شنقماي وبعد رجوعنا من رحلة الفيلة اتصلنا بالاخ حمزة لحجز رحلة لليوم الثاني وكانت الرحلة للشلالات وزيارة اعلى قمة جبل في تايلند مع وجبة غداء شاملة المواصلات من وإلى الفندق وسعر الرحلة للشخص 1200 بات = 136 ريال من 8.30 صباحاً الى 5 مساءً .. (الله يديم الرخص)​

وفي الوقت المحدد صباحاً انطلقنا بسيارة ميني باص وكان معنا اخ سعودي معه زوجته (صار لي معه قصه غريبة راح اقولها في نهاية الرحلة) وكان الطريق طويل يعني تقريباً مشينا 50 دقيقة الى ان وصلنا للجبل والطريق ملتوي وكل ما ارتفعنا كلما زاد الجو برودة والرذاذ ينزل باستمرار لكن متعة الطبيعة تنسيك طول المسافة .. وهذي صور من الطريق​

وصلنا لاول محطة وهي عبارة عن شلال توقفنا عندة لمدة نصف ساعة تقريباً .. اول ما تنزل يعلمك السواق الطريق ويعطيك التعليمات ويبلغك الوقت المحدد للجلوس في المكان .. ومشينا للشلال وكان قريب جداً من الموقف .. بس المشكلة ما نقدر ننزل له او نغير المكان التصوير .. يعني هم محددين مكان تشوفه عن طريقة .. المهم اخذت له كم صورة على السريع​

بعدها استمرينا في الارتفاع والطريق كله انحناءات بس المناظر جميلة وما تشوف الا اللون الأخضر .. ومع الارتفاع وصلنا للغيم وصار الطريق كله غيم والجو بارد إلى أن توقفنا في مكان وسط الغيم فيه كوفي شوب ومحل ملابس وفيه معبد بوذي وفي الجهة الثانية معبد ثاني طور البناء .. الله يهده فوق روسهم

مشكلة الجو ما يخليك تستمتع بالمكان .. تخيل انك وسط الغيم .. الرؤية غير واضحة والملابس تتبلل في ثواني رغم ان نفس السواق اللي معنا طلع لنا شمسيات لكن الجو ما يساعد ولا تقدر تصور لان الكميرات بتتأثر من الرذاذ اللي في ثواني يخلي كل شي رطب وانصح أي واحد يبي يروح ياخذ معه لو جاكيت عن البرد وشمسية .. وهذي صور توضح المكان​

جلسنا شوي في الكوفي وشربنا قهوة وبعدها كملنا الطريق باتجاه اعلى قمة جبل في تايلند ..​

الى ان وصلنا لاعلى قمه .. وهو عباره عن زي الحديقة الصغيرة تطلع لها فوق وتحصلهم حاطين فيه لوحة تبين الارتفاع ومكان للتصوير بحيث يوقف الشخص على المكان وبهذا يكون وقف على اعلى قمة في تايلند​

وهذي صور للمكان ..​

بعدها رجعنا نازلين ومتوجهين للشلال الكبير وتناول وجبة الغداء​

في الطريق توقفنا عند محلات تبيع الفواكه وبعض المشغولات اليدوية والتحف ونزلنا نتمشى فيها شوي ونشتري​

بعدها وصلنا لمكان الشلال وهو عباره عن منتزة فيه مطعم ودورات مياه (تكرمون) وشلال كبير .. .. المهم وقفنا للغداء وطلع السواق جايب معه غداء مخصوص عبارة عن رز وربيان وسلطة وفواكه والسبب ان الاكل اللي في المطعم ماهو حلال

خلصنا الغداء ولله الحمد

واخذنا الكميرا واتجهنا للشلال​

المكان روعة والشلال كبير وصوته قوي لدرجة اننا ما نقدر نوقف قدامه لان الرذاذ مالي الجو بسبب قوة اندفاع المياه وخفت لا تخرب الكميرا من المويه​

بعض الصور صورة توضح المكان والشلال ..​

بعد ما استمتعنا بالمكان وصورنا وتمشينا انتهت الرحلة ورجعنا للفندق بعد يوم ممتع استمتعنا فيه بالطبيعة في جبال شنقماي الرائعة وانصح اي شخص يزور شنقماي يزور هالاماكن لما فيها من طبيعة وجمال ..​

طبعاً سالفة الاخ السعودي اللي كان معي في الرحلة خطوة بخطوة وفي نفس السيارة واكلنا في نفس المطعم ورحنا وجينا لمدة نصف يوم .. سالفة غريبة ههههه​

بعد ما رجعت من السفر بشهر تقريباً وفي رمضان بالتحديد ... كنت انا وبعض الاصدقاء في مناسبة افطار جماعي .. وبعد ما افطرنا وقبل ما نصلي المغرب قالي واحد من الشباب انت رايح لتايلند قلت ايه وجنبه شخص ما اعرفه صراحه .. قالي الشخص اللي معه متى رايح قلت له بتاريخ كذا .. قال انا رايح في نفس التاريخ .. سألني على أي خطوط قلت الخليج قال لا انا رايح مع الاتحاد ... قلت وجهك ماهوب غريب علي .. قال انا بعد شايفك بس وين ما ادري ... واعصر ذاكرتي .. وافكر ... قلت له انت رايح رحلة للشلالات في شانق ماي ؟؟ ... قال معقول انت اللي معي في السيارة هههههه فقلت ايه بس شلون ما عرفتك على طول ... يمكن الشماغ والثوب غير الشكل .. ... سبحان الله على هالصدف .. صدق الدنيا صغيرة​

نرجع للتقرير .. .. وصلنا عند مارجعنا من رحلة الشلالات​

طبعاً في الليل عندنا السوق الليلي في شارع الفندق نتمشى فيه ونتعشى في احد المطاعم الموجودة عند الفندق ماكدونالدز .. بيتزا هت .. برقر كنق ..... الخ​

بس تعبنا من سالفة الاكل .. يعني حتى البرقر والبيتزا ما ناخذ الا مأكولات بحرية او خضار لان ذبحههم ماهو على الطريقة الاسلامية ... والله اشتهيت كبسة رز بلحم ومعها كأس لبن اخخخخ

بعد العشاء نرجع للنوم ووقت النوم غالباً من الساعة 9 إلى 10 ليلاً يعني مافيه سهر لان حلاة تايلند في النهار .. ومن صباح الله خير قايمين .. وغير كذا الرحلات متعبة لذلك انصح الاخوان اللي اقامتهم طويلة في شنقماي يخلون يوم رحلة ويوم راحة وتمشي وتسوق افضل لهم لان الرحلات مجهده ووقتها طويل ..​

اليوم الرابع من تواجدنا في شانقماي بيكون جولة في المدينة على التوك توك​

انتظرونا ..​

​

 

[دودى]

عدنا من جديد​

اليوم الرابع من تواجدنا في شانقماي قررنا ما نروح رحلات لاننا مجهدين وحبينا نريح وناخذ لفة في المدينة .. قلنا نغير من التكاسي وناخذ جولة في المدينة على التوك توك وهو عبارة عن دباب ووراه زي العربه تاخذ شخصين .. قلنا تجربة جديدة خاصة ان الجو في شنقماي روعة وغيم ومطر​

جولة في المدينة على التوك توك
في الصباح الباكر وبعد ما انتهينا من الافطار في الفندق نزلنا للشارع لقيت لي واحد معه توك توك وقلت له ابي آخذ لفه على المدينة قالي تدفع 200 بات الف بك و اوديك لمصنع الحرير ومصنع الجلديات والتحف والعسل والذهب وشغلات واجد وقال بتقعد ساعه او ساعتين او عشر بنفس السعر.. قلت له 100 بات ركبنا معك والا مشكور

... قال بـ 200 بات ... شوي الا عجوزما ادري وين طلعت لنا منه .. وتكلمه وتهوش عليه هع هع سلامات

​

طلعت امه ناطله اذنها عندنا وجت تهوش عليه وتقول خذ 100 بات لا اتوطى في بطنك خخخخ المهم وافق على 100 بات (ما يعادل 11 ريال) وركبنا​

وهذي صورة التوك توك مع الاجودي اللي ودانا​

يا حليله مغمض من زود الادب

شغل الدباب ودعس بنا والهواء يهفهف وبراد على كيف كيفك ...​

​

قعد يتمشى بنا في شوارع شانقماي وبصراحة متعة ذا التوك توك خاصة اذا كان الجو حلو وانصح زوار تايلند بتجربته وبالتحديد في شنقماي لان الجو يساعد ..​

وصلنا لمعرض الحرير وهو عبارة عن معرض كبير للحرير من ملابس ومفارش واقمشة والعاب وهدايا وبراويز واشياء كثيرة مصنوعة من الحرير ..مسوين هم حركة حلوة تفيدهم وتجذب السواح ... اول ما توصل يستقبلونك استقبال حلو ويدخلونك ويمرون بك على كل مراحل صناعة الحرير من شكل الدود في البداية الى كيفية تكوين الحرير ويورونك الآلات والناس وهي تغزل الحرير ويشرحون لك كل المعلومات من إلى ...​

وفي الاخير تدخل المعرض اللي فيه منتوجاتهم وشي طبيعي بتشتري لانك بتستحي عقب هالشروحات تطلع ما شريت هع هع​

المهم تفرجنا على منتوجاتهم وشرينا بعض الاغراض وهذي صور للمكان​

وهذي صور المعرض او الحرير في شكله النهائي​

بعدها رحنا لمعرض الذهب وهو عبارة عن صالة كبيرة فيها اشكال وانواع الذهب والفضة والألماس ونفس الطريقة يستقبلونك ويمرون بك على الذهب ويحاولون يقلبون راسك بس المشكله هنا اذا بغيت تشتري بتدفع مبلغ وقدره يعني ماهي فوطة مصنوعه من الحرير تشتريها تسكيت

هع هع والا فيل صغير مصنوع من القطن هع هع ... المهم قلت للمدام ابشري بالخير ... واخذنا فيه لفة وصراحة اسعارهم مناسبة وجيدة مقارنة بالاسعار عندنا في السعودية ...​

هذي صور لمعرض الذهب​

طلعنا من الذهب ورحنا لمحل يبيع العسل واستقبلونا استقبال مميز كعادتهم وجاء واحد يتكلم لغة عربية وقال تفضلوا ودخلنا في غرفه مكيفة وفيها طاوله وكراسي وقعد يشرح عن العسل وانواعه وقعد يذوقنا .. طبعاً انا اقدر اقوله شكراً وامسك الباب ولا يقدر يقول شي لان المسألة حرية شخصية .. لكن ماخذينها على سعة الصدر ونحاول قدر المستطاع ما نأثر على الميزانية ... المهم الرجال ذوقنا من العسل وقال انه يجي من الجبال وطبيعي جداً وبدون سكر وشريت منهم كيلو بـ 160 ريال تقريباً وبصراحه بعد ما رجعت تحسفت اني ما اخذت اكثر لجودة العسل ولرخص سعره مقارنة بالاسعار عندنا .. وهذي صور للمكان​

بعدها رحنا لمعرض الجلود وهو عبارة عن منتجات كلها مصنوعة من الجلد مثل الشنط والجزم (اعزكم الله) والاحزمة والمحافظ واشياء كثيرة​

اول ما دخلنا لقينا هالمملوح عند الباب ... شكلهم مخططين على الفرو حقه

بس ما اعجبنا المعرض والاسعار شوي غاليه فطلعنا من المكان ..​

طبعاً في هالفترة قعدت افكر في راعي التوك توك شلون ياخذ 100 بات وهو مضيع كل هالوقت واللي زاد استغرابي انه اعجبته السالفه وناوي يمر بنا على كل معارض شنقماي

هع هع !!​

اثاري المملوح ياخذ عمولة من كل معرض يمره هههههههههه

المهم ملينا وقلنا يكفي رجعنا للفندق...​

ريحنا في الفندق والعصر طلعنا لمجمع Pantip Plaza القريب من الفندق وهو خاص بالاجهزة الالكترونية والكميرات والجوالات والكمبيوترات والاجهزة الكهربائية .. بس ممنوع دخول الكميرا .. تسوقنا وشريت شنطة للكاميرات الاحترافية فيها اماكن للعدسات وجميع مستلزمات الكميرا .. وبعدها رجعنا الفندق ..​

طبعاً اليوم التالي بتكون رحلتنا لجزيرة بوكيت فقلنا نستغل باقي هاليوم وسمعنا عن شي اسمه نايت سفاري وهو عبارة عن سفاري ليلية فقلنا نحلل الليلة الاخيرة في شنقماي..​

النايت سفاري​

دقيت على الاخ حمزة (مكتب مهاجرين) وقلت له ابي اطلع سفاري الليلة وحجزت من عنده بـ 500 بات للشخص يعني ما يعادل 56 ريال وتبدأ الساعة 8.45 مساءً​

النايت سفاري عبارة عن عربات تمشي في وسط غابة فيها حيوانات كثيرة منها الاليف ومنها المتوحش ويوجهونك ما ترفع صوتك في الكلام ولا تستخدم الفلاش في الكميرات عشان ما تنزعج الحيوانات لانها مطلوقه بدون شبك او شي ... المهم ركبنا وصاروا يمرون بنا على كل نوع ويولعون بالانوار عليها ويشرحون عنها ويروحون للي بعدها وجلسنا على هالحالة لمدة ساعة او اقل شوي .. وبصراحة البرنامج اعتبره عادي جداً مقارنة بتجهيزات المكان والتنظيم الرائع .. والسبب اننا ما نشوف الحيوانات زين ولا نقدر نصور بسبب ضعف الاضاءة ومنع الفلاش يعني مكان عادي من وجهة نظري .. وهذي بعض الصور واعتذر لقلة الدقة بسبب ضعف الاضاءة في المكان ..​

بعدها قدموا لنا عروض للنوافير (ضمن التذكرة) وهي عبارة عن نوافير معها اضواء مصاحبة وتسوي اشكال والوان جميلة​

بعد انتهاء عرض النوافير مرينا معرض فيه اشياء تذكارية عن المكان وصور للحيوانات ..​

وانتهت رحلة النايت سفاري ورجعنا للفندق لتجهيز الشنط والاستعداد للسفر لجزيرة بوكت ..​

قبل ما انتقل لبوكيت حبيت اذكر بعض الاماكن اللي سمعنا عنها في شانق ماي ولا زرناها ، اما بسبب ضيق الوقت او لعدم رغبتنا الشخصية فيها لكني بذكرها عشان الجميع يستفيد من المعلومات ويبحث عنها بشكل اكبر اذا هي تستحق الزيارة او لا ..​

- قبيلة الاعناق الطويلة – شانق راي – المثلث الذهبي – المدينة العتيقة – عروض القردة والافاعي – العين الحارة​

وبكذا انتهت مدة اقامتنا في شانقماي (4 ليالي) وكانت ولله الحمد جميلة ومميزة والجو فيها رائع ومعها راح انهي هذا الجزء اللي اتمنى يكون مميز وجميل وان شاء الله نكمل رحلتنا الى جزيرة بوكيت ومافيها من رحلات بحرية وتغطيات كثيرة ان شاء الله ...​

وصلى الله وسلم على نبينا محمد​

 

[دودى]

عدنا ..



وصلنا لموعد السفر من شانق ماي الى بوكيت بعد ان قضينا فيها 4 ليالي كانت موفقه ولله الحمد ...​

بوكيت​

وصلنا بحمد لله وقوته الى جزيرة بوكيت بعد رحلة طويلة بعض الشيئ حدود الساعتين .. لبعد المسافة بين شانق ماي في الشمال وبوكيت في الجنوب ..​

جزيرة بوكيت تعد من افضل الجزر في العالم لنظافة شواطئها وصفاء مياهها وكان لها نصيب الأسد من عدد ايام الرحلة 6 ايام تقريباً وفضلت اقسمها لقسمين ..​

قسم عبارة عن ليلتين في منتجع موفنبيك في شاطئ الكارون وقسم 4 ليالي في فندق الهولدي إن في شاطى الباتونق​

الغرض من التقسيم ان المدة طويلة ومنطقة الباتونق على ما سمعت عنها انها مليانه سياح وصجه ولجه شوي فقلت اخلي يومين للاسترخاء والباقي اروح للباتونق ..​

طلعنا من المطار وتوجهنا بالتاكسي لفندق الهولدي إن مقر اقامتنا ...​

مدخل الفندق جميل .. وشكل اللوبي مميز ..​

استقبلونا الجماعة استقبال جميل كعادتهم وعطيناهم فوشرات الحجز وقالوا حظكم زين .. قلنا الحمد لله بس وش السالفه ؟؟
قالوا غرفتكم غير جاهزة الحين لذلك راح نعطيكم غرفة افضل من حجزكم واكبر ..​

قالوا انتظروا شوي الين تجهز الغرفه وودونا للكوفي وقالوا اطلبوا على حسابنا واخذنا قهوه وانتظرنا الى ان جهزت الغرفة ...​

طبعاً حجزي كان بسعر 410 ريال لليلة مع افطار
الفندق موقعه ممتاز يعني تطلع وتلقى البحر قدامك ومن الجهة الثانيه تلقى الشارع الموازي للشاطى كله محلات ومطاعم عربية ومكاتب سياحية وكل شي ..​

لما دخلنا الغرفة صراحة ما توقعناها بهالفخامة والجمال .. وحمامها تكرمون غرفة لحاله ومعها بلكونه كبيرة مطلة على المسبح .. وهذي صور الغرفة​

وهذا الحمام (تكرمون)​

وهذي البلكونه مع اطلالتها على المسبح​

ارتحنا شوي ورتبنا اغراضنا وقلنا نطلع شوي نستكشف المكان ومنها نحجز برنامج مسائي عشان نستغل باقي اليوم ونحجز حق الايام الجايه رحلات ..​

البرنامج المسائي بكل تأكيد بيكون الذهاب لعرض الفنتازيا (FantaSea) الغني عن التعريف واللي راح اتكلم عنه ان شاء الله ..​

رحت اللوبي ابشوف سعر الفنتازيا واقارنها بالسعر خارج الفندق واللي دايم ما يكون ارخص .. وطلع سعرها موحد من الشركة نفسها واخذتها بدون عشاء عروض فقط مع التوصيل ذهاب وعودة ومقاعد ذهبية بـ 1650 بات للشخص تقريباً 182 ريال تقريباً .
بالنسبة للمقاعد الذهبية هذي يكون موقعها ممتاز وفي وسط مسرح العرض .. وراح اتكلم عنها بتفصيل اذا جاء وقتها ..​

طلعنا نستكشف المكان ومرينا الشاطئ ( الباتونق) .. طبعاً نظامه العاب بحرية واكشنه وعالم زي النمل بعكس شاطئ الكارون اللي فيه هدوء واسترخاء وخالي من الالعاب البحرية ..​

لقطات من الشاطئ​

بعدها اخذت لفة في الشارع الخلفي للفندق وماشاء الله كل شي تبيه موجود ومتوفر واخذت فكره عن بعض المطاعم العربية الموجودة وعن المحلات بشكل عام .. المهم فيه مكتب سياحة وسفر في نفس هالشارع اسمه (سارة) سمعت عنه من واحد من الشباب وقالي ان صاحبه شخص اماراتي فقلت نروح نحجز منه بحكم انه عربي ومنا وفينا وناخذ راحتنا في الكلام ..
لقيت المكتب ودخلت عنده وما قصر الرجال قعد يشرح لي عن الرحلات ودردشت معه شوي وحجزت من عنده على ثلاث رحلات اللي هي :​

- رحلة الى جزيرة جيمس بوند
- رحلة الى الرافتينق
- رحلة الى جزيرة بي بي ايلاند​

شاملة السيارة من والى الفندق مع وجبة غداء وعصيرات وفواكه وماء وشاي وقهوة
واتفقنا على اوقات الرحلات ومتى تجي السيارة وغيرها .. وراح اتكلم عن كل رحلة بالتفصيل ان شاء الله ..​

وبالنسبة للمكتب للامانه زيه زي غيره يعني ماشفت فيه فرق الا انه اخ عربي بس .. وهذي صورة للمكتب​

طلعت بعدها من عنده ورحت اشتري بعض الاغراض واللي انصح الجميع بها في رحلات بوكيت ... وهي:​

• كريم واقي من الشمس للوجه وللجسم لانه في يوم واحد بيقلب جسمك اسمر وممكن تحس بحرق وحرارة في جلدك
• كاب او أي شي تغطي به رأسك من حرارة الشمس لانك بتتعرض للشمس وقت طويل في القوارب
• ملابس بحر من شورتات سباحة وبنطلونات برمودا وفوطة وشبشب
• نظارة شمسية
• كاميرا تصور تحت الماء (اذا امكن) لان فيه غوص وممكن تفيدك في الامكان اللي تتعرض فيه للماء غصب عنك .. ومثل هالنوع من الكميرات يصلح تحت الماء وللتصوير العادي بعد ..​

بعد ما رتبت نفسي للرحلات رجعنا للفندق للاستعداد للفنتازيا واللي يبدأ الساعة 9 مساءً​

عروض الفنتازيا (FantaSea Show)​

هي عبارة عن مدينة ترفيهية فيها مسرح للعروض ومحلات لبيع الاشياء التذكارية ومطعم كبير .. واللي يهمنا هي العروض ..​

هي عبارة عن عروض في مسرح مغلق وكبير .. وتحكي قصة التراث التايلندي على مر العصور وتعتمد العروض على الليزر والاصوات واستخدام الحيوانات في التمثيل مثل الفيلة والنمر والماعز والدجاج وغيرها .. وبصراحة عروض ممتعة جداً يعني فيها اتقان عجيب من قبل الانسان والحيوان والاخراج عالمي .. استمتعنا فيها وراح الوقت في غمضة عين ..​

تبدأ الساعة 9 مساءً ومدة العرض تقريباً ساعة وربع ..​

هذي بعض الصور لمكان قص التذاكر وللمكان قبل الدخول للعروض ..​

للاسف ان الكاميرا بجميع اشكالها ممنوع دخلوها للعرض ’ ويستلمون منك أي كميرا سواء فيديو او ثابت ويعطونك رقم واذا طلعت من العرض تستلم كميرتك .. حتى الاكل والشرب ممنوع تدخل به .. وتنظيمهم مميز في الدخول والخروج واستلام الكميرات ..​

بعد ما انتهى العرض طلعنا نتمشى شوي في المكان وشرينا بعض الاشياء التذكارية ولقينا الباصات تنتظرنا برا وكل شي منظم وكل شخص يتجه للباص اللي جاء معه ويشيكون على الاسماء والفنادق قبل لا تركب يعني شغل نظيف ..​

ورجعنا للفندق بعد قضاء ليلة ممتعة مع عروض الفنتازيا اللي انصح بزيارتها لاي شخص يجي جزيرة بوكيت ..​

من بكره راح تبدأ اولى الرحلات البحرية وهي رحله الى جزيرة جيمس بوند​

​

 

[دودى]

جزيرة جيمس بوند James Bond Island​

اسمها المحلي (Koh Tapu) وسميت بجزيرة جيمس بوند لان الممثل البريطاني ( Roger Moore ) صور فيها فيلم "The Man with the Golden Gun" عام 1974م فاشتهرت بهالاسم ..​

سعر الرحلة للشخص : 1700 بات (189ريال)​

انطلقنا صباحاً لرحلة جيمس بوند .. اخذنا الميني باص مع بعض السياح لموقع التجمع في الميناء ومنه تنطلق السفن للرحلات السياحية ..​

​

وصلنا واستقبلونا ووجهونا للمركب اللي بتكون عليه الرحلة وجلسنا ننتظر الين اكتمل العدد وفي هالفترة متاح لك الشاي والقهوة والماء والعصيرات .. بعدها بدا يتكلم المسؤول عن الرحلة ويشرح لنا خطة السير ويورينا على الخريطة وين بنروح وعطانا كل التعليمات عن الرحلة ​

​

وانطلقنا على بركة الله والاجواء مشمسه شوي مع بعض الغيم ​

​

وهذي صورة للسفينة من الداخل​

​

طبعاً ما يعيب الرحلات البحرية من وجهة نظري هي طول المسافة يعني لو تحسب الرحلة كاملة يمكن اكثر من نصفها في الطريق للجزر روحه ورجعه ... صحيح المناظر حلوة لكن يحس الواحد بالملل شوي .. خاصة ان الجو مشمس بشكل عام واوقات الرحلات في عز النهار ..​

المهم واحنا في الطريق مرينا ببعض الجزر الصغيرة إلى ان وصلنا للمحطة الأولى​

​

وهي عبارة عن جزيرة فيها كهوف وراح نركب القوارب المطاطية لدخول الكهوف والوصول لمنطقة في وسط الجزيرة ​

طبعاً كل قارب فيه شخص يقوده ويقدم بعض المعلومات عن الجزيرة وراكبين فقط لانه صغير وطويل عشان يساعده في دخول الكهوف ..​

توقفت السفينة وبدوا العمال ينزلون القوارب المطاطية وركبنا باتجاه الكهوف​

​

​

وهذا تبع الشركة قاعد يصور الناس عشان اذا رجعنا من الرحلة يعرضون علينا الصور مطبوعه وبالبرواز للبيع ولك الخيار في الشراء ..​

​

قعدنا نتجول في المكان صراحة طبيعة رائعة يعني جبال صخريه اشكالها غريبة وكلها اشجار​

​

وبعدها توجهنا للكهوف .. وبلغونا ننزل باجسامنا لتحت لان الالمكان ضيق وفيه ممرات السقف قريب جداً ​

​

​

بعهدها طلع المكان ظلااام واعطونا تريك مع كل قارب عشان نشوف الطريق ونشوف التكوينات الصخرية العجيبة .. ومرينا بأحجار كرستاليه تطلع انعكاسات حلوة مع الاضاءة ... بعدها طلعنا لمكان بين الجبال وتوجهنا لمكان ثاني​

​

والمكان مليان سياح من رحلات ثانية وصاير المكان كلها زحمه بالقوارب المطاطية بس كان الجو حلو بين الجميع والكل مبتسم​

​

بعدها رجعنا للسفينة وتوجهنا لجزيرة جيمس بوند​

​

وصلنا لجزيرة جيمس بوند وصراحه المكان زحمة زحمة بالسياح يعني الواحد ما ياخذ راحته في التصوير او التمشي ..​

اول ما وصلنا للمكان لقينا هالسوق الصغير يبيعون فيه اشياء يدويه وشغلات كثيرة​

​

وفيه حجر كبير منقص من الجبل شكله غريب بس ما قدرت اصوره زين من زحمة السياح​

​

وهذي صخرة جيمس بوند اللي قفز نها في الفيلم

..​

​

​

جلسنا في المكان يمكن 30 – 40 دقيقة وبعدها مشينا من المكان​

توجهنا لجزيرة ثانية وراح يكون فيها دخول في الكهوف بالقوارب المطاطية ..​

هذي صورة العمال نزلوا القوارب من السفينة​

​

مشينا لاول كهف وطلع ضيق مره وزحمه عنده ​

​

​

​

والحمد لله عدينا هالمنطقة الضيقة بس فيها متعه ومغامره ووصلنا لمنطقة وسيعه بين الجبال​

​

بعهدها طلعنا من المكان وشوفوا الزحمه في المكان ههههه​

​

وهذي صورة السواق حقنا الله يذكره بالخير .. من مواليد هالجزر اللي سكانها مسلمين يعيشون على الصيد والسياحة​

​

عدها قدموا لنا الغداء في السفينه عباره عن بوفيه بسيط فيه رز ودجاج وسمك وفاكهة ومشروبات وبعد الغداء شربنا الشاي والقهوة الى ان وصلنا للمحطة الاخيرة وهي جزيرة راح نتوقف فيها للسباحة والاسترخاء​

​

تمشينا شوي في الجزيرة .. فيها كشك صغير ودورات مياه (تكرمون) تدخلها بفلوس يعني تدفع 20 بات ويعطونك مناديل وتدخل .. لكن من جوا رايحه وطي يعني تتحسف انك دخلتها لكن ربك يعين ههههه

لقيت الشباب التايلنديين اللي معنا في القوارب يلعبون لعبة تايلنديه عباره عن كوره من الخشب يتناقلونها بينهم بالرجل بدون ما تطيح على الارض ودخلت معهم اطقطق شوي وانواع الضحك

وفي النهاية صارت رجلي حمراء هع هع ما ادري كيف يلعبون بها !!​

بعدها انتهى الوقت المحدد وركبنا السفينة ورجعنا بعد رحلة ممتعة ومنوعة ومرهقه في نفس الوقت لانها من الصبح إلى المغرب​

وراح اتوقف هنا والجزء القادم ان شاء الله عن رحلة الرافتنق في جبال بوكيت ومافيها من مغامرات وتجارب​

الى اللقاء​

 

[دودى]

نكمل معكم تقريرنا عن جزيرة بوكيت الرائعة



الرافتنق (Whitewater Rafting)​

​

الرافتنق عبارة عن ركوب الزوارق المطاطية داخل النهر وبصراحة مغامرة ممتعة جداً وراح اتكلم عنها ان شاء الله بتفصيل اكبر في هذه الرحلة​

سعر الرحلة للشخص : 1900 بات = 211 ريال تقريباً شاملة ركوب الفيلة والجواميس والدراجات النارية وركوب الرافتنق (5كيلو) مع المواصلات من والى الفندق​

انطلقنا في الصباح الباكر وبالتحديد عند الساعة 8 صباحاً .. اخذنا الميني باص الى مكان التجمع وطلعنا في باص كبير مع مجموعة من السياح الى الرافتنق وبصراحه موقعه بعيد جداً لانه يقع في شمال جزيرة بوكيت وبالتحديد في منطقة الجبال ..​

توكلنا على الله وقطعنا الطريق في اكثر من ساعة وفي هالوقت المرشدة السياحية تعطينا معلومات عن الرحلة والاماكن اللي راح نجيها ,,​

وصلنا لاول محطة وهي عبارة عن منتجع فيه بعض الفعاليات البسيطة .. بدينا بركوب الفيلة .. تاخذك في جولة بين الاشجار​

​

​

بعد جولة الفيلة رحنا لمضمار الدبابات .. تاخذ لفتين بالدباب​

​

بعدها ركوب عربة خشبية تجرها الجواميس​

​

​

​

بعدها رحنا لمكان عروض الفيلة .. يعني تسوي حركات استعراضية ومساج لبعض الجمهور​

​

​

​

هذا شاب كويتي خربها وتطوع ياخذ مساج من بين الجمهور هههه يا رب يشوف صورته في هالتقرير ​

وبعد عروض الفيلة طلعنا من المكان ورجعنا للباص عشان ياخذنا للمحطة التالية .. لكن قبل الانتقال حبيت اوضع ان الفقرة الاولى من الرحلة عادية جداً ووقتها قصير فاذا بالامكان الغاءها من البرنامج والابقاء على الرافتنق فقط يكون افضل واوفر من وجهة نظري ..​

انتقلنا للمحطة الثانية وهي الرافتنق ..​

توقف بنا الباص ووزعونا على سيارات عشان ننتقل لمكان الرافتنق لانه في مكان مرتفع وصعب الباص يوصل له ..​

وركبنا في صندوق السيارة والسواق حاط رجله ويمشي بسرعة بس الطريق حلو وبين الغابات​

​

​

وصلنا لمكان الرافتنق وهو عبارة عن نهر مليان احجار كبيرة مسوين فيه سد يحبسون المويه ويجهزون الزوارق المطاطية وكل زورق يركب فيه 4 اشخاص بالاضافه لشخصين يقودونه ويوجهون الركاب للتجديف بعد ما تجهز الزوارق يفتحون السد وتدفعك المويه في النهر وتواجه احجار تسوي لك مطبات وطوله 5 كيلو صراحة تروح في غمضة عين من متعة التجربة​

​

طبعاً يعطونك وسائل سلامه مثل الخوذة وسترة النجاة ويوفرون لك صناديق تحط فيها اغراضك وتاخذ المفتاح معك​

اول ما وصلنا للمكان شربنا بعض الشاي والقهوة والمرطبات في الاستراحة وعطونا بعض التعليمات عن الركوب وطريقة التجديف وشرحوا لنا الوضع بشكل عام ..​

​

بدوا العمال ينزلون الزوارق على جال النهر ويتأكدون من سلامتها بعدين وزعونا كل 4 في زورق وركبنا وعطونا مجاديف وتجلس على طرف الزورق وتدخل رجلك في الحبال الموجودة اسفل الزورق عشان تثبت .. ​

ويفتحون السد وتنطلق الزوارق .. يمكن في حدود الثلاثين زورق او اكثر وهذا اللي عطى التجربة متعة وحماس ونمشي بسرعة وكل حجر يصادفنا او نزله يكون فيها اهتزاز وقفز للزورق لكن الحمد لله بدون ما نطيح لان الوضع جيد والمكان ماهو بذيك الوعوره والطريق كله متعه وضحك وصراخ .... وفي نص النهر فيه استراحه مائية وسيعه ننتظر في القوارب لمدة 5 دقايق وبعدها نكمل الانطلاق وكل ناس يرشون المويه على الزورق اللي جنبهم بالمجاديف ههههه والكل يضحك ويمزح مع الثاني والطريق كله مطبات ومطافش الى ان وصلنا للنهاية وهذااجمل مافي الرحلة لان فيه متعة وتجربة جديدة ...​

ومن الاستحاله التصوير في هالمكان لانك تنزل رابص مويه وكل اهتزازات فما قدرت اصور التجربة في وقتها ..

تمنيت معي كاميرا قو برو كان قدرت اوثق المغامرة لكن خيره ان شاء الله​

بعد ما انتهينا من الرافتنق اخذونا بالسيارات لنفس المحطة اللي حطينا فيها اغراضنا ولما وصلنا لقينا وجبة الغداء مجهزه عباره عن بوفيه مفتوح ​

تغدينا وشربنا الشاي وريحنا وبعدها خذونا لشلال داخل الغابة للسباحة​

​

​

وبعد السباحه رجعونا بالسيارات للمحطة اللي فيها الباص وبكذا انتهت رحلة الرافتنق الممتعة ورجعنا للفندق قبل المغرب بقليل منهكين من الرحلة ..​

لذلك انصح اللي يروح فوكيت ومعه عدد ايام كثيرة يخلي يوم رحلة ويوم راحة لان الرحلات فيها ارهاق .. ​

حتى اذا رجعت اخر النهار تصير تعبان ولا تقدر تلف بالليل وتتمشى من التعب ..​

​

 

[دودى]

حاب اركز في هالجزء على منتجع موفنبيك واعطيه مساحة من التقرير ​

منتجع موفنبيك (Movenpick ) ذو 5 نجوم​

يقع منتجع موفنبيك على شاطئ الكارون ويبعد عن المطار 45 إلى 50 دقيقة تقريباً .. وهو عبارة عن منتجع ضخم فيه فندق على نظام الغرف وفلل واكواخ معها مسابح خاصة .. والمنتجع يحتوي على مسابح وصالة لممارسة الرياضة من اجهزة حديد ولياقة وغيرها وصالة للبلياردو وتنس الطاولة وقسم خاص بالمساج بجميع أنواعه ومطاعم وكوفي شوب يقدم جميع أنواع القهوة وموفرين فيه أجهزة كمبيوتر وانترنت بالمجان ومن الخلف تطلع من المنتجع تدخل على طول لشاطئ الكارون ..​

يعني ما يحتاج تطلع منه ابد .. لذلك خليته للاسترخاء والهدوء​

المنتجع له مدخل خاص وحرس .. والأمن في كل مكان من المنتجع لكبر مساحته ..​

سعر الليلة فيه بـ 480 ريال شاملة الافطار .. طبعاً انا ماخذ اقل مواصفات يعني غرفة عادية لا اطلاله ولا غيره .. بس معها بلكونه .. وراح افصل فيه شوي بحكم اني جلست فيه يومين
الفندق بشكل عام جميل ومريح والغرفة متوفر فيها كل شي .. وسعره برخص التراب اذا قارناه بمنتجعات الخبر او جدة ولافيه وجه مقارنة

وهذي بعض الصور للفندق والمنتجع بشكل عام ..​

​

​

​

​

​

​

وهذي البلكونة​

​

​

​

وهذي ممرات الغرف والاماكن المطله عليها​

​

​

​

وهذا اللوبي ​

​

وهذي جلسات على شكل اقفاص​

​

وهذا واحد من المسابح وفيه ملعب كرة مائية صغير​

​

وهذي صور للمنتجع وبعض مرافقه ​

مسطحات خضراء واشجار​

​

​

​

وهذي لوحات ارشادية في المنتجع ​

​

وهذي الاكواخ اللي فيها مسابح خاصة بس احجامها صغيرة ​

​

​

اذا حبيت تروح للبحر فأول ما تطلع من المنتجع من البوابة الخلفية تقطع الشارع وتحصل شاطئ الكارون يعني على بعد خطوات من المنتجع ... ​

صراحة شاطى نطيف وحلو وهادي جداً ومناسب للاسترخاء يعني مافيه العاب مائيه من دبابات بحرية وبرشوت وغيرها وممتاز للراحة والتمتع بالطبيعة والاسترخاء .. ​

وهذي بعض الصور له​

​

​

​

​

​

​

وهذي لحظة غروب على الشاطئ​

​

وهذا واحد من المطاعم في المنتجع .. وحياكم الله على بيتزا سي فود

​

​

الحمد لله على النعمة ولكن مشكلة شرق آسيا الاكل .. بجد ملينا من السي فود والخضار .. حتى الدجاج واللحم ما نقدر ناكله لان ذبحه ماهو على الطريقة الاسلامية ماعدا المطاعم العربية والاسلامية واشتقنا لكبسات الرز والطبخات الحلوة في بلدنا لكن الحمد لله على كل حال ..

​

نرجع للمنتجع وكيفية قضاء الوقت فيه .. ​

... عندك صالة الحديد واللياقة وعندك صالة البلياردو وتنس الطاولة​

​

​

​

وممكن قضاء الوقت بالسباحة او الانترنت المجاني الموجود في الكوفي شوب .. ​

وهذي لقطة وداع لشاطئ الكارون على أمل العودة في يوم ما

​

​

وبكذا انتهى هذا الجزء وان شاء الله نكمل معكم في الجزء القادم رحلة الى جزر بي بي ايلاند وتجربة الغطس تحت الماء..​

شكراً على المتابعة​

 

[دودى]

نكمل معكم التقرير

في اليوم ما قبل الاخير من بوكيت كانت رحلتنا البحرية إلى جزيرة بي بي ايلاند



جزيرة بي بي ايلاند Phi Phi Island


رحلة البي بي ايلاند ممكن تختار احد نوعين عند الحجز.. اما بالبوت السريع او بالسفينة الكبيرة

البوت السريع ميزته سرعة الوصول للجزر وبامكان البوت الاقتراب من المناطق الجبلية في الجزر بعكس السفينة الكبيرة اللي توقف بعيد شوي


السفينة ميزتها مافيه ااهتزازات ومريحه بعكس البوت اللي يهتز مع الامواج .. وبعد وسع السفينة وراحتها تعطيها ميزة

انا طبعاً اخذت البوت السريع لان بطىء السفن يجيب الملل في الرحلات واخذت من ضمن الحجز عدة السنوركل للغطس (سنوركل زعانف وقصبة ونظارة) والتذكرة شاملة وجبة غداء مع الماء والمرطبات والفواكه والمواصلات من والى الفندق من 8 صباحاً الى 5 مساءً وقيمة التذكرة : 1900 بات = 211 ريال تقريباً


في الساعة الثامنة صباحاً مرنا الميني باص واخذنا من الفندق لمكان التجمع عند احد الشواطئ

اجتمعنا في كوفي وبدت تعطينا المسئولة عن الرحلة التعليمات والأماكن اللي راح نزورها وبعدها عرضوا عدة الغطس للي يبي يستاجر منهم وقيمتها 200 بات .. طبعاً انا دافعها من ضمن التذكرة لذلك اخذتها بدون دفع أي مبلغ


وركبنا البوت ورتبونا بحيث يكون البوت متوازن من ناحية الوزن في كل جهة وانطلقنا على بركة الله ..

الرحلة غالبيتها خليجيين يعني اللغة العربية هي اللي سادت الرحلة

وبعد تقريباً 30 دقيقة وصلنا للمحطة الأولى وهي عبارة عن منطقة بين الجزر مياهها صافيه وبامكانك تشوف السمك وكل شي داخل الماء

وفي المكان كهف كان مسكون من قبل الصيادين وفيه بقايا آثار السكان

تجولنا في المكان وكان رائع واكثر شي شدنا هي صفاء مياه البحر في هالمنطقة

بعدها انتقلنا لجزيرة ثانية فيها شواطى رائعة ومناسبة للسباحة ... وصلنا للشاطئ ولقيناه مليان سياح ....

وهو نفس الشاطئ اللي صور فيه الممثل الامريكي ليوناردو دي كابريو فيلمه الشهير (The Beach)

يتميز الشاطئ بصفاء مياهه ومناسب للسباحة

سبحنا في الشاطئ واستمتعنا بالمكان لولا حرارة الشمس ..



بعدها انتقلنا للمحطة الثالثة وهي للغطس ووصلنا للمكان .. مياه صافية ويتميز بوجود الحياة البحرية في الاسفل من نباتات واسماك واشكال غريبة ما تمنيت الا ان معي كميرا تصور تحت الماء عشان انقل لكم المناظر ..


وصلنا المكان واعطونا عدة الغطس وبدينا نجهز انفسنا ونلبس واعطونا تنبيهات وتوجيهات للمكان ... والوقت راح يكون نصف ساعة او اكثر شوي

العدة هي (سنوركل زعانف وقصبة ونظارة وسترة نجاه *حسب الرغبه)

طبعاً اللي ما يبي يغطس يجلس في البوت يتفرج




بسمك يا رحيم

تقريبا عمق الماء حوالي 4 او 5 امتار تقريباً لكن من صفاء الماء تشوف كل شي تحت من مخلوقات بحرية غريبة والاسماك تلعب قدامك وحواليك ..

بعدها انتقلنا لآخر محطة وهي عبارة عن جزيرة شواطئها نظيفة ومناسبة للسباحة وفيها فنادق ومحلات
ومطاعم ..

طبعاً مقرر اننا نتناول فيها الغداء ونجلس فيها لاكثر من ساعة ..

صراحه لقينا زحمة سياح من كل شكل ولون ..

اول ما وصلنا وجهنا لمطعم ووزعونا على الطاولات وقدموا لنا الغداء عبارة عن رز وسمك وبعض المأكولات المنوعه


تغدينا وشربنا الشاي وبعدها اخذنا جوله في المكان

وفيها كراسي مضللة تستخدمها بالايجار الكرسي بـ 100 بات

جلسنا نسترخي ونستمتع المكان

وبعدها انتهى الوقت المحدد وتجمعنا وركبنا البوت ورجعنا للفندق بعد رحلة ممتعة وفيها كثير من التجارب الحلوة مثل الغطس والتمتع بالسواحل والشواطئ اللي قليل نشوف مثلها من ناحية النظافة والصفاء ..


وبعد ما رجعنا رتبنا انفسنا للسفر بكره لبانكوك​

 

[دودى]

بانكوك

تم الاستعداد للسفر الى بانكوك لقضاء آخر 3 ايام من الرحلة واللي اتفقنا على انها بتكون للتسوق فقط لعدة اسباب ...

اول شي الوقت قليل ولا يكفي للتمشي والتسوق وثاني شي احنا متشبعين من الرحلات السياحية وآخر شي رخص اسعار الملابس في بانكوك يعني لازم نستغل اسواق بانكوك للتسوق منها قدر المستطاع

اقلعنا من فوكيت الظهر متوجهين الى بانكوك ووصلنا ولله الحمد واخذنا تاكسي من المكتب خارج المطار وكانت وجهتنا الى فندق بايوك سكاي

والطريق زحمة وشوارع بانكوك بشكل عام فيها زحمة سير بعكس المدن الثانية

فندق بايوك سكاي (Baiyoke Sky ) فئة 4 نجوم

الفندق يقع في برج عالي ( THAILAND'S TALLEST TOWER ) يوجد فيه محلات تجارية وفندق ومطاعم من ضمنها مطعم يعتبر الاعلى في تايلند ويقع في الدور 78 واللي راح يكون فيه الافطار اللي من ضمن حجزنا

بالنسبة للفندق اعتبره عادي جداً من ناحية الاثاث والخدمة وموقع الرسبشن يختلف عن باقي الفنادق اللي تكون في المدخل الارضي .. هذا لازم تطلع له بالمصعد واذا جيت تطلع للغرفة تروح لمصعد ثاني .. وصايره المصاعد زحمة اللي طالع واللي نازل يعني الموضوع مزعج في الدخول والخروج .. لكن مايميز الفندق من وجهة نظري هو موقعه المييز لانه في وسط بانكوك وكل المشاوير اللي نروحها بالتاكسي تكون قريبة ولا تكلفنا شي يعني اغلب مشوايرنا اقل من 10 ريال سعودي ... ويميزه بعد الاطلالة الحلوة على مدينة بانكوك

سعر الليلة 350 ريال شاملة الإفطار

وهذي بعض صور الفندق

وهذي اطلالة نهارية وليلية من نافذة الغرفة

طبعاً الهدف من جلوسنا في بانكوك هو التسوق فقط لضيق الوقت ولرخص الأسعار في بانكوك وخاصة الملابس ..


بعد ما ارتحنا شوي نزلنا نستكشف المكان بجانب الفندق .. ولقينا أسواق صغيرة للملابس أخذنا فيها جولة تسوق إلى المغرب وبعدها تمشينا في الشوارع المحيطة للفندق والمنطقة حيوية فيها كل اللي يحتاجة السائح من اسواق ومطاعم ومحلات تدليك بالاضافة لسوق ليلي صغير بجانب الفندق على شكل كوشكات يباع فيها الاشياء المقلدة من ملابس وشنط وساعات وغيرها .. وفيه كذلك المشغولات اليدوية والتحف واشياء كثيرة لكن زحمة وازعاج ولا تاخذ راحتك في التسوق ..

بعدها رجعنا للفندق ورتبنا امورنا للتسوق في اليوم التالي

في اليوم التالي من الصبح توجهنا لطوكيو سنتر والحقيقة توقعت انه مركز تجاري ضخم ولكن طلع متجر كبير للملابس ولكنه مميز ومنوع واسعارهم جيده الى متوسطه واخذنا فيه جولة تسوق واشترينا بعض الملابس ..

بجانب طوكيو سنتر سوق آخر اسمه MBK وهو عبارة عن سوق من عدة ادوار وكل دور يختص بنوع معين من البضائع ... مثلاً دور للملابس ودور للشنط والاحذية ودور للالكترونيات ودور للتحف ودور للاجهزة الكهربائية ..... الخ

صراحه من اجمل الاسواق في بانكوك يعني ميزته انه منوع واسعارهم رخيصة الى متوسطه وخاصة في الملابس ويحتاج وقت طويل عشان تلفه وتشوف كل الادوار

احنا لفيناه الين تعبنا وكملنا من بكره ... وانصح أي شخص يزور بانكوك لغرض التسوق زيارة الـ MBK ..

راح انزل لكم كم صورة اخذتها بالجوال لاني واجهت مشكلة في الاسواق وهي منع دخول الكميرا للسوق لذلك اعتذر منكم لقلة الصور في هذا الجزء

وعلى فكرة لازم تكاسر وتفاصل في السعر اذا جيت تشتري ... وبالنسبة للملابس غالبيتها تايلندية الصنع يعني ما تقارن ببعض الماركات العالمية لكن الخامات جيدة وخاصة للطلعات العادية او ملابس البيت او حتى المناسبات .. وفيه اشياء بعد جودتها عالية


بعد ما اخذنا عدة ساعات في هالسوق المميز واشترينا اغراض وملابس طلعنا لسوق ثاني اسمه بوبي او بوبوي وطلع سوق يبيع بالجملة ومناسب للتجار واصحاب المحلات وطلعنا منه لانه ما يناسبنا ..


وبعدها رحنا على مجمع سيام وهو قريب من الـ MBK وتصميمه مميز وكله ماركات عالمية غالية السعر زي اللي عندنا في الخليج .. ولاحظنا عدد المتسوقين فيه قليل مقارنه بطوكيو سنتر والـ MBK يمكن عشان الأسعار غالية أو ان السياح يلقون نفس هالماركات في بلادهم ونفس البضائع ويمكن عشان استغلال السلع التايلندية الجيدة والرخيصة في الاسواق الثانية..
هذي صور للسوق من الداخل وطبعاً بالجوال لان الكميرا ممنوعه

اخذنا فيه جولة تسوق وتغدينا في مجمع المطاعم داخل السوق .. وطلعنا من المكان ورجعنا للـ MBK مرة ثانية لانه كبير وفيه ادوار كثيرة وفيه سينما ويحتاج وقت طويل ..



بعدها رجعنا للفندق وريحنا بعد التسوق فترة المغرب وفي الليل رحنا للحي العربي وموقعه في شارع سوكو مفيت ورقم الشارع 3 وكان التخطيط نتمشى ونتعشى هناك ونشوف هالشارع اللي كثير ما نسمع عنه ..

وصلنا المكان وماشاء الله الخليج العربي كله هناك

والكل كاشخ بزي بلده يعني تشوف الثوب والشماغ والغترة ...

حصلنا في المكان كل شي متوفر من محلات وسوق ليلي وحلاقين ومطاعم عربية وهنديه ومكاتب سياحية وغيرها ..

لكن حمدت ربي اني ما سكنت في هالمنطقة لانها زحمة وازعاج وفيها مناظر غيره جيده وبخاصة للعوائل والاطفال (بنات الليل في الشوارع) ..


بعدها طلعنا نتسوق في المحلات والسوق الليلي وصارت لنا حادثة بسيطة في المكان ..

وانا امشي ومعي المدام في السوق الليلي لاحظت شخص شكله غريب وتصرفاته اغرب وكان يمشي وراي بالضبط وانا عاد متنبه في هالامور وخاصة في الاسواق الليلية .. المهم اذا ناظرت ورا اشوفه قاعد يحوس ويدوس وشكله ما اعجبني .. قلت للمدام شوفي هالشخص ما ارتحت له تصرفاته غريبه .. بعدها طلعنا من السوق الليلي ورحنا لمطعم هندي وتعشينا وبعد العشاء رجعنا للمحلات وشفت نفس الشخص قاعد يمشي ورا أخ بحريني ويحاول يسحب شي من مخباته الخلفية وانا في هاللحظة رحت له بسرعة وصوت للشخص وهذا سمع صوتي وحط رجله وطلع معه واحد ثاني لما انتبه لحق خويه وانحاشوا وكلمت الاخ البحريني واشوى طلع مافي جيبه شي ولكنه عصب وراح يدور اللي حاول يسرقه .. انا بعدها قلت ما لنا جلسه في هالمكان واخذت تاكسي وعلى الفندق

واحذر الاخوان والاخوات من النشالين في شارع العرب او أي مكان فيه سوق ليلي وازدحام وانصحهم ما يحطون محافظهم في الجيب الخلفي او أي مكان سهل السرقة .. والاخوات انصحهم يعلقون شنطهم الخاصه على الرقبة بدل من تعليقها على الكتف .. واي شي ضروري ومهم اتركوه في السوفت بوكس في الفندق


في اليوم التالي بعد الافطار الصباحي رحنا مشي لمجمع الباتونام لانه قريب للفندق ولايحتاج تكسي ويشبه لبضائع MBK لكن السوق عادي .. وتسوقنا فيه ورحينا في الدنكن دونات شوي وبعدها طلعنا للام بي كي نرجع بعض الاغراض ونكمل باقي الادوار .. وبعدها رجعنا للفندق وقبل لا ندخل الفندق مرينا محل للمساج واخذنا فوت مساج بـ 250 بات للساعة ورجعنا الفندق

في الليل قررنا زيارة النايت بازار واخذنا تاكسي ورحنا للمكان وهو عبارة عن محلات صغيرة وكوشكات تبيع كل شي والمكان كبير والمحلات كثيرة لكن مكتومه وكلها زحمة والاسعار غالية عشان يحسبون حساب المكاسر في السعر وبصراحه ما احب وجع الراس والمفاصل في السعر ولا طولنا في المكان ورجعنا للفندق وقبل ما ندخل الفندق مرينا مطعم حلال فيه مسلمين واكلهم حلو وفيه رز ومشاوي وكل شي وتعشينا عندهم ورجعنا للفندق عشان نجهز الشنط للسفر الى ارض الوطن ..

قبل لا اختم هذي بعض الاماكن السياحية اللي تستحق الزيارة في بانكوك ولكن لضيق الوقت ما زرناها وهي:

- السوق العائم

- دريم وورد

- ساندي ماركت

- سفاري وورلد



ومن بكره صباحاً توجهنا للمطار واقلعت الطائرة في الوقت المحدد .. مرورًا بالبحرين ثم وصلنا للرياض بسلام والحمد لله



واختم تقريري هذا ببعض النصائح لمسافرين الى مملكة تايلند

نقاط ونصائح للمسافر الى تايلند:

• لا تنسى اذكار الصباح والمساء وخلي ذكر الله على لسانك في كل مكان .
• البلد ان شاء الله امان لكن الواحد لازم يعرف متى يطلع ووين رايح ومع مين وابتعد عن مواطن الشبهه .. يعني انت بيدك تحفظ نفسك بعد حفظ الله لك .
• خذ علبة ماء صغيرة معك في كل مكان قدر المستطاع لان اغلب حماماتهم (تكرمون) مافيها مويه لذلك ممكن الواحد يصير له مواقف محرجه .
• انت في بلد له انظمته وقوانينه لذلك يجب احترام النظام وعدم الجدال واعكس صوره حسنه عن بلدك ودينك ..
• قبل ركوب الطائرة احرص على عدم حمل أي مادة سائلة (الكريمات ..المعجون .. الخ) في شنطة اليد واللي تتعدى 100m لانها ممنوعه وراح يصادرونها منك فلذلك اشحنها مع العفش ما عدا ما يقل عن هذه الكمية .

وفي نهاية التقرير اتمنى ان اكون وفقت في نقل تجربتي الخاصة عن هذا البلد باسلوب ممتع ومفيد .. وتضل بعض الآراء والنصائح تجارب شخصية تختلف من شخص لآخر .. مع تمنياتي للجميع بالصحة والعافية .. ورحلات سعيدة ان شاء الله



اخوكم فهد المنيع​