وطلعنا من الهضبه ورحنا مجمع غورنيه
ماادري ليه ماصورت من الخارج
تمشينا فيه شوي وتعشينا
ولابد من الحلى
وعندهم انواع ايسكريمات عجيبه
وهذا الذي لايقاوم (خصوصا ان عندهم نكهات كثيره)
وبالرغم من كثرة النكهات الا ان الطلب مايتغير هنا او هناك (واحد بالجبن وواحد بالنوتيلا)
ورجعنا الفندق وسالنا السيكيورتي حق الفندق ..فيه مغسله ثياب؟ قالوا فيه بس مسكره ذا الحين.. وقال واحد واقف جنب السكيورتي عطها الاستقبال وهم يودونها .. سالت الاستقبال؟؟ قال فيه مغسله... طيب اعطيك الثياب ذا الحين؟؟ قال المشكله مااقدر ارسلهم الا الصباح ..طيب ومتى يخلصون؟؟ قال ثاني يوم بيخلصون.. وللاسف ثاني يوم حنا بنمشي الكاميرون .. قلت لا خلاص
وبكذا انتهى اليوم الخامس
اليوم السادس في الرحله (يوم التسوق)
توجهنا بعد الفطور الى شاطى باتو فرينجي .. ولله الحمد صار مطر وهواء قوي نزلت اسألهم عن النشاطات ؟؟ قالوا الطيران بالشراع وبالقارب اللي يسحبك موقف بسبب الهواء.. ممكن اذا ركد الهواء بعد ساعه او ساعتين يرجعون يشتغلون وقالوا هذا النشاطات الموجوده
قلنا خلنا نروح محل القهوه ووجهنا النفيقيتور ووصلنا للاسف الى مكان غلط
لانه ماعندي الاحداثيات الصحيحه... كل اللي عندي من بحث عن طريق جوجل ..وبعضها مش مضبوط.. المهم مشينا وكان المطر لازال قوي جدا وهواء قلنا مالك الا المجمعات... ورحنا مجمع فريست افينيو اللي في جورج تاون
... وتمشينا فيه وشرينا شنط من ماركة بونيا عليهم خصم.. بس انا ماكنت اخذت معي الا خمس ميه او اكثر بشوي.. وحنا شارين اربع شنط ب٢٠٠٠رينجت ... شرينا الوحده ب500 رينجت تقريبا ...وهنا سعرهم ب1000 ريال تقريبا... طبعا الاسعار مش بالضبط تقريبا ... ف ماكان معي المبلغ وقلت للبائعه خليهم هنا انا نسيت المحفظه بجيك بعد ساعه او ساعتين لين اخلص وبجي.. قالت اوكيه.. وحنا نتمشى داخل المجمع شفنا مدخل للمجمع اللي جنب الافينيو .. مجمعين مربوطين بجسر ..ودخلنا فيه.. نسيت اسم المجمع ..بس كان مثل السوق الصيني اللي في دبي .. بس انه فيه ادوار مش زي السوق الصيني ممتد
... ولان اغلب اللي يبيعون فيه صينيين او كوريين شبهته بالسوق الصيني .. المهم وبضاعتهم مقلده ورخيصه.. جدا يعني بعشره وبخمسه واقل واكثر.. تمشينا فيه وشرينا منه اشياء من ثنتين الظهر الى ست ونص المغرب او اكثر وحنا نلف في ذاك المجمع.. ورجعنا للسياره بعد معاناه عن كيفية الوصول لها.. لانه طلعنا من مجمع ودخلنا في مجمع ومن المجمع الثاني الى المجمع الثالث وكلهم مربوطين بجسر ... اتوقع اساميهم افينيو وباسيفيك و.. ماش نسيتهم المهم تعدل الجو .. بس خلاص مافيه وقت نروح شاطى باتو فرينجي قلنا خلنا نروح السوق الليلي وهو اصلا جنب باتو فرينجي بس شفنا الساعه وصلت ثمان وشوي... قلنا هاه؟؟.. هاه؟؟؟ خلاص كنسل.. اصلا السوق الليلي مش ذاك الزود... على حسب الوصف ان كله اكل... قلنا خل نتعشى..!! وحصلنا مجمع مطاعم وبينهم مطعم عربي
قلنا نطلب منه ودخلنا حتى المواقف اللي للمطاعم بفلوس المهم طلبنا منه..
غالي شوي..
والطعم مش ذاك الزود بس يمشي حاله... ورجعنا للفندق
ونمنا بعدما جهزنا الشنط واستعدينا للانطلاق الى الكاميرون
وشفت راعي تاكسي وجلس يسولف معي.. يقول لي ليش جيت من هذا الطريق؟؟!!
انت تقريبا زدت على نفسك تقريبا ستين كيلو ...
هذا الطريق للي جاي من كوالالمبور ...وذاك اللي جاي من بيننانج...
(يعني وين اذنك ياحبشي
) قلت انا ماادري
معتمد على الله ثم على النفيقيتور ومشينا بعده وقلنا خلنا نوجه النفيقيتور الى مزرعة الفروله ممكن انها على الطريق او اقرب من الفندق!!.. بس طلعت قريب الفندق.. قلنا خلنا نروح على فندقنا... واستلمنا الفندق...
الحاره شوي قديمه بس مش اقدم من جورج تاون والفندق قديم اثاثه قلنا كلها ليله والفندق سق وكتبت عنه تقرير منفصل هنا http://www.arabtrvl.com/vb/t986.html
وقبل ادخل استلم الفندق ...معنا ثيابنا... المفروض نوديهم المغسله.. ولان جنب الفندق مغسله... قلت خلني اوديهم قبل اروح اي محل.. وسالتها ذا الحين الساعه ٢ الظهر ..متى يخلصون الثياب؟؟ قالت لي ست المغرب.. حلو
شوي واجيبهم لك ..وجبتهم بعدما استلمت الفندق... وعطيتهم اياهم ...ووزنتهم.. قالت لي سته كيلو... قلت اوكيه بكم ؟؟؟قالت لي ب١٢ رينجت.. قلت اوكيه
ووجهنا النفيقيتور الى حديقة الفروله.. وشفنا في وجهنا حديقة الزهور ..!!قال الدخول بفلوس.. اما حديقة الفروله ببلاش... قلنا حنا جايين عشان الفروله...
ودخلنا وتمشينا وصورنا
ورق عنب
وشفنا ان حنا نقدر ندخل حديقة الزهور من حديقة الفروله ببلاش..
ودخلنا وصورنا شوي
وبعدها رجعنا من نفس الطريق على مزرعة الفروله عشان ندخل المحل اللي يبيع منتجات الفروله..
وكل شي عنده بنكهة الفروله تقريبا .. وسألناهم .. نقدر نقطف فروله ؟؟ قال ايه تقدر .. بس ذا الحين لا ..!! ليه؟؟ قال : لان الفروله لسه صغير .. اذا تبي تقدر تشتري من عندنا ..
بصراحه النزول الى مكان الشلال والصعود مرة اخرى متعب .. بس يستاهل
المهم
بعدها رجعنا الى المحل اللي يبيع انواع الشاي
كاسات للذكرى
وتنفع كهدايا
ورجعنا بعدها للفندق ورحت المغسله اخذت الثياب
وكان حوالي الساعه السادسه مساء.. وقبل النوم.. قلنا ندخل كنتاكي اللي كان قريب من الفندق .. رحنا له مشي.. وتعشينا ..ورجعنا الفندق نستعد نمشي الى كوالالمبور ثاني يوم
اليوم الثامن
مشينا ووجهنا النفيقيتور الى جنتنج وللاسف كانت غلطه
اول شي تاخرنا شوي في الطلعه من الفندق يعني طلعنا تسع ونص الصباح... طيب مو مشكله.. المسافه ٢٠٠ كيلو.. يعني ساعتين.. بس هذا اذا كان الطريق عادي
بس طريق الكاميرون ملتوي مثل الحيه ومرتفعات يعني السرعه القصوى ٤٠ هذا في احسن الحالات
خذنا في ذاك الطريق اكثر من ثلاث ساعات ووقفنا شوي نبي نشتري عسل وغيرنا رأينا شكينا في مصداقيتهم.. وانا مش ذاك الاهتمام في العسل
وشفنا حديقة الفراوله في الطريق بس كانت مسكره
وبنتي شوي قامت ترجع من ذاك الطريق واللفات
وواجهتنا بوابه في الطريق
طيب والشي الثاني طلعت جنتنج نفس طريق الكاميرون كله تعرجات بس احسن شوي واوسع شوفوا النفيقيتور كيف الطريق صاير
وضباب .. ياحبيبي...
يعني بياخذ وقت طويل بسبب اللفات والمرتفعات ...
ماوصلنا الا ثلاث الظهر تقريبا .. ولاتنسى تصور الموقف
العابهم حلوه جدا ورخيصه .. يعني تشحن البطاقه بخمسين .. تزهق ماخلصتها .. وتقدر تسترجع المبلغ اللي ما لعبت فيه
ودخلنا القريه الثلجيه
قصينا التذاكر
ودخلنا وقالوا لنا ممنوع التصوير داخل
وطلعنا من جنتنج بدري بسبب كنا نبغى ندخل كوالالمبور في النهار ... وقلنا وحنا طالعين بندخل القريه الفرنسيه بس للاسف مسحت الاحدثيات بالغلط ... وحنا طالعين بعد كانت حديقة الفروله مسكره ... بالعربي صحيح دخلنا جنتنج وعجبتنا.. بس فوتنا اشياء كثيره على الطريق.. وزيارة جنتنج كانت سريعه .. ماعطينها حقها .. المهم دخلنا كوالالمبور
وكانت الخريطه مش محدثه.. وفيه طرق جديده مش موجوده على النفيقيتور .. ضيعنا شوي.. بس وصلنا..
ودخلنا الفندق وشيكنا على الغرفه ولا قلنا ان حنا عندنا حجز .. كنا خايفين ان الفندق مايعجبنا ... قلنا اذا عجبنا والا بنكنسل الحجز
المهم عجبنا وقلنا لهم حنا عندنا حجز وقامت اللي في الاستقبال تعوج في فمها كأنه مش عاجبها اللي سويناه (بس بصراحه استقبالهم حلو .. انا انصح بالفندق)
وهذا تقرير عن الفندق http://www.arabtrvl.com/vb/t1042.html
المهم دخلنا.. ودخلنا الاغراض وطلعنا نتمشى حول الفندق اللي كان مقابل التايمز سكوير وكان فيه مجمع رخيص الظاهر اسمه سوانج (عندي له صوره بعدين احطها ان شاء الله )شرينا شغله سريعه ورجعنا.. قلنا يبغى له نجي له مره ثانيه.. وحنا راجعين دخلنا مطعم القلعه
اليوم التاسع (بوتراجايا + تسليم السياره في المطار+شلال تمبلر+تسوق)
طلعنا بعد الفطور في الفندق
بصراحه كان جيد فيه تنوع بسيط وطعمه حلو
وجهنا النفيقيتور الى المطار اللي خذت احداثياته من هذا المنتدى وحنا فالطريق شفنا اسهم تؤدي الى بوترجايا قلنا خلنا نروح نلف فيها شوي احسن من ان حنا نروح لها بتاكسي ورحنا
ونزلنا على البحيره (بس ماادري وين راحت صورها ) المهم ودخلنا المسجد
وطلعنا على المطار وعلى اللوحات الى المطار وشفنا لوحات السيارات الاجار واتبعت اللوحات لين وصلت مواقف السيارات الاجار ودخلت
وشفت كل مكتب وله مواقف خاصه .. ووقفت السياره في مواقف الشركه الخاصه فيها اللي هي (مكتب هواك).. وجلست اشيك على اغراضي تشييك اخير .. الا وجاء صاحب مكتب التاجير .. وعطيته المفتاح .. وسالته عن التكاسي؟؟ وقالي هنا فالمبنى الثاني؟؟ كلها خطفت شارع .. وقبل اروح قلت خلني اشيك على برنامج ماي تاكسي بكم المشوار..!!
(الا صحيح وين صاحب البرنامج؟؟ .. العدني.. كأني فاقده) المهم وعلى اني بروح شلال تيمبلر .. وشفت المشوار ب٦٠ الى ١٠٠ رينجت.. والمسافه حول السبعين كيلو.. قلت حلو ورحت واخذت من تكاسي المطار ... وقالي المشوار على العداد ... والتكلفه تقريبا من سبعين الى ثمانين رينجت .. قلت اوكيه ماشي.. ومشينا وحسيت على وجهه علامة الضياع ..!! وقالي شرايك تروح الصنواي لاقون؟؟ تراها قريبه من الشلال.. قلت له الوقت متاخر .. بروح لها يوم ثاني.. وضيع وشغل النفيقيتور على جواله.. وقالي معليش ضيعت... وطيب كم باقي على الشلال؟؟ قالي اربعين كيلو .. ومشينا وطولنا على ما وصلنا.. بعدما وقف يسال كم واحد لين وصلنا.. واشوف العداد وصل ١٠٠ رينجت.. ودخلنا وقال بنتظركم .. قلت بكم بتنتظرنا؟؟ قال على العداد... قلت طيب.. ودخلنا ولا ارتحنا اذا هذه اللوحه في البدايه وين ترتاح
لوحه تقول انتبه من النشالين
المهم دخلنا
وشفنا القرود تتمشى جنبنا
وكملنا طريقنا
وكان فيه واحد عنده حيه وببغاء تصور معهم تركناه وكملنا المشوار ..
مش طويل كثير بس انتبه لأغراضك
ماطولنا لان الهنود كثير هناك .. يخوف شكلهم.. طلعنا على طول
وركبنا التاكسي واشوف العداد وصل ١١٢ رينجت ..!! وقلت له ودنا عند ميد فالي.. مجمع هو قالنا عليه.. وراح وعبى غاز للسياره (اول مره اشوف تعبئة الغاز للسياره .. وأول مره ادري انها من الكبوت)
وصلنا عند ميد فالي والعداد وصل ١٥٠ ..!! قالي ب١٧٠ ..!! قلت شلون؟؟ قال البوابات.. وماادري وش قال.. قلت له والوقت اللي ضيعته وانت ضايع؟؟ قال لا انا ماضعت.. هو على الطريق .. قلت له لا.. انت ضعت.. مش على الطريق.. انت ضيعت الطريق .. وشغلت النفيقيتور ورجعت.. قالي نفس الطريق... قلت له انت ضيعت.. وهذي غلطتك.. تبيني ادفع لك على غلطتك.. واتحمل غلطتك.. هذي غلطتك انت تتحملها.. قال طيب عطني اللي على العداد 150 رينجت ..قلت بعطيك مع اني المفروض مااعطيك.. بس انا بعطيك وعطيته ١٥٠
ودخلنا المجمع اللي يقول عنه راعي التاكسي فيه محلات رخيصه وفيه غاليه.. سالنا مكتب المعلومات .. ان راعي التاكسي يقول فيه محلات رخيصه ومحلات غاليه في ذا المجمع واللي اشوفه في ذا المجمع كلها ماركات..!!؟؟ قال ايه الغالي في المجمع اللي جنبه وهنا الرخيص...
قلت هاااااه ذا الماركات ورخيص اجل وش موجود هناك؟؟ قال شانيل ولوريل وتوابعها.. قلنا طيب مشينا .. وين المترو؟؟ قال الجهه الثانيه.. وحنا ماشين حصل محل يبيع الروتي وشرينا
واستخدمنا المترو ب واحد رينجت للشخص (مع اني مستخدم المترو في اوربا واعرف نظامه ولله الحمد) بس شوي تبهدلنا معه.. لان تغيير المترو بصراحه يبهدل شوي.. لان تغير المترو لازم تنتقل من مبنى الى مبنى.. بالرغم من انه رخيص ... بس زحمه.. ونزلنا على بوكيت بونتانج... ونزلنا عند مجمعنا اللي امس (سوانجي وانج)
وتمشينا شوي
وتعشينا
وهذا الشي لابد منه (روتي)
ورجعنا الى الفندق نستعد لليوم الثاني
وبكذا انتهى اليوم التاسع
السوق الصيني او الحي الصيني كنت اتوقعه احسن من كذا .. يعني توقعه مثل السوق الصيني اللي في دبي .. بس للاسف كان صغير .. تقريبا مسافة 250 متر او اكثر بشي بسيط ولا هو بذاك المستوى المهم كان قريب من الفندق.. وصلنا التاكسي ب خمسه رينجت.. طبعا فيه اشياء رخيصه تنفع للي يبغى يشتري هدايا.. وبغينا نرجع الفندق.. ووقفنا تاكسي وادري انه قريب بفضل الله ثم برنامج التاكسي .. وقالي راعي التاكسي بعشره قلنا اوكيه ورحنا الفندق ريحنا شوي .. وطلعنا نتمشى لشارع العرب.. ودخلنا مجمع فهرنهايت
وشفنا كم مجمع على طريقنا بس مادخلناهم كلهم
ودخلنا البافليون
وشرينا من محل باركسون شنطتين ب١٠٠٠ رينجت من ماركة بونيا.. نفس اللي من قبل بس طبعا اشكال غير.. وللاسف خلص الكاش اللي في جيبي ورحت الفندق واخذت من الدولارات وحولتهم من اللي في شارع العرب .. ورحت عطيتهم فلوسهم وطلعنا من البافليون
وقلنا نبي البرجين.. قال لنا راعي التاكسي بسبعه رينجت ..قلنا اوكيه .. وركبنا التاكسي وقال رحتوا اخذتوا لفه؟؟ قلنا ايه..!! قال رحتوا محل الكاكاو؟؟
قلنا لا.. قال اجل بوديكم بعشره رينجت .. يعني زياده 3رينجت .. قلنا اوكيه.. ورحتوا الصن وي لاقون قلنا لا قال قصيتوا تذاكر قلنا لا قال اجل قصوا لانه زحمه بتصفون سرى طويل قصوا من هنا احسن لكم والمكتب جنب محل القهوه اللي جنب محل الكاكاو.. قلنا اوكيه.. ودخلنا محل الشكولاته(عندهم كاكاو حلو طعمه بس ماشرينا شي من عندهم غير كذا كانت زحمه عندهم لدرجة انك تمشي على جنب.. ودخلنا محل القهوه وهم كان عندهم قهوه كويسه بس ماشرينا من عندهم لاني كأني اذكر انه وحده قالت في احد التقارير انه في محل رخيص يبيع نفس القهوه .. المهم اني ماشريت شي من عندهم ولا رحت ذاك المحل.. ومحل الجلود يبيع شنط من جلد طبيعي بس انه غالي وعلى شي مش معروف .. يعني مش اسم ماركه معروفه المهم هذا لوحة المحل
وهنا من الداخل (بس عند المدخل اما داخل المحل ممنوع التصوير)
وقصينا تذاكر للصن واي لاقون من مكتب قريب من محل القهوه ..وبعدها رحنا لمجمع سورايا
بس مارقينا البرج .. وتعشينا ورجعنا بعدها من البرجين الى الفندق مشي.. وحنا راجعين مرينا على بعض المحلات وشرينا بعض الاشياء كلها على شارع العرب وطلبنا من مطعم مروش
كباب سندويشات كان طيب كثير ولو انه غالي ب١٦ السندويش بس حلو
وبغينا نطلب من البيك لانه مشهور بس غيرنا راينا
طبعا هذه الحديقه مقسمه الى اربع اقسام تقريبا
قسم الرعب (مادخلناه)
وقسم لحديقة الحيوانات وقسم للحديقة المائيه واتوقع انه فيه قسم رابع بس نسيته (ممكن انه قسم للالعاب الكمبيوتر )
تمشينا شوي عند حديقة الحيوانات
وبعدها على طول على الحديقه المائيه
هذه اللعبه صرت محترف فيها
طبعا حنا اخر ناس طلعنا من المسبح.. من مسبح لمسبح.. ومن لعبه الى لعبه .. ولا طلعنا الا بعدما طردونا..لانه فيه مسابح والعاب على جهه.. وفيه جهه ثانيه فيها مسبح كبير وكانه على شاطى .. هذا المسبح الكبير يسون فيه موجه صناعيه .. هذه الموجه يلعبون عليها ركوب الامواج .. بس للمحترفين .. وحنا نسبح في المسبح الكبير اطلقوا صوت .. معناه انهم بيطلقون الموجه الصناعيه .. وحنا نشوف الموجه من بعيد جايه لنا .. وحنا مش في العميق .. واقفين على رجولنا .. ومستعدين للموجه .. بس من قوتها انا طحت .. وللاسف كانت اول موجه لنا واخر موجه للمسبح .. وبعدها بوقت قصير قالوا لنا طلعوا .. لان محترفين ركوب الامواج جاء وقتهم .. ورجعنا على المسابح اللي جنب الالعاب وجلسنا شوي نسبح الا وقالوا انتهى الوقت.. بنسكر .. طلعوا .. وطلعنا .. وبعدها دخلنا تمشينا في المجمع شوي
والحلى لابد منه ذا المطعم عنده حلى طيب
وشفنا هذا المطعم اللي صار له دعايه قويه هنا من اختنا قصة حب بس مادخلناه
وتعشينا في الطربوش
وكانت اسعاره شوي حلوه والطعم كويس ورجعنا وكان ودنا نرجع للصن واي او ان حنا سكنا في البرميد عشان ندخل بدري للملاهي
كنا محتارين نروح افاموسا والا مانروح... والا نرجع الصن واي لاقون ... بصراحه خطيره الصن واي لاقون .. وحنا مالفيناها كلها .. المهم وبعد كر وفر قلنا بنروح الحديقة المائيه ديسا.. بس عرفت انها ماتفتح الا الساعه ١٢ الظهر قلنا نتسوق على خفيف في مجمع السوانج..
ومايمنع ان حنا نحلي شوي
هذا الروتي ادمان .. ماله حل
وبعدها استخدمت برنامج التاكسي عشان اعرف قيمة المشوار الى الديسا واتر بارك.. شفت المشوار من ١١ الى ١٧ رينجت بس انا كالعاده مااتصل على اصحاب التاكسي وانتظرهم لين يجون لي .. اوقف اقرب واحد لي واقوله بكم وكالعادة رفع السعر وقالي التاكسي ب٢٠ رينجت ..!! قلت ب١٥ رينجت.. كلها كذا كيلو .. (طبعا اذا قلت لهم كذا يفكر اني عارف المنطقة وان هذي مش اول مره اجي هنا .. ينصدم ) قالي لا .. واصريت وتركته.. وناداني بعدها.. ووصلنا عند الحديقة المائيه ديسا
ونزلنا ومشى .. بس للاسف طلعت ذاك اليوم محجوزه بالكامل لموظفين شركة كانون ولا احد يقدر يدخل.. وبعدها مشينا وطبعا مافيه تكاسي .. واستخدمت ذا المره البرنامج وطلبت تاكسي.. واتصل علي صاحب التاكسي وقال بجيك.. وانتظرته وجاني وركبت معه وقلت له ودني مجمع سوقو...
المجمع رخيص مثل مجمع السوانج بس يبغى له وقت..
طبعا هذه ماركات (مثل بيجون وديزني وبولو بس عليها تخفيض)
المهم لفينا فيه شوي وشرينا منه وفيه محلات
ومطاعم(بس اغلبها مطاعم ماليزيه)
وهذا جلسه جنب المطاعم
مشينا ماطلبنا شي من مطاعمهم .. الا وشفنا مطعم قصة حب (مانهاتن فيش ماركت) قلنا نجربه مثل ماجربوه باقي الاعضاء .. والكل يمدحه ويمدح الوجبه
طبعا انا مااكل ربيان بس المدام جربته وقالت حلو .. لذيذ
هذا الصوره في المنيو
وهذا الصوره في الحقيقه
وطلعنا واخذنا تاكسي بعد ماعرفت قيمة المشوار الى الفندق من البرنامج.. اخذت التاكسي وعطيته على قيمة المشوار اللي قالي عنها البرنامج.. وكنت افكر اخذ سيارة اجار عشان اروح فيها افاموسا.. لانه بتطلع ارخص لي بس غيرت الفكره.. ورجعنا للفندق وريحنا شوي وبعدها قلنا بنطلع نتسوق.. ورحنا مره ثانيه للسوانج وشرينا كم هديه وقلنا خلنا نرجع ندخل البرجايا تايمز سكوير .. ودخلنا المجمع طلع مثل السوانج واحسن ومثل السوقو واحسن يعني كانه يضم المجمعين
وغير انه يضم مدينة الملاهي في داخله (قطار الموت اذا ركبته يمر جنب المحلات .. خطير) بس دخول مدينة الملاهي اللي داخل المجمع بفلوس
بالعربي قريب من فندقنا ولاندري عنه... ويبغى له وقت.. وقلنا شلون بكره نروح والا لا للديسا واتر بارك لانه طلع لنا مجمع يبغى له وقت ونشاط.. ذا الحين خلنا نرجع ننام وبكره نكمل .. وتعرفون الرجيم والمحافظه على الوزن يمنع انك تاكل اكل ثقيل قبل تنام .. بس مايمنع من انك تحلي شوي بكريب .. هاه ؟؟ والا شرايكم؟؟
المهم رجعنا الفندق
وبكذا انتهى اليوم الثاني عشر من الرحله
ملاحظات : اذا صادفكم نفس هذا اليوم من مجمع الى مجمع ومن تسوق الى تسوق وكان معكم اطفال .. فأعرف انهم بيزهقون من التسوق.. وبيتسببون ..وهاتك ياصياح.. لان التسوق ممل عند الاطفال .. فنرجوا ضبط النفس والانتباه لهذه النقطه وعدم اللجوء للضرب.. ومحاولة تسلية الاطفال بجعلهم يشاركونكم في كل شي ممكن ان يشاركونكم فيه .. مثل (تعالي شوفي شريت لك بيجاما او شريت لك كذا .. اي لون تبين؟؟.. او تدخلونهم محل الالعاب اللي في المجمع وبعدين ترجعون تكملون تسوق ..
اليوم الرابع عشر مغادرة ماليزيا
من الساعه ٦:٣٠ صحينا .. والتاكسي يتصل علينا ... وشلنا اغراضنا بسرعه.. ونزلنا سلمنا الفندق واتجهنا الى المطار .. وقالي صاحب التاكسي الحركه اللي سويتها خطيره (اللي هي اني كنسلت الطلب من على البرنامج) ممكن يسون حظر على جولك وجوالي.. عشان مانقدر نتصل على بعض بس كويس انها مرت بسلام ... لانهم حريصين كثير.. ووصلنا المطار وباقي على الرحله ساعتين.. طلبنا لنا كلوب هاوس من المطار .. الحلو ان تختار وش تبغى يحطون لك في الكلوب هاوس .. واللي مش حلو كل شي بسعره .. يعني تختار جبن برنجت وتقوله حط لي خس برنجت وحط بيض برنجت او اكثر حط دجاج برنجت او اكثر
