-جبل ابو الهوا ''قدام المحطة والمعدية بجنيه واحد- هتلاقى بوابة المرسى مكتوب عليا مرسى غرب أسوان وتذكرة طلوع الجبل 5 للطلبه بس تروح قبل 4 العصر''
-الفنتين.. هتلاقى المرسى جنب حديقه فريال عند اول الكورنيش والكاتدرائيه . اسال عليها .
هتاخد احلى صور لجراند اوتيل من هناك .
وبنفس اسعار ابو الهوا .
-لو ليك فى المعابد كتير تقدر تزور معبد كوم امبو بمواصلات عاديه ساعه رايح وساعه راجع وفيه ميزة انه مفتوح بالليل فتقدر تزوره بعد البرنامج بتاعتك بس تبلغ المشرف العام.
-الصوت والضوء فيله بس محتاج عدد علشان سعر المركب من 1 لحد 8 سعر واحد .
هتلاقى اسعار المركب على شمال بوابة المرسى.
روحو يوم السبت
-خد معاك كاب
-وكوتشى مريح
-لبس واسع فاتح ويكون قطن
-متقفش تحت الشمس كتير لان الجو لسه سخن.
الاقصر بقى
تاخد المعدية من عند معبد الاقصر بخمسين قرش اه والنعمه زي مبقولك كدا
وتروح البر الغربى وتمشى حته صغيرة قدام هتلاقى الموقف تاخد عربية سرفيس مخصوص توديكم لوادى الملوك بعشين او خمسه وعشين جنيه ولو هيستناكم ويرجعكم زود عشين كمان.
التذكرة للطلبه ب 5 جنيه تديلك حق زيارة 3 مقابر وخلى بالك مقبرة توت عنخ امون ورمسيس السادس ليهم تذاكر مخصوص وملكش دعوة بتذكرة مقبرة نفرتارى وسيتى علشان غاليين شويه''الف جنيه لكل واحدة بس''
هتلاقى طفطف هناك يوصلك من عند شباك التذاكر للمقابر وتذكرته 4 جنيه بس ممكن تمشيها عادى مش مسافه كبيرة اوى!
ممنوووووووع التصوير فى الوادى وفى المقابر ادينى قلتلك اهو ولو حد قالك صور براحتك هيقلبك فى مبلغ محترم..
ممكن تعمل باللون فى الاقصر''يبدأ من 5 الفجر '' بس غالى اوى أحيانا بيوصل 900 و 1000 .
اتمشى على كورنيش الاقصر تحفه وهادى.
متنساش تتصور عند فندق الوينتر بالاس.
جنب معبد الاقصر هتلاقى باب مسجد ابو الحجاج والمسجد يعتبر مبنى جوا المعبد بس مستواه مرتفع عن المعبد وهتلاقى العمدان جوا المسجد لسه باقى عليها النقوش الهيروغليفيه .
لو احتجت تعرف حاجة كمان ابعتلى
رحلة سعيدة
