B
Bedo Abd El Samad
:: مسافر ::
٤ مواقف لطاف وأنا بصلي الجمعة في مسجد "جامع" في دلهي١- كان لسه بدري ع الصلاة فقولت أجيب المصحف اقرا فيه شوية، المهم وانا قاعد لقيت راجل جاي وبيديني طاقية ومشي، قلت ايه الجامع الحلو ده بيدوا طواقي هدية، حطيتها جنبي رِجع تاني وبيقولي البسها!، يادي النيلة السودة، المهم يعني قالي من غير اللائق انك تقرا قرآن من غير طاقية وكدة، تقمّصت شخصية الشعراوي وحاولت أفهمه إنه مش لازم وكدة بس مكنش فيه أمل فلبستها مضطر
٢- الجامع كبير جدًا جدًا وكان فيه آلاف بيصلوا بس خدتني الجلالة وفكرت نفسي فمصر وقفشت معايا أقعد قدام الخطيب بالظبط -قال يعني هفهم - المهم الجامع مزار سياحي برضه فكان في ستات جايه من وره كدة فواحد قام زعقلهم إن الخطبة بدأت ومينفعش يبقى في ستات هنا وواضح إنه كان مضايق من تطفل السياح- المهم بعد مزعقلها لقيته شاور عليا وقال كلام كتير أوي فاللي هو أنا ميكس بين "الله وانا مالي يا لمبي" وبين "عاطف انت يا حيوان" بصتله كدة وفضلت فمكاني وفجأة لقيت حد مهم داخل -كان وزير تقريبًا- والتلفزيون والكاميرات وهوليلة، فكرت أكلم امي تشوفني طالع ع Z aflam ولا Mbc Bollywood حتى اعملها باي باي بس قلت صعب
٣- نظرًا لحساسية المسلمين والهندوس وكدة والإرهاب وإن مسجد جامع أكبر جامع ف دلهي، كان في ظباط لابسين مدني ومعاهم رشاشات وسط المصلين مش فجنب حتى، فانا للأسف حبيت زي عادتي ألاعبهم كدة زي مراقبين الامتحانات بتوعنا، بصيت لواحد فيهم كدة اكني خايف يشوفني وانا بمد ايدي ورا ضهري براحة لقيته قرب عليا كدة وقلب وشة رحت مطلع كدةالشبشب من ورايا وباصصله ببراءة السياح حسيته كان عاوز يسبلي
٤- الأسوأ والأكثر إحراجًا ليا كان في الركعة الأولى وبعد ما الإمام خلص الفاتحة رحت فاقع واحدة "آآآااامييييييييين" مصري زلزلت الجامع، كنت انا الوحيد طبعًا اللي عملت كدة عشان اكتشفت إنهم ف الهند مبيعملوش كدة وكنت عاوز الأرض تنشق وتبلعني ساعتها، كنت خلاص ساعتها هروح للعسكري بنفسي أقوله نشني طلقة خلّص عليا وحتى بعد الصلاة بمد ايدي بسلم ع اللي جنبي ممدش ايده وبصل لايدي باستغراب كدة وقالي "بايسييه" اللي هو عاوز فلوس يعني هو في ايه
يا سيادنا بس المعاملة دي
_____________________
الصورة للميضة العظيمة ألا وهي بركة مية كبيرة في وسط الجامع [HASHTAG]#NewDelhi[/HASHTAG]
ليييه صلاه العيد بتتصلي مرتين ! وليه مفيش ستات بتصلي ف جوامع !