طيب انا رحت دهب ٤ مرات
مرة ميريديان و مرة ايكوتل و مرتين ممشى
ميريديان و ايكوتيل حلوين و كل حاجة بس الحوار فى حاجة
ان من بعد المغرب مفيش حاجة تتعمل فى الفندق اساساً
فهتضطروا تنزلوا الممشى
يعنى فلوس مواصلات
القعدة فى الممشى حلوة جداً جداً جداً
شوفوا فندق يكون نضيف كمكان للنوم بس
مش محتاجين أكتر من سرير نضيف و حمام نضيف
لان مش هتقعدوا اصلاً فى الأوضة
الممشى فى كل محلات الأكل من أول الفول و الطعمية لحد مطاعم الأسماك الى على البحر
فنصيحتى ليكوا
خدوا فى فندق فى الممشى أوض و ممكن بالفطار لو عايزين
نظام الممشى ايه؟
هتصحوا تفطروا فى الفندق أو من المحلات الى فى الممشى
عشان تنزلوا البحر
فى حلين يا اما تنزلوا من الفندق بالمايوهات و الماسكات بس و منها على البحر على طول
يا اما تقعدوا فى كافيه وحاجتكوا تسيبوها و تنزلوا البحر و كل حاجة
هتشربوا حاجة بس و تحاسبوا عليها
بس فى كافيهات بتبقى عاملة مينمم فى حدود ٥٠-٧٥
خلصتوا البحر و جه وقت الغدا
الممشى فى كل حاجة تتخيلوها
اللى عايز فراخ مشوية مثلاً فى كينج تشيكن
اللى عايز سجق و كبدة هيلاقى
أى حاجة موجودة
و الغدا يخشلوا فى ٥٠-١٠٠
على حسب المكان و الكمية
العشاء برضو من الممشى و كل حاجة سهلة والله
بالنسبة للأيام الى تقعدوها
الممشى اللى انتوا قاعدين فيه
فى مكان فى شمال الممشى خالص اسمه اللايت هاوس
المنطقة دى مليانة شعب و حلوة جداً للسنوركلينج
دا يوم أهو
و فى مكان قريب من الممشى اسمه لاجونا برضه حلو جداً
يوم كمان تروحوا بلوهول و أبوجالوم و بلو لاجون فى يوم
و ما تروحوش أبو جالوم بالجمل
بالمركب حلوة
المركب بتطلع من البلوهول
دا يوم تانى
يوم كمان تروحوا الثرى پولز و ممكن تعملوا سفارى هناك فى وادى جُنى
لو حد بيعمل دايڤنج و معاه لايسنس
فى منطقة ال caves
و الislands
و طبعاً الcanyon و الbluehole
و فى برضه فى اللايت هاوس أو المشربة (المنطقتين دول فى الممشى)
و فى الthree pools برضه
بليل تقضوها على أى كافيه فى الممشى
و ممكن تطلعوا جبل الطويلات
أى رحلة لو عددكوا كبير السعر هيبقى أقل
بتروحوا لأى مكتب و تتفقوا معاه
و لو على الdiving
فابقوا اسألونى لإنى أعرف diving centre كويس جداً هناك فى الممشى برضه
أهم حاجة تروحوا دهب لان كدة أو كدة هتتبسطوا
بس اقعدوا فى الممشى أحسن