السلام عليكم لو سمحتوا كنت عاوز اسافر اسكندرية...

[Basem Ahmed]

السلام عليكم
لو سمحتوا كنت عاوز اسافر اسكندرية و اقضى فيها يومين انا و زوجتى و تلات اطفال صغيرين .... كنت عاوز اعرف الاماكن اللى ممكن اتفسح فيها و تكون مناسبة لينا و مكان للمبيت ليلة واحدة او ليلتين و يكون سعرة مناسب
و شكرا مقدما

 

[Mo Ora]

المبيت خش علي أولكس إسكندرية في شقق مفروشة باليوم و الفسح في أماكن كتير القلعة في بحري و ممكن و انت في بحري تاكل من أي مطعم سمك أو صواريخ ده بيعمل شعبي و فيه الشيخ وفيق تحلي منه
و سان استيفانو و سينمات و فود كورت
قصر المنتزة
المعمورة فيها ملاهي و ركوب عجل
بس اوعي تفكر تنزل المايا عشان شواطئ اسكندرية كلها متتنزلش ما عدا قصر المنتزه بس دي شواطئ خاصة
و في جرين بلازاز في سموحه فيها سينمات و مطاعم برضوا فسحه حلوة و فيها ألعاب إلكترونية

 

[Ahmed Elsaady]

اسكندريه في يوم

هختصرلكوا اسكندرية كلها ف البوست ده وهقولك لو قررت لازم تروح فين عشان تقضي يوم ميتنساش ❤
‎١- المنتزة : وده أكبر حديقة موجودة في اسكندرية فيها قصر الملك فاروق وشوية قصور جمبها وفيها مرسي يخوت وبحر وجناين كتير تنفع لو عايزين تعملوا حفلات باربيكيو او ايفنتات اوت دور او لعب ، وحاليا من كُبرها الناس بيتعلموا فيها السواقه .. بس ملحوظة ، لازم تروحوها الصبح قبل ماالدنيا تليل ، عشان بالليل بتبقي شقه دعارة بس علي كبير ،، التذكرة ١٥ جنيه للفرد .
‎٢- مكتبة اسكندرية : لازم اي حد يجي اسكندرية يدخلها ، صرح معماري عبقري وكبيرة جداا وجواها متاحف كتير زي متحف السادات ومتحف للاثار الفرعونية والقبطيه والاسلاميه وحجات تانيه كتير .. وهتلاقي جمبها القبة السماويه دي بتعمل عروض كأنك في الفضاء بالظبط ومن احلي الحجات اللي هتستمتع بيها في حياتك .. وتذكرة المكتبة ٤ جنيه .
‎٣- متحف المجوهرات : من الحجات اللي هتستمتع بيها جدااا فيه مجوهرات من كل ملوك مصر وفي مجوهرات جايه من بره .. ومكان نضيف جدا وهتستمتع بيه وتحقد فيه ع كمية الذهب والالماظ اللي فيه ، التذكرة ب ١٠ جنيه .
‎٤- كوبري استانلي : ملوش اي تلاتين لازمة غير انك تروح تتصور عليه صورتين حلوين او تاكل عنده حلبسة ،، غير كده هو كوبري عادي وزحمه ، طبعا ببلاش .
‎٥- قلعة قايتباي : أحلي مكان تعمل فيه فوتوسيشن من كتر ماهو كبير وفاضي ،، هو عبارة عن اوض كتير اوووي وفاضيه ومن فوقيه بتقدر تشوف فيو حلو اوووي لاسكندرية من فوق ،، التذكرة ب ٥ جنيه .
‎٦- المعمورة : طبعا مينفعش حد يجي اسكندرية من غير مايروح المعمورة ويروح ملاهي المعمورة لانها حلوة ورخيصه جدا ،، غير ان المعمورة كبيرة ونضيفه وممكن البنات تروح تركب فيها عجل وتلف براحتها من غير ماحد يضايقها لان بيبقي في امن وظباط هناك كتير .
‎٧- ألبان سويسرا : اللي يجي اسكندرية ومياكلش عند البان سويسرا يبقي مجاش اسكندرية ،، اي اكله هناك معموله بالجبنة ، والجبنة بتاعته خليط من ١٢ نوع جبنة ،، طعمه قليل الادب ولازم اي حد يجي يجربه .
‎٨- كبدة الفلاح : مينفعش تكون ف اسكندرية ومتاكلش كبدة اسكندراني . وأصل الكبدة الاسكندراني هو كبدة الفلاح ،بتروح تاكل ١٥ نص رغيف كبدة وتلاقيك لسه جعان مثلا من كتر ماهي حلوة وبعدين جمبها تشرب من خروب امال وبعدين تحلي من الكنافه النابلسيه اللي جنبه .
‎٩- حودة جندل : هتدفع ٤٥ جنيه بس وهتاكل كل انواع السمك اللي هتتخيلها وتغوص في السمك ومش هنقدر تخلصه ،، سبب شهرته انه حلو ورخيص .
‎١٠- الشيخ وفيق : هتروح تطلب واحد رز بلبن بالمكسرات ب١٨ جنيه واتحداك تكون كلت واحد زيه قبل كده في حياتك .
‎١١- هولمز : هتلاقيه في شارع شعراوي ،، احلي برجر هتاكله في حياتك وغالبا لازم تكون صايم قبليها ب ٤ ايام عشان تقدر تكمل الساندوتش .. طعمه قليل الادب بصراحه في الحلاوة .
‎١٢- سان ستفانو وجرين بلازا وكارفور ،، دول اشهر ٣ مولات لو حابين تعملوا شوبنج وكل واحد فيه فود كورت في كل المطاعم وجوا كل واحد فيه سينما لو حابين تتفرجوا علي الافلام الجديدة .
‎١٣ - شارع فؤاد : اقدم شوارع اسكندرية هتشوف فيه الفن المعماري القديم وفيه مطاعم كتير حلوة وكتير وتقدر تتصور فيه فوتوسيشن حلو .
‎١٤- محل البن البرازيلي : الناس اللي حابين القهوة يبقي لازم يجربوه لانه جواه مطحن وبتشم ريحه القهوة وانت بتشربها .
‎ده دليلك لإسكندرية .. اسكندرية احلي مكان في مصر وخصوصاً في الشتاء ، هتستمتع بيها وخصوصا لو الدنيا مطرت ، هتلاقيها مطرة ودفا في نفس الوقت
‎الناس فيها حلوين وبشوشين وهيساعدوك لو عرفوا انك غريب ، بس اهم حاجه اعرف ان ميكروباص يعني " مشروع " يعني لو سألت حد عن مكان وقالك اركب مشروع من هنا متستغربش .
‎جبنة رومي يعني جبنة تركي
‎علي الناصية يعني علي القمة
‎جنيه يعني جني
‎استيكة يعني جومة
‎شاي يعني شيّ
‎واهم حاجه" احية "دي كلمة عادية هناك يعني مش عيب فمبتستغربش لو سمعتها كتير .
‎يلا جهز شنطتك واعمل منشن لصحابك ويلا علي اسكندرية
وياسلام لو رحت في الشتا. لان ، اسكندرية في الشتا متتعوضش

 

[Eman Mustafa]

بالنسبة للاقامة في فنادق علي الكورنيش 3 نجوم اسعارهم كويسة ممكن تجيب نمرتهم من النت وتحجز حجرة علي البحر الفيو والهوا بيكون رائع
زي فندق مكة، كليوبترا، الحرم
الفسح في كافيهات كتير علي البحر قعدتها جميلة زي لاتينو جليم
وفي الاتوبيس الدورين بيلف اسكندرية كلها من ناحية الكورنيش وممتع جدا
وفي طبعا المعمورة والقلعة ومحطة الرمل
المواصلات سهلة جدا ومتوفرة في اسكندريه حتي في اتوبيسات نقل عام بتبقي مكيفة وفاضية وفي واحد بيعدي من قصاد الفنادق دي وبيدخل المعمورة نفسها