ما الجديد

مرحبا بك في منتدي المسافرون العرب

انضم إلينا الآن للوصول إلى جميع ميزاتنا. بمجرد التسجيل وتسجيل الدخول ، ستتمكن من إنشاء مواضيع ونشر الردود على المواضيع الحالية وإعطاء سمعة لزملائك الأعضاء والحصول على برنامج المراسلة الخاص بك وغير ذلك الكثير إنها أيضًا سريعة ومجانية تمامًا ، فماذا تنتظر؟
Blue
Red
Green
Orange
Voilet
Slate
Dark

كنت عايزة اعرف لو سافرت مطروح ايه الاماكن اللى... (1 مشاهد)

B

Basant Farag

:: مسافر ::

كنت عايزة اعرف لو سافرت مطروح ايه الاماكن اللى اقدر اروحها كا فسح وخروج
 
A

Ahmed Ibrahim

:: مسافر ::
للناس اللي ناويه تقضي اسبوعفي مطروح

- الطريق من القاهره الي مطروح بيخد حوالي 4 ل 5 ساعات .
- وانتا مسافر خلي في جيبك جنيهات فكه علشان دخول الحمام في الاستراحه ب 2 جنيه .

- الشقق في مطروح اسعارها مرتفعه سيكا و خاصه في فصل 7 و 8 , متوسط اسعار الشقق علي البحر من 500 الي 900 في اليوم , صف تاني 400 متوسط , بعد كده من 200 الي 400 جنيه في الليله
.
- افضل منطقة للسكن المصيفي في مطروح منطقة العوام . يليها الفيروز وباب البحر

- اشهر شواطئ مطروح الليدو و روميل و مطروح العام و النخيل و الابيض و عجيبه
.
- الشواطئ الكويسه للاطفال روميل و النخيل المياه مفيش فيها امواج و واطيه
.
- الشواطئ العامه زي الليدو و مطروح العام و روميل مش هقول وحشه بس هتلاقي فيها شوية زباله ومش صافيه اوي الي هيا
.
- شاطئ الابيض ( بلو بيتش ) افضل شاطئ في مطروح بس مشكلته بعده عن البلد .
- لازم تروح عجيبه لازم عجيبه ما هو انتا هتروح عجيبه يعني هتروح عجيبه

- الاماكن الي ممكن تخطف رجلك ليها الابيض و عجيبه و الغرام و كليوبترا
.
- في سيرك في مطروح زمبقولك كده , بتاع جمال الحلو , هتلاقيه جنب جيلاتي عزه عند فندق المشير احمد بدوي اخر الكورنيش , التذكره ب 40 جنيه , حلو للاطفال مش قد كده للكبار ولو روحته مره متروحش تاني مش هيبقي ليه طعم ولا لون ولا رائحه .
جيلاتي عزه الي عند الكورنيش حلو في واحد تاني عند شارع الاسكندريه مش حلو الاسعار 7 و 10 و 15 , جرب المانجو حلو و بلاش الشوكولاته طعمه مدي علي كاكاو و هتلاقي عندهم فانيليا و ليمون و شوكولاته و مانجو و فراوله , في عندهم رز باللبن و ام علي بس لو معاك عدد كبر دماغك هتلبس جامد علي ايه .
-
_معاك اطفال ؟ مطروح هتبقي حلوه اوي ليهم لان طول ما انتا ماشي علي الكورنيش هتلاقي ملاهي , الملاهي حلوه , دخلهم الملاهي هينبسطوا و هتنبسط معاهم .
- اكبر ملاهي هتلاقيها جنب جيلاتي عزه في اخر الكورنيش فيها العاب كتير و كبيره ممكن تلعب معاهم انتا كمان يا شقي
.
- في سينما في مطروح , لا حقيقي , هو كان في 3 بس صفصفوا علي واحده , سينما السلام الصيفي , خلي حد فيكم يتبرع و يروح قبليكم بساعتين تلاته اربعه يحجز ليكم التذاكر و يحجز ليكم الكراسي علشان لو جيت علي ميعاد البدء مش هتلاقي مكان تقعد فيه , السينما ب 15 جنيه صاله و 20 جنيه بلكون , السينما صيفي مفتوحه بس حلوه مشكلتها زي ما قولت في الزحمه بنت
...... .
- مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي عشرمين محمصه باسم النصر , فاسأل علي محمصه النصر المسيحيه هتلاقي عليها امم حتي لو الوقت الساعه 4 الفجر ( انه حقا لب فاجر ) .
- اعمل حسابك في ميزانيه مخصصه للكراسي و الشمسيات يا زعيم , الثلاثه كراسي و شمسيه ب 40 جندي و ممكن يعمل معاك واجب و يخليهم 4 كراسي و طرابيزه بنفس السعر ومتحاولش تفاصل علشان هتلاقي نفسك بقيت صف 3 علي البحر
.
_ عاوز اسماك هتلاقي عاوز مشاوي هتلاقي عاوز تكاكي هتلاقي
عاوز تأكل سمك عليك و علي ( اسماك مجدي ) مكانه في شارع متفرع من شارع الاسكندريه ناس علي وضعها السمك بتاعهم علي وضعه البلطي شديد مشكلتهم التأخير و الزحمه يعني هات معاك كرسي و اعمل حسابك في 3-4 ساعات هتقعد تستني السمك يتعمل بس هتأكل سمك تحلف بيه طول حياتك و بلاش تجيب من عندهم شوربة سي فود غاليه و طعمها وحش و كلها اخطبوط متقطع .
في جنب مجدي واحد اسمه خالد مش حلو متجبش منه .
وعندك برضه اسماك ابو العربي و حمو التمساح قدام بعض سمكهم حلو بس يتأكل في المطعم
عاوز تأكل مشاوي عندك كمنه و عبده كفته و فتحي و رشا , لا دول مش ولاد خالتي دول بتوع مشويات , مشوياتهم حلوه و خاصه عبده كفته و لو حبيت تأكل هناك كمان احلي و القعده في الشارع مع الجو الحلو ليه مذاق تاني .
متريش ؟ شكلك متريش , عليك و علي كوكو العربي اكل بدوي بقي من الاخر , حلاوتك يا مندي و انتا معدي , وقعده عرب علي الارض كده و انزلي بالصواني و الطواجن بس تقل جيبك علشان كوكو بيزعل جامد
عاوز حلو ؟ في حلو يا حبيبي , عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو و خطير

- مطروح الصبح حاجه و بليل حاجه تانيه خالص ♥ , اضرب الحته التمام و انزل بليل استمتع بجمال مطروح و هواء مطروح و عليل مطروح , روح الكورنيش , الكورنيش حلو
اضرب ترمس , كل دره , اقعد علي السور الي عند البحر علشان الكرسي علي البحر ب 10 جنيه بليل ( ياعمشهنقعد )
اركب بيتش باجي تجربة حلوة و ممتعه النصف ساعه ب 50 جنيه معلش مش هتركبه كل يوم , سهل مش قصه , ايدك اليمين بنزين ايدك الشمال فرامل زييييييييط يا معلم .
العجل حلو برضه ابقي ركب الاولاد عجل و اقعد اتفرج عليهم متبقاش بخيل متركبش لوحدك
الكافيهات حلوه في مطروح و كتير و القعده حلوه في الهواء الطلق و هتلاقي الكافيه الي علي قد الايد و الكافيه الي ممكن يخد ايدك رهن علي ما تجيب الباقي و ترجع كله بالحب
.
- بتحب البلاي ستيشن ؟ في مطروح هتلاقي بلاي ستيشن و قعدات عرب من الاخر حاجه قمه المتعه و علي وضعها
.
- متنساش تجيب زيتون , الزيتون جميل بتاعهم و الكيلو من 10ل 25 هاتلك شويه روحهم معاك
 
E

Eman A. El-Sheikh

:: مسافر ::
شارع اسكندرية اكل و شرا - سوق ليبيا شرا - كل يوم تنزلى شط - عجيية ة الابيض و بلو احلاهم - قرية المعروبة فى روميل - و كل يوم بليل ممكن تعدى ف كافية ع البحر
 
M

Mohamed Mohamef Liverpool

:: مسافر ::
مطروح كلها اوضه وصاله روحى بس وانتي هتلاقي نفسك بتلفيها كلها
 
F

Fatma Ahmed

:: مسافر ::
شاطيء الابيض و الغرام و عجيبة
بورتو مطروح
اتغدي ف كمنة اللي ف شارع اسكندرية
كلي ايس كريم من عزة
كلي فراخ من مشويات سحر
ااقعدوا ف كافيه ع البحر
ريفيرا اوتيل صغير كدة قعدته حلوه و هادية
ااقعدوا تاني ع البحر باليل
قعدة ماكدونالز هناك حلوة جدا و ع البحر
قرية اندلسية فيها العاب مائية و حمام سباحة مغطي للسيدات و بحر بس مش للنزول للفرجة كدة علشان موج عالي لو تعرفي حد معاه كارنيهات يدخلك
كلي سمك عند حسني
ااقعدوا تالت مرة ع البحر باليل
 
A

Ahmed Saad

:: مسافر ::
الصبح اطلعى على الابيض حاولي تدخلي شاطئ الجيش
بليل اطلعي اقعدي عند شاطئ روميل واستمتعي بالهدوء
اطلعى قبل الشروق على عجيبه احضري خيال ااشروق هناك
ساعه عصاري انزلي اتمشي في شارع اسكندريه اشتريلك شويه حاجات
كافتيريا صابر قعدتها جميله
حمام كليوباتر وشاطئ الغرام
مطروح ممكن كل يوم تروحي مكان جديد
 
M

Mohamed Abdelkader

:: مسافر ::
انا لسة راجع من هناك لو في فرصة تروحي بعربيتك حتبقي الحياة افضل لكن المواصلات متوفرة
فسح مطروح الكورنيش ولو معاكم اطفال في ملاهي كل كام متر علي الكورنيش
عجيبة مكان تحفة في الصور
الابيض بحرها نظيف
في القرية البدوية عند بوابة مطروح طريق السلوم هي كافيه ومطعم اكتر منها قرية بس مكان هادي قعدته حلوة
في مطعم مشاوي اسمه كمنة اكلهم حلو ونظيف
ماكدونالد وكوك دوور عاملين قعدة حلوة علي الكورنيش
بشكل عام بلد ظريفة وصغيرة وفي الوقت ده هتكون هادية وافتكر بالليل ممكن تكون برد شوية
 

Similar threads

Similar threads

Users Who Are Viewing This الموضوع (Users: 0, Guests: 1)

أعلى أسفل