M
Mohamed Elnjjar
:: مسافر ::
البوست دا مهم جدا بالنسبة للناس ال رايحين دهب او قررو يروحو دهب وعلى اى اساس انت اختارت تكون وجهتك لمدينة دهب تحديدا ؟؟ اعرف المكان ال انت رايحه وافهم طبيعته كويس عشان لما تروح متتصدمش 
اولا قبل ما نقول ايه ال ممكن يتعمل فى دهب وايه ال يخلينا نستمتع بالمكان نقول على اى اساس هختار دهب للفسحة وهل هى مناسبة ليا وهتعجبنى ولا لاء ؟؟
مبدئيا يا جماعة ال اول مرة يروح دهب وعمال يسمع عنها وشايف كل الناس عمالين يعملو بوستات انهم فى دهب احب اقولك ان دهب مش زى شرم الشيخ خااالص يعنى دهب جو تانى او بمعنى اصح دماغ تانية تماااما عشان لو انت متعود على دماغ وجو الخروجات والتنطيط والرفاهية بتاع شرم الشيخ فلما تروح تدهب غالبا مش هتلاقى الجو دا هناك ( انا بقول الكلام دا ليه ؟؟ لانى العيد الكبير ال فات وانا ماشى بالليل فى الممشى السياحى بتاع دهب كان فى اسر كتييير جدا من كل الطبقات واطفال والممشى زحمة واغلب تعليقات الناس انهم مش مبسوطين فى دهب وان شرم الشيخ احسن منها وان الشاطئ فى الفندق صخور ومش عارفين يستمتعو وان مافيش اماكن كتير للخروج والسهر وللاطفال فى دهب وان مستوى الفنادق مش اد كدا وتعليقات من النوع دا كتير جدا ) ودا كان نتيجة ان بعض شركات السياحة والجروبات السياحية بقت بتحشد اعداد وتجمع فى اى مجموعات عشان يطلعوهم رحلات لدهب من غير ما يعرفوهم طبيعة دهب دى ايه ولا مناسبة لايه ؟؟ وكأن دهب دى موضة جديدة مش مزار سياحى رائع ومهم
دهب يا جماعة عبارة عن مدينة صغيرة بين مجموعة جبال رائعة على ساحل البحر الاحمر بعد شرم الشيخ ب 100 ك والطريق ليها من القاهرة بيخد فى حدود من 9 الى 10 ساعات شامل الرست والاكمنة ال هتعدى عليها وشواظئها بالكاااامل شواطئ صخرية ليئة بالشعاب المرجانية ماعدا شاطئ واحد هناك هو ال رملى وسهل نزوله وهو اللاجونا ودا قريب من وسط البلد وحواليه عدد فنادق قليل مش كتير وجزء من اللاجونا غير تابع لفنادق و مفتوح لكل الناس لكن مش مجهز يعنى تروح تنزل بس تخد حاجة تقعد عليها هناك وشمسية معاك . كمان طبيعة فنادق دهب مقارنة مع فنادق شرم انها فنادق بسيطة تعتمد على البساطة فى كل شيئ من خدمة لاكل لمستوى ودا ميمنعش ان فى كام فندق هناك فخمين بس الاغلب هناك والسمة ال بتشتهر بيها البلد هى الهدوء والبساطة فى كل شيئ
يعنى بمعنى اصح لو دماغ حضرتك متعود على شرم الشيخ وفخامتها وخروجاتها الكتير ال مبتخلصش والفنادق الكتيييير والمدينة الكبيرة والدوشة فغالبا دهب ممكن متعجبكش لانها عكس شرم من حيث انها مدينة صغيرة وخروجاتها محدودة وهادية جدا . وكمان لو معاك اطفال واسرة وعاوز شواطئ مناسبة ليهم واكوا بارك والحاجات دى يبقى غالبا برضو دهب مش مناسبة ليك الا لو انت حابب البلد وبتروحلها باستمرار
(مش بقول ابدا ان دهب وحشة بل بالعكس فى نظرى هى اجمل المدن الساحلية على البحر الاحمر لان انا بحب البساطة والهدوء والاسترخاء ودا بالضبط ال بلاقيه فى دهب يعنى بمعنى اصح دهب ممكن تكون مناسبة اكتر للشباب من الاسر والاطفال )
نيجى بقى للجزء التانى وهو المزارات ... هقولك على كام حاجة كدا ممكن تعملها فى دهب
اولا الرحلات البحرية باليخت ودى بتكون يوم كامل من 8 ص الى 4 م ودى بتطلع من دهب وغالبا بتكون رحلة من رحلتين (منطقة جبر البنت ودى تبع محمية نبق بين شرم ودهب ودا مكان روعة للغطس والسنوركلينج / منطقة اللاجونا ودى بتكون حوالين اللاجونا فى دهب ) وطبعا بتكون شاملة الغداء والمشروبات وهتكون معاك فى رينج 200 الى 250 ج للفرد وممكن تحجزها من مكتب الرحلات بالاوتيل او من مكاتب الرحلات المنتشرة فى الممشى السياحى .
ثانيا رحلات السفارى لمحمية طابا ودى بقى حاجة كدا وهم مش قادر اوصفلكم جمالها بس طبعا دى مش مناسبة خالص لا للاطفال ولا للناس الكبار السن ولا للناس ال مش بيقدرو يممشو مسافات لان الرحلة دى شاقة ومتعتها فى كدا ان بتنزل جبال بالحبل وتتسلق جبال وتمشى بالساعات فى الصحرا وطبعا الرحلة دى يفضل انها تتطلع فى الشتا لانها رحلة صحراوية طول الوقت هتتعرض للشمس مباشرة .. ودى لو انتو مجموعة ممكن تحجزو عربية جيب ل 8 افراد ويكون معاكم جايد من البدو فى العربية هتكلفك العربية بالجايد فى حدود 1200 ج لل 8 افراد او اقل حسب العدد ال هيركب فى العربية ولو انتو اتنين او تلاتة بس ممكن تحجزوها بالفرد من مكاتب الرحلات هناك فى حدود 250 الفرد وبتكون شاملة الغدا فى الصحرا .. بتروحو ضمن برنامج السفارى مكان وهممممى جدا اسمه الوادى الابيض ودا بتنزلوه من اعلى الجبل بالحبل وبتمشو فى الصحرا حوالى ساعة ل ساعة ونص حسب جهدكم وطاقتكم لحد ما بتوصلو مكان اسمه واحة عين خضرة .. عبارة عن واحة جميلة خضرا عايشين فيها البدو وسط الصحرا وفيها عين مياه عذبة وبعدها بتركبو تانى العربيات وتطلعو على صخرة المشروم فى الصحرا وبعدها بتطلعو على مكان اسمه سلامة كانيون او الوادى الاحمر وهو عبارة عن جبال ملونة ورائعة واليوم بيخلص على الساعة 4 مثلا وبترجع الاوتيل .
ثالثا سفارى البيتش باجى ودى بتطلع وقت الشروق او وقت الغروب لمنطقة الثرى بولز بالبيتش باجى وبتكون رحلة ممتعة جدا بتخد حوالى ساعتين والفرد بيكون فى حدود 130 ل 150 ج لو سنجل .
رابعا زيارة منطقة البلو هول او الثقب الازرق ودى فى دهب بتخدلها عربية من اى مكان فى دهب والعربيات المشهورة هناك هى الجيب المكشوفة او الربع نقل بتخدها بحوالى 80 ل 100 ج من دهب بتوديك مكان على البحر كله كافيهات بدوية وادامه حفرة زرقا كبيرة فى المية تعتبر من افضل واروع مناطق الغطس فى العالم من حيث الاسماك الكثيرة ال فيها والشعاب المرجانية البكر ومن هناك ممكن تاجر معدات السنوركلينج او لايف جاكيت لو مش بتعرف تعوم لان هناك عمق كبير جدا ومافيش شاطئ . اهم حاجة تخد رقم السواق ال هيوديك عشان يجيلك تانى بالطلب لما تخلص لان هناك مافيش مواصلات
خامسا رحلة محمية ابو جالوم ودى برضو بتطلع من دهب بتخد عربية للبلو هول بنفس الطريقة ال مكتوبة فى العنصر السابق ومن هناك بيكون معاك صور البطاقة بتاعتك انت والمجموعة ال معاك بتخلص تصاريحك من مكتب الشرطة فى منطقة البلو هول عشان تبتدى تتحرك لمحمية ابو جالوم ودى بقى بتروحا بطريقة من طريقتين ..
ممكن تروح بالجمل وخد بالك ان ركوب الجمل مش سهل وهتكون مغامرة بس ممتعة جدا وهتشوف كمان مناظر تحفة بس هتفضل قاعد على ظهر الجمل حوالى من ساعة ل ساعة وربع تقريبا ذهاب ومثلهم عودة والمسافة دى الجمل هيطلع بيك مطالع وهينزل بيك منازل وهتبقى مغامرة مجنونة بس متعبة شوية لل مش متعود عليها واوقات بتكون مرعبة لبعض الناس . الجمل هيكلفك حوالى 75 ج ل 100 ج ذهاب وعودة وبيكون طالع معاك مخصوص .
وممكن تروح بالانش السريع ودى بتخد وقت حوالى 20 ل 25 دقيقة بس ولكن بما ان اللانش صغير وانت فى بحر مفتوح فخليك عارف ان اللانش هيكون بيرقص ويطلع وينزل مع امواج البحر وطبعا هتكون مغامرة مجنونة برضو ومتقلقش كل ال بيسوقو المراكب ههناك محترفين جدا ودا الطبيعى بتاع البحر فى المنطقة هناك عشان متفتكرش انك هتغرق .. يعنى دا عادى جدا وهتلاقى السواق فطسان على روحه من الضحك عليكم والفرد بيكون فى حدود 50 ج مثلا ذهاب ومثلهم عودة
بتوصل للمحمية وفى هناك عشش او كامبات فى الصحرا على البحر على طول وفى كافتيريات ومطاعم لو حابب تكل وبتعمل سنوركلينج وهناك فى شعاب مرجانية واسماك تحفة والمنظر كمان تحفة
سادسا بالليل عندك خروجات بسيطة كدا يعنى ممكن فى يوم تنزل الممشى السياحى باى مواصلة هناك تلف فيه شوية هو صغير وفيه محلات وبازارات وكافيهات ومطاعم وماركت .
ويوم ممكن تسهر فى مكان فى قلب الجبل اسمه جبل الطويلات ودا بيكون متنور بالشموع وبيقدملك مشروبات او عشا حسب مزاجك وممكن يكلفك من 30 ج ل 150 ج حسب ال هتطلبه المهم انك توفر معاك عربية توديك وتجيبك .
سابعا وانت فى دهب بينك وبين نويبع حوالى 100 ك فممكن جدا تروح تخطفلك يوم فى قلعة زمان على طريق طابا نويبع ودى عبارة عن مكان جميل فوق الجبل على البحر بيقدملك خدمات البار ووجبة غداء وبسين محفور فى الجبل والساونا وليهم بلاج تحت على البحر جميل بس مش مجهز وبتكون حاجز قبلها اون لاين من موقعهم ممكن تجيبه من جوجل باسم قلعة زمان واليوم بيبدء معاك من 12 م الى 9 م وبيتكلف الفرد بالغداء 500 ج ودى برضو محتاجة انك تظبط لها وسيلة انتقالات توديك وتجيبك وممكن كمان تقضيلك يوم فى كامبات راس شيطان فى نويبع لانها فى طريقك
لو عاوز تنزل شرم من دهب اعمل حسابك ان المسافة 100 ك وبتخد فى الطريق حوالى ساعة ونص عشان الاكمنة
فى حاجة كدا ظريفة بحب اعملها دايما وانا راجع بس دى تتعمل لو معاك عربية خاصة انك بترجع من طريق نخل (طريق سينا الاوسط) ودا بتنزله من دهب لنويبع مرورا بطابا .. وانت فى طابا ممكن تقف تخدلك شوية صور تحفة عن تاج الخلجان العربية ال هو خليج الفيورد هناك مكان وهمى .. وممكن اول ما تدخل طابا تعديلك على قرية صلاح الدين هناك وتخد المركب من القرية ب 25 ج للفرد توصلك لجزيرة فرعون وتطلع على الجزيرة تدخل قلعة صلاح الدين وتتفرج على حدود مصر مع الاردن والسعودية والاراضى المحتلة ودى حاجة عظيمة وتحفة جدا بس خد بالك المركب بتاع الفندق هناك ال بتوديك الجزيرة مش دايما شغالة اوقات بتكون عطلانة وكمان طريق سينا الاوسط ال هو انت هترجع منه ودا طريق مختصر كتير عن طريق شرم حاليا ممنوع فيه مرور الاخوة المسيحيين والسادة الضباط من جيش وشرطة وقضاء ودى تعليمات امنية .
افضل توقيت تزور فيه دهب بجد وتستمتع بيها جداااااااا هو فترة الربيع والخريف وفى الشتا بيكون كمان جوها دافى معقول ومناسب جدا للسفارى ال انصحك انك متفوتهاش لو بتحب المغامرة والصحرا
اخيييرا بقى .. دهب فيها يا جماعة سحر غرييييب جدا كانها بتغير روحك وبتسحب منك الطاقة السلبية يعنى حتى لو معملتش برنامج لنفسك ورحت تسترخى بس وتهدى اعصابك صدقنى هتنبسط جدا بمجرد قعدتك بين الجبل والبحر بدون تكلف ولا تصنع مبالغ فيه بس دا فى حالة انك زى حالاتى بتحب الهدوء والجو دا
نصيحة منى ليك قبل ما تفكر تحجز لاى مكان عموما اعرف طبيعة المكان ال انت طالعه وايه الحاجات ال ممكن اعملها وهل هى مناسبة لدماغك ولا لاء
التقرير دا بالكامل والصور من اعدادى وتصويرى فرجاءا اثناء نقل البوست نقله مع ذكر المصدر وكل مكان مكتوب فى البوست هنا هتلاقى ليه صور فى البوست
تقدرو باستمرار تتابعو بروفايلى وكل البوستات الجديدة فى صفحتى الشخصية من الرابط دا :
/Mohamed Elnjjar
#مصر_التى_لا_تعرفونها
اتعرفو معانا على تاريخكم وشوفوا بلدكم بعيون مختلفة . تقدروا تتابعونا وتعرفوا اخبار وتفاصيل الرحلات بمجرد ما نعلن عنها من خلال صفحتنا الرسمية من الرابط التالى :
/حملات تنشيط السياحة الداخلية Campaign of the Egyptian Tourism
او الجروب الرسمى بتاعنا من الرابط التالى :
/فيها حاجة حلوة
اولا قبل ما نقول ايه ال ممكن يتعمل فى دهب وايه ال يخلينا نستمتع بالمكان نقول على اى اساس هختار دهب للفسحة وهل هى مناسبة ليا وهتعجبنى ولا لاء ؟؟
مبدئيا يا جماعة ال اول مرة يروح دهب وعمال يسمع عنها وشايف كل الناس عمالين يعملو بوستات انهم فى دهب احب اقولك ان دهب مش زى شرم الشيخ خااالص يعنى دهب جو تانى او بمعنى اصح دماغ تانية تماااما عشان لو انت متعود على دماغ وجو الخروجات والتنطيط والرفاهية بتاع شرم الشيخ فلما تروح تدهب غالبا مش هتلاقى الجو دا هناك ( انا بقول الكلام دا ليه ؟؟ لانى العيد الكبير ال فات وانا ماشى بالليل فى الممشى السياحى بتاع دهب كان فى اسر كتييير جدا من كل الطبقات واطفال والممشى زحمة واغلب تعليقات الناس انهم مش مبسوطين فى دهب وان شرم الشيخ احسن منها وان الشاطئ فى الفندق صخور ومش عارفين يستمتعو وان مافيش اماكن كتير للخروج والسهر وللاطفال فى دهب وان مستوى الفنادق مش اد كدا وتعليقات من النوع دا كتير جدا ) ودا كان نتيجة ان بعض شركات السياحة والجروبات السياحية بقت بتحشد اعداد وتجمع فى اى مجموعات عشان يطلعوهم رحلات لدهب من غير ما يعرفوهم طبيعة دهب دى ايه ولا مناسبة لايه ؟؟ وكأن دهب دى موضة جديدة مش مزار سياحى رائع ومهم
دهب يا جماعة عبارة عن مدينة صغيرة بين مجموعة جبال رائعة على ساحل البحر الاحمر بعد شرم الشيخ ب 100 ك والطريق ليها من القاهرة بيخد فى حدود من 9 الى 10 ساعات شامل الرست والاكمنة ال هتعدى عليها وشواظئها بالكاااامل شواطئ صخرية ليئة بالشعاب المرجانية ماعدا شاطئ واحد هناك هو ال رملى وسهل نزوله وهو اللاجونا ودا قريب من وسط البلد وحواليه عدد فنادق قليل مش كتير وجزء من اللاجونا غير تابع لفنادق و مفتوح لكل الناس لكن مش مجهز يعنى تروح تنزل بس تخد حاجة تقعد عليها هناك وشمسية معاك . كمان طبيعة فنادق دهب مقارنة مع فنادق شرم انها فنادق بسيطة تعتمد على البساطة فى كل شيئ من خدمة لاكل لمستوى ودا ميمنعش ان فى كام فندق هناك فخمين بس الاغلب هناك والسمة ال بتشتهر بيها البلد هى الهدوء والبساطة فى كل شيئ
يعنى بمعنى اصح لو دماغ حضرتك متعود على شرم الشيخ وفخامتها وخروجاتها الكتير ال مبتخلصش والفنادق الكتيييير والمدينة الكبيرة والدوشة فغالبا دهب ممكن متعجبكش لانها عكس شرم من حيث انها مدينة صغيرة وخروجاتها محدودة وهادية جدا . وكمان لو معاك اطفال واسرة وعاوز شواطئ مناسبة ليهم واكوا بارك والحاجات دى يبقى غالبا برضو دهب مش مناسبة ليك الا لو انت حابب البلد وبتروحلها باستمرار
(مش بقول ابدا ان دهب وحشة بل بالعكس فى نظرى هى اجمل المدن الساحلية على البحر الاحمر لان انا بحب البساطة والهدوء والاسترخاء ودا بالضبط ال بلاقيه فى دهب يعنى بمعنى اصح دهب ممكن تكون مناسبة اكتر للشباب من الاسر والاطفال )
نيجى بقى للجزء التانى وهو المزارات ... هقولك على كام حاجة كدا ممكن تعملها فى دهب
اولا الرحلات البحرية باليخت ودى بتكون يوم كامل من 8 ص الى 4 م ودى بتطلع من دهب وغالبا بتكون رحلة من رحلتين (منطقة جبر البنت ودى تبع محمية نبق بين شرم ودهب ودا مكان روعة للغطس والسنوركلينج / منطقة اللاجونا ودى بتكون حوالين اللاجونا فى دهب ) وطبعا بتكون شاملة الغداء والمشروبات وهتكون معاك فى رينج 200 الى 250 ج للفرد وممكن تحجزها من مكتب الرحلات بالاوتيل او من مكاتب الرحلات المنتشرة فى الممشى السياحى .
ثانيا رحلات السفارى لمحمية طابا ودى بقى حاجة كدا وهم مش قادر اوصفلكم جمالها بس طبعا دى مش مناسبة خالص لا للاطفال ولا للناس الكبار السن ولا للناس ال مش بيقدرو يممشو مسافات لان الرحلة دى شاقة ومتعتها فى كدا ان بتنزل جبال بالحبل وتتسلق جبال وتمشى بالساعات فى الصحرا وطبعا الرحلة دى يفضل انها تتطلع فى الشتا لانها رحلة صحراوية طول الوقت هتتعرض للشمس مباشرة .. ودى لو انتو مجموعة ممكن تحجزو عربية جيب ل 8 افراد ويكون معاكم جايد من البدو فى العربية هتكلفك العربية بالجايد فى حدود 1200 ج لل 8 افراد او اقل حسب العدد ال هيركب فى العربية ولو انتو اتنين او تلاتة بس ممكن تحجزوها بالفرد من مكاتب الرحلات هناك فى حدود 250 الفرد وبتكون شاملة الغدا فى الصحرا .. بتروحو ضمن برنامج السفارى مكان وهممممى جدا اسمه الوادى الابيض ودا بتنزلوه من اعلى الجبل بالحبل وبتمشو فى الصحرا حوالى ساعة ل ساعة ونص حسب جهدكم وطاقتكم لحد ما بتوصلو مكان اسمه واحة عين خضرة .. عبارة عن واحة جميلة خضرا عايشين فيها البدو وسط الصحرا وفيها عين مياه عذبة وبعدها بتركبو تانى العربيات وتطلعو على صخرة المشروم فى الصحرا وبعدها بتطلعو على مكان اسمه سلامة كانيون او الوادى الاحمر وهو عبارة عن جبال ملونة ورائعة واليوم بيخلص على الساعة 4 مثلا وبترجع الاوتيل .
ثالثا سفارى البيتش باجى ودى بتطلع وقت الشروق او وقت الغروب لمنطقة الثرى بولز بالبيتش باجى وبتكون رحلة ممتعة جدا بتخد حوالى ساعتين والفرد بيكون فى حدود 130 ل 150 ج لو سنجل .
رابعا زيارة منطقة البلو هول او الثقب الازرق ودى فى دهب بتخدلها عربية من اى مكان فى دهب والعربيات المشهورة هناك هى الجيب المكشوفة او الربع نقل بتخدها بحوالى 80 ل 100 ج من دهب بتوديك مكان على البحر كله كافيهات بدوية وادامه حفرة زرقا كبيرة فى المية تعتبر من افضل واروع مناطق الغطس فى العالم من حيث الاسماك الكثيرة ال فيها والشعاب المرجانية البكر ومن هناك ممكن تاجر معدات السنوركلينج او لايف جاكيت لو مش بتعرف تعوم لان هناك عمق كبير جدا ومافيش شاطئ . اهم حاجة تخد رقم السواق ال هيوديك عشان يجيلك تانى بالطلب لما تخلص لان هناك مافيش مواصلات
خامسا رحلة محمية ابو جالوم ودى برضو بتطلع من دهب بتخد عربية للبلو هول بنفس الطريقة ال مكتوبة فى العنصر السابق ومن هناك بيكون معاك صور البطاقة بتاعتك انت والمجموعة ال معاك بتخلص تصاريحك من مكتب الشرطة فى منطقة البلو هول عشان تبتدى تتحرك لمحمية ابو جالوم ودى بقى بتروحا بطريقة من طريقتين ..
ممكن تروح بالجمل وخد بالك ان ركوب الجمل مش سهل وهتكون مغامرة بس ممتعة جدا وهتشوف كمان مناظر تحفة بس هتفضل قاعد على ظهر الجمل حوالى من ساعة ل ساعة وربع تقريبا ذهاب ومثلهم عودة والمسافة دى الجمل هيطلع بيك مطالع وهينزل بيك منازل وهتبقى مغامرة مجنونة بس متعبة شوية لل مش متعود عليها واوقات بتكون مرعبة لبعض الناس . الجمل هيكلفك حوالى 75 ج ل 100 ج ذهاب وعودة وبيكون طالع معاك مخصوص .
وممكن تروح بالانش السريع ودى بتخد وقت حوالى 20 ل 25 دقيقة بس ولكن بما ان اللانش صغير وانت فى بحر مفتوح فخليك عارف ان اللانش هيكون بيرقص ويطلع وينزل مع امواج البحر وطبعا هتكون مغامرة مجنونة برضو ومتقلقش كل ال بيسوقو المراكب ههناك محترفين جدا ودا الطبيعى بتاع البحر فى المنطقة هناك عشان متفتكرش انك هتغرق .. يعنى دا عادى جدا وهتلاقى السواق فطسان على روحه من الضحك عليكم
والفرد بيكون فى حدود 50 ج مثلا ذهاب ومثلهم عودة بتوصل للمحمية وفى هناك عشش او كامبات فى الصحرا على البحر على طول وفى كافتيريات ومطاعم لو حابب تكل وبتعمل سنوركلينج وهناك فى شعاب مرجانية واسماك تحفة والمنظر كمان تحفة
سادسا بالليل عندك خروجات بسيطة كدا يعنى ممكن فى يوم تنزل الممشى السياحى باى مواصلة هناك تلف فيه شوية هو صغير وفيه محلات وبازارات وكافيهات ومطاعم وماركت .
ويوم ممكن تسهر فى مكان فى قلب الجبل اسمه جبل الطويلات ودا بيكون متنور بالشموع وبيقدملك مشروبات او عشا حسب مزاجك وممكن يكلفك من 30 ج ل 150 ج حسب ال هتطلبه المهم انك توفر معاك عربية توديك وتجيبك .
سابعا وانت فى دهب بينك وبين نويبع حوالى 100 ك فممكن جدا تروح تخطفلك يوم فى قلعة زمان على طريق طابا نويبع ودى عبارة عن مكان جميل فوق الجبل على البحر بيقدملك خدمات البار ووجبة غداء وبسين محفور فى الجبل والساونا وليهم بلاج تحت على البحر جميل بس مش مجهز وبتكون حاجز قبلها اون لاين من موقعهم ممكن تجيبه من جوجل باسم قلعة زمان واليوم بيبدء معاك من 12 م الى 9 م وبيتكلف الفرد بالغداء 500 ج ودى برضو محتاجة انك تظبط لها وسيلة انتقالات توديك وتجيبك وممكن كمان تقضيلك يوم فى كامبات راس شيطان فى نويبع لانها فى طريقك
لو عاوز تنزل شرم من دهب اعمل حسابك ان المسافة 100 ك وبتخد فى الطريق حوالى ساعة ونص عشان الاكمنة
فى حاجة كدا ظريفة بحب اعملها دايما وانا راجع بس دى تتعمل لو معاك عربية خاصة انك بترجع من طريق نخل (طريق سينا الاوسط) ودا بتنزله من دهب لنويبع مرورا بطابا .. وانت فى طابا ممكن تقف تخدلك شوية صور تحفة عن تاج الخلجان العربية ال هو خليج الفيورد هناك مكان وهمى .. وممكن اول ما تدخل طابا تعديلك على قرية صلاح الدين هناك وتخد المركب من القرية ب 25 ج للفرد توصلك لجزيرة فرعون وتطلع على الجزيرة تدخل قلعة صلاح الدين وتتفرج على حدود مصر مع الاردن والسعودية والاراضى المحتلة ودى حاجة عظيمة وتحفة جدا بس خد بالك المركب بتاع الفندق هناك ال بتوديك الجزيرة مش دايما شغالة اوقات بتكون عطلانة وكمان طريق سينا الاوسط ال هو انت هترجع منه ودا طريق مختصر كتير عن طريق شرم حاليا ممنوع فيه مرور الاخوة المسيحيين والسادة الضباط من جيش وشرطة وقضاء ودى تعليمات امنية .
افضل توقيت تزور فيه دهب بجد وتستمتع بيها جداااااااا هو فترة الربيع والخريف وفى الشتا بيكون كمان جوها دافى معقول ومناسب جدا للسفارى ال انصحك انك متفوتهاش لو بتحب المغامرة والصحرا
اخيييرا بقى .. دهب فيها يا جماعة سحر غرييييب جدا كانها بتغير روحك وبتسحب منك الطاقة السلبية يعنى حتى لو معملتش برنامج لنفسك ورحت تسترخى بس وتهدى اعصابك صدقنى هتنبسط جدا بمجرد قعدتك بين الجبل والبحر بدون تكلف ولا تصنع مبالغ فيه بس دا فى حالة انك زى حالاتى بتحب الهدوء والجو دا
نصيحة منى ليك قبل ما تفكر تحجز لاى مكان عموما اعرف طبيعة المكان ال انت طالعه وايه الحاجات ال ممكن اعملها وهل هى مناسبة لدماغك ولا لاء
التقرير دا بالكامل والصور من اعدادى وتصويرى فرجاءا اثناء نقل البوست نقله مع ذكر المصدر وكل مكان مكتوب فى البوست هنا هتلاقى ليه صور فى البوست
تقدرو باستمرار تتابعو بروفايلى وكل البوستات الجديدة فى صفحتى الشخصية من الرابط دا :
/Mohamed Elnjjar
#مصر_التى_لا_تعرفونها
اتعرفو معانا على تاريخكم وشوفوا بلدكم بعيون مختلفة . تقدروا تتابعونا وتعرفوا اخبار وتفاصيل الرحلات بمجرد ما نعلن عنها من خلال صفحتنا الرسمية من الرابط التالى :
/حملات تنشيط السياحة الداخلية Campaign of the Egyptian Tourism
او الجروب الرسمى بتاعنا من الرابط التالى :
/فيها حاجة حلوة
