زرت السويد كذا مرة. بلد جميلة جدا معلوماتي قد تكون مش مضبوطة قوي انما المواقع المرفقة أكيد تقدر تساعدك.
- الدراسة مجانية في البكالريوس والماجستير بس لازم باللغة السويدية (مع وجود بعض برامج الماجستير باللغة الإنجليزية). لازم درجاتك و تقديراتك تكون عالية جدا ومعاك تويفل او ايلتس بتقدير كويس.
الموقع ده يساعدك للدراسة
/Study in Sweden
للعلم بعض الجامعات دلوقتي بدأت تبقي بمصاريف. بس لسه الأغلبية مجانا.
- اذا اخدت تأشيرة دراسة بتسمح ليك بالعمل بس بشروط (ساعات عمل محددة و أماكن معنية)
- اللغة الرسمية السويدية بس الناس بتتكلم انجليزي كويس جدا. و للأسف دي ميزة و عيب. ميزة انك مش هاتتعب قي التواصل مع الناس هناك. العيب هايبقي صعب تتكلم اللغة السويدية لأنك هاتستسهل الانجليزية.
- في تفرقة عنصرية بدرجات متفاوتة. بس السويد أحسن من المانيا مثلا (هو التعميم ده مش صح قوب برضه). هو علي حسب المدينة والمكان. في مدن المهاجرين فيها بقوا كتير فأكيد مش هاتحس بعنصرية وفي مدن ممكن تلاقي فيها عنصرية. بس هي مش عقبة اطلاقا. الجامعات أحسن مكان مافيهوش عنصرية نظرا لأنها مكان تجمع لكل الجنسيات....
- الحصول علي الجنسية بعد 5 سنين اقامة متواصلة في السويد (مش عارف الدراسة تحسب ولا لا)
الموقع ده ممكن يفيدك.
/How to apply for Swedish citizenship
- الحصول علي عمل يعتمد علي سوق العمل وعلي قدراتك (تقديراتك الدراسية ولغتك ومهاراتك) خالي بالك انت بتتقارن بمواطنين أوروبا.
- الشفافية في السويد عالية واللي مكتوب في المواقع بنسبة 99% صحيح تماما. والفساد أقل مايكون. و الشعب السويدي من أول و احسن الشعوب الاسكندنافية انفتاحا علي الثقافات الوافدة والاجانب....بس نتيجة الهجرات الأخيرة حصل تشبع.... في رأيي الشخصي لازالوا من أفضل الدول. وانصحك و انصح أي حد يقدم فيها.
فرصة الدراسة أحسن بكتير من فرصة العمل. في سلم العمل هايفضل السويدي الأول وبعدين الإسكندنافيين (علشان لغاتهم قريبة من بعض) وبعدين الاوربيين وبعدين بقية دول العالم....يعني صعب جدا...بينما الدراسة اذا تقديراتك عالية ومعاك تقدير كويس في اللغة فرصتك في القبول هناك كبيرة جدا. (اكبر من الحصول علي عمل)
والله ولي التوفيق.
