A
'Adham Roshdy El-deeb'
:: مسافر ::
تجربتي مع الطيران التركي المحزنه الخطوط الجوية التركية انا بحذركم ياجماعه من التعامل وده الموقف اللي حصل معايا وربنا ما يكتبو علي حد فيكو ،، انا حجزت ليا ولزوجتي طيران من مصر يوم ١٩ اغسطس ( القاهره-اسطنبول) ( اسطنبول-منسك) الساعه ٨:٤٥ وموظفة مكتب الخطوط الجويه التركيه اكدتلي اني هوصل في المعاد المحدد ولم يحدث تاخير لاني انا كنت باكد عليها اني عندي مقابله مهمه في بيلاروسيا بعد معاد وصولي ب ٥ ساعات ،، الترانزيت في اسطنبول كان ساعه واحده بس وهي اكدتلي ان الطياره بتوصل في معادها ،، طبعا الطياره اتاخرت في مصر بدون اي اسباب واتحركت الساعه ٩:٥٥ بدون اي اسباب ،،، طبعا وصلنا بعد المعاد بساعه و ٢٠ دقيقه ،، جرينا في المطار نسال علي الطياره بتاعتنا وطبعا كانت طارت بقالها حوالي ربع ساعه ،، يعني واحنا لسه في الطياره الاولي مكناش لسه وصلنا .. روحنا طبعا علي مكتب الخطوط الجويه التركيه المختص داخل مطار اسطنبول قالولنا الطياره فعلا طارت لمنسيك بقالها فتره وانتم هتعدو هنا في تركيا شويه شرحنالهم اننا مش هينفع نتاخر لاني عندي معاد مهم حتي ممكن نحجز اي طيران تاني ،، قالو للاسف مفيش مكان في الطياره اللي هتطلع في نفس اليوم اللي هي ( الطيران البيلاروسي belavia) والطياره المتوفره هي بعد يومين !!!!!!!!،، بعد يومين يعني كل الترتيبات اتدمرت ومواعيدنا راحت علينا وحجم الخسائر بالنسبالنا اكبر بكتير من اللامبالاه اللي الموظفين كانو فيها ،، رضينا بقضاء الله وقولنا نستحمل ،، الموظفه قالتلنا بنحجزلهم فندق خارج المطار اليومين دول وهتتفضلو تركبو طيارتكو بعد يومين بتاريخ ٢١ اغسطس الساعه ١٣:٠٠ والاقامه شامله كل شيء ف الفندق ،، طلبو مننا نروح علي ( passport control) في المطار ونخرج بعدها ناخد شنط السفر اللي كانت مشحونه معانا ع الطياره والباص بياخدنا ع الفندق ،، روحنا علي هناك عشان نخرج من المطار الموظف بكل لامبالاه يقوللي حضرتك مصري و السن يتعدي ٢٠ سنه ومش هينفع تدخل البلد من غير تاشيره ومش هينفع تاخد تاشيره هنا ف المطار لانك مصري وسنك يتعدي ال٢٠ ،، حكينالو الموقف وان احنا عندنا المشكله بسبب شركة الطيران والتاخير قالنا وده قانون البلد وانا لازم انفذو ،، قولتلو وايه الحل قاللي ان زوجتي ممكن هي تدخل البلد من غير تاشيره لانها مواطنه بيلاروسيه وانا اروح اجيب تاشيره من مصر لاني مش معايا تاشيره شنجن ومش مسموحلي اخد التاشيره من المطار .. يعني زوجتي هتروح الفندق وحدها وانا بقعد اليومين بستني في المطار لو مش هروح اجيب تاشيره من مصر ،، رجعنا تاني لمكتب الخطوط التركيه بالمطار المختص بحالتنا قالولنا انا دي مشكلتنا وبنتاسف احنا حاليا لا يوجد امامنا حل غير اننا نفضل في المطار اليومين دول في المطار في ( resting room) لمدة يومين وهيكون معانا وجبة اكل من مطاعم في (food court) كل ٥ ساعات .. الصدمه كانت كبيره جدا انك تتعامل مثل اللاجئين في غرفة استراحه جماعيه انا وزوجتي لم ننام لمدة يومين بسبب بروده الجو داخل الغرفه ، الازعاج ، الجميع ينظر الي بعضه البعض ولا توجد حتي ستاره عازله لاعطاء بعض الخصوصيه ،، روحنا ناكل لقينا ان مسموحلنا باكل وجبات محدده من هذه المطاعم ولم نتمكن من شراء الاكل اللي بنحتاجه لان فلوسنا كانت في الشنط اللي مشحونه في الطياره اللي طبعا رفضو يدوهالنا لاننا لازم نخرج من ال (passport control) عشان نستلمها ،، لم نجد المساعده من شركتكم التي تهين بكل الاشكال من يركب خطوطها ،،، وكانت النهايه حزينه بكل التاكيد .. اما وصلنا منسك بعد يومين العذاب ،، لقينا شنطه من الشنط مكسوره ومهانه .. تاكدنا في الوقت ده انكم مش بتهينو الراكبين فقط ولكن الشنط ايضا ،، الحقيقه كانو اسوأ ايام قضيناها في حياتنا ،، والمفروض اني برجع علي مصر في طيارة ٢٠ سبتمبر الساعه ١٦:٢٠ ولكني مستغني عن التذكره ولا اريد ان اهان مره اخري .
هي تجربه لا اريد تكرارها وهي كانت اول مره علي الخطوط الجويه التركيه .
هي تجربه لا اريد تكرارها وهي كانت اول مره علي الخطوط الجويه التركيه .