كل واحد فينا لما بيسافر بيحصلوا موقف صعب في...

  • بادئ الموضوع بادئ الموضوع Mohamed Khattab
  • تاريخ البدء تاريخ البدء
عرض العطلة
#21
نسيت برفيومز وليكويدز معايا فشنطتي اللي طالعه الطياره وكان مفروض ادفع 90 يورو غرامه اللي هما اكتر من تمن البرفيومز اساسا فطلبت اني اشحنهم عالطياره وميطلعوش معايا ودا كان هيخليني استني ساعتين في المطار وممكن تروح عليا الطياره التانيه ، كان في مصري جدع هو اللي ساعدني الله يباركله <3 ومدفعتش حاجه وكنت اخر واحده لحقت طياره اساسا هههههه
 
#22
اتعلمت اني ما اصحيش ماما وازعجها واعيطلها فالفون لو هي مفيش في ايديها حل يساعدني هههههههه بس الصراحه دعواتها اللي انقذتني <3
 
#23
كنت مسافر الصين ومراتي كانت هناك وبعد ماركبت الطياره اكتشفت اني ناسي المحفظه بالكريديت كارد بالفلوس والموبايل كان فيه 10 % بس وترانزيت تركيا خمس ساعات .والحمدلله عدت علي خير وسافرت
 
#24
كنت راجعة من ابوظبي ترانزيت على مصر والطيارة طول الرحلة كنت حاسة انها هتقع وكان الكابتن اللي سايق اسمه البرتو والله مابنسى اسمه واحنا نازلين عالارض والله نزل نزلة دب عالارض كأن فيل وقع من دور عالي انا اتشاهدت وقولت الطيارة وقعت ..اقسم بالله هبوط عمري مااهنساه ابدا ..مطلوب حيا او ميتا كابتن البرتو ده حسبي الله عالرعب اللي الواحد شافه
وعالعكس مواقف مضحكة حصلتلي.. ف مطار الرياض كنت بصلي الفجر وانا بصلي سمعت نداء الرحلة فخلصت وجريت قابلت ظباط بسألهم اروح منين فسألوني انتي طيران ايه قولتلهم طيران الرياض
موقف تاني ف مطار جدة كنا ف رمضان كنت عايزة اشرب حاجة سخنة وماية ساقعة بس معييش فلوس سعودي والراجل بتاع الصرافة مكنش موجود كل شوية الف وادور والاقيه لسه مجاش وفضلت ساعة اطوف ف المطار على امل الراجل ييجي المهم جت الرحلة وطلعت الطيارة وانا هموت من العطش وطلبت ماية من المضيف ونساني ومشربتش والراجل اللي جمبي صام هو كمان ..وهما بيقدمو الاكل اتحرجت اطلب الاكل عشان اكل واللي جمبي صايم صعب عليا ههههه ونمت من التعب والإرهاق بس اتعذبت بريحة الاكل اقسم بالله كانت مالية الطيارة ..بس كملت صيام بقى ..اصل مااتعذبش بريحة الاكل عالطيارة وانزل افطر
 
#25
كنت في اسطنبول في اعياد الربيع العام الماضي وكانت من امتع ايام حياتي 12 يوم روعه بس عشان الحلو ميكملش قبل سفري بيوم واحد صادف يوم عيد العمال وكان المترو مغلق لمحطة تقسيم اللي عندها الفندق وكل الميدان مغلق اضطريت امشي حوالي 15 كيلو وحوالي 3 ساعات في دوائر حلزونيه عشان اعرف اخترق الحصون واعبر من بعد الميدان( وجوجل مابس كان الدليل ) وكنت شايل فوق كتافي شنط شوبينج من الوزن المحترم حوالي 12 كيلو ( اخر يوم بقا) .. مش مهم كل اللي فات الكارثه اني كنت سايب المدام والاولاد بيلعبوا في حديقه جولهانه وقلت لهم ساعة زمن وارجع تاني رجعت بعد 4 ساعات ومكنش معاهم لا نت ولا ت فكانت لحظات مهببه..لا قادر ارجع لهم من نص الطريق عشان الشيل اللي فوق كتافي دي ولا عارف اريح في الطريق من المشي والجري و لا عارف اوصل الفندق.. اتهنت مشي ومرمطه في اليوم ده بصراحه
 
عرض العطلة
#26
راكب فى طيارة صغيرة موديل السبعينات روسي نازلين دبى... الطيار بيقلل ارتفاعه وبدات اسمع صوت حاجات بتخبط فى بعضها.الصوت ده وكانه حد بيحاول يدى غيار ومش عارف...الصوت بدا يعلى وفى ريحة شياط بسيطة.الاول ماقلقتش لغاية لما لقيت المضيفة بدات تقلق وبتلبس حزام الأمان وهى مرتبكة....الطيار بدأ فى الهبوط بيقلل ارتفاعه والصوت لسه مستمر مع الريحة لغاية ما فاجأة راح عامل واحدة امبليه زى قطار المووت كده اللى هو لأ مش نازل يا جماعه.
طبعا مع الخضه والصويت اكتشفنا ان العجل مش راضي ينزل !!
((مش راضي ينزل ازاى يعنى؟؟))
وراح لافف بزاوية حادة لاول مرة احسها من ساعه ما ركبت طيارات علشان يرجع ويحاول ينزل تانى.
انا ساعتها اعترف انى لاول مره اخاف فى حياتى وانا عمال افكر فى السيناريوهات المحتمله.... اتشاهد بسرعه طيب.فلوسي اهلى هايستفيدوا بيها وهايعرفوا يستلموها ولا لا (حوار المغتربيين)...أتشاهد تانى بسرعه وبصوت مسموع...مش مستعد للموت والذنوب كتيرة..ابنى هايبقى يتيم...هايعملوا حصيرة فوم ولا شبك مع فوم علشان يقلل التصادم والاحتكاك؟ هو مفروض احط ايدى ازاى وقت التصادم لو جرب ينزل من غير عجل؟
كل ده مع موسيقى تصويرية عبارة عن صويت بنات فلبينيات وصوت عجل الطيارة اللى مش عاوز ينزل وريحة الشياط الغريبة.
#لحظة_رعب
 
#27
كنا بنسافر بري بين مصر والسعودية ما كانش في خط سفاجا _ضبا كنا نركب مركب من جدة للسويس نقعد فيها ليلتين و3 ايام في مرة قامت عاصفة وكنا بنموووت وكان قبلها في مركب غرقت وانا كنت مرعوبة جدة شوفنا الرعب طول الليل لغاية ما النهار طلع كلو الناس كانو بيصلو وبيشكرو ربنا .. الحمدلله
 
عرض العطلة
#31
كنت فى رحلة للمغرب بمدينة تطوان واول مرة ازورها ومعرفش فيه اى حد ووصلتها بليل والحو برد جدا ونسيت شنطة سفرى فى التاكسي وكان فيها الفيزا و500دولار والتذكرة وكنت بعرق من كل مكان فى جسمى من الموقف والخوف من البهدلة وكانت مغامرة مريرة وليلة صعبة جدا لغاية ما ربنا اكرمنى ووصلت للشنطة تانى وروحى رجعتلى... وبعدين اصبحت قصة. لطيفة ضمن حكاياتى فى التاكسي بالمغرب وكتبتها فى كتابي النغرب فى عيون مصرية
 
#32
كنا مسافرين دبي وبعد ما الطياره نزلت خلاص والعجل بينزل طلعت تاني واخدت بينا لفه كمان نص ساعه كان اعصابنا ف رجلينا
 
#33
مسافر ميلانو والطياره نزلت فى روما عشان التلج فى ميلانو ومعايا 8 اسر كلهم مش بيعرفوا يتكلموا ايطالى وفى بنت صغيره حالتها صعبه وبنت حامل وكان سنى 19 سنه واتخانق مع الخدمه الارضيه عشان الفندق لازم نكون مع بعض لانهم مش بيعرفوا يتكلمو ايطالى وتانى يوم بدرى هما اللى صحونى عشان ميعاد الطياره وركبنا و وصلنا بسلامه ومش معايا غير 2 يورو فى جيبى لن خالى كان مستنى فى المطار بس عديت على خير
 
#34
كنت راجع من اليونان ع ألمانيا والطيار بعد ما نزل طلع تاني قالك نزلت غلط وفيه عطل مش فاكر ف ايه طبعا انا خوفت والنَّاس ال جنبي كله قعد يبص للي جنبه نظرات الوداع
 
#35
كنت بقضى الاجازه عند اختى ف الكويت وانا راجعه مصر وطبعا اول مره ابقا لوحدى اختى قبل مادخل قالتلى حطى التكت والجواز ف الشنطه عشان انتى هبله شويه ممكن تنسى وترميه طبعا عملت البت الجامده وقولتلها عشان كلامك دا انا همسكهم ف ايدى بعد ماسبونى ودخلت جوا وانا معرفش حاجه ومبعرفش اتصرف لوحدى دخلت وحصل موقف كدا قدامى فوقفت اتفرج ونسيت نفسى وبعدين مشيت وجيت ادخل ابص ف الجواز والتكت ملقتش غير الجواز بس اتصدمت ومن كتر صدمتى قعدت اضحك اوى والناس بتتفرج ومحدش فاهم حاجه ووقتها افتكرت كلام اختى ليا وزى ماتقولوا كدا دماغى وقفت عن التفكير ولا حتى عارفه اطلب مساعده من حد وواقفه ادعى ربنا انى اعدى من الموقف دا ورانه يسترها معايا وبعد عشر دقايق كدا ببص لقيت واحد هندى ماشى ومعاه تكت وبدون اى تفكير جريت عليه ومسكت ايده واقوله دا بتاعى وهو يتكلم وانا مش فهماه وبعد مجادله طويله جى واحد مصرى ووقف وحل الموضوع وف الاخر اخدته ومشيت ومن وقتها وانا منستوش ابدا وبقيت اخد بالى بعد كدا من كل حاجه
 
عرض العطلة
#36
أنا سافرت في عبارة السلام 98 قبل ما تغرق بسنه من السعودية لمصر و كنت ساعتها 10سنين تقريبا .. و لما جينا نشوف سترة النجاه في الكبينه بتاعتنا اكتشفنا إن 4 من أصل 5 ستر النجاه مخرمه و غالبا مش نافعه و دا خلق أفكار مرعبه كتير .. و بالليل منظر البحر الواسع كان يخوف و ما رضيتش أنام طول الرحله .. فيلم تايتانيك كان مأثر جامد .. فكرة إننا نغرق و نتحبس جوه السفينه و نتوه عن بعض .. حاجه تتعب القلب
 
#37
كنا مسافرين انا وصحابي دهب الساعة ٦ بليل وقررنا ندخل طريق طابا كنا ماشيين لوحدنا ف الطريق مفيش فرد ماشي ابدا كنا بنعدي ع الكماين في كماين مفيها فرد عسكري وفي كامين واقفين بره بسلاح علشان ده كمين شمال وجنوب سيناوسبحان الله اول لما دخلنا الكمين النور قطع والظابط قلنا امشوا بسرعة خدنا الرخص والبطاقة وجرينا الطريق كان مدغدغ لدرجه ان تنك البنزين اتخرم البنزين بينزل بسرعة جدا وحولينا صحرا محدش شايف حاجة الحمدلله حلينا الموقف وده كان من عند ربنا مشينا لحد مدينة نخل و فضلنا ماشيين انا وصحابي ف طريق طابا المفروض بتقابلنا داخلتين ف اخر طريق طابا داخله بتاعت طابا اللي بتوديك ع طابا ونويبع ودهب وداخله التانية بتاعت الحدود المصرية المهم ان كمين الجيش كان واقف قبل الدخلتين شاف الرخص وكل بطاقه ومشينا بدل ما ندخل دخلت طابا نويبع دهب دخلنا الحدود مع اسرائيل فضلنا ماشين في الطريق لحد لما الطريق اتقطع وفيه اسلاك شايكه وعينه متشوف النور بقي طبعا ٢٠ كلب اتلموا حوالين العربية وعساكر وبتقول اطفي النور وناس بتظهر قدامك بسلاح وطبعا عرفنا اننا ع الحدود اول حاجة عملتها فتحت الشباك قولتله طريق طابا منين الحمدلله سبونا نمشي واحنا راجعين بقي كمين الجيش اللي عدينا منه مكنش فيه غير اتنين عساكر اول لما جينا نرجع من ع الخدود للكمين الكتيبه كلها خرجت متعرفش منين وردار المهم شاورلنا من بعيد علشان نقف قبل الكمين واتنين عساكر دخلوا علينا اول كلمتين قالوها تصدق بالله احنا رفعنا الاجزاء وكنا هنضرب نار عليكوا علشان محدش بيدخل ويخرج من الطريق ده نهائي والحمدلله حصل اللي حصل ووصلنا دهب بعد مغامره ١٥ ساعة طريق طابا
 
#40
انا كنت مسافره من مصر على طيران الخليج سنه 93 من زمن كده و قبل ما تتحرك الطياره حصل ان سيده من احدى دول الخليج قامت و زعقت وراحت قايله تفوه عليكي يا بلد ( بتشتم مصر ) وانا بقى كنت سمعت ان لو حصل حاجه مش عجباني ممكن اطلب امن المطار على الطياره و رحت ظايته بقى و قولتلها انتي بتشتمي بلدي و قومت و زعقت و المضيفين جم يهدوا فيا و انا ابدا و قلتلهم والله الطياره ماهي طالعه في حته انا عاوزه امن المطار الست دي بتشتم بلدي قاعده لسه على ارض مصر و تشتمها بس بصراحه كنت محموقه جدا و كنت بتضايق ان حد يشتم بلدي لحد ما جالي مساعد الطيار و كان من البحرين و راح قعد على الارض و قالي ارجوكي هخليها تتأسفلك و تعتذر بس خلينا نتحرك احنا بنخسر الاف الدولارات و قامت و اعتذرت ليا و للناس و انا طبعا احرجت من الطيار جدا و مكنتش اعرف ان الموضوع كبر للدرجه دي بس مش ندمانه على الي عملته
 
عرض العطلة
عرض العطلة
عرض العطلة
أعلى أسفل
عودة
قائمة