انا في السكه لبورسعيد و كنت عايز اعرف اماكن...

[Wagdy Fahim]

انا في السكه لبورسعيد و كنت عايز اعرف اماكن للاقامه بأسعار كويسه هناك بس مش فنادق ممكن لو زي هوستل ؟!

 

[Moutaz Mohamed]

Shereen AboSamra

 

[Jqo Jqo]

عايز فى رنج كام وهتقعد اد اية

 

[Mostafa Salem]

ياعم مابلاش ده انت هتلاقى مناحة هناك دلوقتى

 

[Akram Essam Mohamed]

قولهم مبروك للاهلى

 

[Ash Morter]

كان فيه هوستل ادام إستاد بورسعيد بس ده كان من زمااااان جدا وكانوا سيئين للغاية. انصحك تشوف فنادق اسعارها معقولة زي ديلابوست

 

[Abdelrahman Atta]

اوعي تبين انك اهلاوي

 

[Sah AR]

بيت الشباب الي جمب فندق القوات المسحله نضيف جدا بصراحه

 

[Abdulatif Salem]

هتلاقي في شارع التلاتيني الرئيسي كتير

 

[Es Lam]

اسال على المدينه الشبابيه اللى جمب مديرية الشباب كوييسه جدا

 

[Gehad Eltahan]

#الناس اللي عوزه تروح #مصيف #بورسعيد

اولا :
لو مش حاجز فنادق انزل في شارع الثلاثيني او ش محمد علي او ش اوجيينا كلهم فنادق حلو وأسعار مختلفه ...

لكن لو عاوز اعلي شويه يبقي في آخر شارع الثلاثيني فندق light ctiy وهينزلك فطار ....

اما لو عاوز قري سياحيه عندك من مدخل دمياط لحد نادي الصيد كلهم قري سياحيه من اولها قريه الفيروز وقرية الكناري والكروان والنورس وجنة النورس وقرية مرحبا وفندق الباتروس وعندك فندق هلنان وفندق رستا عند ديليسبيس دول قري سياحيه كلهم حلويين ....

وفي كمان قريه الفردوس هي خارج بورسعيد ب 5 دقايق فقط وبها مواصلات داخليه وبها اكوا بارك ...

لكن لو عاوز حاجه فوق الخيال وجامده يبقي قريه مرحبا هتلاقى هناك خدمة مميزه وخدمة vip ....

لو ليكم في بيوت الشباب والرياضه موجود و رخيص جدا وموقعه قريب من البحر ...

اضافه كمان الي المعسكر الدولى للكشافة والمرشدات تكلفه الفرد مبيت فطار وغدا وعشا 100جنيه وممكن أقل لو مجموعه وممكن مبيت من غير غدا وعشا 50جنيه وقريب من البحر والتجارة والسوق الكورنيش ....

الخاص بالاكلات البحريه لو عاوز تاكلو اكلات بحريه تطلع عند مجمع المطاعم خلف نادي القوات المسلحه هتلاقي هناك جميع المطاعم اشهرهم #البرج و #الكاستن بس الأسعار غاليه شويه
وابقي روح بالليل عند علي بابا في سوق البازار ( سندوتشات اكلات بحريه )
لكن لو عوزه حاجه في المعقول وجامده وخدمة وجوده ممتازه يبقي مطعم #ابن_حميدو في شارع 23 يوليو امام مسجد صالح سليم وقريب جدا للي جاي من دمياط ....

عندك بردو مطعم #سماكتو في شارع الاستثمار في مدخل البلد للي جاي من الاسماعيلية بشارع عبد الرحمن شكري عند سور مصنع الغزل والنسيج ...

لو ليك في الكشري عندك رقم 1 #شوقي للكشري من اشهر المحلات في بورسعيد و هند والخديوي ...

التاكسي ب 5.5 جنيه داخل الحي الواحد مهما كنت فين هيوديكي اي مكان ....

الخاص بالقعدات والسهرات عندك كتيررررررر لكن فيه عندك جيانولا في شارع #الجمهوريه قعده vip وعندك بيتزا بينو قريب من الممشي السياحي عند #ديليسبيس برضه vip وعندك الشيف خلف مدرسه المتحف الحربي وعندك طول شارع طرح البحر قريب من الشيف برضه قعدات حلوه ...

ولازم تتمشو عند الممشي السياحي و ديليسيبس وتاكل ترمس والتين الشوكي ...

لعشاق الشيشه عندك كتيررررر جدا ( الصحبجية - #النورس- سيتي ستار - #هيرو - خلف - #ميركاتو - البحريه - الجيزي )

عندك مول جديد فتح قريب واسمه ( #ستايل سكوير ) شامل كل حاجه مطاعم مشويات واسماك وكافيهات وحمام سباحه ولعب اطفال وجيم ...

وادخل بقي علي #كاستا من عند #سلسبيلا طعم جامد جدا وهوا الوحيد في مصر اللي بيعملها بالطعم ده في شارع الثلاثيني .... وجرب من عنده عصير القصب يجنن ....

التسوق من شارع الحميدي وشارع التجاري وشارع الثلاثيني أسعار متوسطه ولو عوزه حاجه عاليه وأسعار ماركات عالمية في شارع الجمهوريه وعند قريب من الممشي السياحي ومحلات كتير في طرح البحر ....

ولو عاوزه هدوم #باله ولعلمك في السوق هدوم جديده في سوق الباله صدقيني ده هتلاقي أسعار منخفضة وحاجات حلوه جدا لان بتبقي فوائض المحلات في الخارج وبينزلوها ع انها مستعمله لكن في الحقيقه جديده والمهم قبل دا الفصال ...

#الأسماك لو عوزه تجيبي أسماك عندك 3 اسواق أما سوق السمك القديم اللي عند سوق ستوته
أو سوق سمك رضوان بجوار قصر الثقافه في الامين
او سوق السمك بشارع النصر امام سوق الباله ....

بس ابقي اعملي حسابك في سمك طازه وسمك لا ...

وخودي علبه الفليين وحطي فيها ثلج عشان السمك وممكن تجيبي علبه ديه من شارع الحميدي او من عند السوق فيه واحد بتاع أدوات صيد هتلاقي عنده ده ....

وانصحك #تحذير #بلاش تتسرعي في شراء الكابوريا وجمبري عشان لان ممكن هتلاقي كابوريا فاضيه والجمبري صغير إلا من رحم ربي ...

تجربة : Ranona Hassan
منقول يارب يفيدك

 

[محمد جبالى]

فندق بانوراما ٤٠٠ جنيه و ٣٥٠ جنيه فطار فقط بوفيه مفتوح

 

[Raghda Dawood]

انا عايزة رقم نادي القوات البحرية اللي هناك

 

[Heba Popo]

لو هوستيل كنت عملت اشتراك بيوت الشباب هنا نضيفه ومستواها كويس عندنا واهلا بيك في بلدنا تنور

 

[Bosy Mohamed Ali]

مبلاش النهارده الاهلى اخد الكاس

 

[إِيمَانٌ اَنْسِ]

روح مدينة الشباب، عند الاستاد بالظبط

 

[Muhammed Salah]

الطريق هيبقا زحمة عشان الليلة عيد فبورسعيد

 

[Mohamed Farg]

ابعد عن بورسعيد دلوقتي البلد في نكد
لما المصري بيخسر بيضايقوا جدا والعكس والله
ده لما المصري ييكسب ساعات وانتا خارج مبيحسبوش عليك جمارك ..حصلت مع اهلي

 

[شهاب السويفي]

واللة البوست دة جة في وقتة انا كمان رايح بورسعيد يوم الاحد وعايز اعرف اتشري ملابس منين افضل مكان الي يعرف يريت يرد

 

[Ahmed Saadoun]

بيت الشباب وراء الاستاد
خود غرفة لحالك