كل سنة زي اليومين دول يطلع موظف سياحة من شرم ينتع بوست طوووويل عررررررررررررريض عن المواطنين المصريين الوحشين اللي بياكلو كتير من الأوبن بوفيه وبياخدو اكل معاهم وبيشطفو عيالهم في البيسين وبيطفشو السياح وبيعضو الموزز
عزيزي موظف السياحة الشاطر الحيلو اللي ياعين امك رماك الزمن الأغبر في الشغلانة دي
عارفين يا حبيبي انك متعلم تعليم عالي وخريج جامعة وانا مالي
بس بقي انت كمان لازم تعرف ان
_ السلوكيات المعفنة دي بتتعمل من كل جنسيات العالم يا قلبي الأمريكان والفرانسويين بيمسحو كاكا في الحيطة بتاعة الأوضة والملايات يا ضنايا جنسيات شرق اسيا بيشيلو الأكل في علب بلاستيك معاهم لحد الأوض ولو متعرفش تبقي مشتغلتش في سياحة ولو عارف تبقي بتستعبط وانت بتغلط في اهل بلدك
_المستوي المتدني بتاع الناس البيئة الوحشين دول تقدر تتكلم مع مديرك يبطل يعمل عروض هو بالمناسبة عامل العروض دي وعارف انه مستهدف ناس غلابا عشوائيين بالأسعار دي عشان يعرف يلم مرتباتكم يبقي تستحملوهم وتعملو لوايح للأوتيل زي باقي الأوتيلات المحترمة في العالم
_سؤال علي جنب كده يا متعلم يا متربي يا بتاع السياحة والأصول هو تصوير الجيست في الأوبن بوفيه ده مش تعدي علي الخصوصية بتاعته وتعتبر جريمة لازم تتربي من تاني عليها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
_هو انت فاكر لما تصورلي ست كبيرة في السن حاطة قمطة علي راسها ولابسة جلابية بلدي في اللوبي هتعاطف معاك لا يا بابا ركزز فيها هتلاقيها شبه امك بالظبط وعموما سهلة ممكن تكتب علي باب الأوتيل الدخول بالمايوهات الرسمية
_هما بيتنكو عليك ويغلطو فيك عشان خلقتك الكشرة اللي بتقابلهم بيها انت بتقلب سحنتك في وشهم وتتعمد تنطق حاجات انجلش عشان تقرفهم وتعقدهم بينما انت الي عندك نقص
_حكاية سرقة الفوط والشوك والسكاكين منتشرة في كل حتة في الدنيا مبقولش انها صح بس في نجوم وفنانين ولعيبة كورة بيتفاخرو انهم بياخدو تذكار من الأوتيل لدرجة ان في اوتيلات بتكتبلك علي باب التواليت استمتع بوقتك ولا تنسي اخذ بعض متعلقات الحمام اه والله ممكن تدور وتشوف
_ لما بيجي سايح من اي بلد تانية ممكن يكون مقزز ومقرف وتصرفاته شاذة وغصب عن بوذك بتبتسم في وشه يبقي ولاد بلدك اولي
_ اخيرا يا حبيبي يا ضنايا والله وربنا ماهما اللي مطفشين السياح
دي بسبب ظروف بلدك الأمنية ياسواد عيني ولو في حد فعلا بيطفش السياح يبقي سيادتك بالسلبيات اللي بتنشرها دي
متبقاش مواطن بائس والقهر رماك هنا وتطلع غلبك في واحد بائس زيك حب يفك عن نفسه يومين البؤساء مش لازم يعضو في بعض
#منقول
