R
Riham Hussein
:: مسافر ::
اليونان بلد حلوة جدا. كان نفسي اقولك رخيصة بس هي الفكرة ان اليورو دلوقتي غالي. لو عايزين تاريخ وآثار وكده تنزلي أثينا هتحتاجي فيها تلات ايام او اربعة بالكتير تلفي المتاحف والأماكن الأثرية وميدان سينداغما syntagma ( التحرير بتاعنا) ومكان هناك في وسط البلد اسمه plaka زي خان الخليلي كده. لو عاوزة بحر وعوم وطبيعة وكده جزر اليونان كتيرة وغاية في الجمال بس تجنبي ميكونوس وسانتوريني لانهم غاليين جدا وفعلا في جزر كتير أحلى زي kefalonia lefkada zakinthos Corfu بس دول مشكلتهم انهم في أقصى الغرب بس سهل انك تروحي من واحدة للتانية لانهم قريبين من بعض بالمراكب. المشكلة بس انك توصلي هناك ممكن تاخدي من اثينا لكورفو طيارة الطيران الداخلي رخيص وهناك تزوري كورفو وبعدين تنتقلي من واحدة للتانية (بصي ع الخريطة عشان تشوفي ترتيبهم) وفيه في أثينا مينا معروف جدا اسمه Pireas بتطلع منه مراكب لجزر كتير حوالين أثينا اختاري بقى وعيشي وممكن برده تروحي واحدة وتنتقلي بينهم بالمراكب. وممكن تروحي كريت بس كريت بتاخدي طيارة أثينا كريت وبتنزلي هناك مش هينفع تروحي مكان تاني لانها كبيرة أصلا وممكن تلفي فيها براحتك. بالنسبة للفنادق الصراحة مقدرش افيدك اوي لأني مانزلتش هناك فنادق أبدا بس كنت باكل برة الاكل برة حلو جدا ومش غالي انتي ممكن تنزلي فندق 3 نجوم مثلا بالفطار بس وتتغدي برة.