مساء الخير علي اعضاء الجروب الكرام كنت عايز...

[Moutaz Mohamed]

مساء الخير علي اعضاء الجروب الكرام

كنت عايز اخد رايكم في موقف حصل علي الجروب عشان نعرف احنا كاداره لجروب غلطانين و لا صح و برده عشان استاذنا المحترم Amr طلب مني اشير كلامه بدون تحوير.

دلوقتي ضيف اجنبي نزل سؤال ايه الاماكن الي تتزار في مصر و يكون بعيده عن الزحمه؟

طبعا كما هو المتوقع قله من الاعضاء ردوا دود سلبيه و اغلبكم لمحتوها قبل الحذف.

بس منهم الاستاذ المحترم طبعا استاذ Amr رد علي الشخص انه بيحظر الشخص الاجنبي انه ميجيش مصر و طبعا مسحت البوست بتاعه (الي شايفني غلطان) يوضحلي طبعا.
بعد كده عضوه اسمها Mariomano دخلت و عملت نفس التعليق و زودت عليه تعليق تاني بنفس المعني و دخل استاذنا المحترم Amr دافع عنها و مضايق جدا انه تم حذف التعليق الخاص بيه و ان في واحده غلطت فيه و قالتلوا انت سلبي فبالتالي كان ردي هل ده نوع من الاستظراف و لا الخفه و طبعا لقيت رد من استاذه Marwa داخله تدافع عنهم علي ان ازاي اكلمهم بالاسلوب ده.
عموما انا عامل اسكرين شوت عشان استاذنا المحترم الغظيم استاذ Amr طلب مني محورش في الكلام و طبعا ليا الشرف ان استاذ عمرو يعلمني الرد المحترم و اللباقه في الكلام تحت مبدا حريه الراي.
ليكم مطلق الرد و الي شايفني غلطان ان مسحت الردود السلبيه فممكن يوضحلي عشان ابقي اخد بالي.

ملحوظه:
مش معني ان بمسح الردود السلبيه عن البلد يبقي ان وطني و ماسك مدفع رشاش بس مبداي حتي لو ليا راي سلبي فاخليه علي الفيس بوك الشخصي ليا مش علي الجروب احتراما لمشاعر الناس و احتراما لاجنبي الي احنا نعتبر وجه لبلد.

 

[MuHammed Khaled]

اللي حضرتك عملته صح

 

[Abdulrhman Sofian]

ال2 اعملهم Ban

 

[Shrouq H Ebrahem]

معاك جدااا فى تصرفك الناس دى المفروض انها واجهه لبلدها لان الجروب بيضم كذا جنسية غير المصرية والنوعية دى معرفش ازاى ضميرها مطاوعها على اللى بتكتبه ده مادام شايفين حاجات سلبية مايروحوا يغيروا منها ويحاولوا ولا حد ماسكهم!؟ كل بلد فيها الحلو والوحش انما اى بلد تانية مش بمبى زى مالناس فاكرة كل الحكاية ان اهلها عندهم دماغ ومخ وبيعملوا الصاالح لبلدهم

 

[Shady Mohamed Safwat]

معتز..فيه ناس كتير اوى بقت فعلا بتكره مصر وناسيين انها بلدنا فى الاخر..انا دخلت بقول ان مصر فيها اماكن من الاجمل فى العالم وان السايح ملوش علاقة اصلا بالسياسة ده جاى يتبسط..وان انت لو معارض للحكومة دى حاجة والسايح ملوش علاقة هو مش هيعيش فى مصر..عايز اقولك اتشتمت بأمى واتشتمت كل انواع الشتيمة والكلام كان على صفحة اجنبية فيها ملايين وناس كتير اجانب كانوا بيشكروا فى مصر والمصريين بيشتموا فيها..

 

[Mina Emad]

انت صح انا ليا كتير اصحابى برا و بتقول سلبيات بس مش بتظهر عشان صوره البلد الا احنا بنموت فى كره البلد و نحب تبقى اخيره رغم اننا ممكن نصلحها انت صح مليون الميه
الوطنى مش بالسلاح بس كفايه انك تخلى صوره بلدك كويسه

 

[Shimaa Hassan]

واخيرا .. حضرتك انا بعتلكم على كميه الكومنتات اللى من النوعيه دى وان لازم تتشال من البوست اقسم بالله انا اعرف جنسيات كتير عمرى ما شفت واحد من اى دوله فى العاااالم بيكره الناس فى بلده واظن الناس اللى بتسافر ملاحظة ده حتى لو كانت الدوله من دول العالم الثالث

 

[Naglaa Maklad]

حضرتك الى يكتب تعليق سلبى ينفر السياح من البلد واحنا فى اشد الحاجة لتنشيط السياحة يعتبر خائن لبلده .

 

[Ahmed El-Baqari]

مش فاهم الناس بتكرة لية ان حد ينزل بلدنا يزورها ؟ هي الناس دي مش فاهمة ان فية اسر كاملة قايمة علي واحد بس ينزل يزور البلد ؟ الناس دي مش فاهمة ان سلوكياتنا كأفراد هي بداية السوء في خدمة السياحة في مصر ؟ الناس مش فاهمة ان تعليق سلبي زي دا علي السوشيال ميديا مبيتحصرش في اطار شخص اللي قالة وبيتعامل التعليق علي انة سياسة دولة ومجتمع ؟
نفسي نبقي زي الدول المحترمة اللي المواطن بيعبر عن روح البلد نفسة ربنا يهدي

 

[Abdulrhman Sofian]

ما ممكن لو حد قالي اجي مصر اتعرف عليها ممكن اوديه الحسين و شارع المعز و الاهرامات و الساحل و شرم الشيخ و طابا و البلوهول وابو الهول و دهب و الغردقة و سهل حشيش و العين السخنة و الزمالك و المهندسين و المعادي

و ممكن اوديه الدويقة و بطن البقرة و ورشة القطن و بهتيم و اسطابل عنتر - بالعقل كدة ايه الاحسن؟؟؟
ما ال2 موجودين في مصر و ال2 واقع

 

[Mostafa Salem]

ايه ياعم العيال المتخلفة دى امسحهم هما نفسهم

 

[Nehal Mohamed]

حضرتك صح جدا ،، واللي مش عاجبه يطلع من الجروب ،، مافيش حاجه اسمها راي ، ازاي حد يسال عن البلد اقوله ماتجيش مش فاهمه والله الناس جرالها ايه

 

[Sami Ismail]

انت صح واللي مش عاجبة الطريقة دي يمشي

 

[Moutaz Mohamed]

انا بس نفسي يرد عليكم بلاش عليا و انا هلتزم الصمت

 

[Nader Saleh]

هو ال Trip Advisor بيشيل التعليقات السلبية ولا بيسيب التعليقات من باب الحيادية والتقييم الكامل للمكان او الدولة قبل زيارتها؟؟؟؟ مثلا لو اجنبى سأل عن منطقة الاهرامات اقول له منظمة ولا اقول له حتلاقى مافيا هناك ؟؟؟؟

 

[أحمد حسني]

وظيفة الادمن انه يحافظ على التزام الاعضاء بقواعد الجروب ، و اي حد مش ملتزم بده بتنبه عليه و تمسح التعليق او تعمله بان و ده مفيش اي خلاف عليه
لكن انك تنزل بوست مخصوص بواقعة ناس معينه و ما سيتبعه من مؤازرة اعضاء في الجروب عن طريق مهاجمه الناس المذكورة في البوست فده اسلوب مش ظريف و فيه شخصنه و باعتبره كأنك بتفرشلهم الملاية و تستعرض عضلاتك كأدمن في الجروب عليهم .
من حقك تمارس الرقابة على الجروب للحفاظ عليه ، لكن بدون الاسلوب ده
بالاضافه بقى ان من حق اي حد يقول اراء ايجابية او سلبية طالما بدون تجريح او اساءة ، كل واحد حر في رأيه
هو الناس اللي كان ليها تجارب سلبية مع مصر للطيران و كتبت ده يبقى نقول عليهم خونه و كله تمام !!!!!
او ينفع اشجع حد انه يجيي زيارة للهرم بمفرده و اقوله كله تمام من غير ما انصحه و انا باشوف بعيني بيعملوا في السياح ايه من استغلال و قلة ادب و خلافه !!!!!!!

 

[Fatoma Mohammed]

انا من رأيي طالما البوست شخص بيسال عن حاجة او بيقول تجربته في سفر ..لو في تعليقات سلبية ومش عجبه الشخص ..صاحب البوست من حقه يحذفها ..اما لو في رأي بطريقة محترمة خلاص ..مهمة الادمن انه يراقب البوستات الي نازلة ولو في شخص غلط او اساء في كومينت ..ع الادمن يحذفه ..طالما الناس تنزل بوست بتسال عن حاجة ليه متكونش ردود اجابة ع حاجة معينة..ولو في حد عايز ينصح الشخص ممكن ينصحه بطريقة محترمه او يبعتله رسالة

 

[Ahmed M. El Shireef]

انت صح جزئيا، من الطبيعي إن يكون في رأي سلبي مش منطقي إن لما حد يسأل سؤال يلاقي كل الإجابات بتمدح في البلد و الأجنبي إللي هيقرى فاهم كده و بيدور على حد يقوله الحقيقة، انا ماشفتش إللي كان تعليقه سلبي قال إيه، لكن المفروض في حالة هنحكي حاجة سلبية لحد بره مانقولهاش بشكل عام يشوه صورة البلد لكن المفروض يتقال نصيحة كاملة، يعني مثلا تخلي بالك من النشالين أو المتحرشين إزاي، و إيه الأماكن إللي آمنة تتراح. انا من رأيي إن مش صح نقول البلد ماتتزارش لإن في سياح كتير موجودين بالفعل و عايشين حياتهم لكن مش صح برضه نزوق الموضوع اكتر من اللازم ونلبس إللي هييجي من بره في الحيطة

 

[Ahmed Hamza Meringue]

خلاص يبقى اكتب عالجروب ان ممنوع الاراء السلبية
يعني لما حد يقولك انا رايح ليبيا او سوريا اي حد يقوله لا ما تروحش عشان فيه حرب هناك ابقى امسح الكومنت بتاعه عشان سلبي ...
او اكتب ان رأي مخالف لرايك هتمسحه عشان انت ادمن الجروب .. ايه رأيك ؟

انا شايف ان اي حد يسأل سؤال عايز اروح البلد الفلانية مصر او غيرها حد هيرد يقوله لأ ما تروحش ما تعملش ما تسويش وحد تاني هيقوله تعالى دي جميلة ولطيفة واللي سأل السؤال بعد كدة هو اللي يكون وجهة نظره عشان هو مش صغير
انما طالما دا جروب عام والكومنتات متاحة للاعضاء يبقى هو حر يكتب اللي هو عايزه طالما ما غلطش في حد ولا قال كلام غير لائق

 

[Marwa Abdelmonim]

انتوا صح الناس دي بتكره نفسها قبل مابتكره البلد ومش قادرين يفرقوا بين البلد الوطن والحكومه ودا ال مأخرنا