بص يا باشا انا هاديلك الزتونة بما اني عايش في سويسرا. الأكل هنا غالي جدًا لو هتاكل في مطاعم. لكن لو هاتشتري حاجات بسيطة من Coop او Migros ممكن مايكلفكش كتير, ممكن تجيب ساندويتش مع مشروب ويكلفوك حوالي ٧ فرانك مثلًا. لو ميزانيتك كبيرة الأكل في المطاعم هايكلفك مش اقل من ١٥ فرانك للفرد و ١٥ ده لو هتاكل حاجة تركي في السريع لكن لو هاتتغابي يعني هاتخش في ٣٠ او ٤٠ فرانك للفرد. البيتزا اللي الناس بتجيبها في المانيا ب ٥ يورو هتلاقيها هنا ب ٢٠ فرانك.
المواصلات غالية جدًا جدًا يعني لو هاتشتري تذكرة قطر (مفيش طريقة تانية للتحرك بين المدن) من زيوريخ للوسيرن مثلًا هاتكلفك مش اقل من ٥٠ فرانك ده غير الباصات والترام الحاجات دي. اوعى تركب تاكسي!
بخصوص الترفيه بقى تذكرة السينما ال ٣ دي ب ٢٠ فرانك. لو هاتحضر كرنفال مثلًا زي كرنفال الخريف في بازل هاتدفع مبلغ مش قليل لو عايز تستمتع بيه. طبعًا لازم هاتبقى عايز تشوف الجبال وتروح هايكينج وكده وده هاتدفلعه تذكرة عشان تركب ال cable car. لو صحتك كويسة هاتلك هايكينج بوت محترم واطلع على رجليك! لو عندك اي استفسارات إتفضل إسأل وانا هحاول اساعدك على قد ما اقدر.
