مش عارف المفروض اكتب بوست زي ده ولا حتي الادمن...

[Taha Mokhtar]

مش عارف المفروض اكتب بوست زي ده ولا حتي الادمن حيوافق عليه ولا لا بس عامه نعتبره لحظه مصارحه للكل
من شويه كان في بوست بيعبر عن حاله استياء من فصل المصريين عن الاجانب في فندق في الغردقه .. طيب ممكن تفتحوا صدركم شويه
نبدا من البدايه
سلوك المصريين في المصايف عامه او في طريقه الانبساط .. مدينه زي اسكندريه في الحقيقه مش مصيف هي مدينه سكانيه فيها شقق ناس اشتريتها تصيف فيها وبقيه الصيف بتاجرها كنوع من انواع الاستثمار ولقربها من مدن كتير بيجيلها رحلات اليوم الواحد
طبعا مهما وصفتلكم مش حتتخيلوا ولا تحسوا بالمعاناه بس علشان اقربلكم الصوره تخيل انت تحت بيتك في الشارع كل يوم شادر فرح .. اهل بيتك ينزلوا يتعاكسوا ولو.متعكسوش يشوفوا حاجات المفروض ملهمش ذنب يشوفوها .. الشادر قافل المرور وبيطلع عينك .. مبتعرفش تنام يوميا علشان تروح شغلك من الازعاج مابالك بقي لو حد مسن او مريض .. طبعا انت ملكش حق تتكلم
بمناسبه الحقوق .. الحقوق دايما ليها كلمه لازقه فيها اسمها واجبات .. انت لو سافرت بره وفي موظف عاملك وحش او حتي عطلك دقايق ممكن تقلب الدنيا .. وده في الدول الحديثه العهد بالتقدم .. بس متقدرش تسيب زبالتك في مكان كنت قاعد فيه لان حيطلع كرامتك من الاجانب قبل صحاب البلد قبل الشرطه نفسها .. مابالك بقي لو عملت ازعاج في سكن او مواصلات
انت كمواطن من المفترض ليك اوليه في بلدك ده حقك لانها ارضك وثرواتك وضرايبك والحكومه دي شغاله عندك ( ده مش سياسه اقسم بالله ) لكن في نفس الوقت انت عليك حقوق ابسطها ثقافه القانون واللي للاسف لو مبنكسرهوش ( ده لو ) فاحنا بنطنش علي كسره من ابسط شئ للكبيره وده خلانا بنتعامل درجه تانيه في بلدنا
كان في موقفين حصلولي في يوم واحد ايام ما كنت شغال مرافق افواج بالصدفه .. الموقف الاول داخل اجمع الزباين اللي طالعين معايا الرحله من الفندق .. واحد مصري حاطط رجل علي رجل وبينده عليا علشان اجيبله الطقطوقه .. حاولت افهمه اني مش شغال في الفندق وان حتي لو شغال في الفندق فالنظام هنا ان حضرتك بتخدم نفسك بنفسك .. طبعا حسيبكم تتخيلوا رد المصري بنفسكم مع الاخذ بالاعتبار انه كان طالع من فيلم الايدي الناعمه بالظبط .. وان ده ساب انطباع دائم لمجموعه من السياح ان هي دي مصر وهما دول المصريين .. تقبلوا ان دي تبقي صورتهم اللي حينقلوها وحيتعاملوا معاكم علي اساسها في السفارات وبره ?!
في نفس اليوم واحدة روسية المفروض انها طالعه معايا الرحلة وكانت حالتها لا تسمح نهائيا من كتر السكر اللى هى فيه وانها رحله بحرية وغالباً ( حترجع ) سامحونى على اللفظ .. ومصممة انها تطلع .. طبعاً قولتلها وقولت للمرافق اللى معاها انها تطلع بس على مسئوليتها وان لو تعبت او عملت اى ازعاج او تلفيات حتبقي مسئوليتكم
المهم انها فعلاً رجعت وانها هى واللى معاها منزلتش من على المركب غير اما نضفت بنفسها اللى حصل
مع العلم ان الروس دول فعلاً اللى يتقال عليهم ( همج ) وان المصريين عقولهم برقبتهم بجد

باختصار الرغي ده كله واللى متاكد انه حيزعل ناس كتير (ومع العلم انى سيبت مجال السياحه من سنين يعنى مش بقول كده علشان انا شغال في السياحة وبدافع لا ) لكن انا نفسي بتقهرت ويتحرق دمى اما بحس انى بتعامل كمواطن او كانسان درجة تانية جوا او برا مصر لمجرد انى مصرى .. وان وضع زى اللى فالفندق ده اهانة لكل المصريين .. لكن فى نفس الوقت مندفنش راسنا في الرملة .. احنا عندنا مشاكل ( كوارث ) بنعملها فى حياتنا اليومية جوا مصر وبنعملها في الاماكن السياحية وبره مصر وده السبب اننا بنتعامل جوا وبره مصر وفي السفارات كده .. وللاسف دى مش حالات فردية لا ده العكس تماما .. وان حتى اللى مبيعملش كده عليه مسئولية اكبر انه بيشوف ده وبيسكت

 

[DO HA]

انا مع الفصل لان كنت فشرم وبصراحه المناظر اللي شوفتها تطفش الاجانب اصلا
يعني لما واحد يرمي من اليخت البامبرز بتاع ابنه قالمايه فالمنطقه اللي بيتعمل فيها دايفنج وفيها شعب مرجانيه
ولا اللي بينزلوا ببوكسرات و فنلات بيضا
ده اسمه ايه ؟!

 

[Suzanne Shaarawy]

و اللي بيقف في بلكونة الدور الاول او التاني و يرمي ورقة شوكولاته ولا منديل مستعمل ينزل علي حديقة الساكن في الدور الارضي !!!!
ده غير صوت التليفزيون العالي جدااا و التحدث بصوت عالي ايضا كل ده بالنسبة للاجانب كارثة و ممكن يقاضي الاوتيل !

 

[Christen Motie]

بصراحة عندك حق و انا مع الفصل جدا انا لما بفكر اسافر جوة مصر و لا اطله برة بقرر اطلع برة حتي لو مكان اوحش بس لسبب بسيط ابعد عن المصرين و فضولهم و التصرفات اللي بيعملوها
انا سافرت مالديف و شرم و عملت سنوركلنج هنا و هنا و بعترف ان شرم احلي بس ميزة المالديف الخصوصية و الروقان اللي استحالة تلاقيهم ف مصر
اتمني ف يوم من الايام بلدي تكون احسن و البلد اللي كانت بتصدر حضارة للعالم متكونش فيها ناس همجية و قليلة الذوق كدة

 

[Marwan Mohamed]

من احسن الحاجات اللي قريتها في البيدج

 

[Heba Shawky]

عندك حق كنت بفندق بشرم وناس مصريين وكمان من هيئة لبسهم متدينين يعنى النظافه من الايمان والله الست قلعت ابنها البامبرز عالبسين وسابت البامبرز على الشيزلونج ومشيت وسابته والتانيه شفتها واحنا بنفطر حايبه شنطه زى بتاعة السوق ولمت اكل فيها كان منظر يكسف انا اتكسفتلها ده انا استاذنت الويتر اخد قطعه من الكرواسان لابنى الصغير وانا خارجه من المطعم وكنت مكسوفه وغير الرجاله اللى بيكون معاها زوجاتها وتعاكس كمان فعلا فى تصرفات للمصريين تكسف انا كمصريه بدور على اماكن وفنادق ميكنش فيها مصريين طبعا مش كل المصريين لكن الغالبيه بتسؤ صورة بلدنا بتصرفات غير لائقه

 

[Tarek Mohamed]

الله يرحمه الزعيم مصطفى كامل لما قال .. لو لم اكن مصريا .. لوددت ان اكون هولنديا

 

[Mohamed Abdellah]

معاك فى كلامك ده مليون فى الميه، وانت قولت فى كلام حاجه كويسه انه حتى او مفيش قانون، فالناس لازم تتصدى لده، واعتقد انك سمعت عن اللى حصل فى تركيا هنا من كام يوم من بعض السوريين وطريقة الناس فى التصدى ليهم.

 

[Adel Shokhba]

كلنا واحنا صغيرين لما كنا ندخل البيت بعد ما امهاتنا تنظف لو احنا لابسين الجزم كان لازم نسمع الجمله الشهيره( اقلع الجزمه ياحيوان) يعني بلدنا احنا اولى اننا نحافظ على نظافتها. الاخ اللي لما تيجي تقوله كده ما يصحش يرد عليك يقولك (بفلوسي) لا انت ما اشتريتش المكان بالناس اللي فيه. انت بفلوسك تقضى اجازه مع الإلتزام بتعليمات المكان.
الأجانب اللي بتشوفهم بالبكيني هم مش عاهرات ولا حاجه. دي عاداتهم وثقافتهم في التعامل مع الشواطئ.
المصريين القدماء كان عندهم اله الجمال. احنا بقى استبدلناه باله النطاعه.
بنترفض في السفارات علشان بنروح بلاد الناس ونهرب ونقعد بشكل غير قانوني وطبعا مش هنعرف نشتغل... بعض التصرفات السلبيه لبعض الناس بتدي الناس فكره ان المصريين كلهم كده . وبتعك للأسف على الكل.

 

[Seba Mahmoud Nagy]

بصراحة شديدة عندك كل الحق والمشكلة الكبرى إن الشخص المصري المحترم بيعامل معاملة قبيحة بسبب إن الحابل و بيتاخد مع النابل ومحدش بيفرق سواء داخل أو خارج مصر إنت مصري كويس ولا مصري بلا أخلاق للأسف إنت مصري إذاً إنت معفن فرجاءً كلنا نخاف على منظرنا ومنظر أولاد بلدنا واخوتنا ومنظر بلدنا اتمنى الناس تتغير

 

[Ahmad Wadan]

طيب المصريين المحترمين اللي سلوكهم يفوق تحضر الغرب ذنبهم إيه!
ليه السيئة تعم أساسا. مايبقى في قانون والكل يخضع له وغير الملتزم يتعاقب.

 

[Karim Hamada Ahmed]

اوسخ شعب ويقولوا مفيش تقدم والعقليات متخلفه وجهل وقله ادب ومفكرين كل ده شطارة العيب فى البنى ادمين اللى معندناش وعى ولا ثقافه

 

[Ĥossam Śhams Eldin]

مع الوقت الناس حتتحضر وحتفهم زي المصريين لما بيتغربو بيبئو يكسبو سلوك البلاد الي سافرولها شرم والغردقة والاماكن دي كانت محظورة عن المصريين من ايام مبارك كان دخولها بفيزا مفيش دول في العالم بتعمل في مواطنيها كده اتفتحت بس بعد الثورة والناس بدئت تشوف بلدها علموهم بدل ماننتقدهم السياحة في مصر قايمة عالمصريين بس دلوقتي

 

[شيماء وجيه]

دى ثقافة عامة في المجتمع للاسف نفس المصري ال بتحكي عنه في الكومنت هو المصري ال بيشتغل في الفندق برده ؛ في ناس رهيبة من العاملين في الفندق يكفي نظرته من التعالي او الطناش او انه يفضل لزق للاجانب كانه بيشتغل عندهم خادم خصوصي او في بعض الحالات بيعاكس الاجانب وبيحاول يستخف دمه عليهم ؛ ده انا شوفت حاجات غريبة جدا بعد الثورة في فنادق ٥ نجوم من العاملين المصريين ده حتى بيرفض يعطيك حقك الشاي او العصير او المياه وبيكون متغاظ جدا لو انت طلبت اي طلب هو حقك ، في حين انه بيروح للاجانب كل ٥ دقايق يسالهم عوزين حاجه مبسوطين لغيت لما يزهقهم في حياتهم ؛ انا مشوفتيش التصرفات دى غير من العمال المصريين بس لكن العمال الاجانب مهنين كل نزيل عندهم هو نزيل ؛ المشكلة في الثقافة والمهنية ياجماعة اذا كان المصري نزيل او عامل ؛ القصة عامة ياجماعة ؛ بالاضافة لشيء اخر المصري منتقد جدا وبيعمم خاص لو ان ال عمل الموقف ده مصري خلاص بيقول كل المصريين كده ويفضل يسب ويلعن في كل المصريين ؛ في شعوب بلاد تانية ثقافتهم العامة والله اقل منا بكتير جدا منهم مع احترامي تركيا انا شوفتهم في الحرم المكي وجلست مع اطياف منهم من كل المجتمع في الاغلب احنا اكثر منهم ثقافة وتحضر وجدعنه وعداله وشهامة وحاجات كتير ؛ لكن هما مش بيقالوا عن بعض كده حتى المثقفين منهم مش بيجلدوا بعض كده وشعوب تانية مش عوزة اذكر بلاد ولا اعمل مقارنات بس عوزة اقول كفاية انتقاد وجلد لانفسنا المصري هو الوحيد ال بيقول دول مصريين وهو بيعني بيها التقليل لكن كل الشعوب الاخري ال اقل منا في حاجات كتير اخلاقية وسلوكية وثقافية لما بيقول اسم بلدهم بيكونوا يقصدوا بيها التفخيم ده حتى السودانيين ياجماعة مع كل الاحترام لهم طبعا ؛ ال يشوف سلوك من شخص مش عجبه يدخل بذوق يغيره ولو احنا عملنا حاجات كويسة امام الناس الناس هتكسف يمكن مش اول مرة لكن مع الاستمرارية ؛ ويارت محدش ينسي هو بيحكم عن فئة من الاقليم مثلا وتصرفاته في شرم مثلا ؛ يشوف كمية التجريف والتهميش الفكري الثقافي السلوكي الممنهج ال الناس دى اتعرضت لها في الماضي وحتى الان كمية الضغوط وساعات العمل الكتيرة وعدم وجود عادلة منجزة تطلع من الانسان اكثر من كده ؛ انا ساعات بقول لنفسي الناس طيبة اوي

 

[Jeje Diab]

انا هفضل أقول إنها أزمة أخلاق

 

[Ahmed Badrul Radzi]

لا طبعا غلطان اولا متقارنش الطبقه الفقيره ال علي شواطئ اسكندريه ب المصريين ال بيروحو الغردقة و شرم لأنهم حتي لو مش اغنيا بس علي الأقل وسط او اقل من الوسط حاجه بسيطه لو الأوتيل عامل عرض مثلا رخيص ،، كمان يا أستاذ الأجانب فيه منهم كتير زباله و اسلوبهم أنيل من المصريين وده شوفتو ب عيني فالغردقه الأجنبيه بتملي لتر فاضي كامل من العصير ال علي البوفيه عشان تاخذه البحر و ماتضطرش تطلب عصير كمان كانو بياخدو ف اكياس الكرواسون و الباتيه عشان لو جاعو علي ما الغدا يجي !!!! وعاوز اقولك ولا حد أتكلم معاها من الويتريه لكن لو مصريه كان طلع عين ابوها !!!! وعلي فكره اكتر من مره ال بقولو ده

 

[Rania Emam]

م

 

[Galo Al Hawari]

I went to so many places in sharm and hurghada and never felt their is any distinguish between Egyptians and foreigners ...we were treated with respect and got the best services from the staff.

 

[Mohamed Ibrahim]

طبعا حق الادارة بتاع الفندق تعمل كدا عشان المهازل والفوضى اللي بتحصل من المصريين... بس بصراحة هي مشكلة شركات السياحة من وجهة نظري مش العميل ولا الفندق.. والعميل طبعا لانه الاغلبية فاهم الاوبن بوفيه غلط ( طبعا مش كل الناس مع كامل إحترامي للجميع)

 

[Dalia Elraies]

انا مش موافقة على الفصل لأن في مصريين كتير محترمين هيتأذوا ... الحل في تطبيق القانون بشكل رادع واللي ميلتزمش بالنضافة والاداب العامة يتم طرده من الفندق ببساطة مع دفع غرامة ... وفي المطعم لما يسيبوا اكل كتير مكانهم يدفعوا تمنه ... لازم نواجه العشوائية ... لأن الفصل هايخلينا نستسلم للغوغائية ونتقبلها كأمر واقع