السلام عليكم ممكن يكون البوست هزلي او مضحك...

[Mohamed Khalid]

السلام عليكم ممكن يكون البوست هزلي او مضحك للبعض بس ما اظنش اني ممكن الاقي مساعدة في مكان تاني انا كنت عايز اعرف ايه اسهل بلد ممكن اسافر لها بأقل التكاليف خالص للعلم انا في رابعة هندسة و تعبان هنا جدا الحمد لله عندي أفكار نفسي اعملها ممكن اشتغل 15 ساعة يوميا و مجتهد جدا و مش بسيب اي حاجه غير لما اخلصها على أكمل وجه ممكن اراقب و أدير اي حاجه مقابل الخبرة بس انا بقالي سنتين بشتغل و بفشل انا كل اللي محتاجه فرصة بس لو حد يعرف يدلني على حاجه هكون متشكر جدا

 

[Ramy Tahan]

خلص الكليه و سافر دور علي شغل في دبي او سنغافوره
ده اضمن حاجه
و طبعا لازم تكون مظبط الانجليزي بتاعك
و ربنا يوفقك

 

[Ahmed H. Ebrahim]

هزلي او مضحك ليه؟ سؤالك كلنا تقريبا مرينا بيه وكان بداية لتحول كبير في حياتنا كلنا تقريبا خصوصا للناس اللي قدرت تسافر برة على شغل وربنا هيكرمك ان شاء الله وظروفك هتتحسن طالما انت مجتهد
نصايحي ليك اولا انك لاااااازم تتفوق وتتميز في مجالك، مش بتقدير الجامعة اد مهو انك تبقى عارف ومتمكن من تخصصك خصوصا لو حاجات مدرستهاش بس حصلتها بنفسك سواء من على النت او من بحوث عملتها بمجهودك الشخصي
ثانيا اهتم جدا جدا جدا بالانجليزي ولو تخصصك مطلوب في المانيا او النمسا حاول تتعلم الماني في وقت فراغك عشان تعرف تاخد على الاقل منحة في بلد منهم ولو شاطر اوي تعرف تشتغل فيهم
ثالثا لازم تشتغل بإيدك في حاجات حرفية مطلوبة في تخصصك، مينفعش تبقى مهندس نظري ومعندكش خبرة عملية ولا فاهم في شغل الصنايعية اللي هيشتغلوا معاك، انزل خد كورسات حرفية على حسب تخصصك حتى لو اتعلمتها في ورش او مع مقاولين حسب انت تخصصك ايه
رابعا متستعجلش النتايج طالما انت بتعمل اللي عليك ومجتهد في الطريق اللي بيوصل، ربنا مبيضيعش تعب حد
خلص الكلية وبالحاجات دي كلها هيبقى بروفايلك محترم تقدم تقدم على منح ماجيستير او دكتوراه او حتى تقدر تشتغل في شركة كويسة جوا او برة وبعد تلات او اربع سنين تقدر تقدم على هجرة مستريح
وبالتوفيق ان شاء الله