كنت عايز اتكلم في موضوع لاحظته كده بس كذا مره...

[Mohammed Asal]

كنت عايز اتكلم في موضوع لاحظته كده بس كذا مره أأجل الكلام فيه .. معرفش واخدين بالكم منه ولالأ

وحابب طبعاً اسمع رأيكم
طبعا كل واحد بيبقى ليه رأيه الشخصي بس لاحظت ان لما تيجي تسأل واحد يومين حلو في باريس !! يقولك يااااااااااااااه ياعم انا لفيت باريس دي كلها في يوم بس كفايه عليها يوم وروح بعدها مدينة تانيه او بلد تانيه !! واحد يسأل هو 3 أيام كفايه في لندن يااااااااااااااااااه !!!! كتير أوي مدينة ممله ومفيهاش حاجة !!!!!!!!!!!!!!!!! أنا بصراحه بيجيلي اذبهلال من اللي بيعملو كده ... طيب انت شايف انك مستمتع بكده وانك لما تروح بج بن وتاخد سيلفي خلاص كده لندن خلصت !!! اسمحلي ياريتك ماسافرت
أو أطلع اخد سيلفي مع برج أيفل في باريس يبقى باريس خلصت

طبعا انت حر لكن توصل لان واحد يسخر منك عشان هتقعد 3 او 4 ايام في مكان ده مش طبيعي بجد ...!!! ليه

انا سألت حد اقعد كام يوم في لندن عشان انبسط قالي يومين !!! تخيلو
رحت لندن قعدت فيها 10 أيام قالو عليا مختل عقلياً مع اني كل يوم كنت بعمل حاجه مختلفه وسافرت وانا مخلصتش البلد كلها ولا هخلص

زي مثلا يجيلك سايح ايطالي اسكندريه وياخد من اول المنتزه لاخر بحري في يوم كل شويه ينزل يتصور في مكان ويطلع يكمل !!!! هل كده خلص اسكندريه ؟!!!
آآآه طبعا خلصها بس من وجهة نظره هو !!!!

اللي عايز اوصله انك عشان تعيش مع اهل بلد معينه لازم تحتك بيهم وتشوف بياكلو ايه بيروحو فين بيزورو ايه مش كل يوم احط شنطتي او امشي بيها في بلد واطلع تاني يوم على بلد والثالث وهكذا !! هو مش سباق !!! ازاي اطلع اكتر دول معينه في اقل وقت ممكن اللي هو غالبا وقت او مدة الفيزا ... ولما خدت شنجن قالولي هتروح فين قلتلهم ايطاليا بس !!!! لقيت ناس بتقولي بس !!! وكأن ايطاليا دي البحرين مثلا مفيهاش شمال سويسري او شرق او غربب او جنوب زي امالفي وغيره ومتنوعه جدا

طولت بس الموضوع مستفز شكرا ...

 

[Esraa Shreef]

فعلا هو مش سباق. عملت موضوع اليوم الواحد فبروج بلجيكا وندمت قلت يا ريتني قعدت يومين تلاته. وقعدت فامستردام اسبوع و كل يوم كنت بعمل حاجه جديده. وباريس 4 ايام ومشفتهاش كلها برده. انا بفضل ان كل مدينه تاخد حقها علشان تعرف طبيعه المدينه وتحس فعلا بالتجديد. مش سباق اجري اتصور جنب ايفل و اللوفر وروح عالمدينه اللي بعدها. علشان لو حد سالني اقول اكتر انا رحت مدن كتييير وانا هبقي قضيت فترتيب الشنط والسفر اكتر ما اتفسحت

 

[Mohamed Fathy]

غير ان الموضوع زاد عن حده وكل من سافرله بلدين بقى رحاله الفهلوه نطت بردو فى السياحه

 

[Nayera Essam]

يبقي عايزيين بقي تجربتك فى ايطاليا امكان الزيارات المواعيد الانتقالات التكاليف المطاعم

 

[Nihal Khattab]

صح جدا كلامك. يا ريت تقولي روحت فين في إيطاليا

 

[Mohamed Ghazi]

متفق مع كلامك، المفروض تدي وقت كافي لإكتشاف المدينة وثقافتها لحد متشبع منها خالص، مش يوم ولا يومين وكام صورة وخلاص.

 

[Ashraf Gawdat]

ما هو برضه احنا مش بنروح أوروبا كل ويك اند مثلا .. ده اللي بيسافر كتير ممكن تلاقيه بيسافر مرة في السنة مادام مش شغله .. وبالتالي فرصة إنه يروح بلاد أكتر هتقل لو هيقعد في كل مدينة 10 أيام .. ده ممكن الرحلة كلها متكملش 10 أيام أصلا

زائد إن أغلب اللي بيسافروا مش رايحين يعملوا دكتوارة في علم الاجتماع عن عادات وتقاليد الشعب الفلاني .. أنا رايح أستمتع مش رايح أدرس الشعب اجتماعيا

في النهاية كل واحد بيقول وجهة نظره حسب بيحب إيه ومش بيحب إيه .. اللي بيحب المتاحف ممكن أسبوعين ميكفوهوش في باريس .. لكن اللي مش بيحبها زي حالاتي آخره اللوفر ونص يوم كمان .. في النهاية اللي مسافر ده بيقرر بناء على شخصيته هو مش شخصية اللي بينصحه .. علشان كده النصيحة الصح لازم تكون مسببة .. يعني يقول له تقعد فترة كذا تعمل فيهم كذا وكذا .. واللي مسافر يحدد إذا كان هيحب الكذا وكذا دول ولا الكذا الأولانية بس ومش هيحب التانية .. وهكذا

 

[Islam Salam]

بدافو..شابوة لموضوعك

 

[Luna Omar]

معاك حق طبعا.. الاخر لا فى استمتاع و لا استرخاء،بس يمكن عشان وقت محدود بيكونوا مهتمين يلفوا على أد مايقدروا

 

[Fahd Moenis]

يا راجل انا بقالي سنين عايش ف لندن و بخرج كل اسبوع ٣ مرات مثلا و لسة مخلصتش ١٠% من المملكة مش حقولك لندن بس

 

[Eman Elmatbouly]

كلام جميل مقدرش اقول حاجه عنه
انا عمري ما سافرت بلد و حسيت أني خلصتها لف !!!

 

[Marwa El-Mohands]

الموضوع نسبي جدااا وكل واحد ليه وجه نظر في السفر وبالتالي من وجه نظري السؤال اصلا غلط الصح ان الواحد يسال مثلا ايه الاكتيفتي او الاماكن الي اقدر اعملها وازورها في البلد الفلانيه وبعدها انا أقرر هروح فين وده يستغرق قد ايه
انا مثلا لما روحت كازبلانكا شايفه ان يوم واحد كافي جدااا وألف باقي المغرب علي الرغم من ان شركات السياحه بتطلعها مالا يقل عن ٨ ايام لكن انا شايفه اني شوفت فيها الي انا عايزاها ميش مساله اخلصها لف ولا لا وعشان كده الموضوع وجهات نظر ونسبي للغايه

 

[Norhan Ali Arafa]

فعلا انا يستغرب كمان من الناس دي،دا الخلايجه أغلبهم بيقعد شهر و وبيبقوا مبسوطين عادي وانا شايفه اني اقعد ف بلد مدة طويله احسن م روح بلدان جري اذا كان احنا ف مصر اهو ومخلصنهاش..

 

[Alaa Eldin Emam]

انا عن نفسى رحت باريس اربع ايام و لقيتهم قليلين جدا على مكان زى باريس.

 

[Racha Rachad]

عشان تسافر بجد محتاج تقعد وقت عشان تفهم البلد، هو أصله مش بعدد المدن و لا البلاد. اقعد بمزاجك.. ميهمكش انت اللي بتسافر و انت اللي هتستفيد و تنبسط. انا في بلاد بروحها تاني و تالت و اقعد أكتر كل مرة و اكتشف حاجات جديدة. إنما ليه الجري...

 

[Enass Attia]

انا قعدت في برلين ١٥يوم ولسه فيه حاجات كان نفسي اشوفها

 

[Sahar Ezzat]

انا اتفق معاك جدا و فعلا بعمل كده

 

[Ashraf Mansour]

اختلاف وجهات نظر وكل واحد حسب هدفه من الرحلة .. انا ماليش فى الاستجمام والريلاكسيشن ولا ليا فى المتاحف لكن عاشق للطبيعة والشلالات والبحيرات والثلوج فاحب انتقل من مدينة لمدينة وازور المعالم الرئيسية فى كل مدينة زى ميدان مشهور او قلعة مشهورة او كنيسة واكتفى بمشاهدتهم من الخارج وبالتالى بالنسبة ليا فأى مدينة ماتاخدش اكتر من ثلاث او اربعة ايام

 

[Emad Aziz]

معاك ومش معاك .. كل واحد ليه وجهه نظره وهدفه من السفريه .. انت صح وهو كمان صح .. مش لازم واحد فيكم غلط يا عزيزي

 

[Emad Aziz]

لانك حتي لو قعدت شهر في بلد بردو لا يمكن تشوف ولا تعرف كل اللي فيها ..