A
Ahmed Mohamed
:: مسافر ::
البوست التاريخي للمبتدئين part 2 .. ازاي تظبط سفريتك لوحدك من الالف للياء ؟؟
الحلقه التانيه : ازاي تحصل علي ارخص تذكره طيران ل بلد معينه
مبدأيا في مقدمه لازم اقولها عشان نوضح للناس ( وهم ) الحصول علي تذكره رخيصه .. انا كتبت المقدمه دي قبل كدة ف سامحوني اني بكررها تاني
=======================================
طيب خلينا في الاول نتفق علي مبدأ في الحياه تتعامل بيه في كل نواحي حياتك مش في تذاكر السفر بس
" مفيش شئ بدون مقابل "
كل حاجه في الدنيا دي بتحصل عليها لازم تدفع مقابلها سواء المقابل دة كان فلوس او راحه جسد او عمر ضايع او قلق وتوتر او البعد عن الاهل الخ الخ
.
لازم تعرف ان مفيش شركه طيران بتخسر .. مفيش شركه طيران هتعيط وهتموت عشان تديك تذكره برخص التراب
كل شركات الطيران كسبانه منك 200% ايا كان سعر تذكره الطيران اللي هتبيعهالك
.
لما بتلاقي سعر تذكره طيران ارخص من الاسعار المتداوله بفرق 2000 و 3000 جنيه اعرف انك هتدفع الفرق بس بصورة مش مباشره
مش ب تدفعه فلوس وبس .. ممكن تدفعه تعب لجسمك .. تدفعه قلق وتوتر ان الظابط يرجعك من المطار .. تدفعه قلق وتوتر انك متلحقش الطياره التانيه .. تدفعه ان شنطتك تضيع ومتعرفش تجيبها ..
.
زي ان الترانزيت يكون 16 ساعه مثلا ف تنام ف المطار علي الارض وجسمك يتكسر عشان عايز توفر فلوس
.
او الترانزيت ساعه واحدة بس لكن في مطار يكون زحمه جدا في اجراءاته فبالتالي مش هتلحق الطياره التانيه وتضيع عليك رحلتك
.
او الترانزيت يكون في دوله شنجن واكثر من 14 ساعه فمتطلعش الطياره من اصله بعد ما تكون حجزت وضاعت عليك فلوس التذكره
.
او التذكره تكون من غير شنط والشنط ليها ثمن لوحدها برا التذكره يعني هتدفع ثمن التذكره الرخيصه مرتين كأنك اشتريت تذكره غاليه بالظبط
.
او الترانزيت يكون في مطار تعبان ومتهالك وقديم ومفيهوش اي وسائل راحه وتتعب انت واسرتك ورحلتكم تتضرب
.
او ان شركات الطيران تعملك عرض في موسم مضروب عشان تبيعلك بواقي التذاكر زي حوار عرض الاماراتيه من كام شهر دة .. باعت الوهم في اكياس والناس اشترته .. لان في شهر 6 و 7 محدش بيروح الامارات اساسا
.
او تكون التذكره الرخيصه تكون من مطار بعيد جدا زي الاقصر مثلا .. وتضطر تسافر 10 ساعات من القاهرة للاقصر في القطر وتدفع مصاريف تاكسيات وقطر وليله تبات فيها ف الاقصر الخ الخ .. يعني تدفع ضعف ثمن التذكره الرخيصه دي
.
( مرة لقيت تذكره طيران من فرنسا ل اسبانيا ب 20 يورو بس ) لكن الخازوق ان التذكره من مطار بوردو ودي بعيده جدا عن باريس اكثر من 6 ساعات المسافه بين الاتنين يعني فلوس المواصلات اللي هدفعها من باريس ل بوردو هتبقي 3 اضعاف ال 20 يورو اللي هدفعهم في التذكره
.
من الاخر لازم هتدفع الفرق يعني لازم هتدفعه .. مفيش حاجه اسمها تذكره طيران رخيصه ومريحه ورحلتها جميله في نفس الوقت .. دي اوهام
.
انا بقولك كل الهري اللي فوق دة ليه ؟؟ عشان ميبقاش عندك high expectations اوي انك تجيب تذكره رخيصه اوي اوي اوي وفي نفس الوقت مريحه اوي اوي اوي
هي دي الحياه ياابني .. حاجه قصاد حاجه
.
عايز ترتاح ومتتعبش في مشاوير وترانزيت طويل وسحل كتير >>> يبقي لازم تدفع فلوس كتير
عايز توفر الفلوس وتجيب ارخص ارخص حاجه >>> هيبقي علي حساب راحتك وصحتك
.
لكن الاتنين مع بعض دول في المدينه الفاضله بتاعه افلاطون فقط
=======================================
ايه بقي الطرق الخفيه اللي تجيب منها ارخص تذكره " نظريا " ؟؟
1- الدخول من متصفح متخفي
في اي متصفح بيبقي موجود حاجه اسمها new private window اللي هي Ctrl+Shift+N .. ادخل ابحث من عليه مش من ع المتصفح الاساسي
ليه بتعمل كدة ؟ عشان سكاي سكانر وال cookies اللي عليه لما بتعمل سيرش طويل الموقع بيعرف انك بتدخل كتير جدا وبيسجل ال URL بتاعك ف بيزود عليك الارقام مع كل مرة بتدخل تعمل سيرش
لكن لما بتدخل من متصفح متخفي مبيقدرش يسجل دخولك في كل مرة وبالتالي الارقام بتوصل ل فرق 600 جنيه تقريبا بين السعر علي المتصفح الاصلي والوهمي ( تقدر تجرب وتشوف بنفسك )
.
2- حاجه اسمها cheapest month
ودي بتجيبلك ارخص الاسعار للدوله اللي انت رايحها في ارخص شهر ليها لزيارتها .. بس الخدعه هنا انه نفترض جابلك شهر 8 مثلا هو ارخص شهر لزياره دوله معينه
.
متاخدش ايام الذهاب والعودة اللي طلعتلك في ارخص شهر دة كأنها ارقام ثابته وتفرح بالرقم اللي جابهولك وتقول امين وخلاص
.
لا .. انت هتقوم مثبت يوم الذهاب في ال cheapest month وتبدا تلعب في ايام العودة في الايام اللي حوليها وهيطلعلك اسعار اقل كمان من الارقام اللي سكاي سكانر ادهولك
يعني مثال اوضح :
لو ال cheapest month لزيارة تركيا مثلا طلعلك شهر 8 .. وطلعلك ارخص سعر في شهر 8 دة هيكون ذهاب يوم 20 مثلا وعودة يوم 28
متقومش تفرح بالارقام دي وخلاص
لا هتقوم مثبت يوم 20 اللي هو الذهاب في البحث وتبدا تغير في ايام العودة .. مرة تجرب يوم 29 .. مرة تجرب يوم 30 .. مرة تجرب يوم 27 وهكذا وهكذا .. هتثبت يوم الذهاب وتلعب في يوم العودة
هتلاقي ارخص وارخص من الرقم اللي طلعلك كمان
.
3- حاجه اسمها multi city ticket
ودة الحل السحري ل تذاكر الطيران الغاليه ل دول شرق اسيا تحديدا
.
الفكره في التذكره دي انها بتخليك تروح من مصر ل بلد معينه وبعدين ترجع من بلد تانيه خالص ل مصر
.
يعني بتخليك تزور اكثر من بلد في نفس الرحله بثمن تذكره طيران بلد واحدة وبتبقي ارخص بكتير جدا من انك تروح بلد لوحدها ذهاب وعودة من نفس البلد
.
يعني لو طبقنا مثال علي دول شرق اسيا
هتلاقي تذاكر طيران ماليزيا أو اندونيسيا كل واحدة فيهم لوحدها معديه 8000 جنيه .. يعني لو عايز تروح كل بلد فيهم لوحدها هتدفع 16 الف جنيه عشان تروح الاتنين
.
لكن لو حجزت multi city ticket الاتنين مع بعض ذهاب من القاهرة ل ماليزيا مثلا وعودة من اندونيسيا للقاهرة هتلاقي التذكره المجمعه دي ثمنها 8000 جنيه او ازيد حاجه بسيطه
يعني هتبقي زورت بلدين بثمن تذكره بلد واحدة فيهم
.
وفي حركه صايعه بتتعمل ف البحث في اوبشن ال multi city ticket وهي انك تغير امكان الذهاب والعودة وبالتالي ممكن يطلعلك التذكره ارخص
.
يعني ممكن تعكس وتخلي التذكره ذهاب من القاهرة ل اندونيسيا و عودة من ماليزيا ل القاهرة .. ف تلاقي التذكره بقت ارخص وهكذا وهكذا ..
.
( طبعا انت بتحتاج ل مواصله داخليه بين البلدين سواء طياره او اتوبيس )
افضل خطوط طيران داخلي لدول شرق اسيا هما air asia - tiger air - jet star
افضل خطوط طيران داخلي لدول اوروبا هما easy jet - ryan air
.
ولاحظ ان كل شركات الطيران الداخلي دي شركات low cost يعني من غير شنطه بتتشحن أو وزن عشان متلبسش ف الحيط وتفتكر انهم شركات طيران عاديه
.
والاحسن لو هتطلب وزن علي التذكره انك تطلبه وانت بتحجز مش لما توصل المطار عشان لما بتوصل المطار بيعتبروها غرامه وبتدفع اكثر بكتير من لو انك طلبت وزن وانت بتحجز التذكره من الاول
.
4- طبعا في نصائح روتينيه اساسيه بنسمعها من اي حد بيتكلم عن تذاكر الطيران ..
* زي انك تعمل السيرش لكل المطارات مش مطار واحد بس عشان لو في عرض علي مطار معين يجيلك
يعني بدل مثلا ما تعمل سيرش من مطار القاهرة بس لا تعمل سيرش من egypt كلها عشان لو في رحله من مطار داخلي ارخص من مطار القاهرة يجبهالك
.
* انك تقارن الاسعار علي مواقع طيران مختلفه لنفس الرحله اللي انت عايزها سواء من موقع شركه الطيران نفسها او من المواقع الوسيطه زي ويجو و اكسبيديا الخ الخ
.
* يبقي في مرونه في مواعيد سفرك يعني متبقاش مضطر تسافر في يوم معين ومحدد ولو اتأخرت يوم واحد عنه تقول مش هسافر .. مهو انت كدة هتشتري بالغالي وبأي سعر قدامك .. لكن لو فيه مرونه في مواعيد سفرك ساعتها هتعرف تجيب ارخص سعر للطيران
.
5- انك تستخدم مدينه ك base ل رحلاتك وسط بلاد مختلفه
يعني ايه الكلام دة ؟؟
مثلا مثلا مدينه ميلان في ايطاليا من ارخص المدن اللي ممكن تسافر منها علي بلاد كتير اوي في العالم ( اعمل سيرش واتأكد بنفسك )
تقوم انت حاطط ميلان مركز عشان تسافر منها ل روما ,, وتسافر بعدها منها ل مدريد ,, وتسافر بعدها منها ل باريس الخ الخ
وممكن تجرب الموضوع دة في دول شرق اسيا
.
6- ابعد عن ايام الجمعه والاحد في اي حجوزات ودائما ركز في بدايه بحثك علي يوم الثلاثاء
لان الجمعه والاحد هما ال high time للحجوزات عشان الناس اللي رايحه ويك اند والناس اللي راجعه من الويك اند ( الويك اند في كل العالم بيبقي سبت وحد )
واثبتت الدراسات ان ارخص ايام الحجوزات بتبقي يوم الثلاثاء وسط الاسبوع ( كانت عندي صورة للاحصائيه دي بس للاسف ضاعت من الموبايل )
.
7- حاجه اسمها Price Alerts
مواقع زي kayak او skyscanner بيكون عندها حاجه اسمها price Alerts ودي انك بتديهم ايميلك وهما لما يلاقوا تذكره طيران رخيصه أو تذكره طيران عليها عرض للوجهات اللي انت بتبحث عنها دائما يقوم يبعتولك ايميل بالتذكره الرخيصه دي
طبعا شرط انك تستفيد من الحوار دة انك تكون flexible ومرن في مواعيد سفرك م مرتبط بمواعيد معينه
.
8- لو مسافر مدينه بعيدة عن العاصمه ف البلد اللي انت رايحها احجز تذكرتين منفصلتين مش لازم تذكره كامله واحدة
بمعني .. لو مثلا رايح بالي في اندونيسيا .. ولقيت تذكره طيران من القاهرة ل بالي ب 10 الاف جنيه .. ساعتها احجز من القاهرة ل جاكرتا ومن بعدها من جاكارتا ل بالي
وقتها هتلاقي السعر اقل بكتير من انك تحجز من القاهرة ل بالي مباشره
.
9- دة الفيديو اللي جايب الخلاصه واحسن فيديو شوفته بيتكلم عن ازاي تعمل سيرش عن تذاكر الطيران خطوة بخطوة عشان يبقي تطبيق عملي ليك
.
10- البحث عن ارخص تذكره عايز صبر وطوله بال .. يعني لو هتزهق من اول مرة يبقي بلاش تبحث احسن واحجز بالغالي وخلاص .. لكن التذكره الرخيصه عايزة تعب ف البحث وعايزة صبر عشان تقدر تقلب وتعمل سيرش علي كل الارقام والايام المتاحه
.
انا عارف ان الكلام دة اتهرس في مليون بوست ومليون فيديو ع اليوتيوب قبل كدة .. في الشارع هتسمع الكلام دة .. في اليوتيوب هتسمع الكلام دة .. في المطارات هتسمع الكلام دة .. مدحت شلبي و احمد شوبير بيقولوا الكلام دة
لدرجه لو فتحت الكابنيه هتلاقي برضو الكلام دة بس زي ما قولت احنا هدفنا من البوستات دي المبتدئين اللي هما ابيض يا ورد .. مييييح يعني عشان يتعلموا زي ما احنا اتعلمنا محدش اتولد من بطن امه ابن بطوطه يعني ف معلش استحملوا الشرح الطويل معلش
.
وكالعادة ... اقعدوا بالعافيه
الحلقه التانيه : ازاي تحصل علي ارخص تذكره طيران ل بلد معينه
مبدأيا في مقدمه لازم اقولها عشان نوضح للناس ( وهم ) الحصول علي تذكره رخيصه .. انا كتبت المقدمه دي قبل كدة ف سامحوني اني بكررها تاني
=======================================
طيب خلينا في الاول نتفق علي مبدأ في الحياه تتعامل بيه في كل نواحي حياتك مش في تذاكر السفر بس
" مفيش شئ بدون مقابل "
كل حاجه في الدنيا دي بتحصل عليها لازم تدفع مقابلها سواء المقابل دة كان فلوس او راحه جسد او عمر ضايع او قلق وتوتر او البعد عن الاهل الخ الخ
.
لازم تعرف ان مفيش شركه طيران بتخسر .. مفيش شركه طيران هتعيط وهتموت عشان تديك تذكره برخص التراب
كل شركات الطيران كسبانه منك 200% ايا كان سعر تذكره الطيران اللي هتبيعهالك
.
لما بتلاقي سعر تذكره طيران ارخص من الاسعار المتداوله بفرق 2000 و 3000 جنيه اعرف انك هتدفع الفرق بس بصورة مش مباشره
مش ب تدفعه فلوس وبس .. ممكن تدفعه تعب لجسمك .. تدفعه قلق وتوتر ان الظابط يرجعك من المطار .. تدفعه قلق وتوتر انك متلحقش الطياره التانيه .. تدفعه ان شنطتك تضيع ومتعرفش تجيبها ..
.
زي ان الترانزيت يكون 16 ساعه مثلا ف تنام ف المطار علي الارض وجسمك يتكسر عشان عايز توفر فلوس
.
او الترانزيت ساعه واحدة بس لكن في مطار يكون زحمه جدا في اجراءاته فبالتالي مش هتلحق الطياره التانيه وتضيع عليك رحلتك
.
او الترانزيت يكون في دوله شنجن واكثر من 14 ساعه فمتطلعش الطياره من اصله بعد ما تكون حجزت وضاعت عليك فلوس التذكره
.
او التذكره تكون من غير شنط والشنط ليها ثمن لوحدها برا التذكره يعني هتدفع ثمن التذكره الرخيصه مرتين كأنك اشتريت تذكره غاليه بالظبط
.
او الترانزيت يكون في مطار تعبان ومتهالك وقديم ومفيهوش اي وسائل راحه وتتعب انت واسرتك ورحلتكم تتضرب
.
او ان شركات الطيران تعملك عرض في موسم مضروب عشان تبيعلك بواقي التذاكر زي حوار عرض الاماراتيه من كام شهر دة .. باعت الوهم في اكياس والناس اشترته .. لان في شهر 6 و 7 محدش بيروح الامارات اساسا
.
او تكون التذكره الرخيصه تكون من مطار بعيد جدا زي الاقصر مثلا .. وتضطر تسافر 10 ساعات من القاهرة للاقصر في القطر وتدفع مصاريف تاكسيات وقطر وليله تبات فيها ف الاقصر الخ الخ .. يعني تدفع ضعف ثمن التذكره الرخيصه دي
.
( مرة لقيت تذكره طيران من فرنسا ل اسبانيا ب 20 يورو بس ) لكن الخازوق ان التذكره من مطار بوردو ودي بعيده جدا عن باريس اكثر من 6 ساعات المسافه بين الاتنين يعني فلوس المواصلات اللي هدفعها من باريس ل بوردو هتبقي 3 اضعاف ال 20 يورو اللي هدفعهم في التذكره
.
من الاخر لازم هتدفع الفرق يعني لازم هتدفعه .. مفيش حاجه اسمها تذكره طيران رخيصه ومريحه ورحلتها جميله في نفس الوقت .. دي اوهام
.
انا بقولك كل الهري اللي فوق دة ليه ؟؟ عشان ميبقاش عندك high expectations اوي انك تجيب تذكره رخيصه اوي اوي اوي وفي نفس الوقت مريحه اوي اوي اوي
هي دي الحياه ياابني .. حاجه قصاد حاجه
.
عايز ترتاح ومتتعبش في مشاوير وترانزيت طويل وسحل كتير >>> يبقي لازم تدفع فلوس كتير
عايز توفر الفلوس وتجيب ارخص ارخص حاجه >>> هيبقي علي حساب راحتك وصحتك
.
لكن الاتنين مع بعض دول في المدينه الفاضله بتاعه افلاطون فقط
=======================================
ايه بقي الطرق الخفيه اللي تجيب منها ارخص تذكره " نظريا " ؟؟
1- الدخول من متصفح متخفي
في اي متصفح بيبقي موجود حاجه اسمها new private window اللي هي Ctrl+Shift+N .. ادخل ابحث من عليه مش من ع المتصفح الاساسي
ليه بتعمل كدة ؟ عشان سكاي سكانر وال cookies اللي عليه لما بتعمل سيرش طويل الموقع بيعرف انك بتدخل كتير جدا وبيسجل ال URL بتاعك ف بيزود عليك الارقام مع كل مرة بتدخل تعمل سيرش
لكن لما بتدخل من متصفح متخفي مبيقدرش يسجل دخولك في كل مرة وبالتالي الارقام بتوصل ل فرق 600 جنيه تقريبا بين السعر علي المتصفح الاصلي والوهمي ( تقدر تجرب وتشوف بنفسك )
.
2- حاجه اسمها cheapest month
ودي بتجيبلك ارخص الاسعار للدوله اللي انت رايحها في ارخص شهر ليها لزيارتها .. بس الخدعه هنا انه نفترض جابلك شهر 8 مثلا هو ارخص شهر لزياره دوله معينه
.
متاخدش ايام الذهاب والعودة اللي طلعتلك في ارخص شهر دة كأنها ارقام ثابته وتفرح بالرقم اللي جابهولك وتقول امين وخلاص
.
لا .. انت هتقوم مثبت يوم الذهاب في ال cheapest month وتبدا تلعب في ايام العودة في الايام اللي حوليها وهيطلعلك اسعار اقل كمان من الارقام اللي سكاي سكانر ادهولك
يعني مثال اوضح :
لو ال cheapest month لزيارة تركيا مثلا طلعلك شهر 8 .. وطلعلك ارخص سعر في شهر 8 دة هيكون ذهاب يوم 20 مثلا وعودة يوم 28
متقومش تفرح بالارقام دي وخلاص
لا هتقوم مثبت يوم 20 اللي هو الذهاب في البحث وتبدا تغير في ايام العودة .. مرة تجرب يوم 29 .. مرة تجرب يوم 30 .. مرة تجرب يوم 27 وهكذا وهكذا .. هتثبت يوم الذهاب وتلعب في يوم العودة
هتلاقي ارخص وارخص من الرقم اللي طلعلك كمان
.
3- حاجه اسمها multi city ticket
ودة الحل السحري ل تذاكر الطيران الغاليه ل دول شرق اسيا تحديدا
.
الفكره في التذكره دي انها بتخليك تروح من مصر ل بلد معينه وبعدين ترجع من بلد تانيه خالص ل مصر
.
يعني بتخليك تزور اكثر من بلد في نفس الرحله بثمن تذكره طيران بلد واحدة وبتبقي ارخص بكتير جدا من انك تروح بلد لوحدها ذهاب وعودة من نفس البلد
.
يعني لو طبقنا مثال علي دول شرق اسيا
هتلاقي تذاكر طيران ماليزيا أو اندونيسيا كل واحدة فيهم لوحدها معديه 8000 جنيه .. يعني لو عايز تروح كل بلد فيهم لوحدها هتدفع 16 الف جنيه عشان تروح الاتنين
.
لكن لو حجزت multi city ticket الاتنين مع بعض ذهاب من القاهرة ل ماليزيا مثلا وعودة من اندونيسيا للقاهرة هتلاقي التذكره المجمعه دي ثمنها 8000 جنيه او ازيد حاجه بسيطه
يعني هتبقي زورت بلدين بثمن تذكره بلد واحدة فيهم
.
وفي حركه صايعه بتتعمل ف البحث في اوبشن ال multi city ticket وهي انك تغير امكان الذهاب والعودة وبالتالي ممكن يطلعلك التذكره ارخص
.
يعني ممكن تعكس وتخلي التذكره ذهاب من القاهرة ل اندونيسيا و عودة من ماليزيا ل القاهرة .. ف تلاقي التذكره بقت ارخص وهكذا وهكذا ..
.
( طبعا انت بتحتاج ل مواصله داخليه بين البلدين سواء طياره او اتوبيس )
افضل خطوط طيران داخلي لدول شرق اسيا هما air asia - tiger air - jet star
افضل خطوط طيران داخلي لدول اوروبا هما easy jet - ryan air
.
ولاحظ ان كل شركات الطيران الداخلي دي شركات low cost يعني من غير شنطه بتتشحن أو وزن عشان متلبسش ف الحيط وتفتكر انهم شركات طيران عاديه
.
والاحسن لو هتطلب وزن علي التذكره انك تطلبه وانت بتحجز مش لما توصل المطار عشان لما بتوصل المطار بيعتبروها غرامه وبتدفع اكثر بكتير من لو انك طلبت وزن وانت بتحجز التذكره من الاول
.
4- طبعا في نصائح روتينيه اساسيه بنسمعها من اي حد بيتكلم عن تذاكر الطيران ..
* زي انك تعمل السيرش لكل المطارات مش مطار واحد بس عشان لو في عرض علي مطار معين يجيلك
يعني بدل مثلا ما تعمل سيرش من مطار القاهرة بس لا تعمل سيرش من egypt كلها عشان لو في رحله من مطار داخلي ارخص من مطار القاهرة يجبهالك
.
* انك تقارن الاسعار علي مواقع طيران مختلفه لنفس الرحله اللي انت عايزها سواء من موقع شركه الطيران نفسها او من المواقع الوسيطه زي ويجو و اكسبيديا الخ الخ
.
* يبقي في مرونه في مواعيد سفرك يعني متبقاش مضطر تسافر في يوم معين ومحدد ولو اتأخرت يوم واحد عنه تقول مش هسافر .. مهو انت كدة هتشتري بالغالي وبأي سعر قدامك .. لكن لو فيه مرونه في مواعيد سفرك ساعتها هتعرف تجيب ارخص سعر للطيران
.
5- انك تستخدم مدينه ك base ل رحلاتك وسط بلاد مختلفه
يعني ايه الكلام دة ؟؟
مثلا مثلا مدينه ميلان في ايطاليا من ارخص المدن اللي ممكن تسافر منها علي بلاد كتير اوي في العالم ( اعمل سيرش واتأكد بنفسك )
تقوم انت حاطط ميلان مركز عشان تسافر منها ل روما ,, وتسافر بعدها منها ل مدريد ,, وتسافر بعدها منها ل باريس الخ الخ
وممكن تجرب الموضوع دة في دول شرق اسيا
.
6- ابعد عن ايام الجمعه والاحد في اي حجوزات ودائما ركز في بدايه بحثك علي يوم الثلاثاء
لان الجمعه والاحد هما ال high time للحجوزات عشان الناس اللي رايحه ويك اند والناس اللي راجعه من الويك اند ( الويك اند في كل العالم بيبقي سبت وحد )
واثبتت الدراسات ان ارخص ايام الحجوزات بتبقي يوم الثلاثاء وسط الاسبوع ( كانت عندي صورة للاحصائيه دي بس للاسف ضاعت من الموبايل )
.
7- حاجه اسمها Price Alerts
مواقع زي kayak او skyscanner بيكون عندها حاجه اسمها price Alerts ودي انك بتديهم ايميلك وهما لما يلاقوا تذكره طيران رخيصه أو تذكره طيران عليها عرض للوجهات اللي انت بتبحث عنها دائما يقوم يبعتولك ايميل بالتذكره الرخيصه دي
طبعا شرط انك تستفيد من الحوار دة انك تكون flexible ومرن في مواعيد سفرك م مرتبط بمواعيد معينه
.
8- لو مسافر مدينه بعيدة عن العاصمه ف البلد اللي انت رايحها احجز تذكرتين منفصلتين مش لازم تذكره كامله واحدة
بمعني .. لو مثلا رايح بالي في اندونيسيا .. ولقيت تذكره طيران من القاهرة ل بالي ب 10 الاف جنيه .. ساعتها احجز من القاهرة ل جاكرتا ومن بعدها من جاكارتا ل بالي
وقتها هتلاقي السعر اقل بكتير من انك تحجز من القاهرة ل بالي مباشره
.
9- دة الفيديو اللي جايب الخلاصه واحسن فيديو شوفته بيتكلم عن ازاي تعمل سيرش عن تذاكر الطيران خطوة بخطوة عشان يبقي تطبيق عملي ليك
.
10- البحث عن ارخص تذكره عايز صبر وطوله بال .. يعني لو هتزهق من اول مرة يبقي بلاش تبحث احسن واحجز بالغالي وخلاص .. لكن التذكره الرخيصه عايزة تعب ف البحث وعايزة صبر عشان تقدر تقلب وتعمل سيرش علي كل الارقام والايام المتاحه
.
انا عارف ان الكلام دة اتهرس في مليون بوست ومليون فيديو ع اليوتيوب قبل كدة .. في الشارع هتسمع الكلام دة .. في اليوتيوب هتسمع الكلام دة .. في المطارات هتسمع الكلام دة .. مدحت شلبي و احمد شوبير بيقولوا الكلام دة
لدرجه لو فتحت الكابنيه هتلاقي برضو الكلام دة
بس زي ما قولت احنا هدفنا من البوستات دي المبتدئين اللي هما ابيض يا ورد .. مييييح يعني عشان يتعلموا زي ما احنا اتعلمنا محدش اتولد من بطن امه ابن بطوطه يعني ف معلش استحملوا الشرح الطويل معلش .
وكالعادة ... اقعدوا بالعافيه
