بص بقي يا استذة خد النصايح دي من واحد بقاله خمستاشر سنه هنا وشاف كل التطورات اللي حصلت في دبي...خد عندك ..اولا البرج ولا ليه ستين لزمه خدلك كام صورة من تحت وروح النافورة كذا مرة لان كل مرة موسيقي مختلفه وإحساس مختلف بس ماتنساش تعمل لايف وانت هناك علي الفيس علشان نشوفك.
ابن بطوطه مول اكثر من رائع وحتستمتع بيه اكتر من دبي مول لأنه فيه نكهات كتيرة من أكثر من بلد....وادخل السينما الثري دي اللي هناك ممتازة
مردف سيتي سنتر من الروائع هنا بالذات فلايت سيمولاشن حتاخد شهادة طيران في نص ساعه ( ماتفكرشي في الفلوس هي مرة في العمر)
روح جميرا عند ذا ووك واركب الهوا هناك....فيه حاجه اسمها سكاي دايف روعه لو انت بتحب التهييس.
ماتنساش تاخد مركب وتتمشي في الخليج من عند مارينا كده حتشوف مناظر روعة...
اطلع فوق شوية وروح حاجه جديدة اسمها لاست اكسيت ( المخرج الاخير) عربيات امل في الصحراوي إنما ايه .. روعه...كلها افكار جديدة.
وجنبها علطول حتلاقي تجهيزات لديزني لاند
قرية الليجو مش حلوة اوي علشان دي للاطفال
اشرح اكتر وانزل ابوظبي وروح جامع الشيخ زايد...تحفة معمارية مالهاش حل وكل اللي بيزورة اجانب ...خدلك كام صورة هناك ولو ليك في الصلاة صلي وارجع بسرعه علشان تلحق وافي سيتي....حتكرة اهرامات الجيزة واللي بتشوفوا فيها....حتعرف الناس هنا بتتهافت علي اثارنا ازاي......ومن وافي سيتي تروح الخور تركبلك مركب وتتعشي هناك وترجع الفندق قتيل وتناملك اربع ساعات بس علشان تعرف تزور كل مكان .
لما تصحي حتلاقي نفسك لسة مكسر...مايهمكشي خدلك حمام بارد واسترجل واشرب واحد بيريل وبعدين افطر فطار جامد مادام فري في الفندق
وانت نازل اشتري واحد ريد بول من السوبر ماركت قبل ماتغلي....واول ميترو وعلي مول الإمارات وتدخل سكاي دبي sky Dubai تتزحلق شوية مع البطريق وتطلع تتمشي فيه شوية مش اكتر من ساعه علشان ماتضيعشي وقتك...تركب المترو تاني وتروح ابراج الامارات ومن هناك تركب التورماي الي النخلة وتروح اطلانتس وتعيش حياتك....وتفتكر مدحت صالح وهو بيقول وانا وايايا بعيش زي المليونيرات
))....
هنا بقي تشرب الرد بول اللي اشترتها وانت طالع من الفندق فاكرها؟؟؟
تخلص اليوم ده وجري علي الفندق علشان بكرة بقي حتروح مكان جديد
فيه مول في جميرا اسمه سيتي ووك لا يفوتك ولازم يتراح بتاكسي... معلشي. ضحي شوية اهي علقه تفوت ولا حد يموت ....
من سيتي ووك روح شلال المياة الصناعي اللي معمول عند محطة مترو الخليج التجاري ...خدلك كام صورة علي السريع واركب المترو الي شارع الرقة.....تم تجديدةوبقي شكلة حلو ويستاهل انك تزورة تستعيد ذكريات زمان ايام الاشي طبعا فاهم قصدي
)).
وبعدين بقي ترجع تحضر شنطتك وتسافر لأنك لو استنيت اكتر من كده ح تحتاج قرض تاني من البنك ...وبالتوفيق....لو احتجت حاجه قوللي
))
