كنت حاتجوز بنت من بلد أسمها كبردينو بلقاريا ودي دولة تابعة للكيانات الفدرالية في روسيا المهم أتفقت مع البنت أني حاعزمها هي والدها يجوا مصر ويقعدوا أسبوعين وبعدها والدها يقرر بالموافقة أو الرفض للجواز والدها اشترط شرطين قبل مايجي ، الاول اني أقابل أبن عمه الي موجود في الأزهر بيدرس وأسمه ( سمات ) علشان يديله انطباع مبدئي عني الشرط الثاني انه مش حايرد غير بعد مايرجع بلده ويعمل أجتماع للعائلة ويعرض عليهم رأيه ويتم التصويت ، الجواز عندهم بيكون بتصويت علي القرار من العائلة المهم قابلت قريبهم وأكتشفت أنه موجود في احدي قري مدينة المنوفية أسمها سبك الأحد ودي قصة ثانية وزي ماقال الأستاذ هيكل ( وللقصة قصة وتلك قصة اخري ) المهم اتعرفت علي قريبهم ( سمات ) شاب في العشرينات ودمه زي العسل وبعدها والبنت وباباها جم مصر وقعدوا 12 يوم وبعد لما سافر رد عليا وقالي أنه عرض علي العائلة وأشاد بي وبعائلتي وهم وافقوا بس بشرط اني أستني سنتين لحد ماتكمل الدكتوراة بتاعتها ، طبعا حوار اني أفضل متعلق سنتين وكل الي يربطني بالبنت شات علي السكايب حوار فاشل حكيت الي حصل ( لسمات ) قاريبهم ماهو بقي صاحبي قالي أوعي توافق صمم أنك تجوز دلوقتي وخلي بالك في عرف عندنا لو حد من العائلة مات بيتأجل الفرح سنة وعمها عيان ووممكن علي حظك يموت قولتله انا مستعد نكتب كتاب والدخلة بعد الدكتوراة قالي هما مايعرفوش عندنا كتب كتاب وبعدين دخلة ممكن دخلة وبعدين كتب كتاب لكن العكس ده مش حايفهموه قولتله طيب وايه الحل لو باباها رفض قالي ( حنخطفها ) أتخضيت طبعا وقلتله انت مجنون نخطف مين قالي ماتقلقش حنخطفها كده وكده ده موضوع متعارف عليها عندنا لو بنت وولد بيحبوا بعض والأهل مش موافقين علي الجواز أو في حالة وفاة تستدعي تأجيله الولد والبنت بيتفقوا انه يخطفها تمثيل كده علشان يحط اهلها ادام الأمر الواقع ويوافقوا علي الجواز والخطف ليه عرف وأسلوب أنك بتخبي البنت في بيت معين والبيت ده أنت مش بتدخله أصلا بيكون مع البنت أتنين ستات من عيلتك وبتبعت لاهلها حد من طرفك يبلغهم انك خاطفها وبيروح المرسال وبيرجع مع حد من عائلتها بيتغمي عينه طوال السكة وبيروح للبيت الي فيه البت المخطوفة ويعرض عليها ثلاث مرات أنها ترجع معاه لو رفضت بيرجع يبلغ عائلة البنت وبيعملوا قاعدة وفي الاخر بيصوتوا بالموافقة علي الجواز بس أهم حاجة لازم تكون البنت موافقة لأن القانون بيجرم العادة دي فلو أهل البنت أشتكوا والبنت كانت مش موافقة حاتدخل السجن المهم قولتله طيب يا ( سمات ) لو جريتك ووافقت علي موضوع الخطف ده أزاي أسافر بلد غريبة وأخطف بنت في بلد انا غريب فيها معرفش فيها حاجة ده اهلها ممكن يخطفوني ويدفنوني وماحدش يعرف لي طريق قالي ماتقلقش لو البنت وافقت أنا حسافر معاك وحساعدك انا وصحابي وحجابلك المكان الي حنخبيها فيها والمرسال الي حانبعته بس أوعي والدها يعرف اني أنا الي ساعدتك ياأما حايقطع علاقته بي ، المهم لما عرضت علي البنت رفضت وقالتلي انا ماأقدرش اعمل كده مع اهلي لأني كده بتبقي فضيحة للعائلة بلغت ( سمات ) بالي قالته قالي قولها أتنيلي أنتي أمك مخطوفة وخالتك مخطوفة ولما لقيت ان البنت أصلا جاي علي هواها تأجيل الفرح وبتلكك علشان متتخطفش ولو بتحبني فعلا كانت وافقت تتخطف صرفت نظر عن الموضوع واتجوزت من اوكرانيا
و كانت slava ukraini حاجة كدا زى تحيا مصر
#ماليزيا