A
Ashraf Gawdat
:: مسافر ::
لمحبي الطبيعة ولهواة أوروبا .. النهاردة هتكلم عن تجربة مختلفة أعتقد إن محدش اتكلم عنها هنا قبل كده .. تجربة أكبر كهف جليدي في العالم .. وهو كهف أيسريزنفيلت Eisriesenwelt في النمسا
الفكرة في الكهف ده إنه تجربة مختلفة .. لو بنتكلم على الطبيعة فغالبا بنتكلم على جبال .. جبال مغطاة بالخضرة والأشجار .. قمم الجبال مغطاة بالثلوج في عز الصيف .. بحيرات وأنهار وشلالات .. غابات .. إلخ .. لكن تجربة الكهف .. والكهف الجليدي بالذات تجربة مختلفة تستحق التجربة
قبل أي حاجة لازم نبقى واخدين بالنا من مجموعة نقط:
أولا: التجربة متعبة جدا .. جدا جدا. الوصول للكهف نفسه متعب جدا ويتضمن مشي صعودا على جبل لفترة مجموعها يقترب من 45 إلى 60 دقيقة (على طريق ممهد طبعا) .. وباقول مجموعها لأن جزء من الصعود يتضمن ركوب أتوبيس أو تليفريك. داخل الكهف نفسه هتمشي صعودا تقريبا 700 درجة سلم وزيهم هبوطا .. الفترة داخل الكهف كانت حوالي ساعة ونص نصهم صعود على درجات سلم متعبة. أنا باقول كده علشان اللي رايح يبقى عامل حسابه وميتفاجئش .. والموضوع مش مستحيل يعني واحنا عملناه واحنا ناس ملناش أي علاقة بالرياضة ولا عندنا لياقة .. وفي رأيي الشخصي إن الموضوع يستحق
ثانيا: الرحلة بشكل عام هتكلف الفرد حوالي 50 يورو. صحيح تذكرة الكهف + التليفريك عاملة 24 يورو .. لكن يضاف عليهم تمن تذكرة القطر رايح جاي لأنك غالبا مش هتكون قاعد في نفس المدينة اللي فيها الكهف وهتروحه من مدينة تانية .. والقطر يعمل حوالي 9.5 يورو يعني حوالي 19 يورو رايح جاي (حسب انت جاي منين بس دي أقل حاجة) + 7 يورو تذكرة الأتوبيس اللي هيوصلك لغاية بداية الجبل اللي عليه الكهف ويرجعك تاني .. يبقى المجموع 24 + 19 + 7 = 50 يورو
ثالثا: الموضوع هياخد منك تقريبا يوم كامل تروح الصبح ترجع آخر النهار .. يعني لو بتخطط للرحلة حطله يوم مستقل وممكن يتحط معاه أي حاجة ممكن تتعمل في الفترة المسائية .. لو كان لسه فاضل صحة
رابعا: ممنوع التصوير داخل الكهف .. يعني مش هتعرف توثق صورتك وانت واقف جنب المناظر الطبيعية داخل الكهف .. ودي بالنسبة لي أسوأ حاجة في الموضوع
خامسا: مهما كان الجو صيف وحر فالجو جوه الكهف تلج .. الواحد ممكن يكون طالع بلبس صيفي تماما لكن لازم يكون عامل حسابه في أتقل لبس معاه ويستحسن جوانتي كمان علشان البرد .. النقطة دي مهمة جدا
لو قررت تروح .. هتشوف انت موجود في أي مدينة وتاخد القطر منها لمحطة اسمها Werfen . لو من سالزبورج القطر رايح بس بيتكلف في حدود 9 يورو وبياخد حوالي 50 دقيقة .. ولو من زيلامسي بيتكلف حوالي 10 يورو وياخد حوالي ساعة .. أما لو من فيينا علشان بعيدة فالقطر يتكلف حوالي 50 يورو وياخد 3 ساعات ونص .. علشان كده أحسن حاجة إن الواحد يقضي كام يوم في سالزبورج أو زيلامسي - وهم يستحقوا جدا - وياخد يوم منهم للكهف
محطة القطر جنبها في أتوبيس بيروح للكهف وبيكون مكتوب عليه اسمه Eisriesenwelt .. تذكرته زي ما قلت 7 يورو ذهاب وعودة بعد ما تخلص. الأتوبيس بينزلك عند بداية الجبل .. تطلع شوية على رجلك وتوصل شباك التذاكر .. تقطع تذكرة الكهف + التليفريك (ممكن تقطع للكهف بدون التليفريك بس اطلع بقى المسافة كلها على رجلك لو جدع) .. تطلع كمان مسافة على رجلك لغاية التليفريك .. تركبه وتنزل فوق .. تكمل طلوع أكتر على رجلك برضه لغاية ما توصل بوابة الكهف. في جنب البوابة حمامات بالمناسبة
الناس بتدخل في مجموعات ومعاهم مرشد .. لما مجموعة تكمل بتستنى المجموعة اللي بعدها .. في مجموعات المرشد بالألماني ومجموعات بالإنجليزي. قبل ما تدخل هتلبس اللبس التقيل اللي واخده معاك .. قبل ما يفتح بوابة الكهف المرشد هيحذركم إن اللي معاه طفل يمسكه كويس واللي لابس برنيطة ولا حاجة على راسه يمسكها كويس علشان هيطيروا. الفرق الضخم في درجة الحرارة بين جوه الكهف وبراه بيعمل فرق ضغط عالي جدا .. فرق الضغط بيعمل تيار هوا شديد جدا .. أنا شنطة الضهر اللي كنت لابسها وقعت من على كتفي. في الشتا لما الجو بره يبرد مش بيكون في فرق في الضغط وبالتالي مفيش تيار هوا .. أو لما بره يبرد أكتر من جوه بيعمل تيار في الاتجاه العكسي
في الداخل الدنيا بتكون ضلمة إلى حد ما .. علشان كده بيدوا الناس قبل ما يدخلوا كلوب بشمعة مش ببطارية (واضح إن أي إضاءة بكهربا أو بطاريات ممنوعة بالداخل حتى مع المرشدين). جوه كله تلج .. الأرض والحيطان والسقف .. غير تكوينات تلجية ضخمة من الأرض للسقف وبتاخد أشكال مختلفة بعضها أشكال حيوانات .. وبعض التكوينات تشوفها من ناحية تتطلع فيل تبصلها من ناحية تانية تطلع حوت مثلا. بتمشي جوه على سلم خشب تقريبا ما مجموعه 700 درجة بتلف فيهم جزء كبير من الكهف صعودا وزيهم هبوطا .. لغاية ما الجولة تخلص وتطلع تاني من الكهف ويقابلك نفس تيار الهوا وانت خارج
تقلع اللبس التقيل لو كان الجو صيف .. تاخد نفس مشوار الصعود ولكن هبوطا .. لغاية ما توصل محطة القطر وترجع مدينتك تاني
الجولة بتاخد حوالي ساعة ونص جوه الكهف .. تعمل حسابك في ساعتين على الأقل كمان بره .. ساعة من لحظة وصول القطر للمحطة للوصول للكهف وساعة زيهم في الراجع .. زائد ساعة للقطر نفسه وزيها للراجع .. وبالتالي الرحلة كلها يتعمل حسابها في 5 ساعات ونص على الأقل .. علشان كده باقول الرحلة تاخد أغلب النهار .. لكن ممكن يتعمل حاجة بعدها حسب الصحة المتبقية وحسب المتاح (لأن أغلب الأماكن بتقفل بدري)
ده سايت الكهف .. عليه معلومات أكتر ومفصلة جدا .. يعني أنا محتجتش أي معلومة من مكان خارجي .. وفيه المواعيد بالتفصيل وفيه الأسعار حسب السن (الأطفال ليهم سعر مخفض) وحسب العدد (المجموعات الكبيرة ليها سعر مخفض) وهكذا .. وفيه كيفية الوصول للكهف وفيه وصف للكهف وصور من الداخل وكل حاجة
https://www.eisriesenwelt.at/en
اقعدوا بالعافية
الفكرة في الكهف ده إنه تجربة مختلفة .. لو بنتكلم على الطبيعة فغالبا بنتكلم على جبال .. جبال مغطاة بالخضرة والأشجار .. قمم الجبال مغطاة بالثلوج في عز الصيف .. بحيرات وأنهار وشلالات .. غابات .. إلخ .. لكن تجربة الكهف .. والكهف الجليدي بالذات تجربة مختلفة تستحق التجربة
قبل أي حاجة لازم نبقى واخدين بالنا من مجموعة نقط:
أولا: التجربة متعبة جدا .. جدا جدا. الوصول للكهف نفسه متعب جدا ويتضمن مشي صعودا على جبل لفترة مجموعها يقترب من 45 إلى 60 دقيقة (على طريق ممهد طبعا) .. وباقول مجموعها لأن جزء من الصعود يتضمن ركوب أتوبيس أو تليفريك. داخل الكهف نفسه هتمشي صعودا تقريبا 700 درجة سلم وزيهم هبوطا .. الفترة داخل الكهف كانت حوالي ساعة ونص نصهم صعود على درجات سلم متعبة. أنا باقول كده علشان اللي رايح يبقى عامل حسابه وميتفاجئش .. والموضوع مش مستحيل يعني واحنا عملناه واحنا ناس ملناش أي علاقة بالرياضة ولا عندنا لياقة .. وفي رأيي الشخصي إن الموضوع يستحق
ثانيا: الرحلة بشكل عام هتكلف الفرد حوالي 50 يورو. صحيح تذكرة الكهف + التليفريك عاملة 24 يورو .. لكن يضاف عليهم تمن تذكرة القطر رايح جاي لأنك غالبا مش هتكون قاعد في نفس المدينة اللي فيها الكهف وهتروحه من مدينة تانية .. والقطر يعمل حوالي 9.5 يورو يعني حوالي 19 يورو رايح جاي (حسب انت جاي منين بس دي أقل حاجة) + 7 يورو تذكرة الأتوبيس اللي هيوصلك لغاية بداية الجبل اللي عليه الكهف ويرجعك تاني .. يبقى المجموع 24 + 19 + 7 = 50 يورو
ثالثا: الموضوع هياخد منك تقريبا يوم كامل تروح الصبح ترجع آخر النهار .. يعني لو بتخطط للرحلة حطله يوم مستقل وممكن يتحط معاه أي حاجة ممكن تتعمل في الفترة المسائية .. لو كان لسه فاضل صحة
رابعا: ممنوع التصوير داخل الكهف .. يعني مش هتعرف توثق صورتك وانت واقف جنب المناظر الطبيعية داخل الكهف .. ودي بالنسبة لي أسوأ حاجة في الموضوع
خامسا: مهما كان الجو صيف وحر فالجو جوه الكهف تلج .. الواحد ممكن يكون طالع بلبس صيفي تماما لكن لازم يكون عامل حسابه في أتقل لبس معاه ويستحسن جوانتي كمان علشان البرد .. النقطة دي مهمة جدا
لو قررت تروح .. هتشوف انت موجود في أي مدينة وتاخد القطر منها لمحطة اسمها Werfen . لو من سالزبورج القطر رايح بس بيتكلف في حدود 9 يورو وبياخد حوالي 50 دقيقة .. ولو من زيلامسي بيتكلف حوالي 10 يورو وياخد حوالي ساعة .. أما لو من فيينا علشان بعيدة فالقطر يتكلف حوالي 50 يورو وياخد 3 ساعات ونص .. علشان كده أحسن حاجة إن الواحد يقضي كام يوم في سالزبورج أو زيلامسي - وهم يستحقوا جدا - وياخد يوم منهم للكهف
محطة القطر جنبها في أتوبيس بيروح للكهف وبيكون مكتوب عليه اسمه Eisriesenwelt .. تذكرته زي ما قلت 7 يورو ذهاب وعودة بعد ما تخلص. الأتوبيس بينزلك عند بداية الجبل .. تطلع شوية على رجلك وتوصل شباك التذاكر .. تقطع تذكرة الكهف + التليفريك (ممكن تقطع للكهف بدون التليفريك بس اطلع بقى المسافة كلها على رجلك لو جدع) .. تطلع كمان مسافة على رجلك لغاية التليفريك .. تركبه وتنزل فوق .. تكمل طلوع أكتر على رجلك برضه لغاية ما توصل بوابة الكهف. في جنب البوابة حمامات بالمناسبة
الناس بتدخل في مجموعات ومعاهم مرشد .. لما مجموعة تكمل بتستنى المجموعة اللي بعدها .. في مجموعات المرشد بالألماني ومجموعات بالإنجليزي. قبل ما تدخل هتلبس اللبس التقيل اللي واخده معاك .. قبل ما يفتح بوابة الكهف المرشد هيحذركم إن اللي معاه طفل يمسكه كويس واللي لابس برنيطة ولا حاجة على راسه يمسكها كويس علشان هيطيروا. الفرق الضخم في درجة الحرارة بين جوه الكهف وبراه بيعمل فرق ضغط عالي جدا .. فرق الضغط بيعمل تيار هوا شديد جدا .. أنا شنطة الضهر اللي كنت لابسها وقعت من على كتفي. في الشتا لما الجو بره يبرد مش بيكون في فرق في الضغط وبالتالي مفيش تيار هوا .. أو لما بره يبرد أكتر من جوه بيعمل تيار في الاتجاه العكسي
في الداخل الدنيا بتكون ضلمة إلى حد ما .. علشان كده بيدوا الناس قبل ما يدخلوا كلوب بشمعة مش ببطارية (واضح إن أي إضاءة بكهربا أو بطاريات ممنوعة بالداخل حتى مع المرشدين). جوه كله تلج .. الأرض والحيطان والسقف .. غير تكوينات تلجية ضخمة من الأرض للسقف وبتاخد أشكال مختلفة بعضها أشكال حيوانات .. وبعض التكوينات تشوفها من ناحية تتطلع فيل تبصلها من ناحية تانية تطلع حوت مثلا. بتمشي جوه على سلم خشب تقريبا ما مجموعه 700 درجة بتلف فيهم جزء كبير من الكهف صعودا وزيهم هبوطا .. لغاية ما الجولة تخلص وتطلع تاني من الكهف ويقابلك نفس تيار الهوا وانت خارج
تقلع اللبس التقيل لو كان الجو صيف .. تاخد نفس مشوار الصعود ولكن هبوطا .. لغاية ما توصل محطة القطر وترجع مدينتك تاني
الجولة بتاخد حوالي ساعة ونص جوه الكهف .. تعمل حسابك في ساعتين على الأقل كمان بره .. ساعة من لحظة وصول القطر للمحطة للوصول للكهف وساعة زيهم في الراجع .. زائد ساعة للقطر نفسه وزيها للراجع .. وبالتالي الرحلة كلها يتعمل حسابها في 5 ساعات ونص على الأقل .. علشان كده باقول الرحلة تاخد أغلب النهار .. لكن ممكن يتعمل حاجة بعدها حسب الصحة المتبقية وحسب المتاح (لأن أغلب الأماكن بتقفل بدري)
ده سايت الكهف .. عليه معلومات أكتر ومفصلة جدا .. يعني أنا محتجتش أي معلومة من مكان خارجي .. وفيه المواعيد بالتفصيل وفيه الأسعار حسب السن (الأطفال ليهم سعر مخفض) وحسب العدد (المجموعات الكبيرة ليها سعر مخفض) وهكذا .. وفيه كيفية الوصول للكهف وفيه وصف للكهف وصور من الداخل وكل حاجة
https://www.eisriesenwelt.at/en
اقعدوا بالعافية