لو اتعرض عليك انك تمسك السياحه في مصر ايه الي...

[Moutaz Mohamed]

لو اتعرض عليك انك تمسك السياحه في مصر
ايه الي ممكن تعمله عشان ترجع السياحه العالميه تاني و تخليها اقوي من الاول و تتحط في مركز متقدم وسط دول العالم؟

انا مثلا ممكن
*هجيب احسن مصورين في مصر و مفيش اكتر منهم دلوقتي في مصر و اخليهم يعملوا فوتو سيشن علي مستوي المحافظات بحيث انه يخلي كل مدينه في مصر عباره عن مركز سياحي لمدينه.

*هعمل قناه علي اليوتيوب عشان تعرض الصور ديه في صوره افلام وثائقيه

* هخلي الفيزا عند الوصول بقيمه ٣٠ دولار

* هفتح شركات سياحه تخضع لوزاره السياحه في كل دول اوربا بحيث ان يكون في برامج ثابته بالمدن و الاماكن الي هيتم زيارتها في مصر

* هتعاقد مع مصر لطيران عشان تكون في رحله اسبوعيه من كل دوله اوربا و اضمن ان كل الفلوس ديه تكون داخله مصر.

* هعمل حفلات عالميه لا تقل tomorrow land و cold play عشان نحسن من مستوي السياح الي بييجوا مصر

*هعمل مسرح ثابت يتعرض عليه كل انواع الفولوكلور المصري

*هلغي فكره ان مصر عباره عن دوله فرعونيه فقط و هنعرف العالم ان مصر مركز لحضارات المختلفه

*تشجيع تصوير الافلام و الاغاني الاجنبيه في مصر مع تسهيل اجراءات التصوير خصوصا لو داخل الاماكن الاثريه او الترفيهيه.

تفتكروا ايه تاني ممكن نعمله؟؟
#Traveller_Experience_suppot_tourism

 

[Mahmoud Rabie]

العدل أساس أي شئ

 

[Mohamed Mustafa Hamed]

هو أول حاجة خالص نعمل budget airlines مصرية زي Ryan Air و easy jet و Pegasus

 

[Mohamed Gamal Gemy]

افتح الطيران المصرى للاستثمار لشركات شارتر اجنبيه . وتعمل طيران داخلي بين الغردقة وشرم والاقصر واسوان بدون الحاجه للرجوع للقاهرة كل مرة .
واخفض قيم الضرايب على الشركات الاجنبيه اما تعمل ترانزيت فى مصر وهكذا

 

[Shady S. Raafat]

اهم حاجه اصلا قبل دا كله الامن ..السياح دلوقتي بيصدقوا ما يلاققوا دوله امنه ومفهاش تفجيرات زي الامارات والخليج بيجروا عليها

 

[Hend Salem]

- الاهتمام بالاماكن السياحية و الاثرية من حيث النضافة و توفير الخدمات
- منع الباعة الجائلين و بتوع الجمال و الاحصنة اللى بيقرفوا السايح فى الاماكن السياحية و على رأسها الأهرامات
- تدريب العاملين فى مجال السياحة على كيفية التعامل مع السائح الاجنبى و يبطلوا يتعاملوا معاه على انه سكيبة دولارات
- منع كلمة كل سنة و انت طيب من قاموس السياحة
- رفد مدام عنايات و استاذ صلاح من وزارة السياحة او احالتهم للمعاش المبكر و تعيين شباب اصحاب فكر و رؤية للنهوض بالسياحة
- تنظيم حملة دعائية عالمية للترويج للسياحة فى مصر و تسليط الضوء على الاماكن اللى بتشد انتباة السائح
- فتح اسواق جديدة و متنوعة و بديلة لسياح شرق اوروبا و السياح الروس و عدم التركيز على بلد بعينها
- خلق انشطة جديدة من اللى بتشد انتباه السياح حاليا

 

[Ali Hadi]

اول حاجة طبعا اسيطر علي الجريمة شوية و رصف الطرق وعمل كباري للبلد كتيير عشان تحل ازمة المرور وان بلد تكون منغير فيزا عشان لو حسبتها انتا بيجيلك فلووس اكتر 100 مرة من الفيزا لما السايح بيجي البلد هحاول اهتم بالمزارات السياحية اكتر من كدة

 

[Nancy Magdy]

هسجن كل المتحرشين.. واهو الاستفادة تبقى دوبل

 

[Amr Elshahat]

اول حاجه الغي سياسه .all inclusive
دورات تدريبيه للعاملين في السياحه
رقابه صارمه علي كل الاماكن السياحيه
تحديث الرحلات في مصر و عمل برامج جديده بدل اللي بتتكرر من ٢٠ سنه
الرقابه علي البزارات ..
لو قعدت اتكلم مش هنخلص النهارده

 

[Safwat AbdEl Barry]

أهم أ لوياتك تحط إيدك فى إيد وزيرى الداخلية والدفاع بحيث توظف قوة الوزارتين فىخدمة السياحة بتنظيف الأماكن السياحية من النصابين والخرتية والشحاتين ولصوص التاكسيات والأماكن الممنوعة بأسم المحميات ومناطق عسكرية محظورة وتسهيل الدخول فى المطارات والموانئ مع سرعة الإنجاز والبشاشة فى التعامل وقطع يد كل من يستغل السائح أو يتنطع لطلب إكرامية أو رشوة.لابد أن يشعر السائح أنه ضيف عزيز ومرحب به أينما حل أو إرتحل .والباقى سيكون غاية فى السهولة من ناحية السيطرة على الأوتيلات والقرى السياحية لأن حياتهم الساااائح

 

[Amr Elshahat]

2013 انا حاولت اتعاقد مع مصر للطيران .. علي طيارتين شارتر من سانت بيتر برج للغردقه وزيهم من موسكو ... الروتين المصري بوظ الاتفاق قبل ما يبتدي

 

[Kævën Tæwêüqê]

مش مجامله
بس لو انا وزير هاجيب شباب امثالك يعملوا دعايا خارجيه واسفرهم يروجوا بالصور والكلام والحكايات عن بلدنا للأجانب

 

[Ahmad Wadan]

هوسد الأمر لأهله. بس كده.

 

[Hany Adel]

مش هخلي خد يفتح شركة سياحة الا لو دارس سياحة او اثار او تاريخ...محدش يشتغل في الفنادق الا اللي دارس سياحة و فنادق خصوصا في المطاعم يكونوا فاهمين معني الفندقة...الجمالين و بتوع الحصنة و الكارتات في الاماكن السياحية يطلعلهم تصريح و يكونوا تحت رقابة مشددة و يشتغلوا بنظام الدور...نشر كاميرات مراقبة لمراقبة السلوك لان فيه سياح و مصريين للاسف بيقفوا علي التماثيل او يلمسوها و العقاب يكون فوري...حملات اعلانية و قناة مخصصة 24 ساعه عن السياحة و الاماكن السياحية في مصر

 

[Amr Elshahat]

المفروض بتعمل مجلس اعلي للسياحه .. يتكون من الشباب الخبره اللي بقلها سنين في السياحه و يقترحوا كل الافكار الجديده و الصح منها يينفذ

 

[Amr Ali]

هاعمل فيزا لشرم الشيخ والغردقة بس .. للجنسيات اللي غير مرغوب في دخولها مصر زي ايران مثلا .. والفيزا دي تبقى رخيصة

 

[Abady Breezy]

هشيل الناس بتاعت الحصنه اللي في الهرم اللي بيرخموا على المصريين قبل السياح وبيستغلوهم هخلي الاشراف العام عند منطقة الاهرامات شباب خارجيين كلية آثار والحكومة تامن من بعيد لبعيد؛ الأهرامات اهم منطقة سياحيه في العالم

 

[شيماء علي مراد]

*الاهتمام بنضافة الاماكن السياحية
و الاهتمام بنظافة الحمامات فيها
*فرض رسوم منخفضة لجميع الاماكن و المزارات السياحية و رسوم اضافية للاماكن المميزة بكل مزار
مثلا ٥ جنيه لدخول الاهرامات و ٢٠ جنيه اخرى للدخول بداخل الهرم
*توفير خط ترام hip on hip off بجميع المحافاضات له مسار خاص لتجنب الزحام المروري

*منع الباعة الجائلين و المتسولين بالاماكن السياحية
*عمل افلام تسجيلية عن جميع مناطق مصر السياحية و الترفيهية
*دعوة فنانين السينما العالمية للتصوير بمصر و تسهيل الاجراءات

 

[Amira Kamal]

لازم نعمل قانون نحمي بيه السياح من المستغليين و الحرامية و المتسوليين والناس الرزلة اللي بنقابلها و الناس تبقي بشوشو و ظريفة كده

 

[Walid El-Dessouki]

أهم شئ أبعاد السرسجيه عن مجال السياحه و تبديلهم بالمتعلمين