انا ملاحظه ان كتير من البوستات في مواقع السفر...

[Ghada Ahmed]

انا ملاحظه ان كتير من البوستات في مواقع السفر بدات تحاول تكوين جروبات للخروج مع بعض و التعارف على الواتساب او الفيسبوك .... كل ده جميل طبعا .... بس ياريت تتاكدوا من ان فعلا ان اللي بتكون المجموعات ديه و بتاخد ارقامكم هي بنوته زيكم .. مش شاب او لغرض مش محترم ..... مجرد نصيحه لوجه الله.

 

[Bahaa Aldeen Farouk]

شكرا طبعا للتوضيح و الصراحه أنا شخصيا لا أنصح أي حد سواء شاب أو بنت أنه يدي بياناته الشخصيه لأي فرد سواء رقم موبيل أو عنوان منزل أو غيره
و لو فيه مجموعه حابين يطلعوا رحله منظمه يبقى عن طريق جهة موثوق فيها و ليها سمعتها و اسمها و ليها تاريخ في تنظيم الرحلات , مش أي حد يجمع 5 أو 6 أشخاص و يقول أنا حنظم رحله ( بدون اي خبره ) لأن للاسف بتطلع مهازل
لو حد عاوز يجرب لوحده الأول مافيش مشكله يجرب و يغلط و يتعلم و لكن الغلط الأكبر أنه يدبس مجموعه أكبر معاه في شيء غير منظم ممكن يكلفهم خسائر كتير أوي

 

[Mostafa Hamza]

انا شايف كدا فعلاً و الاحسن كمان انه لو فعلاً فى نيه السفرمع بعض فى جروب الافضل انه حد من اهالى الناس مثلاً يروح يشوف اهل الناس التانيين او يتجمعو فى مكان عام مع ولدتها بقى زوجها اى حاجه تثبت انها فعلاً بنت او ست و الهدف الحقيقى هوا السفر مش حوارات او استغلال مثلاً او غرض النصب

 

[Jiji Hashem]

شكرا ... فعلا ده كلام صح

 

[Mahmoud Said El Sherif]

بنت وولد .. انا مجربتش اخرج مع حد عن طريق جروب على النت سواء ولد او بنت .. فى ناس منفتحه وبتقبل تكون صدقات عن طريق الجروبات لما بتلاقى من البروفايل ان صاحبه قريب لارائهم واجتماعياتهم وماديتاهم .. فى ناس مبيفرقش معاهم صداقة البنت من الولد .. احنا بنحذر من الموضوع لكن لا نحجر على احد

 

[Mohamed Zedan]

هو كلامك سليم بس ماعتقدش لسة فى حد بيعمل شغل الاطفال دا
معظم الناس الى هنا سافرت وواعية وكبار
بس كلام مهم للناس تاخد بالها

 

[Abo Ali]

قى بلوك للظروف

 

[Adham Hamdi]

بيحصل عك تنظيم كل مرة ده بفرض انه حد نيته كويسة مش بيستهبل

 

[Mohamed A. Zaki]

على جروبات تانية زي traveller experience ناس جمعوا نفسهم و سافروا و رجعوا و شكروا في الناس و السفرية و منهم ناس طلعوا لوحدهم ما يعرفوش حد سواء شباب او بنات بس الاساس ان الادمنز شغالين كويس جداً في الجروب ده و بينضفوه بشكل يومي و بالتالي نسبة الناس اللي مش تمام قليلة جداً و نادر لما تحصل مشادات او ناس تشتم و غيره زي ما بيحصل في معظم لو مش كل جروبات الفيس و عموماً كدة كدة كل شخص بيقدر يوقف اللي قدامه عند حده و مش شرط رحلة مع جروب عالنت وحشة لكن مع مكتب حلوة ما كتير ناس حصلهم مواقف سلبية من رحلات مع مكاتب

 

[Ahmd G. Raof]

افرضى لغرض مش محترم وناس متفاهمه ايه اللى مزعلك انتى هو حد ضرب حد ع ايده ناس كبيره وعاقله اوى وعارفه بتعمل ايه كويس مش جايز واحده بتشقطلها عريس او العكس

 

[Ismail Almaz]

حذري من ان الموضوع فيه غش بس لكن ملكيش تحذري في انه تديه لولد او مش لولد ..لان كل بنت وليها اسلوب تفكيرها ..لكن نت مفروض تقولي احذروا لو ولد وعامل بنت ....

 

[Diaa Mahfouz]

متدوش رقمكم لولد ؟! حضرتك احنا في 2017 !! معظم الرحالات الناجحه بتعملها اولاد .. وكل الرحالات الفاشله تنظيم بنات .. ده اولا.. ثانيا حضرتك الرحلات ولو رحلات دوليه بالذات .. وجود ولد في جروب او مع حد هيدى نسبه امان اكتر من ان بنت لوحدها او بنات حتى مع بعض .. طبعا مع احترام اراء كل واحد في اختياره لحريته .. اضافه الي ان بره هتتعاملي مع كل البشر مش بنات بس .. واخيرا معظم الناس هنا كبيره وواعيه ومش في دماغهم الهجص اللي بتحذرى منه ..

 

[Abdelrahman Fawzy]

ياريت نبطل العقد دى بعد اذنك

 

[ساره الشريف]

شكرا ع النصيحة ☺

 

[Mo Ha MMed]

/عقارات مدينة الضباط المستقبل

 

[Rania Ali]

طيب انا هحكيلكم تجربة مختلفة..
في واشنطن اتعرفت على بنت امريكية بتشتغل مدير مشروع في منظمة حقوق انسان وكانت على قوة مشروع بيساعد البنات المخطوفين قصرا او استدراجا للعمل في الدعارة ف امريكا..
بتساعدهم يرجعوا بلدهم أو يلاقوا شغلانات أخرى احسن وتغيير هوية عشان القواد ميعرفش يلاقيهم تاني

guess what????????

قالتلي أن بنسبة 100% من البنات اللي هي ساعدتهم سنة 2011 حوالي كذا 1000 بنت تم استدراجهم وليس خطفهم..
والاستدراج تم من وكلاء سفر بناءا على رغبة البنات انهم عاوزين يسافروا إما للفسحة أو للعمل.. وأن التفاصيل كانت بسيطة جدا ومفيهاش أي تعقيدات ولا اجراءات صعبة نهائي وان دخولهم للولايات المتحدة كان رسمي وطيران كمان..
والموضوع بيبدأ بفسحة او شغل بالفعل وبعد كدا بتقلب تراجيدي

وقالتلي كمان أن مفيش ولا بنت منهم وافقت ترجع بلدها عشان الفضايح اللي هيعملها الوكيل للبنت في مجتمعها الصغير لأنهم من مجتمعات نامية جدا

اظن الرسالة وصلت

وانا والله ملاحظتي دايما على بوستات البنات اللي من نوعية "ياللا ياجماعة نلم بعض ونسافر" هي أن لو موش عارفة البنات دي معرفة شخصية وجيدة وواااااااثقة فيها جدااااا
يبقى تسافري لوحدك اضمن
او سافري مع شركة مشهرة

دي ناس هتشاركيهم غرف نوم وتفاصيل حياة وهتلبسي ملابس منزلية مريحة في وجودهم وهتروحي ف النوم وهما موجودين معاكي.. صعب تكوني آمنة على نفسك وفلوسك مع حد متعرفيهاش..
بنت ولد عفريت ازرق.. الثقة والراحة أهم من الفسح والتوفير

 

[Tamer Elnahal]