طيب يا جماعة لسه في حد مكتبش بوست عن عيوب...

  • بادئ الموضوع بادئ الموضوع Mostafa M. El-Desouky
  • تاريخ البدء تاريخ البدء
عرض العطلة
M

Mostafa M. El-Desouky

:: مسافر ::
#1
طيب يا جماعة لسه في حد مكتبش بوست عن عيوب المصريين في الفنادق؟ حد لسه مقالش اقتراح ازاي يعرف يسيطر على الguest المصري المتوحش؟ في حد لسه مطلعش العنصرية و الطبقية اللي جواه و عرفنا انه قرف جدا جدا لما سافر بسبب المناظر اللي شافها؟
الأستاذ اللي هناك كتبت رأيك؟ المدام اللي ف رابع صف عبرتي عن أحاسيسك؟؟

مش كده يا جماعة والله.. حسستونا ان البني آدم المصري بكافة أنواعه لا يستحق، لا يستحق أي شئ! يعني مش كفاية اللي الناس شايفاه و عايشاه لأ احنا كمان مستمرين في قهرهم و كأن العيشة في مصر أصلا مش كفاية! الناس اللي بتروح اسكندرية بنتريق عليهم، يروحوا شرم الشيخ ولا الغردقة يطلعوا ولاد ستين تيت و بيعملوا بيبي في البيسين.. أنا مشوفتش كده في حياتي بصراحة! ستريوتايبج و ستيجما و عنصرية و قرف لا يوصف!

اللي مش عاجبه أشكال عموم الشعب يروح مستعمرات الأثرياء في الساحل وهو هيريح عينه من المواطنين المقرفين دول، أو يشخلل جيبه شوية و ينزل في فندق من أبو ٥٠٠٠ الليلة فما فوق وهو ممكن يرتاح و يلاقي نفسه.. يا اما يحاول ينضف نفسيته و يشوف الكويس و الحلو بس و يستمتع باجازته عشان خلاص والله النفسية مش مستحملة نشوف الكلام المقزز ده كل يوم.

بالمناسبة دي أنا عامل شير لبوست كنت كاتبه في ٢٠١٥ بعد طيارة روسيا ما وقعت، ممكن تقروه عشان تعرفوا العيب من مين.

شكرا و آسف للإطالة.
Uxk4M-5bkz_d53SKajSGTtuiXoxGJGYh.jpeg

Uxk4M-5bkz_d53SKajSGTtuiXoxGJGYh.jpeg
 
#2
الفكرة كلها فى ثقافة شعب مش اكتر مش موضوع طبقية وفلوس خالص على فكرة يعنى اية واحد ينزل فى فندق يدفعلة اقل حاجة 1000 وينزل المية بالملابس الداخلية يعنى هو مش قادر يجيب مايوة من ارخص حتة ب40 جنية ويعنى اية اجيب اكل يكفى 6 افراد وانا فرد واحد بس مش حرام الاكل دة يترمى ! ويعنى اية ارمى زبالة فى كل حتة واوسخ المكان اللى قاعد فية مش موضوع فلوس ولا طبقية ولا الكلام دة الفكرة فى احترام المنطر العام والمكان اللى رايحة مش اكتر ..
 
#3
انا روحت اسكندرية في 2015 تحديدا المعمورة مش عايزة اقول لحضرتك أن بدون مبالغة كانت اسوء مرة اروح فيها اسكندرية.. كمية زبالة على البحر و في المعمورة عاما تخلي الواحد يكره نفسه و الناس على الشاطئ بياكلوا فسيخ و سمك و يرموا الزبالة عادي ده غير الناس اللي نزلوا بالجلبيات البحر و ده غير اني سمعت بودني ام بتقول لابنها اعمل بي بي في البحر لما قالها ماما انا عايزة ادخل الحمام ده غير حاجات كتير اوي سيئة شوفتها.. في 2014 روحت شرم الشيخ و طلعنا رحلة بحرية لجزيرة تيران و محمية رأس محمد و على اليخت الراجل قعد يقول محدش يرمي حاجة في البحر عشان الشعب المرجانية ماتموتش و قال علي شوية حاجات منعملهاش بس سبحان الله كل الكلام ده اتبخر و محدش سمع كلام الراجل اصلا و اتحدف في البحر ازايز مية و أكياس شيبسي عادي ولا كأن الراجل قال حاجة.. ده غير طبعا ان مفيش فندق روحته سواء في شرم أو الغردقة أو أي مكان الا ولقيت للأسف عادات سيئة جدا من المصريين بذات في البوفيه لدرجة اني ساعات بحس ان الناس دي جعانة بجد و مابيصدقوا يلاقوا اكل.. انا اسفة جدا بس انا بحكي اللي بشوفه قدامي و للأسف نادرا لما بشوف سلوك كويس و محترم من الناس
 
#4
يا جماعة في فرق بين ان أنا أعمل حاجة للتوعية و التوجيه و ان أنا أعمل حاجة للسخرية من الناس و التهكم عليهم. احنا دلوقتي لما نتكلم على شرم و الغردقة و نقول المصريين عملوا و المصريين سووا و كل واحد يدلي بدلوه من منظور فوقي احنا كده ولا بنصلح ولا بنوعي، بالعكس احنا بنضر ناس و بنشوه صورتنا كلنا و في الآخر الموضوع بيبقى حالات فردية و ناس معندهاش وعي كافي و محدش قال لها قبل كده تعمل ايه و متعملش ايه. و زي ما فيه حالات فردية من المصريين في برضه حالات فردية من الأجانب بيعملوا كل الحاجات دي و أسوأ.. سكر و زعيق و أكل بطريقة همجية و بينزلوا المياه بالهدوم و ساعات بينزلوا من غير هدوم و محدش بيقول لهم تلت التلاتة كام!

و بعدين نيجي لموضوع البوفيه اللي مضايق الناس.. هل معلوم للجميع ان من قواعد البوفيهات المفتوحة ان مفيش أكل يتبقى؟ يعني البواقي كلها بتترمي في الزبالة أساسا طب ما نسيب الناس تاكل. و بعدين هو يعني الفنادق حاليا بقت بتجيب منتجات ذات جودة عالية فبتخسر؟ لأ طبعا، بيجيبوا أرخص و أسوأ أكل خصوصا في مواسم المصريين.. اذا الموضوع حلقة متصلة من السوء سواء من مقدم الخدمة أو من متلقيها.
 
#5
مع إحترامي لكل الآراء المشكلة في المصريين فعلا بزيادة، لكن سببها حاجتين، اول حاجة مفيش معرفة بعالم الفنادق و أغلبهم اول مرة يخش فندق ، السبب التاني ثقافة و جهل و عدم استعداد للنقاش اى الفهم بيعتبروا انهم يسمعوا توجيهات جرح لكرامتهم بدل ماهو فرصة يتعلموا
و طبعا مفيش اي آلية من مسئولي السياحة لمعاقبة اي حد يخرج عن النص ولا لرفع الوعي
 
عرض العطلة
#6
انا كنت فى يوم من الأيام شغال فى فندق فى جنوب سيناء و آسف جدا أنى أقول أنى كان من أسوأ انواع الجست إللى بييجى هو الجست المصرى طبعا مينفعش نجمع لان زى ما فيه الحلو فيه الوحش و للأسف الزبون المصرى فعلا من انواع الجست إللى بيحسس إللى شغال فى المكان انه اشتراه بفلوسه. للأسف مفيش عندنا ثقافة لوسمحت و متشكر و على فكرة الكلمتين دول لوحدهم ليهم فعلا تأثير السحر على اى حد شغال فى مجال الفندقة. طبعا دى بلدنا و من حق اى حد يروح يزور ويشوف بلده. بس كل مكان ليه ظروفه مكان زى جنوب سيناء ده كنز حقيقي بالشعاب و الصحاري و الوديان و للأسف مينفعش الأجانب يخافوا على حاجتنا اكتر منا. على فكرة انا كمان اشتغلت فى مجال الغطس و عارف الفرق مابين الجست الأجنبى إللى جى يغطس و يتمتع و الجست المصرى إللى جى يغطس برده. بصراحة فرق كبير جدااااااا و برضه مبعممش
 
#7
طيب مابدل ماننتقد الناس اول مايوصل اي جروب او شخص الادارةتحدد شخص مسئول من الفندق يفهمه التزاماته وحقوقه وده يعتبر توعيه للناس مش عيب يعني لان في ناس معندهاش معرفة بكيفية التعامل في الفنادق وأقول لحضرتك حاجة تاني مزعلة اللي شغالين في شرم والغردقة قلة الدولارات اللي بيتعامل بيها الأجنبي إنما المصري هيستفيد منه ايه
 
#8
أستاذ مصطفى يؤسفني أقولك ان كل الكلام إللى اتكتب ده مايجيش حاجة من الواقع، حضرتك شكلك مابتشوفش إللى بيحصل هناك.انا وجوزي بطلنا نروح هناك من 2014 من كتر المهازل والفضايح و ببقى فى نص هدومى قدام جوزى للأسف لانه انجليزى ومافيش عندهم الهمجية دى، و خصوصا التحرش
 
#10
خلينا نتكلم بصراحة احنا المصريين فينا العجب . بس دا عادى جدا انه يحصل كل ما سبق ذكره واكتر لاننا للاسف كان حلم او متحرم علينا دخول الاماكن دى . طب الحل ؟ ادارة الفندق تقدر تعدى الازمة دى بإحترافية سلسلة .اولا عمل تجمع / وقفة ترحبيية بالسادة الزوار من خلال شباب العلاقات العامة يرحبوا بالناس ويشرحولهم امكانيات المنتجع ويتحركوا فيه ازاى والانشطة والخدمات الترفيهية اللى حيقدموها وخلال دا بذكاء وشياكة يتم التنويه على بعض السلوكيات المرفوضة وياسلام بقى لو تقدمولهم مشروب ترحيبى خلال الجلسة دى وتكون المدة ماتزدش عن 10 دقائق . برضوا ياريت ادارة الفندق تتنازل شوية عن احلام مكسب الدولارات وخلوا التعامل مع الناس يكون من غير نظرة الاستخصار اللى بتبقى فى عيون الاستف . كمان قولولهم ان فى حفل فى اخر يوم لاحسن اسرة حتكون معانا ومعيار الاختيار عشوائى وحيكون مثلا قضاء ليلة او اثنين زيادة . معلش السياحة عند المصرى شئ جديد وثقافة مكنش مسموح لينا نعرفها . الافكار كتيير جدا بس الاهم اننا نتقبل بعض . مع الوقت كل حاجه بتتطور واللى حيتعلم الموسم دا الموسم اللى بعده حيكون محترف .
 
عرض العطلة
#11
*البوست الي لف الفيس بوك كله منذ الأمس عن السياحة الداخلية والي مطلع المصريين شوية رعاع غوغاء بيبهدلوا الفنادق ... البوست ده الي لف الفيس وللأسف مصريين كتير بيشيروه بدون تفكير ومتعاطفين مع الفنادق المسكينة التي يدمرها السائح المصري ....

إلى البيه كاتب البوست إلي لف الفيس بوك كله والناس شيرت بدون ما تفكر وإلي مطلع أغلب الشعب المصري همج ومكلف نفسه ومصور ناس بملابسها الداخلية والذي لم يذكر أي شيء عن مساوئ الفنادق واتكلم كأن فنادق مصر تنافس أرقى الفنادق الأوروبية أحب أوجه لك الملاحظات الآتية :

لما أكون طبيبة تفتيش ورئيس لجان التفتيش السياحي وأعمل محاضر في فنادق خمس نجوم بها لحوم من خارج مذبوحات المجازر الحكومية وأحرر محاضر بمضبوطات فاسدة ده إسمه إيه ؟

لما أكون طبيبة تفتيش وألاقي بواقي الأكل وزبالة المطبخ بيعاد طهوها لتقديمها في الأوبن بوفيه وهو أكبر أكذوبة بتضحكوا بيها على الناس والإنسان الي بيفهم ميفرحش بالأوبن بوفيه وبالكميات الي سيادة البيه كاتب البوست بيمن بيها على الناس لأن الأوبن بوفيه في عرفنا كأطباء بيطريين أغلبه من بواقي الأكل .

لما أكون طبيبة بيطرية وأعرف حالات تسمم حدثت لسائحين وتدخلت سفاراتهم وعملت مشاكل ورفعت قضايا ده مش بيسيئ للسياحة المصرية ولا الولد الي مامته بتشطفه من البي بي هو بس الي بيسيئ للسياحة المصرية ؟

لما أكون نزيلة في فندق وأقضي أربع أيام فيه بدون شاور چل أو شامبو وكل شوية أكلم الهاوس كيبينج والريسيبشن وأشتكي ومحدش يسأل هل لو نزيل أجنبي كنتم جرؤتم تتعاملوا معاه كده ؟

لما أكون حاجزة all inclusive وألاقي إدارة الفندق بتضحك عليا والسناكس الي كنت بعتبرها العشاء بتاعي لأني مش بحب وجبة العشاء الرئيسية هي عبارة عن حتة جبنة وكام رغيف عيش في أوبن بوفيه طويل عريض شكله يخليك تقرف تاكل

سيادتك زعلان اوي ان النزيل بياخد البيبسي الي في التلاجة علشان تعملوا ريفيلنج على الرغم انك محاسبه على كل ده ومحدد له كل فرد في الغرفة ليه زجاجة مياه واحده وكان او اتنين بيبسي وصعبان عليك انه اخد حقه منك.. حقه الي هو دافع لك تمنه وانت مش بتديه له مجانا

سرقات الفنادق من ملاعق وشوك وبشاكير وأكواب موجودة في كل فنادق العالم ومن كافة الجنسيات وأعرف ناس عرب في منتهى الثراء كان لازم ياخدوا من كل فندق حاجة بيعتبروها تذكار او فهلوة او شطارة وعمرنا ما لقينا حد اتكلم عن اهل بلده انهم غوغاء وبيسرقوا الفنادق انما المصري لازم نجرسه ونفضحه ونطلعه حرامي بالوراثة ونكتب عنه بوستات تلف الفيس كله وإلي ما يشتري يتفرج

بالنسبة للمطاعم الي بتتلزق في انها سياحية وهي لا تحمل اي ترخيص سياحي اتفرجوا على المنيو بتاعهم وهما بيضيفوا 12% خدمة او بيطبقوا سياسة الحد الأدنى للطلبات minimum charge وهما نصابين ومش من حقهم الفلوس دي .

إدارات الفنادق الي بتتعامل بكل صلف وغرور مع السائح المصري وتعتبره سائح درجة عاشرة ومتخلف مستعدة تاخد بالشوز من أي سائح خليجي ويتنصب عليها زي ما عائلة مالكة خليجية كانت مستعمرة فندق رمسيس هيلتون ومبيدفعوش فلوس وبيتعاملوا بمنتهى الغرور مع ادارة الفندق ولهم بودي جاردز مسلحين داخل الفندق بيرفعوا السلاح على اي حد يغلط ويطلع الدور الي نازلين فيه وكلابهم تسببت في تشوه في وجه طفلة في فندق آخر ومشفناش كاتب البوست الفشيخ ده كتب عنهم او طلعهم رعاع وغوغاء لأن فلوسهم بتتكلم انما المصري غلبان نهينه ونبهدله ونفضحه في كل منبر

المصريين مش ملائكة وليهم عيوبهم زيهم زي اي شعب واتفرجوا على السائح العربي بيعمل ايه في بلدنا لكن ده نغفر له كل شيء علشان فلوسه ونحط ونقلل من قيمة المصري إلي لولاه وعلى كل مساوءه وخطاياه هو الي مشغل الفنادق دي دلوقتي في ظل تدهور ظروف السياحة وتناقص أعداد السائحين ....

الغوغاء هما الي اتريقوا على أهاليهم الي رايحين يعيشوا لهم يومين ووصفوهم بالفلاحين وبتوع الأرياف ونسيوا ان مصر بناها فلاح في يوم من الأيام أبهر الدنيا بحضارته يا شوية حثالة بتغلطوا في أهلكم ....

#عيب_عليكم_يا_فنادق_فضايحها_معانا_نحن_الأطباء_البيطريين

دكتورة شيرين علي زكي ...

رئيس لجنة المتابعة الميدانية بالنقابة العامة للأطباء البيطريين
 
#12
يا جماعة مصر بلد كبيرة والمصريين عددهم كبير وزي كل الشعوب في الكويس وفيه الوحش بس النسبة... المسالة جذورها من فشل نظام التربية والتعليم اللي لم ينجح انه يربي السلوكيات الراقية زي النظافة العامة واحترام الخصوصية وللاسف الحل انك تروح بعيد بعيد جدا عن جموع الجماهير وتتجنب المواسم روحوا مرسي علم
 
عرض العطلة
#16
وهو فيها ايه اما اصيف واتبسط بس بتحضر ونضافه واخاف على بلدي وممتلكاتها وهي الناس هتتتعامل معامله كويسه انما الواحد بيشوف العجب بصراحه تحس التتار هجم وجاي يخرب المكان والحاجه الي بيكون المصرين ممنوعين دخولها بتفضل سليمه ونضيفه الكلام ده يزعل للاسف وحضرتك لو خرجت بره مصر سياحه او شغل غصب عنك هتحترم تقاليد البلد ااتانيه انما اشمعنى بلدك متخافش عليها وتحافظ على ممتلكاتها وبعدين نقول حرام ومضطهدين مهو من سلوكنا الحيواني الغير ادمي
 
#17
كفايه بس اما اي سائح اجنبي يسال عن مصر تلاقي اىمصريين يقولولو بلاش في حين ان اي بني ادم تاني من جنسيه تانيه لو بلده مفيهاش حاجه يعملك البحر طحينه عشان تزور بلده شعب غبي الصراحه ومش حرام الي بيتعمل فيه ابدا لان طباخ السم بيدوقه لو كانت نفوسنا واخلاقنا كويسه كنت هتلاقي البلد دي اجمل بلد
 
#18
عموما كل شيء ممكن ادراكه بالعلم والمعرفه والمجال الاوسع فى هذا النطاق هو وسائل الاعلام وعلى رأسها التلفزيون ، فلا يوجد برنامج تلفزيوني فى جميع القنوات مخصص للسياحة والسفر ،ما المانع ان نخصص برامج فيها تهذيب لسلوك الفرد فى قياده السياره ، وفى المطاعم والفنادق والمنتجعات والمطارات والحوارات ،، ما المانع مع عرض مشاهد ومقارنات وخلافه ،، لابد من التعلم والمعرفه ففيها العلاج
 
#19
والله حتى ما رحموا الفنادق ام ٥٠٠٠فى الليله عبايات واكل بالهبل بيترمى وكراسى تنزل البحر وهمجيه حاجه بقت تقرف
 
#20
صاحب البوست لك الف تحية
وفعلا الموضوع زاد عن حده وأصبح سخرية من المصريين نفسهم من نفسهم شوف الي بينتقد ويافور مصري منه فيه ونسي انه بيتاخد له سكرين وبيعتبروه وشهد شاهد من أهلها
عموما المشكله وحلها فى أصحاب الفنادق لأنهم أصحاب البيت
مثال صغير وعملي وسهل تطبيقه لافعلا هما عندهم نيه سليمه
مثال. .مكتبة الاسكندرية من علي الباب بيفرض عليك قوانين وبتطبق علي الكل مجموعات وأفراد
بيبقي فى مرشد اومتحدث بنظام المكان لكل زائر ومفيش حد يقدر يخالف القوانين بالأدب ومحدش اعترض بعيدا عن مستواه المادي والعلمي
ده لو عندهم النيه
 
عرض العطلة
عرض العطلة
عرض العطلة
أعلى أسفل
عودة
قائمة