P
Passant Atef
:: مسافر ::
بص ياسيدى حسب شخصيتك لو بتحب الاستجمام والبحر وكده انصحك بالغردقة وسهل حشيش ولو عايز حاجة فيها خروج وتنطيط يبقى شرم الشيخ الكلام ده يحبذ فى الربيع او الخريف او ممكن الشتا عادى لكن الصيف حر شويتين لو عايز بقى جو اثار ومعابد الاقصر واسوان او ممكن القاهرة بس دى زحمة شوية بزيادة بس فى اماكن لطيفة كتير هناك
E
Eslam Agiba
:: مسافر ::
مرحبا بيك ...اذا حابب الشاطىء يبقى شرم او الغردقه او العين السخنه ، القاهره ضرورى تقضى فيها يومين ع الاقل تشوف الاهرامات ، المتحف ، خان الخليلى، القلعه ، مجمع الاديان ، برج القاهره ، المولات ،وجوله نيليه ، الاسكندريه ممكن تقضى فيها يوم فيها المكتبه الشهيره ، والقلعه و البحر مع المأكولات البحريه
A
Amy Adams
:: مسافر ::
اسمع نصيحتي اخويا انا هجيبلك المختصر المفيد ابدأ زيارتك بالقاهرة اولا - اهم معالمها المتحف المصري بميدان التحرير و بعد انتهائك من زيارة المتحف اتمشى الى ميدان طلعت حرب المشي في وسط القاهرة متعة و اهرامات الجيزة بس احذر درجة الحرارة المرتفعة في الاهرامات و اصحاب الحنطور و الجمال .. بالليل تسهر في خان الخليلي و الحسين و لازم تزور شارع المعز لدين الله الفاطمي هتحس بعبق التاريخ و تقعد على قهوة الفيشاوي قهوة الادباء روح مول مصر أو بورتو كايرو اختار حاجة فيهم ..اسهر في باخرة على النيل زي نايل سيتي او السرايا و لو حبيت باخرة متحركة خدها من المعادي .. روح برج القاهرة و اتعشى في المطعم الدوار فوق البرج منظر بنورامي رااائع بتشوف القاهرة كلها بس لازم تكون حاجز قبلها في المطعم بيوم.. اسكندرية طبعا اجمل من القاهرة اهم معالمها قلعة قايتباي و مكتبة الاسكندرية و المكتبة بداخلها متاحف لازم تزورها و تحضر عرض الكواكب في القبة السماوية هتحس انك في الفضاء الخارجي فعلا حاجة كدا وهممم بس روح المكتبة الصبح بدري بالليل ممكن تسهر في كافيه عالبحر اسمه لاتينو .. روح حدائق المنتزة بس بالنهار و طبعا لازم تتصور على كوبري الشاي هناك اسأل اي حد هيدلك ع الكوبري دا و لفها على رجليك ساعتين تلاتة و في هناك مطعم اسمه روستري ممكن تتغدى فيه .. بعد المغربية تنزل محطة الرمل (وسط البلد) و تشوف العمارة القديمة و الاحياء العتيقة و تاكل شاورما من عند تاڤرنا ... و تختم رحلتك بشرم الشيخ هتاخد منك 3 ايام .. اهم النشاطات هناك تركب براشوت شيء خيالي .. تحجز رحلة يخت بحرية و تعمل دايفنج و تعيش بقى مع الشعاب المرجانية و لازم تحجز رحلة بالجلاس بوت وبالليل اسهر في سوهو سكوير و خليج نعمة و لازم لازم لازم بكرر على لازم تقعد في كافيه اسمه فرشة و لو عايز تجيب هدايا هات من السوق القديم و على فكرة المطاعم فيه رخيصة كمان و الى ذلك تحجز طيران من شرم الى المغرب بسلامة الله و رحلة موفقة .. ملحوظة بلاش تركب تاكسي و مواصلات عامة حمل على موبايلك تطبيق اوبر و اطلبه و قوله عايز اروح المكان الفلاني دي شركة آمنة بحد كبير لان بيكون معك بيانات السائق