من المواقف الطريفة اللي اتعرضتلها في برشلونة...

[Rashad Salama]

من المواقف الطريفة اللي اتعرضتلها في برشلونة .. كان من لصين حاولوا ينشلوني بطريقة ظريفة جداً .. لكن من فضل ربنا عليا انه نور بصيرتي في ساعتها على طول و تداركت الموقف بسرعة ..

الموقف بدأ و انا نازل من الباص و قبل الفندق بمحطة تقريباً و ماشي في الشارع وقفني شخص ماسك الموبايل و بيدعي انه من ايطاليا و فاتح برنامج خرائط جوجل و بيدعي انه مش عارف يوصل لعنوان معين ..

اول حاجة:بصيت في موبايله لاقيت البرنامج لسة بيفتح و مافيش عنوان مكتوب اصلاً .. و قولتله طبعاً اني ما بتكلمش اسباني فالافضل يسأل شخص تاني و كان معدي من جنبنا شخص آخر و شاورتله اسال الراجل ده فكان رد فعله غريب شوية انه كان مصر اني انا اللي اوجهه .. و ده شككني اكتر انه بيستعبط و قولت في عقل بالي الراجل ده يا اما شارب يا اما حرامي ..

و قررت اسيبه و امشي و لسة هلتفت لقيت واحد تاني جاي داخل علينا احنا الاتنين و لابس صديري اسود و معاه سماعات موبايل سوداء و بيقول بالانجليزي اقفوا عندكوا انتوا بتعملوا ايه هنا ؟؟!!
انا بوليس ..

طبعاً الفار لعب في عبي اكتر لان البوليس الاسباني لابسين لبس واضح جداً و مكتوب عليه بالبنط العريض بوليس .. الحاجة التانية .. ان اول دخلته و بيتكلم معايا انجليزي لاول وهلة .. فكان عندي احساس غير مريح كده .. لو هو بوليس و ميعرفش مين دول الاصل انه يتكلم اسباني لحد ما يعرف ان اللي واقفين دول ما بيتكلموش اسباني ..

المهم قولتله انا دكتور مصري و بحضر مؤتمر هنا .. و الراجل ده بيسألني على عنوان معرفوش .. و انا شاكك فيك اصلاً شكلك مش بوليس .. رد قالي انا من الخدمة السرية .. فاهم يعن ايه الخدمة السرية .. و راح خاطفني بسؤال سريع .. وروني باسبوراتكم ..
( عادة في اي بلد بروحها بسيب باسبوري و ورقي و فلوسي في خزنة الفندق و ما بشيلش في جيبي غير مبلغ بسيط للطواريء .. و ديه أهم خطوة أي حد بيسافر لازم يعملها )

المهم قولتلوا وريني انت ال ID بتاعك لاني لسة شاكك فيك .. لاقيته طلع محفظته و بيوريني كارنيه كده جوه المحفظة لا ينم عن اي شيء و بيقولي صورتي ديه ولا مش صورتي ..
و قفل محفظته و سأل الراجل التاني وريني باسبورك فالراجل راح مطلع زي بطاقة كده و ورهاله .. و بعدين راح سائل سؤال انتوا معاكوا كوكايين او مخدرات ؟! .. رد الراجل التاني لأ انا ممعاييش .. فقاله وريني محفظتك

ساعتها الفار لعب في عبي اكتر ولاقيت التاني فعلا طلع محفظته و كان فيها فلوس تقريباً عشرات اليور شوفتهم و هو بيوريله المحفظة .. و كنت حاسس انه بيوريهالي انا مش هو ..

و توقعت طبعاًً ان الخطوة اللي بعدها هيقولي نفس السؤال وريني محفظتك و باسبورك .. و قد حدث بالفعل .. ساعتها حصل عندي حالة من اليقين ان دول حرامية و ان شكلي هتنشل بطريقة ما

فبدأت أأمن على جيبوبي و طلعت موبايلي مسكته في ايدي و كنت شايل شنطة كروس حاطط فيها الكاميرا و شوية خرايط للبلد و كتيبات سياحية ..

و بدأت اكلمه بصرامة انت شكلك لا بوليس ولا حاجة و انا عاوز اروح للبوليس دلوقتي و على فكرة فيه عربية شرطة بتقف قدام المول اللي هناك ده .. ( المول كان قدام الفندق الي كنت نازل فيه و كنت بشوف دايما ان فيه سيارة شرطة واقفة قدام المول بصورة شبه دايمة ) ..

لاقيته ساعتها بيقولي طيب روح انت و خد الراجل التاني و مسكه من قفاه و قالوا تعالى معايا للقسم و مشيوا و هما بيسرعوا الخطى ..

طبعاً اول حاجة جت في بالي اني أأمن على حاجتي تاني و فتحت شنطتي و اتأكدت ان كل حاجة الحمد لله سليمة .. و طلعت محفظتي و اتأكدت ان الفوس فيها .. و مشيت بسرعة على الفندق اللي كان على بعد ٣٠٠ متر تقريباً و انا بأحمد ربنا اني ما اتنشلتش .. .. ..

الخلاصة و الدروس المستفادة في قواعد السفر :
١) اوعى تشيل باسبور أو اي اوراق رسمية معاك و انت خارج ..
٢) كروت الائتمان بتاعتك تسيبها هيا كمان في خزنة الفندق ..
٣) تشيل في جيبك فقط وثيقة التأمين و صور ضوئية للباسبور و الفيزا و مبلغ لا يتعدي المائة يورو على اقصى تقدير تحسباً لأي طواريء و ده كافي جداً حتى لو قابلتك سلطات زرزارة ذات نفسها
٤) الشرطة هناك ناس زي العسل و ودودين جداً مهمتهم انهم يطمنوك و يساعدوك اذا احتجت مساعدة ..
٥) اكتر ناس بتتعرض للسرقة و النشل في اوروبا هما اللي ملامحهم شرق اوسطية .. رز بقه و كدزة .. فحاول تتنكر ‍‍‍
٦) و ديه الاهم .. ان ربنا هو خير حافظ و لن يضرك اي شيء طول ما ربنا حافظك
#اخشع_ياض
#المصريين_اهما

 

[Nardine Fekry]

Passant Ahmed Salem

 

[Atef Bahgat]

حمد لله علي سلامتك يا دك ربنا يحفظك ويحفظنا

 

[Mohamed Hikal]

جدع

 

[Luna Omar]

حمدلله على سلامتك

 

[Mahmoud Aref]

طيب مش المفروض ان الباسبور بطاقتك وهويتك ازاي اسيبهم في الفندق

 

[Mira Nasr]

انت يعني بتخوفنا احنا بالبصه دي . ️. كنت بصيتها للحرامي

 

[Islam Omran]

شكراً ليك

 

[Ahmed Elsherbini]

لا والله لصين صايعين فعلا وعارفين بيعملوا ايه . انا حصل معايا موقف شبيه لواحد لكن مش محترف كان هاوى ظهر فجأة قدامى فى محطة جار دى نور فى فرنسا وانا بشترى تذكرة من الماكينة ولقيته بيشخشخ بمفاتيحه وبيورينى كارنيه مالوش اى ملامح وبيقولى انت معاك بطاقة؟ انت رايح فين؟ انت منين؟ وبيزعق بصراحه ماعجبنيش أداءه وسيبته ومشيت.

 

[Mohamed Abdul Moniem]

انت ايه اللي موديك اسبانيا بس... خليك في مصر أمن وأمان وتقدر بسهوله تسأل الضابط عن ID بتاعه

 

[Nano Monmon]

نفس اللي حصل معانا في برشلونه وقفنا شخص وقال انوا مباحث وطلب جوازات السفر بتاعتنا وجوزي قالوا موش معايا جوزات موجوده في الفندق طبعا هي كانت معانا بس انكرنا وطلبنا منوا يجي معانا الفندق استعبت فيها الراجل وقال خلاص خلاص ومشي فعلا الواحد لازم مايصدقش حد انوا مباحث او شرطة

 

[Moneim Mahmoud]

شكرا علي المعلومه.

 

[Diaa Mahfouz]

الحركه دى مقفوشه في برشلونه .. ولو بتقرا عن برشلونه scam .. كتت قريت عن الحركه دى .. الحمد لله ان ربنا سترها معاك

 

[Duaa Nugud]

يا Hassan عاين دي لكن قبيل Koul قال انه لازم الزول يحوم بالباسبورت هسة ما عرفت يحومو بالباسبورت ولا بصورة منه

 

[Mohamed Khairat]

فعلا كلامك مظبوط حمد لله على سلامتك

 

[Fady Amin]

Ayman Megahed
Nos el rwaya 7sl m3ak

 

[Mohamed Fatehy]

Mohamed Nabil انت راجل خبرة طبعا

 

[Siham Lz]

اسبانيا للأسف معروفة بالسرقة ،امي تعرضت لموقف شبيه بهذا ،الحمدلله على السلامة

 

[Enass Attia]

ده نفس السيناريو اللي حصل معايا في المانيا بالضبط

 

[Wafaa Ahmed]

طب الرجاله هيتنكروا ،لكن احنا بنلبس حجاب هنتنكر ازاي