مساء الخير علي المسافرين محتاج نصيحه من اهل...

[MusTafa MoHamed]

مساء الخير علي المسافرين
محتاج نصيحه من اهل التجربه
اسبوع الي عشرة ايام في الصين , الميزانيه 300$(للاقامه والمواصلات والفسح) , ايه المدن اللي رخيصه وفيها مزارات سياحيه اقدر ازورها ولو اكتر من بلد وقريبين من بعض ممكن اروحهم بالقطر مثلا ياريت .
وسوال تاني ممكن اجيب ايه من هناك وادخل بيه مصر من غير جمارك واقدر اكسب منه مثلا اي حاجه ؟؟
عايز استفيد من السفريه كسياحه وشغل برضو في المستقبل .
ورمضان مبارك عليكم

 

[Nour Elkawas]

الصين بلد جميل .. تعمل حسابك اقل شئ من طيران وتاشيرة وفندق وفسح واكل وشرب مش اقل من ٣٠ الف جنيه ده لو هتروح جوانزو او شينزن او يايوا لو هتسافر بكين اعمل حسابك من ٤٠ ل ٥٠ الف وطبعا انت اللي بتحدد المصاريف بتاعتك وبتتحكم فيها على حسب قدرتك المادية بس حاول تذاكر كويس البلد اللي هتروحها ونزل من دلوقتي خريطة مترو جوانزو وكمان برنامج وي شات مهم جدا و VPN عشان الفيسبوك يفتح معاك وابعد عن الاكل اللي فيه لحوم هناك وخليك في المكرونات النودلز وكده ورحلة سعيدة .. بخصوص البيزنس ممكن تجيب الف بروتاكت سكرين للموبايل وتبيعهم جملة هنا يجبولك فلوس حلوة

 

[Youssef Mordi]

300$ قليلين

 

[Sherif Zakaria]

اللي كاتب الكومنت معلوماته مش صح.
٤٠-٥٠ الف ايه؟ يعني اكتر من ١٥ الف يوان صيني! ده كلام عاري من الصحه..ده انت بتقول أقصي حاجه ١٠ ايام.
الفيزا كنت عاملها ب ٥٠٠ جنيه بعد التعويم و بتختلف حسب النوع فمفيش ٣٥٠٠ ديه في حالتك لان انت واحد رايح سياحه كام يوم فروح اسال شكه سياحه لكن المبلغ ده وهمي علشان تروح سياحه.
انت مش محتاج تقعد في فندق ب ٢٥٠ يوان، ممكن تقعد في hostels محترمه جدا و في وسط المدينه و أمان بأقصاها ١٠٠ يوان في الليله (dormitory)
الفيزا F مش سياحيه، ديه non commercial و السياحيه هي ال L و علشان تغيرها هناك هتدفع فلوس مش قليله هناك و بتختلف حسب الحاله.
الفيزا M مش معناها multi ديه خاصه بالبيزنس و التجاره.

 

[Nour Elkawas]

اعتقد الكلام واضح وانت داخل تستعرض للاسف وتجود .. انا قلت ٣٠ الف عشر ايام شامل كل شئ في حالة جوانزو ومن ٤٠ الف الى ٥٠ في حالة السفر الي بكين اقرا الكلام كويس قبل ماتقول معلومات غلط .. وبعدين مين قال ان الفيزا M معناها مالتي .. انا قلت بتكون مالتي عشان الدخول والخروج من البلد لاكثر من مرة .. ومش من حقك اصلا ولا من الذوق العام انك تتهكم على معلومات حد تاني بيروح الصين في السنة مرتين .. السفر فن مش عن عن يا شريف

 

[Youssef Mordi]

روق يا استاذ Nour Elkawas مش كده هدي اعصابك كل سنه وانت طيب

 

[Lamis Badr]

Su zhou -hang zhou-Shang hai دول ٣ مدن جنب بعض تقدر تروحهم...وفِي كمان مدن في غايه الروعه..si chuan وهناك هتلاقي أماكن طبيعيه جميله جدا وتقدر تروح تزور موطن الباندا...واوعي متروحش مدينه yun nan

 

[Lamis Badr]

عامه بعد التعويم الأسعار مبقتش رخيصه خالص...يعني الجنيه المصري مقارنه بالرينمنبي ولا حاجة..فيفضل تبقي عامل خطه وعارف رايح فين وعاوز تزور ايه..لان في الصين أغلي حاجة المواصلات اللي هتتنقل بيها من مكان لمكان..(في قطار مثلا بياخد ٣٠ ساعه بيبقي ارخص من قطار ٨ ساعات)بس هتلاقي فرق أسعار كبير .ابو ٣٠ ساعه ممكن ٢٦٠ يوان او اكتر..وال ٨ ساعات ب ٩٠٠ يوان فيما فوق..ودا انت هتحدده علي حسب ميزانيتك وعلي حسب ناوي تقعد اد ايه..

 

[Ashraf Awad]

يا ريس
عشان متوهش الأمور منك
وواضح انك طالع ع الاد اوي
شوف المكان اللي انت رايحه شغل وهتعمل كم تور حواليه
عشان التوفير يكون ف محله هتاخد معاك معلبات تونة فول جبن لانشون وتنسي الاكل هناك خالص
هتشتري تذكرة مترو أسبوعية ب ٥٠ ريمبي. هنلف بيها كل الخطوط وتشوف المدينة كويس
لازم تحدد انت رايح فين فيها الجنوب وهي مدن جوانزو وشنزن مثلا وف الحالة دي ممكن تدخل هونج كونج من قبيل الفسحة
لو رايح الوسط شنغهاي وسوهو وهانزوا فيه أماكن حلوة جنبهم
ولو رايح فوق بقا بكين وغيره
الصين بلد كبيرة
لازم تحدد طيرانك كمان
لان مثلا ممكن تروح شنغهاي وترجع من جوانزو

 

[Youssef Mordi]

في مطاعم عربيه وممكن ماكدونالدز كويس علي فكره

 

[Moaid Al-Shabani]

300$*6.81= 2045
حوالي 2045 بعشرة ايام في الصين مبلغ قليل جدا ،
كوانزو مدينة زحمة ولكن فيها اماكن حلوة للفسح ومواصلاتها رخصية بالمترو وكذلك فيها اسواق للالكترونيات اذا تحب تشتري وتعمل بداية تجارة،
وكلام الاستاذ مزبوط اعمل حسابك VPN وكذلك ويشات مهم، وبالتوفيق

 

[Ashraf Awad]

واضح انك مش محدد مدينة معينة وعشان كدة وف حدود الامكانيات اقترح انك تروح جوانزو عن طريق هونج كونج
الطيران الي جوانزو مباشرة موجود ع عدة شركات ومنها مصر للطيران
لو رايح شغل يبقي لازم تحضر معرض الكانتون وده بيتعمل مرتان سنويا مرة ف شهر ابريل ومرة ف شهر اكتوبر لعرض كل ما ينتج ف الصين ف جوانزو
لكن ف الفترة دي البلد هناك بتكون زحمة إنما ممكن تلاقي اقامة ع الاطراف سعرها كويس ويفضل تكون مع اخد عشان تكلفة الغرفة
الاكل ف المطاعم العربية الفرد بيتكلف حوالي ١٠٠ ريمبي وماكدونالدز الماك فيش حوالي ١٨ ريمبي
اقترح المعلبات وبلاها أكل برة طبعا
شنغهاي حلوة طبعا وخصوصا الكورنيش وبرج التليفزيون وشارع نان جينج روود وبيبيول سكويرز إنما الاقامة أغلي من جوانزوا
حاول يكون معاك مبلغ كدة مركون ع جنب عشان انت ف سفر ومتضمنش اي حاجة
ممكن كمان تعمل عضوية هوستيل هنا وتنزل ف بيوت الشباب اعتقد هتلاقيها الليلة ب ١٠ ريمبي او ٢٠ بالإفطار
الوي شات بديل عندهم إنما لو هتتعامل مع صينيين الفيس مقفول ع الواي فاي إنما ألفي بي ان بيفتحه
مهم تعمل باقة اسبوعية للإنترنت من مصر بحوالي ٢٥٠ جنيه
وانت بتحجز طيران
لو لاقيت طيران لهونغ كونج ارخص ممكن تروح وتنزل فيها ف اي هوستيل يومين وتدخل بالقطر او الأتوبيس لجوانزو حوالي ساعة وبدون تأشيرة لهونغ كونج المصريين بيدخلوها مجانا ودي فيها فسح كتير
لكن ممكن ف يومين تطير الر٣٠٠ دولار

 

[Ehab Fathi]

هبعتلك اسم فندق هتقعد فيه 10ايام ب200دولار..... وانت ممكن تاخد معاك اكل من هنا جبن ومعلبات وتقضيها وال100دولار تبقي مواصلات هناك.... كوانزو مدينه جميله هتتبسط منها.... وممكن تروح من هناك علي هونج كونج او مكاو بس دي عاوزه 200دولار كمان وتبقي اتفسحت في 3دول.....عملتها في شهر 11 اللي فات وزرت هونج كونج والصين ومكاو بحوالي 600دولار..... وكانت رحله ممتعه والله... اتبسط فيها عن اليابان

 

[الشاه الب ارسلان]

تروح وترجع بالف سلامه

 

[Azza A. Omran]

جوانزوا هيا اللى هتشرى منها ارخص حاجات لكن بيعملوا تصفية احيانا على الملابس و هتلاقى حاجات سعرها كويس، الاحذية الرياضية اسعارها رخيصة قوى و دى اكتر حاجه كويسة لكن المشكلة فى الوزن، لعب الاطفال فيه فرق كبير لكن طبعا ابعد عن الطيارات لانها مشكلة فى المطار