صباح الخير كل سنه وانتو طيبين البوست ده...

  • بادئ الموضوع بادئ الموضوع Engy Adel
  • تاريخ البدء تاريخ البدء
عرض العطلة
E

Engy Adel

:: مسافر ::
#1
صباح الخير
كل سنه وانتو طيبين
البوست ده هيكون طويل شويه عشان اول مرة اسافر و فيه مليون سؤال في بالي
فبعد اذكم انا هركن الاسئلة والي عارف اجابة يقول جمبها الرقم شكرااااا
انا مسافرو سويسرا جنيف الحد باذن الله شغل .... بس اول مرة اركب طيارة
1- انا هكون صايمة لو ربنا قدرني ممكن اسم ابليكيشن اجيب منه القبلة ومواعيد الاذان؟؟؟
2- انا بعرف منين القاعة الي هركب منها هل ده بيكون موضح بالتذكرة عشان لسه مستلمتهاش؟؟
3- لما بدخل ايه هي الاجراءات الي هتحصل معايا لحد موصل للطايارة؟؟
4- لو عايزة ادخل التواليت بقوم عادي ولا بستأذن؟؟
5- اغير عمله هنا ولا لما اسافر؟؟
6- السفر باللاب توب و الكاميرا مسموح عادي؟؟
7- ايه الي ممنوع اخده معايا في شنطة الطيارة وايه الي ممنوع اسافر بيه عاما ؟
8- في اي ابليكشن يساعدنس في البلد دي؟؟
9- وهل عشانن انا مش جيدة اوي في الانجليزي هيبقي الموضوع صعب بالنسبالي؟؟
10 - في اي نصايح شخصية منوحكوا لواحدة اول مرة تسافر تخلي بالها منها؟؟
11- انا لو حجزن علي بوكينج لازم يخصم من الكارت ولا ممكن ادفع كاش لما اوصل ولو دة بيتحدد علي الموقع الاقيه فين بالظبط واسم السياسة دي ايه؟؟؟

اخر طلب لو حد يعرف معلومة بلييز متبخلوش عليا وساعدوني ربنا يباركلوكوا

بعد اذنوكوا محدش يتريق او يستهزأ بالاسئلة اكيد الواحد الي اول مرة بيبقي كدة شكراا
 
#2
ايه يا بنتي كل ده ، relax عشان تستمتعي بالرحله . اولا المغرب هناك الساعه ٩ فربنا يعينك وثانياً فيه ابليكيشن كويسه قوي اسمها Muslim pro هتلاقي لونها اخضر وظبطيها من وانتي هنا . القاعه من علي التذكرة واتاكدي تاني وانتي علي باب عشان بيبقي حسب شركة الطيران اللي طالعه عليها .
قومي للتواليت عادي طالما مافيش علامه ربط الأحزمة وطالما مش وقت إقلاع او هبوط . خدي اللاب توب والكاميرا عادي. ماتاخديش اي سوائل او كريم او روج او ماسكرا او قصافه او مبرد او سكينه . هيبقي عندك مشكله كبيره في اللغه عشان هما اصلا الانجليزي بتاعهم ضعيف ولغتهم الأساسيه فرنساوي . خليكي وقتك مرتاح في المطار وماتروحيش علي اخر لحظه . علمي شنطتك عشان تعرفيها علي السير بدون لخبطه مع شنط تانيه .
 
#3
١. الابليكشن مش هيشتغل في الطياره عشان بيحتاج انترنت، تقدري تسالي الطاقم لو عرب، لما توصلي نزلي ابليكشن الا صلاتي هيقولك المواعيد والقبلع
٢. التذكره مبتقولش القاعه، على حسب الطيران هتعرفي انتي في مبنى ١/٢ وبعد ما تدخلي وتيجي عند الوزن هيدوكي البوردينج فيه البوابة والكرسي في الطياره
٣. هتدخلي على الوزن ياخدو الشنط ويدوكي البوردينج وبعدين تدخلي على الجوازات بعدين تستني الطياره بس
٤. بتقومي عادي ومينفعش تقومي والطياره بتطلع وبتنزل ولما نور الحزام يكون منور
٥. غيري عمله في مصر احسن
٦. مسموحين عادي بس اتاكدي البلد اللي رايحاها بتطلب انهم يبقى في الشنط الكبيره ولا الهانذ باج
٧. كحول متفجرات ادوات حاده كده يعني، واي سائل علبته اكبر من ١٠٠ مل
٨. نزلي tripadvisor
٩. طالما بتعرفي تتكلمي الكلام الاساسي عادي بس خلي معاكي ابليكشن ترجمه ف الموبايل احتياط، في ناس بتعيش هناك طول عمرها والانجليزي بتاعها مكسر بس سويسرا بيتكلمو فرنسي اساسا مش انجليش بس
١٠. متسيبيش شنطة ايدك مفتوحة، خدي معاكي فلوس على قدك والباقي سيبيه في خزنة الفندق، اتمشي كتير في شوارع جديده، معظم اوروبا مفيهاش حاجه تتعمل بعد ٧-٨ ف ابداي يومك بدري واصحي بدري اوي عشان تعملي كل حاجه، لو صايمه اشتري الفطار من ٦ او ٧ عشان المطاعم والمحلات بتقفل بدري اوي وهتتسوحي، متبينيش للناس انك اول مره تيجي عشان ميحسوش انك متوتره
١١. كل فندق ليه سياسه معينه ومكتوب علي الحجز pay on arrival مثلا او كده، او انه free cancellation معناها مش هيسحب من الكارت
 
#4
5- غيري عملة هنا مش هناك لأن لو اللي معاكي جنيهات ممكن متلاقيش حد ياخدها هناك أصلا ولو لقيتي هتخسري فيها جامد
 
#5
وريحي اعصابك شويه الموضوع بسيط وهين مش زي ما انتي موتره نفسك، لو غلطتي ف المطار الموظفين هيساعدوكي ويرشدوكي عادي، ولو اتلخبطتي ف اي حاجه ف الطياره الطاقم موجود عشان كده. ولما توصلي هتلاقي شرطه كتير في الشارع لو عندك اي استفسار او مساعده قوليلهم، الدنيا سهله متقلقيش ❤
 
عرض العطلة
#7
ان شاء الله تبقى رحلة سعيده عليكي وتنبسطي جدا، معلش نصيحة لله متصوميش في السفر، صومي لما توصلي بس مش خلال الرحله، ضغطك ممكن يوطى وتتعبي جامد (عن تجربة). ف خدي يوم الرحله ده متصوميهوش ولما توصلي هتكتشفي المغرب عندهم على ٩ والفجر على ٢ يمكن ف انتي عندك رخصه تفطري برضو في السفر لو مقدرتيش، وافتكري تشتري اكل فطارك لو هتصومي وعشاكي لو فاطره من بدري
 
#8
دا انا اتوترت من كلامك
كل حاجة هتمشي بالمنظومة بس يفضّل دايما تعملي كل حاجة بدري
اولا هتطلعي من بيتم وتتوجهي للمطار قبل أسفر بأربع ساعات لازم تكوني ف المطار قبلها ب ثلاث ساعات
شنطة كبيرة لا تزيد وزنها عن ٣٠ كيلو. تحطي فيها كل حاجاتهم الشخصية كريمات برفيوم سواءل قصافة سكينة اي حاجة معدن
وممكن تكون معاكي شنطة هاند باج تاخدوها معاكي ف الطيارة فيها اللاب أوراق المهم مفيش فيها حاجة معدن او سواءل
ثانيا هتتحركي للمطار حسب طيرانك ايه بيتحدد اي صالة سفر ف المطار لو مصر للطيران بيكون الصالة ٣ الجديدة ده بيبان من التذكرة
هتوصلي المطار
هتدخلي بعد التفتيش الخارجي الشنط
هتلاقي لوحة مكتوب عليها سفر وفيها مواعيد والرحلات وقدامها المكان اللي هتروح فيه تسلمي شنطك وتوزني وهيدوكي البوردنج باص
ده اللي هيتحدد فيه الكرسي بتاعك
هتسلمي التذكرة والباسبور وهياخدوا الشنطة اللي هتدخل تحت ف الطيارة
وتستلمي البوردنج باص وتروحي بعد كدة للجوازات
هتلاقي ورقة قبل الجوازات بتاخدي واحدة تكتبي فيها بياناتك من باسبورك
وتدخلي ع ضابط الجوازات
هتختمي خروج من مصر
وهادخل المنطقة الحرة
كدة رسميا انتي برة مصر
البوردنج باص هتلاقي فيه رقم الجيت اللي هتدخلي منه للطيارة او الأتوبيس اللي هيوصلك للطيارة وهتتفتشي تاني وهيسالك معاكي فلوس اد ايه مينفعش تخرجي اكتر من ١٠ الاف دولار
بس هتطلعي الطيارة
المضيفة هتقعدك ف الكرسي بتاعك
تربطي حزامك ويفضل يكون معاكي لبان اول مرة هتحسي ان ودانك مضايقاكي والطيارة طالعة
التواليت ف اي وقت تقومي فيها ماعدا طلوع الطيارة وهبوطها وكمان تكوني متاكدة انه فاضي
متوتريش نفسك الامر مبسط وسهل
بس يفضّل تسالي ف مل خطوة ما تتكسفيش لان اي غلطة هيعطلك
 
#9
خلي بالك ماينفعش تاخدي معاكي في الشنطة اللي عالطيارة لا كريمات ولا سوائل ولا برفانات، اي حاجة من دي بتتحط في الشنطة اللي هتتشال في بطن الطيارة،
مسموح بأقل من 100 مل في الشنطة اللي عالطيارة، لو ازازة برفان او كريم صغيرة اقل من 100 مل مسموح عادي
 
#10
لو قدرتى يكون معاكى ماستر كارد هيفرق معاكى كتير
مش هتشترى عملة من هنا الا حاجة بسيطة للطوارئ و مش هتشيلى كاش معاكى وانت بتتحركى ودة أأمن كتير رغم ان جنيف أكثر بلد آمن فى أوربا
وطبعا دة هيوفر معاكى كتييييير جدا عشان سعر التغير على البطاقة أحسن كتير
بالنسبة للبكوكنج مش هيسحب من البطاقة الا لو non-refundable
 
عرض العطلة
#13
اطلبي انك لو الكاميرا سعرها عالي مش حاجة صغيرة اطلبي تثبتيها هيا والاب علي الباسبور بتاعك علشان ميرجعش يطلب جمرك وانتي راجعة
 
#15
معلش سؤال كمان انا لو عايزة اخد اكل نواشف معايا هل مسموح احطهم في الشنطة الي تحت وايه نوعيا الاكل الي يتاخد بسكوت بقسماط مثلا ؟؟؟؟
 
عرض العطلة
#19
انا حركزلك على حاجة واحدة الحمام تدخليه من غير اذن يعني لو مفيش مطبات او اشارة الحزام اجباري تدخلي عادي بس الغلط ان اغلب المسافرين ميعرفوش ازاي يغلقو الباب و الطريقة الوحيدة لمعرفت ان الباب مغلوق هي ان الضوء يكون اشتغل و صاطع داخل الكبينة و اللون احمر في القفل
 
#20
حد يقولى اى شغل ممكن يديني فرصه انى اسافر زى كده وانا اقدم من بكره
ربنا يوفقك يارب تروحي وترجعى بالسلامه استمتعى ومتشديش اعصابك عشان مش مستاهله وهتندمى لو ضيعنى كل الوقت وانتى مرعوبه كده مش هتحسي بطعم اى حاجه ربنا يوفقك ❤❤
 
عرض العطلة
عرض العطلة
عرض العطلة
أعلى أسفل
عودة
قائمة