السلام عليكم يا شباب .. الصراحه طول عمرى بفضل...

[Diaa Mahfouz]

السلام عليكم يا شباب .. الصراحه طول عمرى بفضل السياحه الخارجيه لانى بعتبر السياحه الداخليه دى اصلا مش سياحه .. سياحه جايه من تسويح او تسوح .. ومفيش حد هيتسوح "يتوه" في بلده يعنى ...
المهم انا مسافر الاقصر ٤ ايام شغل .. وقولت اجرب واشوف موضوع السياحه المحليه ده .. فممكن حد يقولى ايه اللي ممكن ازوره فعلا واتبسط او احس انه يستاهل يتزار فعلا لان اكيد في حاجات متكرره او حاجات متستاهلش ان الواحد يزورها ... للعلم هقعد ٤ايام "عائله" .. ياريت حد يفيدنى .. شكرا ليكم ..

 

[Noha Nafea]

معبد فيله و القريه النوبيه

 

[Mohamed Yassin]

السياحه جايه من تسييح

 

[Awan Elward]

معبد الكرنك بس احتار اليوم اللى فيه الصوت والضوء بالعربي عشان تقضي اليوم هناك ...تروحوا بدرى شوية مثلا العصر عشان تلفوا المعبد و تتصوروا وتتفرجوا على الاثار وتقريبا الصوت والضوء بيبتدي 7 على مااتذكر وبتقطعله تذاكر تانى وبتخرجوا بره وتستنوا بداية الصوت والضوء بيعرفك بأه على كل مكان في المعبد وغالبا الموضوع حياخد يوم لان المشي كتير جوه والجو حر
المنطاد بس لو فيه اطفال ماينفعش وبردو سعره غالى كان ب 800 ج الفرد وبتبقي بالحجز والرحلة بتبتدى بدري قبل الشروق يعنى لو قررتوا تركبوه حاول تحجز الاول مع اى شركة للمنطاد او من خلال الفندق
معبد الاقصر حلو اوى و جانبه متحف التحنيط بس مادخلتوش بس يتزاروا مع بعض في نفس اليوم
السوق القديم هو صغير بس فيه محلات اكسسوارات وشنط وعطارة والحاجات دى لو عاوزين هدايا وده ممكن ترزحوه في اي يوم بالليل
اكتر مكان متعب هو البر الغربي بس ممتع ....ممكن تركبوا مركب يعديكوا للبر الغربي تقريبا كان ب 40 ج كمجموعة مع بعض لحسابكوا وبتنزلواهناك تتفقوا مع تاكسي او ميكروباص ع حسب العدد وبيفضل معاكوا تروحوا كذا مكان وادى الملوك وادى الملكات وكلها مقابر ونزولها متعب ووسط جبال والجو صعب اوى فلازم يكون معاكوا مياه كفاية و نضارات شمس ومعبد حتشبسوت و تماثيل مأمون دى كلها اماكن في البر الغربي قريبة نوعا ما من بعض بس لازم يبقي معاك تاكسي يوصلك بينهم وكل مكان بتذكرة طبعا ....وممكن تاخد من مكانك تاكسي يوصلك البر الغربي بس بياخد وقت طويل الاسهل تعدوا بمركب وتاخدوا مواصلة من هناك
نزهة نيلية طبعا ولما ترجعوا تركبوا حنتور يتمشي عالكورنيش شوية
عموما الاقصر كلها آثار بس هى بلد رخيصةةوهادية واهلها جدعان اوى
المنطقة اللى فيها محطة القطار فيها محلات الفسيخ والملوحة لو حابين تشتروا من هناك
في جزيرة الموز بس مالهاش لزوم مافيهاش حاجة مميزة يعنى غير انك بتروحها بمركب وتقعد فيها شوية تتمشي في شجر الموز وفيها تمساح وحيد كده والمركب بيستنى معاك يرجعك تانى
اهم شيء اى حركة يكون معاك مياه ساقعه كفاية وماتيلوش حاجة في ايديكوا شنط ضهر يكون افضل

 

[Mohamed Elezawy]

معبد الكرنك ومعبد الاقصر ومعبد حتشبسوت ومعبد هابو بس خلى بالك من الشمس لازم يكون معاك شمسية